Category: کراچی

سندھ ہائی کورٹ نے ایس بی سی اے کو رنچھوڑ لائن کی خطرناک قرار دی گئی عمارت سے متعلق ٹیکنیکل رپورٹ پیش کرنے کا حکم دے دیا۔

سندھ ہائی کورٹ میں رنچھوڑ لائن کی خطرناک قرار دی گئی عمارت گرانے کا معاملہ عمارت کے مالک زین العابدین و دیگر کی درخواست پر زیر سماعت آیا، جس میں عدالت نے ایس بی سی اے کو ٹیکنیکل رپورٹ پیش کرنے کا حکم دے دیا۔

جسٹس سید حسن اظہر رضوی نے سماعت کے دوران کہا کہ رنچھوڑ لائن پورا تباہ ہوچکا، کیا ایس بی سی اے کے پاس عمارت گرانےھ کے لیے بھی فنڈز نہیں ہیں؟ اب اس کام کےلیے بھی کسی این جی او کی مدد لیں گے؟

اس دوران مالکان نے عدالت کو بتایا کہ سندھ بلڈنگ کنٹرول اتھارٹی نے 2009 میں عمارت کو خطرناک قرار دیا تھا اور اب تک وہاں مختلف افراد رہائش پذیر ہیں لیکن ایس بی سی اے کارروائی نہیں کررہی۔

کورٹ ذرائع کے مطابق مالکان نے عدالت میں خواہش ظاہر کی کہ وہ چاہتے ہیں کہ سندھ بلڈنگ کنٹرول اتھارٹی خطرناک قرار دی گئی عمارت کو خود گرائے کیوں کہ اگر عمارت کود گرگئی اور جانی نقصان ہوا تو ملبہ ہم پر ڈالا جائے گا لہذا عدالت کی جانب سے ایس بی سی اے کو عمارت کو مسمار کرنے کی ہدایت دی جائے۔

کلفٹن شون سرکل کے قریب مسلح ملزمان نے ڈکیتی مزاحمت پر شہری کو قتل کردیا اور تقریباً 75 لاکھ روپے لوٹ کرفرار ہوگئے۔

تفصیلات کے مطابق کراچی میں ڈکیتی مزاحمت پرشہریوں کی جان لینا معمول بن گیا ، کلفٹن شون سرکل کے قریب مسلح ملزمان نے بینک سے نکلنے والے شخص سے لوٹ مار کی اور مزاحمت کرنے پر شہری کو گولیاں مار دیں جبکہ تقریباً 75 لاکھ روپے کی رقم لوٹ کرفرار ہوگئے۔

ایس پی کلفٹن ابریز عباسی نے بتایا مقتول قریبی بینک سے رقم نکال کر اپنے بھائی کے ہمراہ جا رہا تھا کہ انڈر پاس سے قبل ملزمان نے روکا اور مزاحمت پر فائرنگ کی۔

پولیس کا کہنا ہے کہ واقعہ سے متعلق مزید تفتیش کر رہے ہیں ، گاڑی کے اندر ابھی بھی کافی رقم موجودگی کی اطلاع ہے تاہم اس رقم کا تخمینہ بھی نہیں لگایا گیا۔

تفتیشی حکام کے مطابق مقتول کی جانب سے 3چیک کے ذریعے 75 لاکھ روپے کی رقم نکالی گئی ، رقم حصول کے دوران 2مشتبہ افراد بینک کے صوفوں پر براجمان رہے ، مشتبہ افراد کی سی سی ٹی وی فوٹیج بھی سامنے آگئی ہے۔

صدر کی موبائل مارکیٹ میں ڈکیتی کی بڑی واردات کے دوران ملزمان موبائل مارکیٹ ڈیلر سے 46 لاکھ کیش اور 77 لاکھ کے چیک لوٹ کر فرار ہوگئے۔

تفصیلات کے مطابق کراچی کے علاقے صدر میں پریڈی تھانے کی حدود میں ڈکیتی کی بڑی واردات ہوئی ، جہاں مسلح ملزمان موبائل مارکیٹ کے ڈیلر کو لوٹ کر فرار ہوگئے۔

پولیس نے بتایا ہے کہ واردات نجی کمیونی کیشن کےآفس میں 10 جنوری کی شام رپورٹ ہوئی، اس دوران ملزمان 46 لاکھ کیش اور 77 لاکھ کے چیک لے کر فرار ہوئے۔

پولیس نے واقعے کا مقدمہ پریڈی تھانے میں درج کرلیا ہے، جس میں کہا گیا ہے کہ شام 4 بجکر 35 منٹ پر چار مسلح ملزمان آفس میں داخل ہوئے تمام ملازمین پر تشدد کیا اور واردات کی46لاکھ نقدی اور 77 لاکھ روپے مالیت کے چیک لے گئے۔

واردات کی سی سی ٹی وی فوٹیج بھی سامنے آگئی ہے تاہم پولیس نے جلد ملزمان کی گرفتاری کی یقین دہانی کرادی ہے۔

شہر قائد میں کورونا کی شرح خطرناک حد تک بڑھ گئی اور مثبت کیسز کی شرح 20 فیصد تک جا پہنچی۔

تفصیلات کے مطابق کراچی میں کورونا کے تیزی سے پھیلاؤ کے باعث صورتحال بگڑنے لگی ، شہر میں 1223 مزید کیسز کے ساتھ کورونا کی شرح 20.22 فیصد ہوگئی۔

محکمہ صحت سندھ کا کہنا ہے کہ کراچی میں گزشتہ روز 6048 ٹیسٹ کیے گئے اور ایک دن کے دوران ایک ہزار سے زائد کیسز رپورٹ ہوئے۔

محکمہ صحت نے بتایا کہ کراچی میں اومیکرون ویرینٹ کی شرح 95 فی صد سے زائد ہو چکی ہے۔

دوسری جانب پنجاب کے صوبائی دارالحکومت لاہور میں کورونا کی شرح سات فیصد سے زائد ، اسلام آباد میں شرح ساڑھے 4فیصد سے زائد اور راولپنڈی میں بھی شرح 4 فیصد سے زائد ہوگئی ہے۔

یاد رہے گذشتہ روز کراچی میں اومی کرون کا تیزی سے پھیلاؤ کے پیش نظر وزیرصحت سندھ عذرا پیچوہوکی زیرصدارت اجلاس میں کراچی میں تمام شہریوں کیلئے ماسک پہننا لازمی قرار دیتے ہوئے غیرویکسین شدہ افراد کی موجودگی پر شاپنگ مالز اور اسکول سیل کرنے کا فیصلہ کیا گیا تھا۔

کیمیکل فیکٹری میں آتشزدگی سے لاکھوں روپے مالیت کا سامان جل گیا، شہر بھر کے فائر ٹینڈرز نے آگ بجھانے کی کارروائی میں حصہ لیا۔

تفصیلات کے مطابق کراچی کے علاقے شیرشاہ پراچہ چوک کے قریب کیمیکل فیکٹری میں آگ بھڑک اٹھی، فیکٹری میں آتشزدگی کی اطلاع ملنے پر ریسکیو اداروں کی ایمبولینس رضاکار مدد کو پہنچے جبکہ رینجرزکے جوانوں نے ریسکیوٹیموں کیساتھ آگ بجھانے میں حصہ لیا۔

فائربریگیڈحکام نے کیمیکل فیکٹری میں لگنے والی آگ کو تیسرے درجے کی قرار دیا اور بتایا آگ 9بجکر19منٹ پرلگی ، فیکٹری میں کیڑے مارادویات تیارکی جاتی تھیں۔

فائربریگیڈ نے شہربھرکے فائرٹینڈرزکی مدد سے آگ بجھانے کی کارروائی میں حصہ لیا اور رات نو بجے لگنے والی آگ پرفائربریگیڈ نے نوگھنٹے کی جدوجہد کے بعد قابو پایا۔

فائربریگیڈ حکام کا کہنا تھا کہ متاثرہ فیکٹری میں کولنگ کا عمل جاری ہے تاہم آتشزدگی کی وجوہات کا فوری طورپرتعین نہیں کیا جاسکا۔

حکام کے مطابق متاثرہ فیکٹری میں نقصان کا اندازہ لگانے کےلیے فائربریگیڈ اورپولیس نے تحقیقات شروع کردی ہے۔

سندھ ہائی کورٹ نے سابق کرکٹر دانش کنیریا کی ڈومسیٹک اور لیگ کرکٹ کھیلنے کی اجازت سے متعلق درخواست مسترد کردی۔

پاکستان کرکٹ ٹیم کے سابق گیند باز دانش کنیریا کی جانب سے سندھ ہائی کورٹ میں ڈومسیٹک اور لیگ کرکٹ کھیلنے اجازت کےلیے درخواست دی گئی تھی جس پر چیف جسٹس احمد علی شیخ کی سربراہی میں دو رکنی بینچ نے فیصلہ سنایا۔

کیس کی سماعت کے دوران پاکستان کرکٹ بورڈ کے وکیل نے عدالت کو بتایا کہ دانش کنیریا پر انگلش کاؤنٹی کلب نے تاحیات پابندی لگائی ہے جس کے بعد اسپاٹ فکسنگ کیس میں برطانوی عدالت نے بھی کرکٹر کی اپیل مسترد کی تھی۔

واضح رہے کہ سابق گیند باز دانش کنیریا نے گزشتہ برس دسمبر میں پی سی بی کے بحالی پروگرام میں شمولیت کی اجازت دینے کی استدعا کی تھی۔

عدالت میں دائر درخواست میں دینش کنیریا نے موقف اپنایا تھا کہ کرکٹ ہی میرا سب کچھ ہے کوئی دوسرا روزگار نہیں، کرپٹ ترین دیگر کھلاڑیوں کو بحالی پروگرام کا حصہ بنایا جا رہا ہے دیگر کو دوسرا موقع جبکہ مجھے نظر انداز کیا جا رہا ہے۔

دینش کنیریا کا کہنا تھا کہ پی سی بی میرا موقف آئی سی سی میں پیش کرے، ڈومیسٹک اور قومی کرکٹ کھیلنا چاہتا ہوں پی سی بی کو ڈومیسٹک کرکٹ اور کرکٹ کی اجازت دینے کا حکم دیا جائے