Category: لاہور

پیپلزپارٹی کے چیئرمین بلاول بھٹو زرداری نے کہا ہے کہ سیلاب متاثرہ علاقوں میں بہت تباہی نظرآرہی ہے اور ماننا چاہیے کہ وزیراعلیٰ پنجاب مریم نواز اور ان کی ٹیم بہت محنت کر رہی ہیں۔

بلاول بھٹو زرداری کا سیلاب متاثرہ علاقوں کا دورہ کیا اور گنڈا سنگھ والا بارڈر پر سیلاب متاثرین میں راشن کے تھیلے تقسیم کیےبلاول زرداری نے کسانوں اور سیلاب متاثرین سے گفتگو کی جبکہ سیلاب متاثرین اورکسانوں نے بلاول بھٹوکواپنے مسائل سے آگاہ کیا،چیئرمین بلاول بھٹو زرداری قصور کے سیلاب زدہ علاقہ تلوار پوسٹ پہنچے توگورنر پنجاب سردار سلیم حیدر،راجہ پرویز اشرف ،ندیم افضل چن،قمر مان کائرہ،سید حسن مرتضی شہزاد سعید چیمہ اور دیگر رہنما ان کے ہمراہ تھے،

پریس کانفرنس کرتے ہوئے بلاول کا کہنا تھاکہ حکومت کی طرف سے قصور میں ریلیف کیمپ قائم کیا گیا ہے آج میں نے قصور کا دورہ کیا ہے۔ اس سیلاب نے صوبہ پنجاب کو سب سے زیادہ نقصان پہنچایا ہے۔ وفاقی حکومت خاص طور پر پنجاب حکومت کا اس سیلاب کے ریلیف میں صفِ اول کا کردار ہے۔ سیلاب متاثرہ علاقوں میں بہت تباہی نظرآرہی ہے، وزیراعلیٰ پنجاب مریم نواز اور ان کی ٹیم بہت محنت کررہی ہیں، وفاقی حکومت کو بھی صوبائی حکومت کا ساتھ دینا چاہیے، صوبائی حکومت کے اکیلے بس کی بات نہیں کہ اتنی بڑی تباہی کا مقابلہ کرے، پنجاب میں سب سے زیادہ نقصان کسان کا ہوا ہے،سیلاب کے باعث پنجاب کے زرعی شعبے کو نقصان پہنچا ہے، پیپلزپارٹی کے رہنماؤں اورکارکنوں کو ہدایت کی ہے کہ سیلاب متاثرہ علاقوں میں عوام کی مدد کریں۔

بلاول کا کہناتھا کہ وزیراعظم سے اپیل ہے کہ زرعی ایمرجنسی ڈکلیئر کی جائے، کسانوں کو بیج اور کھاد میں ریلیف فراہم کیا جائے، بے نظیر انکم سپورٹ پروگرام کے ذریعے متاثرین کی مدد کی جائے، پنجاب میں سیلاب سے سب سے زیادہ کسانوں کو نقصان ہوا ہے، مودی سرکار نے عالمی قانون توڑ کر کہا کہ سندھ طاس معاہدے کو نہیں مانتا، اس مرتبہ بھارت ہمارے ساتھ سندھ طاس معاہدے کے تحت ڈیٹا شیئر نہیں کررہا، بھارت کومجبور کریں گے کہ عالمی قوانین کی پاسداری کرے ، پانی کے ساتھ جو دہشتگردی کررہے ہیں یہ پاکستانی عوام کو نشانہ بنارہے ہیں، بھارت سندھ طاس معاہدے کو مانے یا ہمارے دریا واپس کرے۔

حکومتِ پنجاب نے صوبے بھر میں گندم، آٹے اور روٹی کی بلاتعطل فراہمی یقینی بنانے کیلئے دفعہ 144 کا نفاذ کردیا۔

صوبے بھر کی فیڈ ملز میں گندم کے استعمال پر پابندی عائد کردی گئی ہے،محکمہ داخلہ کے ترجمان کے مطابق سیکریٹری داخلہ کے حکم نامے کے مطابق گندم صرف فلور ملز میں آٹا بنانے کیلئے استعمال ہوگی، حکومتِ پنجاب نے صوبے میں گندم کی ممکنہ قلت کے خدشات کے پیشِ نظر اہم فیصلہ کیا ہے،ترجمان کا کہنا ہے کہ پنجاب میں فیڈ ملز کے پاس 1 لاکھ 4 ہزار 184 میٹرک ٹن گندم کا ذخیرہ موجود ہے، سیکریٹری پرائس کنٹرول کی رپورٹ کے مطابق فیڈ ملز گندم کو مرغیوں کے دانے کیلئے استعمال کرنے والی تھیں۔

ترجمان کے مطابق گندم انسانوں کی بنیادی خوراک ہے جسے آٹے کی تیاری میں استعمال ہون اچاہیے، پنجاب میں فیڈ ملز پر 30 یوم کیلئے گندم کے استعمال پر پابندی عائد کی گئی ہے۔

پنجاب میں قصور اور لاہور سمیت گردونواح کے علاقے حالیہ سیلاب کی بدولت شدید متاثر ہوا ہے

پاک فوج اور مقامی انتظامیہ کا دریائے ستلج اور راوی میں سیلاب متاثرہ علاقوں میں مشترکہ ریسکیو اینڈ ریلیف آپریشن جاری ہے،تمام متعلقہ محکمے دن رات سیلاب متاثرین کی خدمت میں مصروف عمل ہیں ،فلڈ ریلیف کیمپس میں پاک فوج کی جانب سے فری میڈیکل کیمپ بھی قائم کیے گئے ہیں،متاثرہ علاقوں میں پاک فوج کے جوانوں نے کشتیوں کے ذریعے درجنوں خاندانوں کو محفوظ مقامات پر منتقل کیا،فلڈ ریلیف کیمپس میں متاثرین کو خوراک، صاف پانی اور ادویات فراہم کی جا رہی ہیں

متاثرین کی جانب سے پاک فوج کے جوانوں کی قربانیوں اور جذبہ خدمت کو بھرپور خراج تحسین پیش کیا گیا،مشکل کی اس گھڑی میں پاک فوج عوام کے شانہ بشانہ کھڑی ہے

وزیراعلیٰ پنجاب مریم نواز شریف کی زیر صدارت ایک طویل اور اہم اجلاس منعقد ہوا، جس میں سیلاب متاثرین کی بحالی کے لیے فوری اور مؤثر اقدامات کا جائزہ لیا گیا۔

اجلاس میں فیصلہ کیا گیا کہ سیلاب سے متاثرہ علاقوں کے لیے ایک جامع بحالی پیکیج تیار کیا جائے گا، جس کے تحت متاثرہ خاندانوں کو فوری ریلیف اور طویل المدتی سہولیات فراہم کی جائیں گی،مریم نواز شریف نے اربن یونٹ، بورڈ آف ریونیو اور دیگر متعلقہ محکموں کو فوری طور پر بحالی پیکیج پر کام شروع کرنے کی ہدایت کی۔ انہوں نے واضح کیا کہ سیلاب متاثرین کی مشکلات پر ہمدردی کے ساتھ غور کیا جائے اور امدادی رقوم میں اضافہ کیا جائے تاکہ ان کی بحالی میں کوئی کمی نہ رہے،وزیراعلیٰ نے سیلاب سے متاثرہ کاشتکاروں کے لیے بھی الگ بحالی پروگرام ترتیب دینے کی ہدایت دی۔ انہوں نے سروے کے عمل کو جلد از جلد مکمل کرنے اور اس میں شفافیت برقرار رکھنے کے لیے ڈیجیٹل ریکارڈنگ کے استعمال پر زور دیا۔ اس مقصد کے لیے ایک اعلیٰ سطحی کمیٹی بھی قائم کر دی گئی ہے جو اس سروے پراجیکٹ کی نگرانی کرے گی۔

اجلاس میں فیصلہ کیا گیا کہ وہ خاندان جو اپنے گھروں کی تباہی کے باعث فوری طور پر واپس نہیں جا سکتے، ان کے لیے ہر ضلع میں عارضی طور پر مارکیز قائم کی جائیں گی۔ ان مارکیز میں مرد و خواتین کے لیے الگ الگ رہائش، صاف پانی، کھانے اور دیگر بنیادی سہولیات کی فراہمی یقینی بنائی جائے گی۔ وزیراعلیٰ نے خاص طور پر سردی کے موسم کی آمد کے پیش نظر ان عارضی رہائشوں کی جلد تکمیل پر زور دیا،مریم نواز شریف نے دریاؤں، ندی نالوں اور دیگر آبی گزرگاہوں سے تجاوزات اور غیر قانونی آبادیاں ختم کرنے کا بھی فیصلہ کیا۔ اجلاس میں اس بات پر اتفاق کیا گیا کہ ان مقامات کو ریڈ زون قرار دیا جائے گا تاکہ آئندہ ایسی قدرتی آفات سے بچا جا سکے۔متاثرین کی مستقل رہائش کے لیے "اپنی چھت، اپنا گھر” پروگرام میں ان کی شمولیت کا بھی فیصلہ کیا گیا ہے، جس کے ذریعے انہیں اپنے گھروں کی تعمیر کے لیے امداد فراہم کی جائے گی۔

وزیراعلیٰ نے کہا کہ وہ اس وقت تک چین سے نہیں بیٹھ سکتیں جب تک سیلاب متاثرہ خاندان اپنے گھروں میں آباد نہ ہو جائیں۔جب وہ سیلاب زدہ علاقوں کا دورہ کرتی ہیں تو لوگوں کی پریشانی ناقابلِ برداشت ہوتی ہے۔ انہوں نے کہا کہ لوگ بے گھر ہو چکے ہیں، ایسے میں حکومت کے لیے سکون سے بیٹھنا ممکن نہیں،انہوں نے مزید کہا کہ سیلاب متاثرین کی بہت سی امیدیں ان سے وابستہ ہیں، اور ان امیدوں پر پورا اترنا ان کے لیے باعث فخر بھی ہے اور ذمہ داری بھی۔ مریم نواز نے اس بات پر زور دیا کہ پنجاب کو فلڈ اور دیگر قدرتی آفات سے بچانے کے لیے ایک جامع ماسٹر پلان کی اشد ضرورت ہے، تاکہ ہر سال ہونے والے نقصان سے مستقل طور پر بچا جا سکے۔ اس مقصد کے لیے طویل المدتی اور قلیل المدتی پائیدار پالیسیوں کی تشکیل ناگزیر قرار دی گئی۔

پی ڈی ایم اے پنجاب نے مون سون بارشوں کے 10 ویں اسپیل کا الرٹ جاری کردیا۔

پی ڈی ایم اے پنجاب نے 6 سے 9 ستمبر تک صوبے کے بیشتر اضلاع میں طوفانی بارشوں کی پیشگوئی کی ہے اور کچھ علاقوں میں فلش فلڈنگ کا خدشہ بھی ظاہر کیا ہے۔ ترجمان پی ڈی ایم اے کے مطابق 10 ویں اسپیل میں راولپنڈی، مری، گلیات، اٹک، چکوال، جہلم،گوجرانولہ،لاہور اور سیالکوٹ میں بارشیں متوقع ہیں،اس کے علاوہ نارووال، حافظ آباد، اوکاڑہ، ساہیوال، قصور، سرگودھا اور میانوالی، ڈیرہ غازی خان، ملتان اور راجن پور میں بھی بارشوں کا امکان ہے،ترجمان پی ڈی ایم اے کے مطابق 7 سے 9 ستمبر کے دوران ڈیرہ غازی خان رودکوہیوں میں فلیش فلڈنگ کا بھی خدشہ ہے۔

دوسری جانب ڈی جی پی ڈی ایم اے پنجاب عرفان علی کاٹھیا کا کہنا ہے کہ دریائےچناب، راوی اور ستلج میں سیلابی صورتحال کا سامناہے جب کہ بڑے شہروں میں مون سون بارشوں کے باعث ندی نالے بپھرسکتےہیں۔