Category: کراچی

کراچی: میٹروویل میں شوہر نے فائرنگ کرکے بیوی کوقتل کردیا اور بعد میں خود کوبھی گولی مارلی۔

سائٹ ایریا کے علاقے میٹروویل میں فائرنگ سے میاں بیوی ہلاک ہوگئے، فائرنگ کے واقعے کی اطلاع ملنے پر پولیس موقع پر پہنچ گئی اور دونوں کی لاشوں کو تحویل میں لینے کے بعد ضابطے کی کارروائی کے لیے عباسی شہید اسپتال منتقل کردیا گیا ہے۔

پولیس کے مطابق متوفی رومان فرنٹینئر کانسٹیبلری سے ریٹائرڈ تھا اور اس کی متوفیہ سمیرا سے دوسری شادی تھی، ابتدائی تفتیش کے دوران فائرنگ کا واقعہ گھریلو جھگڑے کا شاخسانہ معلوم ہوتا ہے، شوہر نے پہلے فائرنگ کرکے بیوی کو قتل کیا اور اس کے بعد خود کو گولی مار کر خود کشی کرلی ہے تاہم اس حوالے سے مزید تفتیش جاری ہے۔

کراچی: معروف شاعرہ اور مصنفہ سیما غزل نے وزیر اعظم اور صدر پاکستان سے امریکا علاج میں تعاون کی اپیل کردی۔

ملک کی معروف شاعرہ اور مصنفہ سیما غزل پھیپڑوں کے مرض میں مبتلا ہیں۔ انہیں ناسازی طبعیت کی وجہ سے اسپتال منتقل کردیا گیا۔ سیما غزل نے امریکا میں علاج کے لیے صدر پاکستان عارف علوی اور وزیراعظم عمران خان سے تعاون کی اپیل کی ہے۔

انہوں نے درخواست کرتے ہوئے کہا میرے پھیپڑے ٹرانسپلانٹ ہوں گے، میرا علاج پاکستان میں ممکن نہیں۔ اگر ٹرانسپلانٹ نہ ہوئے تو میں موت کے منہ میں چلی جاؤں گی۔ مجھے امید ہے حکومت میرے ساتھ تعاون کرے گی۔

پاکستان فلم انڈسٹری کے درخشاں ستارے اور چاکلیٹی ہیرووحید مراد کو مداحوں سے بچھڑے 38 برس بیت گئے،لیکن اب بھی وہ اپنے چاہنے والوں کے دلوں میں زندہ ہیں۔چاکلیٹی ہیرو کے نام سے اپنے پرستاروں کے دلوں پر راج کرنے والے اداکار وحید مراد دو اکتوبر 1938 کو کراچی میں پیدا ہوئے۔ انہوں نے 1962میں فلم ہیرا اور پتھر سے کیرئیر کا آغاز کیا۔

وحید مراد نے فلموں میں اداکاری کے دوران ہئیر اسٹائل اور لباس کی صورت میں فیشن کی دنیا میں نئے رجحانات متعارف کروائے۔وحید مراد نے اپنے فلمی کیرئیر میں 150 فلموں میں بطور رومانوی کردار اداکاری کے جوہر دکھائے۔ ان کی مشہور فلموں میں ہیرا اور پتھر دل میرا دھڑکن تیری ، ارمان ، اندلیب ، مستانہ اور دیور بھابھی شامل ہیں۔شاندار اداکاری پر لیجنڈ اداکار وحید مراد کو لائف ٹائم اچیومنٹ ایوارڈ اور ستارہ امتیاز سے نوازا گیا۔ اپنے عروج کے دوران لاکھوں دلوں کو موہ لینے والا یہ اداکار صرف 45 برس کی عمر میں دنیا سے رخصت ہو گیا۔پاکستان فلم انڈسٹری کا ستارہ 23 نومبر 1983 میں ہمیشہ کیلئے رخصت ہو گیا ۔

کراچی : پی ٹی آئی رہنما لیلیٰ پروین پر وکلا کا مبینہ تشددسابقہ شوہر سمیت دیگرکے خلاف مقدمہ درج کر لیا گیا ۔

تفصیلات کے مطابق ملیر کورٹ میں پی ٹی آئی رہنما لیلیٰ پروین پر وکلا کے مبینہ تشدد کے واقعے کے خلاف ملیر سٹی تھانے میں مقدمہ درج کرلیا گیا ہے۔ مقدمے میں سابقہ شوہرعلی حسنین ایڈووکیٹ اور دیگر افراد کو نامزد کیا گیا ہے۔واضح رہے کہ لیلیٰ پروین کے سابق شوہر کے خلاف ان کے بھائی نے بوگس چیک کا مقدمہ دائر کر رکھا تھا۔
‏ ملیر کورٹ میں وکلا نے وکیل کے خلاف مقدمہ درج کرانے پر پی ٹی آئی خاتون رہنما لیلی پروین کو بد ترین تشدد کا نشانہ بنا ڈالا۔ اور دھمکی دی کہ کسی وکیل کے خلاف مقدمہ درج کرنے سے پہلے اتنا ضرور سوچ لو کہ آنا عدالت ہی ہے ۔ ملیر کورٹ کے وکلاء نے کھلی طور پر بدمعاشیاں کیں کہ پی ٹی آئی خاتون کو کھلے عام تشدد کا نشانہ بنایا ۔
ملیر سٹی تھانے میں دائر مقدمے میں لیلیٰ پروین نے مؤقف اختیار کیا کہ پانچ سال قبل ان کی ایک شخص کے ساتھ شادی ہوئی تھی اور ان کا ایک ڈیڑھ سالہ بیٹا بھی ہے۔ تاہم رواں سال جون میں اُن کی طلاق ہو گئی تھی۔
لیلیٰ کے شوہر ایک وکیل ہیں اور کراچی بار کونسل کے رکن بھی ہیں۔
ایف آئی آر کے مطابق لیلیٰ کے سابق شوہر نے اُن (لیلیٰ) کے بھائی سے 65 لاکھ روپے قرضہ لیا تھا اور اس قرضے کی مد میں ایک چیک دیا تھا۔
چیک باؤنس ہونے کے بعد اُن کے بھائی نے لیلیٰ کے سابق شوہر کے خلاف مقامی تھانے میں مقدمہ درج کروایا اور 21 نومبر کو پولیس نے ملزم کو گرفتار کر لیا۔
لیلیٰ پروین بتاتی ہیں کہ 22 نومبر کو تفتیشی افسر ملزم کو ملیر کورٹ میں لے کر آئے اور وہ اپنے بھائی کے ساتھ ملیر کورٹ میں مقدمے کی پیروی کے سلسلے میں آئی تھیں۔
لیلیٰ کا دعویٰ ہے کہ جب وہ عدالت پہنچیں تو صبح پونے گیارہ بجے کورٹ میں موجود ملزم (ان کے سابقہ شوہر) کے کہنے پر ان کے چند ساتھی وکلا نے انھیں پستول دکھاتے ہوئے جان سے مارنے کی دھمکیاں دیں اور مقدمے کی پیروی نہ کرنے کو کہا جس پر انھوں نے انکار کیا۔
پی ٹی آئی رہنما نے پی ٹی آئی سے علیحدگی کا اعلان کر دیا ۔

کراچی : ترجمان کے الیکٹرک نے کہاہے کہ ملیر اور لیاری کے مختلف مقامات پر بلوں کی عدم ادائیگی کے باعث واجبات 2 ارب 90 کروڑ روپے سے تجاوز کر گئے ہیں۔ متعدد نوٹس اور یاددہانی کے باوجود بجلی کے بلوں کی ادائیگی نہیں کی گئی۔

ترجمان نے کہا کہ علاقہ نمائندوں کی باضابطہ تحریری یقین دہانی کے باوجود ادائیگاں نہیں کی گئیں۔

کے الیکٹرک مختلف علاقوں میں بلوں کی ادائیگی کے لئے منتظر ہے۔ نادہندگان کے خلاف کارروائی ناگزیر ہوگئی ہے۔انہوں نے کہاکہ ولی محمد روڈ، سینگولین، ایریا چاکیواڑہ اور ملحقہ علاقوں میں 45 کروڑ روپے سے زیادہ کے واجبات ہیں۔ ملیر پاک کوثر ٹائون، گیلان آباد، ای ون، ڈی ون ایریا اور ملحقہ علاقوں میں ایک ارب روپے سے زیادہ کے واجبات ہیں۔

کراچی : پاکستان رینجرز سندھ اورپولیس نے انٹیلی جنس معلو مات کی بنیاد پر مشترکہ کارروائی کرتے ہوئے کراچی ضلع ملیر کے علاقے سعدی ٹائون سے منشیات فروش ڈیلر / سپلائر ملزم میر زمان عرف مانا کو گرفتار کر لیا۔ ملزم کے قبضے سے اسلحہ اور منشیات بھی برآمد کر لی گئی ہے۔ترجمان رینجرزکے مطابق ابتدائی تفتیش کے دوران ملزم نے انکشاف کیا کہ وہ 1998 سے کراچی میں وسیع پیمانے پر منشیات فروشی اور چھوٹے منشیات فروشوں کو بھی منشیات سپلائی کرنے میں ملو ث رہا ہے۔

ملزم نے اعتراف کیا کہ وہ کوئٹہ سے مال بردار گاڑیوں کے ذریعے منشیات منگواتا رہا ہے اور کراچی کے مختلف علاقوں کوچی کیمپ، مدینہ کالونی، سہراب گوٹھ، واٹر پمپ، صفورہ گوٹھ اور سعدی ٹائون میں منشیات سپلائی کرتا رہا ہے۔ترجمان کے مطابق گرفتار ملزم کوبمعہ اسلحہ اور منشیات مزیدقانونی کاروائی کے لیے پولیس کے حوالے کردیا گیا ہے۔ترجمان رینجرز نے عوام سے اپیل کی ہے کہ وہ ایسے عناصر کے بارے میں اطلاع فوری طور پرقریبی رینجر ز چیک پوسٹ، رینجرز ہیلپ لائن 1101 یا رینجرز مددگار واٹس ایپ نمبر03479001111پر کال یا ایس ایم ایس کے ذریعے دیں۔آپ کا نام صیغہ راز میں رکھا جائے گا۔

کراچی : گورنر سندھ عمران اسماعیل نے پاکستان میں فروخت ہونے والے پیٹرول کو دنیا بھر میں ملنے والے پٹرول سے سستا ترین قرار دے دیا ۔

تفصیلات کے مطابق شہر قائد میں میڈیا سے گفتگو کرتے ہوئے انہوں نے کہا کہ ماضی کی حکومتوں کی جانب سے پٹرولیم مصنوعات پر ٹیکسز لگائے جاتے تھے لیکن ہماری حکومت نے کوئی نیا ٹیکس نہیں لگایا جس کی وجہ سے پاکستان سے سستا پیٹرول کسی ملک میں نہیں ملتا ۔
دوسری جانب پاکستان پیپلز پارٹی کی سینیٹر شیری رحمان کہتی ہیں کہ آنے والے ماہ میں حکومت پیٹرول کی قیمت میں بہت بڑا اضافہ کرنے جا رہی ہے ، انہوں نے سماجی رابطے کی ویب سائٹ ٹویٹر پر ٹویٹ کرتے ہوئے انہوں نے حکومت پر شدید تنقدی کی اور کہا کہ تباہی سرکار نے مہنگائی کی سونامی کا با ضابطہ اعلان کر دیا ہے ، حکومت نے بجٹ میں پیٹرولیم لیوی کا ہدف 610 ارب روپے رکھا تھا ، قیمتوں میں اضافے کے ساتھ اب پیٹرولیم لیوی بھی عوام سے وصول کی جائے گی۔
نے کہا کہ اب پیٹرول کی قیمت اضافے کے ساتھ ہر ماہ 4 سے 5 روپے فی لیٹر لیوی بھی عائد کی جائے گی ، آنے والے ماہ میں حکومت پیٹرول کی قیمت میں بہت بڑا اضافہ کرنے جا رہی ہے ، پہلے ہی ہفتہ وار مہنگائی کی شرح 18.34فیصد ہو چکی ہے ، حکومت کی نااہلی کی وجہ سے پاکستان کی معیشت اب آئی ایم ایف چلائے گی ، غربت اور بیروزگاری کی شرح مسلسل بڑھنے کے باوجود عوام پر مہنگائی کا بوجھ ڈالا جائے گا۔
واضح رہے کہ گذشتہ روز وفاقی مشیر خزانہ شوکت ترین نے کہا تھا کہ پیٹرول لیوی ہر مہینے 4 روپے بڑھائی جائے گی، پیٹرول لیوی کو 30 روپے تک لے کر جانا ہے ، آئی ایم ایف نے 700 ارب روپے کا ٹیکس لگانے کا مطالبہ کیا تھا، حکومت چھوٹے لوگوں کو ٹارگٹڈ سبسڈی فراہم کرے گی۔ انہوں نے وفاقی وزیر توانائی حماد اظہر کے ہمراہ پریس کانفرنس کرتے ہوئے کہا کہ آئی ایم ایف کے ساتھ معاہدہ طے پاگیا ہے، آئی ایم ایف کے ساتھ اسٹاف ایگریمنٹ کامیابی سے مکمل ہوا، آئی ایف پاکستان کو تقریباً ایک ارب ڈالر دے گا۔

کراچی میں چڑیا گھر میں کنٹریکٹر کی جانب سے جانوروں کو خوراک کی فراہمی بحال کر دی گئی۔کنٹریکٹر امجد محبوب کا اس حوالے سے کہنا ہے کہ چڑیا گھر انتظامیہ سے مذاکرات کے بعد خوراک بحال کی گئی۔

چڑیا گھر کی انتظامیہ نے فروری سے ادائیگی نہیں کی تھی جس پر گذشتہ روز خوراک کی سپلائی روکی گئی۔کنٹریکٹر نے مزید بتایا کہ آج چڑیا گھر کی انتظامیہ سے ملاقات میں معاملات طے پا گئے ہیں۔جس کی جانب سے واجبات کی ادائیگی دسمبر تک کرنے کی یقین دہانی کرائی گئی۔چڑیا گھر کے ڈائریکٹر خالد ہاشمی کا کہنا ہے کہ سوشل میڈیا پر زیر گردش نوٹس جعلی ہے،چڑیا گھر کے اسٹوریج روم میں خوراک کے ذخائر موجود ہیں۔واضح رہے کہ ٹھیکے دار نے بقایاجات کی عدم ادائیگی پر کراچی کے چڑیا گھر کے جانوروں کا کھانا بند کر کے نوٹس چسپاں کردیا تھا۔

کراچی کے چڑیا گھر میں جانوروں کا کھانا فراہم کرنے والے ٹھیکے دار نے بقایا جات کی ادائیگی نہ ہونے پر خوراک کی فراہمی بند کردی تھی۔

کے ایم سی کے محکمہ فنانس نے ٹھیکے دار کو فروری سے خوراک فراہمی کے بلز کی ادائیگی نہیں کی جس پر ٹھیکدار نے آج سے خوراک بند کرکے نوٹس چسپاں کردیا۔جس میں کہا کہ بقایا جات کی ادائیگی کرو ورنہ جانوروں کا کھانا فراہم نہیں کیا جائے گا۔چڑیا گھر کی انتظامیہ نے کہا تھا کہ چڑیا گھر کے راشن گوڈائون میں جانوروں کے لیے صرف چند دنوں کا کھانا موجود ہے ، خوراک کی فراہمی بند ہو جانے کے باعث سینکڑوں جانوروں کو خوراک کے مسائل کا سامنا ہوسکتا ہے۔ذرائع نے بتایاکہ صورتحال یہ رہی تو جانوروں کی زندگیوں کو خطرات لاحق ہوسکتے ہے ۔ایڈمنسٹریٹر کراچی مرتضی وہاب اور میونسپل کمشنر افضل زیدی تمام صورتحال سے بے خبر ہے۔

صوبہ سندھ کے دارالحکومت کراچی اور حیدر آباد میں دودھ کی قیمت کا تعین کردیا گیا، سرکاری تخمینہ ایسوسی ایشن کے اعلامیے کے ساتھ جاری کر دیا جائے گا۔

تفصیلات کے مطابق محکمہ لائیو اسٹاک سندھ نے کراچی میں دودھ کی فی لیٹر کاسٹ آف پروڈکشن 133 روپے فی لیٹر متعین کی ہے جبکہ حیدر آباد کے لیے دودھ کی فی لیٹر کاسٹ آف پروڈکشن 127 روپے فی لیٹر متعین کی گئی ہے۔

سرکاری تخمینہ ایسوسی ایشن کے اعلامیے کے ساتھ جاری کر دیا جائے گا۔

دوسری جانب ڈیری اینڈ کیٹل فارمرز کا کہنا ہے کہ دودھ کی قیمت ڈیری فارمرز کا منافع 26.60 روپے فی لیٹر شامل کر کے 159.60 روپے فی لیٹر اور 19 روپے فی لیٹر کرایہ، ہول سیلرز اور ملک ریٹیلرز کے منافع کے ساتھ 178.60 روپے فی لیٹر ہوگی۔

ایسوسی ایشن کا کہنا ہے کہ کمشنر کراچی نے اگر 24 تاریخ کو نوٹیفکیشن جاری نہ کیا تو دودھ کی قیمتوں میں ازخود اضافہ کردیں گے۔

ذرائع کا کہنا ہے کہ محکمہ لائیو اسٹاک نے عوامی نمائندگی کے بغیر ڈیری فارمرز کے لیے دودھ کی پیداواری لاگت تیار کی ہے، پیداواری لاگت میں صارفین کے حقوق کو مکمل نظر انداز کر دیا گیا اور مبینہ طور پر ڈیری فارمرز کی مرضی و منشا کے مطابق قیمت کا تعین کیا گیا۔

یاد رہے کہ ڈیری فارمرز عدالتی احکامات کے خلاف دودھ 94 روپے فی لیٹر کے بجائے 140 روپے فی لیٹر فروخت کر رہے ہیں، ڈیری فارمرز سنہ 2018 سے انتظامیہ کی مقرر کردہ قیمت سے زیادہ پر دودھ فروخت کر رہے ہیں۔