Category: کراچی

وزیراعلیٰ سندھ سید مراد علی شاہ سے 27 سالہ بینائی سے محروم نوجوان ارل حسین نے ملاقات کی، جس نے 2024ء کی بیچ میں سی ایس ایس امتحان پاس کرکے فارن سروس گروپ حاصل کیا۔ وزیراعلیٰ سندھ نے ارل حسین کی کامیابی کو صوبے کے لیے فخر قرار دیتے ہوئے کہا کہ "ارل حسین نے یہ ثابت کر دیا ہے کہ اگر عزم مضبوط ہو تو کوئی محرومی انسان کے راستے کی رکاوٹ نہیں بن سکتی۔”

ملاقات کے دوران وزیراعلیٰ مراد علی شاہ نے کہا کہ حکومتِ سندھ خصوصی افراد کے لیے تعلیم، تربیت اور روزگار کے بہتر مواقع فراہم کرنے کے لیے پرعزم ہے۔ اُنہوں نے کہا کہ "میں چاہتا ہوں کہ انکلوژو سٹی (Inclusive City) اور دیگر اداروں کے تعاون سے خصوصی بچوں کو اعلیٰ تعلیم حاصل کرنے کے لیے ہر ممکن سہولت دی جائے، تاکہ وہ بھی قومی ترقی میں اپنا بھرپور کردار ادا کرسکیں۔”وزیراعلیٰ سندھ نے ارل حسین کی ہمت، محنت اور جذبے کو سراہتے ہوئے کہا کہ اُن کی کامیابی نوجوانوں کے لیے ایک حوصلہ افزا مثال ہے۔ اُنہوں نے کہا، "مجھے پورے صوبے بلکہ پورے ملک سے ایسے لوگوں کا ساتھ چاہئے جو خصوصی افراد کی ترقی، تعلیم اور برابری کے مواقع کے لیے مخلص جذبے کے ساتھ کام کرنا چاہتے ہیں۔”

ارل حسین نے وزیراعلیٰ سندھ کا شکریہ ادا کرتے ہوئے کہا کہ حکومت کی معاونت اور اہلِ خانہ کے حوصلے نے اُنہیں کامیابی کے اس مقام تک پہنچایا۔ اُن کا کہنا تھا کہ وہ پاکستان کی خدمت کے لیے اپنی تمام صلاحیتیں بروئے کار لائیں گے۔ذرائع کے مطابق ارل حسین کا تعلق سندھ کے ایک متوسط گھرانے سے ہے، اور وہ بچپن سے ہی بینائی سے محروم ہیں۔ تاہم، اُنہوں نے تعلیم کے میدان میں ہمت نہ ہاری اور اپنی محنت و عزم سے وہ کارنامہ انجام دیا جو کئی مکمل بینائی رکھنے والے افراد بھی نہیں کر پاتے۔

وزیراعلیٰ سندھ نے ملاقات کے اختتام پر ارل حسین کے لیے نیک خواہشات کا اظہار کرتے ہوئے اُنہیں خراجِ تحسین پیش کیا اور ہدایت دی کہ صوبے میں خصوصی افراد کے لیے مزید تعلیمی مواقع پیدا کرنے کی حکمتِ عملی پر جلد عمل درآمد کیا جائے۔

کراچی ٹریفک پولیس کے سربراہ ڈی آئی جی ٹریفک پیر محمد شاہ کے زیرِ استعمال سرکاری گاڑی کا بھی ای چالان کر دیا گیا۔ ذرائع کے مطابق یہ چالان گارڈن کے قریب ٹریفک قوانین کی خلاف ورزی پر کیا گیا تھا۔

ڈی آئی جی ٹریفک پیر محمد شاہ نے خود اس واقعے کی تصدیق کرتے ہوئے بتایا کہ چالان اُس وقت ہوا جب گاڑی ڈرائیور چلا رہا تھا۔ انہوں نے کہا کہ "گاڑی کا 10 ہزار روپے کا چالان سیٹ بیلٹ نہ پہننے کی خلاف ورزی پر ہوا ہے، اور میں یقیناً یہ چالان اپنی جیب سے ادا کروں گا۔”پیر محمد شاہ نے مزید بتایا کہ مذکورہ گاڑی سندھ پولیس کے سینٹرل پولیس آفس (CPO) کے پتے پر رجسٹرڈ ہے۔ ان کا کہنا تھا کہ چالان کے بعد انہوں نے ڈرائیور کو سخت ہدایت دی ہے کہ آئندہ ہر سفر کے دوران سیٹ بیلٹ لازمی استعمال کرے۔انہوں نے عوام کے لیے بھی پیغام دیتے ہوئے کہا کہ "ٹریفک قوانین سب کے لیے برابر ہیں ،قانون کی پاسداری ہر شہری کی ذمہ داری ہے، چاہے وہ عام شہری ہو یا پولیس افسر۔”

پیر محمد شاہ کے اس اقدام کو شہری حلقوں میں مثبت مثال کے طور پر دیکھا جا رہا ہے، کیونکہ انہوں نے نہ صرف قانون کی خلاف ورزی تسلیم کی بلکہ خود احتسابی کا مظاہرہ بھی کیا۔ٹریفک پولیس کے مطابق کراچی میں ای چالان مہم تیز کی گئی ہے تاکہ شہریوں میں ٹریفک قوانین کی پابندی کا رجحان بڑھایا جا سکے۔

سندھ کابینہ کی ذیلی کمیٹی برائے کفایت شعاری کا سندھ کے سینئر وزیر شرجیل انعام میمن کی صدارت اہم اجلاس ہوا

اجلاس میں صوبائی وزیر بلدیات سید ناصر حسین شاہ، وزیر برائے ایکسائز و ٹیکسیشن مکیش کمار چاولہ، وزیر برائے داخلہ، قانون و پارلیمانی امور ضیاء الحسن لنجار، وزیر برائے جیل خانہ جات و ورکس اینڈ سروسز علی حسن زرداری، متعلقہ محکموں کے سیکریٹریز اور اعلیٰ افسران شریک ہوئے،اجلاس میں مختلف محکموں کی جانب سے سرکاری گاڑیوں (وہیکلز) کی الاٹمنٹ اور استعمال سے متعلق تفصیلی جائزہ پیش کیا گیا،کمیٹی نے وزارتِ قانون، پارلیمانی امور، بلدیات، داخلہ، اطلاعات، اینٹی کرپشن، اور یونیورسٹیز اینڈ بورڈز کے لیے نئی گاڑیوں کی خریداری، ضرورت، اور مالی اثرات پر تفصیلی تبادلہ خیال کیا،شرجیل میمن کا کہنا تھا کہ کابینہ نے کفایت شعاری کے اصولوں کو اپنی پالیسی کا بنیادی حصہ بنایا ہے، سرکاری گاڑیوں کی خریداری، مرمت، اور استعمال کے تمام مراحل میں شفافیت یقینی بنائی جائے گی، جن محکموں کو گاڑیوں کی اشد ضرورت ہے، انہیں سہولت دی جائے گی، غیر ضروری اخراجات سے گریز ناگزیر ہے، وزیراعلیٰ سندھ کی ہدایت کے مطابق تمام محکموں کو اپنے اخراجات میں کمی اور مالی نظم و ضبط پر عملدرآمد یقینی بنانا ہوگا، ہر محکمے کی موجودہ گاڑیوں کی تعداد، حالت، اور ضرورت کے بارے میں مکمل رپورٹ پیش کی جائے تاکہ ضرورت کی بنیاد پر فیصلے کئے جا سکیں، سرکاری گاڑیوں کے ذاتی استعمال یا غیر مجاز مقاصد کے خلاف سخت کارروائی عمل میں لائی جائے،تمام گاڑیوں کا ڈیجیٹل ریکارڈ تیار کیا جائے تاکہ نگرانی مؤثر اور شفاف بنائی جا سکے،

سندھ ہائیکورٹ نے کراچی میں ایئرپورٹ کے قریب غیرملکیوں پر خودکش حملے میں سہولت کاری کے کیس میں گرفتار ملزمہ گل نساء کی درخواست ضمانت مسترد کردی۔

پراسیکیوشن کے مطابق ملزمہ پر جناح انٹرنیشنل ایئرپورٹ کے قریب غیرملکیوں پر خودکش حملے میں سہولت کاری کا الزام ہے، ملزمہ خودکش حملہ آور شاہ فہد کے حب سے کراچی میں داخلے کے وقت گاڑی میں ساتھ بیٹھی تھی،ملزمہ کے وکیل شوکت حیات ایڈووکیٹ کا کہنا ہے کہ ملزمہ کے خلاف کوئی شواہد نہیں ہیں، ملزمہ کے کسی کالعدم تنظیم سے تعلق کے بھی شواہد نہیں ہیں،عدالت میں وکیل صفائی نے کہا کہ سی سی ٹی وی فوٹیج میں نظر آنے والی خاتون گل نساء نہیں ہے،پراسیکیوشن کا کہنا تھا کہ کیس میں سہولت کاری کے الزام میں ملزم جاوید بھی گرفتار ہے۔

واضح رہے کہ 6 اکتوبر کے خود کش حملے میں 2 چینی شہری ہلاک ہوگئے تھے۔

وزیراعلیٰ سندھ سید مراد علی شاہ کی زیرِ صدارت گھوٹکی–کندھ کوٹ پل منصوبے کی پیش رفت سے متعلق ایک اہم اجلاس وزیراعلیٰ ہاؤس کراچی میں منعقد ہوا۔ اجلاس میں صوبائی وزیر داخلہ ضیاء الحسن لنجار، وزیر ورکس اینڈ سروسز علی حسن زرداری، وزیراعلیٰ کے معاونِ خاص سید قاسم نوید، چیف سیکریٹری سید آصف حیدر شاہ، آئی جی سندھ غلام نبی میمن اور دیگر اعلیٰ افسران شریک ہوئے۔

اجلاس میں گھوٹکی–کندھ کوٹ پل منصوبے پر تفصیلی بریفنگ دی گئی۔ وزیراعلیٰ سندھ کو بتایا گیا کہ یہ منصوبہ پبلک پرائیویٹ پارٹنرشپ (PPP) کے تحت تعمیر کیا جا رہا ہے اور اس کی تکمیل سے سندھ، پنجاب اور بلوچستان کے درمیان تجارتی و معاشی روابط میں نمایاں بہتری آئے گی۔وزیراعلیٰ مراد علی شاہ نے اجلاس سے خطاب کرتے ہوئے کہا کہ "گھوٹکی–کندھ کوٹ پل ایک تاریخی اور نمایاں منصوبہ ہے جو تینوں صوبوں کے عوام کو قریب لائے گا اور علاقائی ترقی و ہم آہنگی میں سنگ میل ثابت ہوگا۔”انہوں نے مزید کہا کہ ماضی میں سیکیورٹی خدشات کے باعث منصوبے پر کام سست روی کا شکار رہا، تاہم اب امن و امان کی صورتحال بہتر ہو چکی ہے، لہٰذا منصوبے پر کام کی رفتار میں تیزی لائی جائے۔ وزیراعلیٰ نے ورکس اینڈ سروسز ڈیپارٹمنٹ کو ہدایت دی کہ "مجھے گھوٹکی–کندھ کوٹ پل کا کام تیز رفتاری سے چاہیئے اور 2026ء کے آخر تک منصوبہ مکمل ہونا چاہئے۔”

بریفنگ میں بتایا گیا کہ گھوٹکی–کندھ کوٹ پل 12.15 کلومیٹر طویل ہوگا، جو ملک کی سب سے بڑی برج (Bridge) قرار پائے گا۔ گھوٹکی کی جانب سے 10.4 کلومیٹر اور کندھ کوٹ کی سمت سے 8.1 کلومیٹر تک رسائی سڑکیں تعمیر کی جا چکی ہیں، جبکہ جاڑی واہ، گھوٹکی فیڈر کینال اور طبی مائنر پر پل بھی مکمل ہو چکے ہیں۔مزید بتایا گیا کہ منصوبے کے لیے 38 پائپ کلورٹس کی تعمیر بھی مکمل کر لی گئی ہے۔ صوبائی وزیر ورکس اینڈ سروسز علی حسن زرداری نے اجلاس میں آگاہ کیا کہ منصوبہ PPP موڈ پر تعمیر ہو رہا ہے اور ابتدائی منصوبے کے مطابق 2028ء میں مکمل ہونا تھا، تاہم وزیراعلیٰ کی ہدایت کے بعد اسے 2026ء کے آخر تک مکمل کرنے کی کوشش کی جائے گی۔

وزیراعلیٰ سندھ نے متعلقہ محکموں کو حکم دیا کہ "کانٹریکٹر نومبر کے پہلے ہفتے سے پل پر دن رات کام شروع کرے اور باقاعدگی سے پیش رفت رپورٹ پیش کرے۔”انہوں نے زور دیا کہ اگر تعمیراتی عمل بغیر کسی تعطل کے جاری رکھا گیا تو پل 2026ء میں ہی مکمل کیا جا سکتا ہے، جو نہ صرف سندھ بلکہ پورے ملک کے لیے ترقی اور رابطے کی نئی راہیں کھول دے گا۔