Category: کراچی

سندھ بھرمیں جونیئر اسکول ٹیچرز کی بھرتیوں کیلئے ہونے والے ٹیسٹ کے حیران کن نتائج سامنے آئے ، ایک فیصد امیدوار بھی ٹیسٹ پاس نہ کرسکے۔

تفصیلات کے مطابق سندھ بھرمیں جونیئر اسکول ٹیچرز کی بھرتیوں کے معاملے پر آئی بی اے سکھرنے ٹیسٹ کے نتائج جاری کردیے ہیں۔

نتائج میں بتایا گیا کہ سندھ بھرسےایک فیصد امیدوار بھی ٹیسٹ پاس نہ کرسکے ، صرف 0.78 فیصدامیدوارٹیسٹ پاس کرسکے، صوبے بھر سے ٹیسٹ میں ایک لاکھ 60ہزارامیدواروں نےشرکت کی تھی۔

وزیر تعلیم نے گزشتہ روز کابینہ اجلاس میں نتائج سے کابینہ کو آگاہ کیا۔

یاد رہے آئی بی اےسکھر نے جی ایس ٹی ٹیسٹ 13 سے 19ستمبر کو لینے اور پی ایس ٹی ٹیسٹ 19ستمبر سے 26ستمبر کو لینے کا اعلان کیا تھا۔

یاد رہے رواں سال مئی میں وزیر تعلیم سندھ سعید غنی نے کہ صوبے میں 37 ہزار اساتذہ بھرتی کرنے کا اعلان کرتے ہوئے کہا تھا کہ ہم نے نئے اساتذہ کی بھرتیوں کیلئے اشتہار دیا تھا، ہزاروں نوجوانوں نے ملازمت کیلئے اپلائی کیا ہے لیکن کورونا کی وجہ سے ٹیسٹ منعقد نہیں ہوسکے۔

جناح انٹرنیشل ایئر پورٹ کے قریب سول ایوی ایشن اتھارٹی کی زیر ملکیت دو ایکڑ سے زائد اراضی کی مبینہ منتقلی کی تحقیقات کا فیصلہ کیا گیا ہے۔

اس سلسلے میں فیڈرل انویسٹی گیشن ایجنسی (ایف آئی اے) نے اراضی منتقلی کی تحقیقات کیلئے 5 سی اے اے افسران کو آج طلب کرلیا ہے۔

اس حوالے سے ذرائع کا کہنا ہے کہ آج طلب کیے گئے 5 افسران سمیت11 افسران کو متعلقہ ریکارڈ کے ساتھ بیانات کے لئے 7 سے 9 ستمبر کے درمیان طلب کیا گیا تھا۔

مذکورہ 5افسران مقررہ تاریخ پر بیان ریکارڈ کرانے ایف آئی اے میں پیش نہیں ہوئے تھے، پیش نہ ہونے والوں میں سید محمد علی، ناصر شیخ، کاشف علی ہاشمی، حنیف اورکزئی اور زرین گل شامل ہیں۔

یاد رہے کہ ایف آئی اے میں جاری انکوائری کا معاملہ سال2001 میں دو ایکڑ سے زائد اراضی کی مبینہ منتقلی سے متعلق ہے۔

سرکاری اراضی کی مبینہ منتقلی تحقیقات میں طلب کئے جانے والوں میں ریٹائرڈ افسران سمیت حالیہ اعلیٰ عہدوں پر تعینات افسران بھی شامل ہیں۔

ذرائع کے مطابق طلب کیے جانے والے افسران اسٹیٹ ڈیپارٹمنٹ، کمرشل اور سی اے اے ہیڈکوارٹرز سمیت دیگر شعبوں سے تعلق رکھتے ہیں۔

محمکہ موسمیات نے کراچی میں آج شام موسلادھاربارش کی پیشگوئی کرتے ہوئے کہا ہے کہ مضافاتی علاقوں میں اربن فلڈنگ کاخطرہ موجودہے۔

تفصیلات کے مطابق محمکہ موسمیات نے کراچی میں آج اورکل شام کو موسلادھاربارش کا امکان ظاہر کرتے ہوئے کہا ہے کہ ہلکی اورتیزبارش مختلف علاقوں میں ہوگی تاہم مضافاتی علاقوں میں اربن فلڈنگ کاخطرہ موجودہے۔

ڈائریکٹرمحکمہ موسمیات نے بتایا کہ ہفتےکوموجودہ بارش کاسسٹم کمزورہوجائے گا تاہم 28ستمبر تک بارش کے نئےاسپیل کا امکان ہے، آنے والااسپیل موجودہ اسپیل سے زیادہ ہیوی ہوگا۔

کراچی کاموجودہ درجہ حرارت 28ڈگری سینٹی گریڈریکارڈ کیا گیا اور 7 کلومیٹر فی گھنٹے کی رفتار سے ہوائیں چل رہی ہے جبکہ آج دن میں درجہ حرارت 34 سے 36 ڈگری سینٹی گریڈ تک رہے گا۔

گذشتہ روز کراچی میں بارش کے دوران سڑکیں تالاب اور گلیاں دریا کا منظر پیش کرنے لگی ، ٹریفک جام کی وجہ سے لوگوں نے کو مشکلات کا سامنا کرنا پڑا۔

بارش ہوتے ہی کے الیکٹرک کے 250 سے زائد فیڈرز ٹرپ کر گئے ، جس کے باعث مختلف علاقوں میں بجلی کی فراہمی معطل ہوگئی۔

صوبہ سندھ کے حیدرآباد ریجن میں پینشن کی ہزاروں جعلی آئی ڈیز کے ذریعے تین ارب روپے نکالے جانے کا انکشاف ہوا ہے، نیب نے واردارت میں ملوث 4ملزمان کو گرفتارکرلیا۔

تفصیلات کے مطابق سندھ میں جعلی پنشن آئی ڈیز کے ذریعے3 ارب کی کرپشن کا انکشاف ہوا ہے، نیب کی ٹیم نے شہباز کالونی میں کارروائی کرکے چارافراد کو گرفتار کرلیا۔

اس حوالے سے ذرائع کا کہنا ہے کہ سال 2012 سے2017 کے 5 سال کے عرصے میں خزانہ آفس حیدرآباد سے مبینہ طور پر رقم منتقل کی گئی۔

ذرائع کے مطابق خزانہ آفس سے رقم جعلی پنشن آئی ڈیز میں منتقل کی گئی تین ارب کی کرپشن میں مجموعی طور پر محکمہ کے ملازمین سمیت پچاس افراد ملوث ہیں۔

محکمہ زراعت، تعلیم، خزانہ، صحت، پولیس سمیت 15 محکموں کے ملازمین ظاہر کرکے نجی افراد کو جعلی پینشن بلوں کی ادائیگی کی گئی۔ نیب حکام کے مطابق ہزاروں کی تعداد میں نجی افراد کو ریٹائرڈ سرکاری ملازم دکھا کر پنشن سمیت دیگر بلز کی ادائیگی کی گئی۔

تیز رفتار کار نے سگنل توڑ کر تین بچوں کو ٹکر ماری اور ڈرائیور موقع سے فرار ہوگیا۔کراچی کے علاقے ڈیفنس کے خیابان شجاعت اور خیابان شہباز کے سنگم پر کار سوار تین بچوں کو روند کر فرار ہوگیا۔ کار کی ٹکر سے بچے کئی گز دور جاگرے۔
بچے موٹر مکینک کی دکان پر کام کرتے تھے، جو چھٹی مل جانے کے بعد ایک موٹر سائیکل پر سوار اپنے گھر قیوم آباد جارہے تھے۔مخالف سمت سے سگنل توڑ کر آتی تیز رفتار کار نے زور دار ٹکر ماری۔ کار سوار نے بچوں کو روندنے کے بعد کار کو ریورس لیا اور جگہ بنا کر موقع سے بھاگ نکلا۔ اطلاع ملنے پولیس موقع پر پہنچی اور بچوں کو اٹھا کر اسپتال لے گئی۔

پاکستان پیپلز پارٹی منارٹی ونگ نے اپنے محبوب چیئرمین بلاول بھٹو زرداری کی 33 ویں سالگرہ کے موقع پر ابرہیم حیدری سے بلاول ہاو س تک شاندار ریلی نکالی۔ ریلی میں ہزاروں کی تعداد میں اقلیتی برادری کے افراد نے شرکت کی۔ رات دیر گئے ریلی کے اختتام پر بلاول ہاو س کے سامنے پی پی پی چیئرمین کی سالگرہ کا کیک کاٹنے کی تقریب منعقد کی گئی۔
تقریب میں صوبائی وزیر اقلیتی امور گیانچند ایسرانی، وزیر اعلی سندھ کے معاون خصوصی و پیپلز پارٹی سندھ کے جنرل وقار مہدی، وزیر اعلی سندھ کے معاون خصوصی پونجو مل بھیل ،ایم پی اے انتھونی نوید، نائب صدر منارٹی ونگ مکھی اودھا مل ، انفارمیشن سیکرٹری منارٹی ونگ کراچی ڈویڑن ڈاکٹر راکیش موتیانی و دیگر شریک ہوئے۔
تقریب میں چیئرمین کی سالگرہ کا کیک کاٹا گیا اور بلاول بھٹو زرداری کی درازی عمر کے لیے خصوصی دعا کی گئی۔

اس موقع پر خطاب کرتے ہوئے صوبائی وزیر اقلیتی امور گیانچند ایسرانی اور وزیر اعلی سندھ کے معاون خصوصی وقار مہدی نے کہا کہ پاکستان کی عوام کی امید صرف چیئرمین بلاول بھٹوزرداری ہیں۔انشاء اللہ اگلے وزیر اعظم بلاول بھٹو زرداری بنیں گے۔ انہوں نے کہا کہ پی ٹی آئی حکومت نے عوام کو دھوکا دیا ہے، عوام کو سنہرے خواب دیکھا کر ہر وعدے پر یو ٹرن لیا ہے۔ پی ٹی آئی کی غلط پالیسیوں کی وجہ سے مہنگائی اور بے روزگاری میں ریکارڈ اضافہ ہوا ہے۔ اب عوام چیئرمین بلاول بھٹو زرداری کی طرف دیکھ رہی ہے۔

کراچی کے ساحل پر پھنس جانے والے جہاز کا معاملہ، ہینگ ٹونگ جہاز ایک مشکل سے نکلا تو دوسری میں پھنس گیا، کراچی پورٹ کا جہاز کو کروڑوں روپے کے بل کی ادائیگی تک نکلنے کی اجازت دینے سے انکار۔ تفصیلات کے مطابق کراچی کے ساحل پر پھنسے بحری جہاز ہینگ ٹونگ کی معائنہ رپورٹ جاری کر دی گئی ہے، رپورٹ میں جہاز کو سی وردنیس اجازت نہ مل سکی۔
رپورٹ میں کہا گیا ہے کہ ہینگ ٹونگ جہاز کو کراچی پورٹ اور دیگر اداروں کے واجبات ادا کرنے کے بعد ہی لے جایا جا سکے گا، کے پی ٹی نے پورٹ چارجز کی مد میں 1 کروڑ 4 لاکھ 55 ہزار 6 سو 56 روپے کا بل بھی جاری کر دیا ہے۔ماہرین کے مطابق کمزور انجن کی وجہ سے جہاز کو سی وردنیس اجازت نہیں دی گئی ہے، پھنسے ہوئے بحری جہاز کو ٹو وردنیس رپورٹ جاری کی گئی ہے، سرٹیفکیٹ کے مطابق جہاز کو ٹو کر کے کراچی سے دبئی لے جایا جائے گا، اور جہاز کو ٹگ بوٹس کے ذریعے ہی کھینچ کر لے جایا جا سکے گا۔
رپورٹ کے مطابق آپریشنل چارجز 5 لاکھ 4 ہزار، ٹگس 12 لاکھ 9 ہزار، برتنگ چارجز 22 لاکھ 5 ہزار، سروس چارجز 22 لاکھ 5 ہزار، ہیوی مشنیری 20 لاکھ 25 ہزار روپے جہاز کا مالک اد کرے گا۔جہاز کا ڈھائی سو ڈالر یومیہ کرایہ بھی لے جانے سے پہلے ادا کرنا ہوگا۔یاد رہے کہ 2250 ٹن وزنی مال بردار بحری جہاز ایم وی ہینگ ٹونگ 77 بدھ 21 جولائی کی شام کو سمندر سے کراچی کے ساحل پر آنے کے بعد ریت میں دھنس گیا تھا، یہ جہاز 2011 میں تیار ہوا تھا۔
متعدد کوششوں کے بعد آخر کار 7 ستمبر کو اسے ساحل سے 5 میل سے زائد سمندر میں گھسیٹ کر لے جانے میں کامیابی حاصل کی گئی، اور جہاز کو ایس اے پی ٹرمینل میں برتھ نمبر1 پر لگا دیا گیا۔بحری جہاز ہینگ ٹونگ 77 کو نکالنے کیلئے ری فلوٹنگ آپریشن میں سالویج ماسٹر، 2کرین بارج ،دو ٹگس نے حصہ لیا تھا۔

شہر قائد میں کالی گھٹائیں چھاگئیں اور بارش سے موسم خوش گوار ہوگیا تاہم شدید بدانتظامی کے باعث سڑکیں پانی میں ڈوب گئیں۔
کراچی میں دوپہر کو دیکھتے ہی دیکھتے آسمان پر کالے بادل امڈ آئے جس کے بعد ابر رحمت برس اٹھا۔ بارش سے شہر میں گرمی کی شدت میں کمی واقع ہوئی اور شہریوں کے چہرے خوشی سے کھل اٹھے، شہر کے مضافاتی علاقوں سے شروع ہونے والا بارش کا سلسلہ وسطی علاقوں میں بھی پہنچ گیا اور کہیں ہلکی تو کہیں موسلادھار بارش ریکارڈ کی گئی۔
بارش کے بعد نکاسی آب کے مؤثر انتظامات نہ ہونے کے باعث شہر میں کئی علاقے زیر آب آگئے، سڑکوں اور گلیوں میں پانی کھڑا ہونے سے ٹریفک جام ہوگیا جس کی وجہ سے شہریوں کو شدید مشکلات کا سامنا کرنا پڑا، ناگن چورنگی، کارساز، فور کے چورنگی کے علاقوں میں اب بھی پانی جمع ہے۔
شہرِ قائد کے مختلف علاقوں میں بارش شروع ہوتے ہی بجلی غائب ہوگئی، متاثرہ علاقوں میں گلشنِ حدید، کھوکھراپار، میمن گوٹھ، شاہ لطیف ٹاؤن، بن قاسم، ملیر، سعود آباد، علیم آباد، غریب آباد، رزاق آباد، احسن آباد اور گلشن معمار، لیاقت مارکیٹ، معین آباد، شادمان، الفلاح، گرین ٹاؤن اور قائد آباد شامل ہیں۔ ذرائع کے الیکٹرک کے مطابق شہر کے کئی علاقوں میں بجلی حفاظتی بنیادوں پر بند کی گئی ہے، بارش بند ہونے اور تنصیبات کے گرد سے پانی کی نکاسی ہونے پر بجلی بحال کی جائے گی۔
محکمہ موسمیات کے مطابق اب تک سب سے زیادہ بارش سُرجانی میں 70 ملی میٹر ریکارڈ کی گئی جب کہ فیصل بیس 36، ناظم آباد 18، اولڈ ٹرمینل 14.2، جناح ٹرمینل 10.2، سعدی ٹاؤن 7.7، قائدآباد 5.5، یونیورسٹی روڈ 5.2 اور گلشنِ معمار میں 3.6 ملی میٹر بارش ریکارڈ کی گئی۔

محکمہ موسمیات کے ارلی وارننگ سینٹر کی جانب سے متوقع مون سون بارشوں کے حوالے سے جاری نئی ایڈوائزری کے مطابق مون سون سسٹم کے اثرات مشرقی سندھ میں داخل ہوگئے ہیں، کراچی، حیدرآباد، ٹھٹھہ، نواب شاہ، جیکب آباد، شکارپور، دادو اور جامشورو میں بارشیں 25 ستمبر تک جاری رہ سکتی ہیں۔

سندھ میں گرینڈ ڈیموکریٹ الائنس (جی ڈی اے) کو بڑا دھچکا لگ گیا، پیر پگاراکے قریبی ساتھیوں نے فنکشنل لیگ سے راہیں جدا کر لیں۔

پیپلزپارٹی کی رہنما فریال تالپور مہتاب اکبر راشدی کی رہائشگاہ پہنچ گئی، مسلم لیگ فنکشنل کی رہنما مہتاب اکبر راشدی اور اکبر راشدی نے پیپلزپارٹی میں شمولیت کا اعلان کر دیا۔

صوبائی وزراء سعید غنی، امتیاز شیخ اور سابق وزیر اعلی سندھ سید قائم علی شاہ بھی ہمراہ ہیں۔ مہتاب اکبر راشدی فنکشنل لیگ کے رکن سندھ اسمبلی بھی رہی ہیں۔ مہتاب اکبر راشدی کے شوہر اکبر راشدی پیر پگارا کے کزن ہیں۔