Category: کراچی

ہوٹل میں شلوار قمیض پہن کر جانے پر پابندی کے خلاف شہری کی درخواست قابل سماعت قرار دے دی گئی۔

کراچی کی کنزیومر کورٹ جنوبی میں ہوٹل میں شلوار قمیض پہن کر آنے پر پابندی کے خلاف دائر درخواست کی سماعت ہوئی،درخواست گزار نے مؤقف اختیار کیا کہ 18 مئی کو مقامی ہوٹل میں کھانا کھانےگیا، ویٹر نے بیٹھنے سےمنع کردیا، مینیجرکوشکایت کی تو اس نےشلوار قمیض کو چیپ ڈریسنگ قراردیا،دوران سماعت ہوٹل انتظامیہ نے مؤقف اپنایا کہ شلوارقمیض سمیت تمام دیگر لباس میں ملبوس افرادکا احترام کرتے ہیں اور ہوٹل میں ایسا کوئی واقعہ پیش نہیں آیا،ابتدائی سماعت میں ہوٹل انتظامیہ کا کہنا تھا کہ کیس کنزیومرکورٹ کے دائرہ اختیار میں نہیں آتا تاہم عدالت نےہوٹل کے خلاف درخواست قابل سماعت قراردیتے ہوئے اس پر اعتراضات مستردکردیے

وزیر محنت و افرادی قوت سندھ سعید غنی سے قومی ہیرو کوہ پیما اسد علی میمن نے ملاقات کی۔

صوبہ سندھ سے تعلق رکھنے والے معروف کوہ پیما اسد علی جنہوں نے دنیا کی بلند ترین چوٹی سر کرنے کے ساتھ ساتھ دنیا کے چھ براعظموں کی بلند ترین چوٹیوں کو سر کیا ہے، انہوں نے گذشتہ روز وزیر محنت و افرادی قوت سندھ سعید غنی سے ان کے دفتر میں ملاقات کی۔ کوہ پیما اسد علی میمن دنیا کی چھ براعظموں کی اونچی چوٹیوں کو سر کرنے کے بعد اب دنیا کے ساتویں براعظم کی اونچی ترین اوشنیہ کی چوٹی سر کرنے کے لئے پر اعتماد ہیں۔ اسد علی نے اپنے آنے والی مہم کی آفیشل کٹ بھی وزیر محنت سندھ سعید غنی کو پیش کی۔

اس موقع پر صوبائی وزیر سعید غنی نے سندھ دھرتی سے تعلق رکھنے والے اس بہادر نوجوان اسد علی کے لیے نیک خواہشات کا اظہار کیا اور کہا کہ ہم دعا گو ہیں کہ اسد علی پوری دنیا میں پاکستان کا نام بلند کرنے کے لیے تمام بلندیوں کو چھونے میں کامیاب ہو۔

سندھ ہائیکورٹ نے کم عمر بچی کے اغوا اور جبری شادی کے کیس میں لڑکی کو شوہر کیساتھ جانے کی اجازت دے دی،

سندھ ہائیکورٹ میں کوٹری کی رہائشی کم عمر بچی کے اغوا اور جبری شادی کے کیس کی سماعت ہوئی،اہلخانہ کے مطابق بچی کی عمر 12سال ہے،تاہم ملزم نے بچی کی نکاح نامے پر عمر 19برس ظاہر کروائی،بچی کے تمام دستاویزات بھی عدالت میں پیش کئے گئے،سرکاری وکیل نے عدالت کو بچی کے بیان سے آگاہ کیا کہ اس نے اپنی مرضی سے شادی کی ہے اوراپنے شوہر کے ساتھ رہنا چاہتی ہے ،عدالت نے بچی کو شوہر کے ساتھ جانے کی اجازت دے دی، جس پر بچی کے اہلخانہ کی جانب سے کمرہ عدالت میں شور شرابہ کیاگیا، بچی کے اغوا کا مقدمہ جامشورومیں درج کیاگیاتھا

میئرکراچی مرتضیٰ وہاب نے کہا ہے کہ اگر وہ پنجاب کے معاملے میں کچھ بولیں گے تو وزیراعلیٰ مریم نواز ناراض ہوجائیں گی۔

کراچی میں میڈیا سے گفتگو کرتے ہوئے مرتضیٰ وہاب نے کہا کہ کراچی انسٹی ٹیوٹ آف ہارٹ ڈیزیزمیں 2 ماہ میں فری لیبارٹری شروع کریں گے، اسپتال میں 2 ماہ میں ٹیسٹ مفت ہوں گے، کراچی کے لیے 20 ارب روپے کا لالی پاپ ناکافی ہے، وزیراعظم کراچی کے لیے 200 ارب روپے بھی خرچ کریں تو وہ بھی ناکافی ہیں، کراچی کے لیے آپ کمپنی بنادیتے ہیں اس پر اعتراض ہے، میں چاہتا ہوں کہ میرے شہر کو حقوق ملیں،پنجاب کے معاملے میں کچھ کہوں گا تو مریم بی بی ناراض ہوجائیں گی، مریم بی بی نے پانی کے مسئلے پر بات کی،کینال پر بات کی، پنجاب کے عوام اس وقت تکلیف میں ہیں، ہمارافرض ہے ان کی تکالیف دور کریں۔

مرتضیٰ وہاب کا مزید کہنا تھا کہ عوام کو الیکٹرک بس نہیں حالات میں بہتری چاہیے، پنجاب میں موٹروے بن گئی مگرکراچی میں موٹر وے نہیں بن پائی، بندرگاہ والا شہر کراچی آج بھی بنیادی سہولتوں سے محروم ہے، 15 سال کا پی ایس ڈی پی ریکارڈ نکال لیں، سب واضح ہو جائے گا۔

سندھ کے ضلع خیرپورمیں گیس اور خام تیل کے ذخائر دریافت ہوئے ہیں۔

ترجمان آئل اینڈ گیس ڈیولپمنٹ کمپنی لمیٹڈ کے مطابق خیرپور میں بترسِم ایسٹ-1کنویں سے یومیہ2کروڑ 25 لاکھ مکعب فٹ گیس حاصل ہوگی جب کہ دریافت سے یومیہ 690 بیرل خام تیل حاصل ہوگا،ترجمان نے بتایا کہ بترسِم ایسٹ-1 کنویں کی کھدائی 30جون 2025 کو شروع کی تھی، کنواں 3800 میٹر گہرائی تک کھودا گیا جس کے بعد ذخائر ملے،نئی دریافت سے ملکی توانائی کے ذخائر میں نمایاں اضافہ ہوگا، مقامی وسائل سے توانائی کی طلب و رسد میں فرق کم ہوگا جب کہ ملکی تیل اور گیس کے امپورٹ بل میں بھی نمایاں کمی ہوگی۔

پاکستان کے معروف کامیڈین ولی شیخ کے گھر کے باہر سے ان کی گاڑی چوری ہوگئی۔

سوشل میڈیا پلیٹ فارم فیس بک پر جاری ویڈیو بیان میں ولی شیخ نے بتایا کہ 30 ستمبر بروز منگل دوپہر 3:30 سے 4 بجے کے درمیان ملیر معین آباد فیز 3 میں موجود میرے گھر کے باہر سے میری سفید اور سیاہ رنگ کی گاڑی چوری ہوگئی ہے، گاڑی چوری کی شکایت کیلئے میں نے 15 پر کال کی تو کئی گھنٹے گزرنے کے باوجود مجھے کوئی رسپانس نہیں دیا گیا جس کے بعد میں نے خود تھانے جاکر شکایت درج کروائی تاہم، تھانے کی پولیس نے مجھے بہت اچھا رسپانس دیا،

ولی شیخ نے اپنے بیان میں سندھ حکومت سمیت دیگر قانونی اداروں سے اپیل کرتے ہوئے کہا کہ میں ایک بہت چھوٹا سا آرٹسٹ ہوں اور پیسے جمع کرکے گاڑی خریدی تھی لہٰذا اس گاڑی کو تلاش کرکے میرے سپرد کیا جائے اور جرائم پیشہ عناصر کیخلاف کارروائی کی جائے ،

کراچی کے علاقے نارتھ ناظم آباد بلاک ایل کے قریب نالے سے مرد کی سر کٹی لاش جبکہ گلستانِ جوہر کے علاقے پہلوان گوٹھ کے قبرستان سے ایک شخص کا سر ملا ہے۔

پولیس کے مطابق گزشتہ روز نارتھ ناظم آباد کے نالے سے ملنے والی لاش کی تاحال شناخت نہیں ہوسکی۔ لاش کو بوری میں ڈال کر نالے میں پھینکا گیا تھا،دوسری جانب گلستانِ جوہر کے علاقے پہلوان گوٹھ کے قبرستان میں پھینکے گئے ایک بیگ سے ایک شخص کا سر ملا ہے،ریسکیو ذرائع کے مطابق انسانی سر کو قانونی کارروائی کے لیے اسپتال منتقل کردیا گیا ہے،پولیس کا کہنا ہے کہ سر کٹی لاش اور انسانی سر ایک ہی شخص کا ہے یا الگ الگ، اس حوالے سے تفتیش کی جارہی ہے۔

وزیر اعلیٰ پنجاب مریم نواز کے بیان پر سندھ بارکونسل کی جانب سے احتجاج کیا گیا، سندھ بار کونسل نے وزیر اعلیٰ پنجاب مریم نواز سے بیانات واپس لینے اور معافی ما نگنے کا مطالبہ کیا ہے۔

سندھ بار کونسل کی جانب سے مریم نواز کے بیان پر آج ہڑتال اور عدالتی کارروائی کےبائیکاٹ کا اعلان بھی کیا گیا ہے۔واضح رہے کہ مریم نواز نے فیصل آباد میں تقریب سے خطاب میں مخالفین کو آڑے ہاتھوں لیتے ہوئے کہا تھا کہ میرا پانی میرا پیسا، کسی کو اس سے کیا تکلیف ہے، پنجاب کو مشورہ دینے والے اپنے مشورے اپنے پاس رکھیں۔مریم نواز کا کہنا تھا این ایف سی میں چاروں صوبوں کو ایک جیسے پیسے ملتے ہیں، آپ پیسے کہاں لگاتے ہیں؟ مانگنے والا سلسلہ اب بند ہو جانا چاہیے، پنجاب نے آپ کے معاملات میں کبھی مداخلت نہیں کی، آپ بھی نہ کریں، آپ کے پاس ہر چیز کا حل کشکول لیکر کھڑے ہو جانا ہے؟

علاوہ ازیں پاکستان پیپلزپارٹی نے وزیراعلیٰ پنجاب مریم نواز کے بیان پر قومی اسمبلی اور سینیٹ سے واک آؤٹ کیا۔قومی اسمبلی اجلاس میں نوید قمر نے اعتراض اٹھایاکہ یہ میرا پانی میرا پیسہ کا کیا مطلب ہے؟ مریم نواز کی تقریر پر بہت افسوس ہوا، پنجاب میں پہلی بار ایسا سیلاب آیا لیکن سندھ کو اس کا تجربہ ہے۔