Category: کراچی

سندھ کے صوبائی وزیراطلاعات،سینئر وزیر شرجیل انعام میمن نے کہا ہے کہ حقائق کے منافی، نفرت پر مبنی بیانات اور سوشل میڈیا کے سستے نعروں سے تاریخ نہیں بدلی جا سکتی،

سینئر وزیر سندھ شرجیل انعام میمن کا کہنا تھا کہ کراچی کے مسائل سے پیپلز پارٹی نہ کبھی غافل رہی ہے اور نہ آج ہے، پانی، سیوریج، سڑکیں اور انفرااسٹرکچر وہ مسائل ہیں جنہیں سابقہ نام نہاد شہری حکومتوں کی دہائیوں کی غفلت نے جنم دیا،پاکستان پیپلز پارٹی ہی وہ واحد جماعت ہے جو عملی اقدامات کے ذریعے عوام کے زخموں پر مرہم رکھ رہی ہے،کے فور، سالڈ ویسٹ مینجمنٹ، بس سروسز، اور بڑے ترقیاتی منصوبے مسلسل حکومتی کاوشوں کا ثبوت ہیں،سندھ حکومت نے ہمیشہ وسائل کی منصفانہ تقسیم پر یقین رکھا ہے، کراچی کا پیسہ کراچی پر لگایا جا رہا ہے،سندھ کے سرکاری اسپتال نہ صرف جدید سہولیات فراہم کر رہے ہیں بلکہ ان کا ماڈل دیگر صوبوں کے لیے مثال بن رہا ہے، پیپلز پارٹی نے ہمیشہ وفاق کی مضبوطی، صوبائی خودمختاری اور عوامی فلاح کو مقدم رکھا ہے،سندھ کے باشعور عوام جانتے ہیں کہ کون ان کی خدمت کر رہا ہے اور کون محض بیانات کی سیاست کے ذریعے اپنی ناکامیاں چھپا رہا ہے،

پاکستان پیپلزپارٹی کے چیئرمین بلاول بھٹو زرداری کی سربراہی میں سندھ حکومت کے صوبے سے باہر جاری عوامی فلاحی منصوبوں کے حوالے سے اجلاس ہوا

چیئرمین بلاول بھٹو زرداری کو سندھ حکومت کے صوبے سے باہر جاری تعلیم، صحت اور مفت رہائش کے منصوبوں پر بریفنگ دی گئی،بتایا گیا کہ بلوچستان کے ضلع صحبت پور میں سندھ پیپلز ہاؤسنگ کے تحت ساڑھے چار ہزار متاثرین کو گھر بناکر دئیے جارہے ہیں، گوجر خان، بھیرہ، رحیم یار خان، ڈیرہ اسماعیل خان اور مظفرگڑھ میں SIUT کے تحت اسپتالوں کی تعمیر کی جارہی ہے تاکہ پنجاب اور خیبرپختونخوا میں بھی گردوں کے جدید علاج کی سہولیات میسر آسکیں، ضلع مالاکنڈ کے علاقے بٹ خیلہ میں گرلز کالج اور خواتین کے لیے ووکیشنل ٹریننگ سینٹر کی تعمیر کی جارہی ہے، ملتان میں بہاؤالدین زکریا یونیورسٹی کے قریب آئی ٹی پارک کا قیام عمل میں لایا جارہا ہے،بلاول زرداری نے ہدایت کی کہ پنجاب، بلوچستان اور خیبرپختونخوا کے عوام کی سہولت کے لئے سندھ حکومت اپنے منصوبوں کو جلد مکمل کرے،

علاوہ ازیں پاکستان پیپلزپارٹی کے چیئرمین بلاول بھٹو زرداری سے سندھ کے نئے آئی جی جاوید عالم اوڈھو نے بلاول ہاؤس میں ملاقات کی اور صوبے میں قیام امن کے حوالے سے اپنے لائحہ عمل سے متعلق بریفنگ دی

دریں اثنا پاکستان پیپلزپارٹی کے چیئرمین بلاول بھٹو زرداری سے سندھ کے وزیراعلی سید مراد علی شاہ نے بلاول ہاؤس میں ملاقات کی جس میں صوبے کی انتظامی و سیاسی صورت حال پر بات چیت کی گئی

سندھ حکومت نے خطرناک عمارتوں کو خالی کرانے اور گرانے کےلیے ترجیحی اقدامات کا فیصلہ کرلیا۔

سینئر وزیر سندھ شرجیل میمن کا کہنا ہے کہ غیر محفوظ عمارتوں کو فوری خالی کرایا جائے گا، جو غیرمحفوظ عمارتیں پہلے ہی خالی کی جا چکی ہیں انہیں گرایا جائے گا،شرجیل میمن نے ہدایت کی کہ متاثرہ رہائشیوں کی بحالی کو یقینی بنایا جائے، کراچی میں 588 انتہائی خطرناک عمارتوں میں سے 471 کا سروے اسسٹنٹ کمشنرز نے مکمل کرلیا ہے۔

دوسری جانب صوبائی وزیر بلدیات سید ناصر حسین شاہ نے کمشنر کراچی کے دفتر میں ایک اعلی سطحی اجلاس کی صدارت کی،اجلاس میں مخدوش عمارتوں کو جلد از جلد خالی کرانے اور جو خالی کرائی جا چکی ہیں انہیں منہدم کرنے اور متاثرہ افراد کی بحالی کے لئے ترجیحی اقدامات کرنے کا فیصلہ کیا گیا ،صوبائی وزیر نے کہا ہے کہ مخدوش عمارتوں کو خالی کرانے اور متاثرہ فراد کی بحالی کے لئے فوری نوعیت کی کوششیں کرنے کی ضرورت ہے تاکہ مکینوں کی زندگیوں کو محفوظ کیا جاسکے اور انہیں با عزت اور محفوظ رہائش فراہم کی جا سکے،کمشنر کراچی سید حسن نقوی نے صوبائی وزیر کو بریفنگ دی انہوں نے بتایا کہ اسسٹنٹ کمشنرز نے انتہائی 588 مخدوش عمارتوں میں سے 471 مخدوش عمارتوں کا جنرل سروے مکمل کرلیا ہے،سروے کے ذریعے ملکیت سمیت مکینوں اور یونٹس سے متعلق تمام ضروری معلومات جمع کر لی گئی ہیں،اجلاس میں 59 خالی کرائی گئی عمارتوں کے مکینوں کی بحالی کے لئے ترجییحی اقدامات کرنے کا فیصلہ کیا گیا۔

وزیر داخلہ محسن نقوی کا کہنا ہے کہ کراچی میں امن کے قیام کیلئے رینجرز نے تاریخ رقم کی، رینجرز کچے میں بھی ڈاکوؤں کا خاتمہ کررہی ہے۔

کراچی میں سندھ رینجرز ٹریننگ سینٹر میں پاسنگ آؤٹ پریڈ سے خطاب کرتے ہوئے وفاقی وزیر داخلہ محسن نقوی نے کہا کہ کراچی کے حالات ماضی سے بہت مختلف ہیں، کراچی عالمی سطح پر تجارتی مرکز بن چکا ہے، رینجرز کی کاوشوں سے کراچی میں حالات پہلے سے بہتر ہیں۔ کراچی میں امن کے قیام کیلئے رینجرز نے تاریخ رقم کی، سندھ رینجرز پولیس کے ساتھ مل کر کچے میں ڈاکوؤں کا خاتمہ کررہی ہے،پاکستان رینجرز سندھ اپنی پیشہ وارانہ صلاحیتوں اور اعلیٰ کارکردگی کی وجہ سے جانی جاتی ہے ، اس فورس نے ماضی میں امن قائم کر کے ایک تاریخ رقم کی ہے، مئی 2025 میں بھارت کے خلاف آپریشن بنیان المرصوص کے دوران پاکستان رینجرز سندھ نے افواجِ پاکستان کے شانہ بشانہ رہ کر ملک کا دفاع کیا۔ پاکستان رینجرز سندھ نے وطن کی حفاظت کے لیے لازوال قربانیاں دی ہیں

وزیر داخلہ محسن نقوی نے پہلی سندھ رینجرز پاسنگ آؤٹ پریڈ سے خطاب کرتے ہوئے تربیت مکمل کرنے والے اہلکاروں اور ان کے اہل خانہ کو مبارکباد دی۔ انہوں نے کہا کہ پاس آؤٹ ہونے والے جوان پاکستان کے لیے ایک قابل فخر ادارے کا حصہ بن رہے ہیں،

کراچی: جناح انٹرنیشنل ائیرپورٹ کراچی پر ایک غیر معمولی اور حیران کن انتظامی حکم نامہ سامنے آیا ہے، جس میں ایک ایف آئی اے افسر کو امیگریشن ایریا میں سیوریج، بیت الخلاء کی صفائی اور چوہوں کی نگرانی کی ذمہ داریاں سونپ دی گئی ہیں۔

ذرائع کے مطابق ڈپٹی ڈائریکٹر امیگریشن شہزاد اکبر کی جانب سے جاری کیے گئے تحریری آرڈر کے تحت اسسٹنٹ سب انسپکٹر منور مہدی کو کراچی ائیرپورٹ پر بطور ایڈمن انچارج سیوریج تعینات کیا گیا ہے، جو ایک نئی اور غیر روایتی پوسٹ تصور کی جا رہی ہے۔میڈیا رپورٹس کے مطابق آرڈر میں واضح کیا گیا ہے کہ نامزد افسر امیگریشن کے تمام بیت الخلاء اور سیوریج سسٹم کی صفائی ستھرائی کی نگرانی کا ذمہ دار ہوگا۔ اس کے ساتھ ساتھ افسر اس بات کا بھی پابند ہوگا کہ وہ ہر ایک گھنٹے بعد صفائی کی دستخط شدہ رپورٹ ڈپٹی ڈائریکٹر امیگریشن کو پیش کرے۔ اس نوعیت کی ذمہ داریاں نہ تو ایف آئی اے کے قواعد و ضوابط کا حصہ ہیں اور نہ ہی کسی تفتیشی یا امیگریشن افسر کے دائرہ اختیار میں آتی ہیں، جس پر ادارے کے اندر شدید سوالات اٹھائے جا رہے ہیں۔

مزید حیران کن طور پر آرڈر میں یہ بھی درج ہے کہ مذکورہ افسر اس بات کی نشاندہی کرے گا کہ امیگریشن ہال اور ڈپٹی ڈائریکٹر آفس میں موجود چوہے کس بیت الخلاء اور کن سیوریج لائنوں کے ذریعے آتے جاتے ہیں،افسر کو ہدایت دی گئی ہے کہ وہ چوہوں کی نقل و حرکت، راستوں اور ممکنہ نقصانات پر بھی رپورٹ مرتب کرے، جسے افسران کی جانب سے غیر سنجیدہ اور تضحیک آمیز اقدام قرار دیا جا رہا ہے۔اس غیر پیشہ ورانہ حکم نامے کے بعد ایف آئی اے کے افسران میں سخت اضطراب پایا جاتا ہے۔ ذرائع کے مطابق پہلے ہی آف لوڈنگ کے غیر واضح زبانی احکامات اور داخلی محکمانہ کارروائیوں کا سامنا کرنے والے افسران اس آرڈر کو اپنی مزید تذلیل کے مترادف قرار دے رہے ہیں۔کئی افسران کا کہنا ہے کہ ایک قانون نافذ کرنے والے ادارے کے افسر کو صفائی اور سیوریج کی نگرانی پر لگانا نہ صرف اختیارات کے ناجائز استعمال کے زمرے میں آتا ہے بلکہ اس سے ادارے کا وقار بھی مجروح ہو رہا ہے۔