Category: لاہور

وفاقی ٹیکس محتسب ڈاکٹر آصف محمود جاہ نے کہا ہے کہ ادارہ لوگوں کی خدمت کے لیے سرگرم عمل اور مسائل جلد سے جلد حل کررہا ہے۔ وہ لاہور چیمبر آف کامرس اینڈ انڈسٹری میں ایف ٹی او کی سنٹرل ایڈوائزری کمیٹی کے اجلاس سے خطاب کر رہے تھے۔ لاہور چیمبر آف کامرس کے سینئر نائب صدر رحمن عزیز چن اور نائب صدر حارث عتیق ، ایف ٹی او ایڈوائزر احمد علی جوندہ اور سرفراز وڑائچ نے بھی اس موقع پر اظہارِ خیال کیا ۔

انہوں نے کہا کہ ڈیلی ویجز ملازمین کی آمدنی پر سے ٹیکس کٹوتی ختم کروائی۔ انہوں نے کہا کہ ایف بی آر کی جانب سے غیر متعلقہ نوٹس دیئے جانے والے 100سے زائد افراد کو ٹیئر 1سے نکلوایااور ایف بی آر کو ایسے نوٹس جاری کرنے والے افسران کے خلاف کاروائی کی ہدایت کی ہے۔انہوں نے کہا کہ شکایات رجسٹر کرانے کا آسان اور تیز حل متعارف کر رہے ہیںاور ٹیکس پیئرز کے مسائل کے فوری حل کے لئے حکمت عملی ترتیب دے رہے ہیں۔

انہوں نے کہاکہ ایکسکلوژن سرٹیفیکیٹ کے اجراءکا اختیار کمشنر کو دے دیا ہے۔لگژری اشیاءکی درآمد پر حالیہ پابندی کے حوالے سے ایف ٹی او نے کہا کہ امپورٹرز کو درپیش مشکلات کا جائزہ لے رہے ہیں۔ انہوں نے کہاکہ ہمارا بنیادی مقصد کاروباری برادری کے لئے آسانیاں پیدا کرنا ہے اور اس مقصد کے لئے 11دفاتر سرگرمِ عمل ہیں۔ انہوں نے لاہور چیمبر آف کامرس کے سینئر نائب صدر رحمن عزیز چن بطور کورڈینیٹر کمیٹی کے امور میں انتہائی اہم کردار کر رہے ہیں۔

اس موقع پر نائب صدر لاہور چیمبر حارث عتیق نے کہا کہ تاجر برادری کا ایف ٹی او آفس پر اعتماد بڑھ رہا ہے۔ انہوں نے کہا کہ ایس ایم ایز سیکٹر کے حوالے سے لاہور چیمبر آف کامرس کی جانب سے دی گئی تجاویز پر توجہ دی جائے۔انہوں نے کہا کہ ٹرن اوور ٹیکس کو کم کرنے کے لئے اقدامات کئے جائیں۔ نائب صدر نے مزید کہا کہ شکایت کنندگان جس جگہ رہتے ہیں ان کے لئے وہیں سے زوم پر شکایات رجسٹر کروانا ایک اچھا قدم ثابت ہوگا۔

وفاقی وزیر داخلہ رانا ثناء اللہ کا کہنا ہے کہ آئی ایم ایف سے مذاکرات کامیاب نہ ہوئے تو ملکی معیشت کو چلانا کوئی معجزہ ہی ہو سکتا ہے۔

لاہور میں میڈیا سے گفتگو کرتے ہوئے رانا ثناء اللہ کا کہنا تھا کہ عمران خان نے مریم نواز سے متعلق جس قسم کی گھٹیا اور نازیبا گفتگو کی اس سے ایسا معلوم ہوتا ہے کہ ان کا اپنا تجربہ خراب رہا ہے، میرے خیال میں تو عمران خان جیسا گندا کردار تو لاکھوں میں کیا ملین میں بھی تلاش کرنے سے شاید ہی ملے۔

فوری الیکشن سے متعلق سوال پر ان کا کہنا تھاکہ تمام اتحادیوں کا فیصلہ ہے کہ آئینی مدت پوری کریں گے، ہم اپنے اتحادیوں کو کوئی سرپرائز نہیں دیں گے اور جو بھی فیصلہ ہو گا باہمی مشاورت سے ہو گا۔

‘پیٹرول کی قیمت پر ڈکٹیشن نہیں لے سکتے، آئی ایم ایف سے دوبارہ مذاکرات کرنے چاہئیں’
پیٹرول، ڈیزل اور بجلی مزید مہنگی ہوگی: پاکستان نے آئی ایم ایف کا مطالبہ مان لیا
انہوں نے مزید کہا کہ موجودہ صورتحال میں آئی ایم ایف کا جو کردار ہے وہ بہت اہم ہے، آئی ایم ایف کے ساتھ معاہدہ ہم نے نہیں کیا لیکن اگر آئی ایم ایف کے ساتھ مذاکرات کامیاب نہیں ہوتے تو پھر ملک کی معیشت کو چلانا کوئی معجزہ ہی ہو سکتا ہے۔

رانا ثناء اللہ نے مزید کہا کہ مسلم لیگ ن یہ بھی نہیں چاہتی کہ تیل کی قیمت بڑھا کو غریب عوام کے منہ سے نوالہ بھی چھین لیا جائے، اگر شہباز شریف کو کام کرنے دیا جائے اور تمام اداروں کی جانب سے سپورٹ ملے تو ہمیں یقین ہے کہ ملک کو ان مشکل حالات سے نکال سکتے ہیں۔

وزیر داخلہ کا کہنا تھا کہ نواز شریف بھی چاہتے ہیں کہ مہنگائی کا طوفان لوگوں پر نہ توڑا جائے، اتحادی حکومت کے حوالے سے ساری مشاورت کو نواز شریف کی حمایت حاصل ہے۔

ایک اور سوال کے جواب میں وزیر داخلہ کا کہنا تھا لیکن اگر ہمیں کام کرنے سے روکا جائے گا، ہمارے ہاتھ پاؤں باندھے جائیں گے اور پرفارمنس پر شکوک کا اظہار کیا جائے گا تو پھر بڑی سیدھی بات ہے کہ جو ذمہ دار ہیں وہ بھگتیں، ہم اتحادیوں سے مشاورت کے بعد عوام سے رجوع کریں گے۔

سپیکر پنجاب اسمبلی چوہدری پرویز الٰہی نے کہا ہے کہ سب سے پہلے اللہ تعالیٰ کا شکر گزار ہوں بعدازاں الیکشن کمیشن کو مبارک باد کہ انہوں نے جمہوریت کی بنیادیں مضبوط کیں۔آج کے فیصلے سے بہت خوشی ہوئی ہے.حق اور سچ کی فتح ہوئی ہے.

ان کا کہنا تھا کہ میں اول روز سے کہہ رہا ہوں کہ یہ الیکشن ہی غلط تھا اور یہ حلف بھی غلط تھا اور اب یہ ثابت ہوگیا، آئندہ کا لائحہ عمل یہ ہے کہ اب انہیں اٹھا کر باہر پھینکیں گے۔پرویز الہی کا مزید کہنا تھا کہ عمران خان کا امیدوار ہوں، حلف لینے کے بعد اگر عمران خان مجھے کہیں گے تو آدھے گھنٹے میں اسمبلیاں توڑ دوں گا۔

انہوں نے کہا کہ منحرف ارکان اسمبلی اپنی سوسائٹی اور گھروں میں عبرت کا نشان بن چکے ان کا اب کوئی سیاسی مستقبل نہیں، جہانگیر ترین اور حمزہ شہباز نے بہت پیسہ پھینکا لیکن پیسہ ان کے کوئی کام نہیں آیا۔

حمزہ شہباز شریف کے وزیراعلیٰ بننے پر انہوں نے کہا کہ جس کام کی بنیاد ہی غلط ہو جو ریت پر گھر بنایا گیا ہو ان کا یہی حال ہوتا ہے اس میں یہ خود ہی دفن ہوجاتے ہیں اور ان کا نام و نشان مٹ جاتا ہے۔

وزیراعظم شہبازشریف اور وزیراعلیٰ پنجاب حمزہ شہباز نے منی لانڈرنگ کیس میں ایف آئی اے کی عدالت میں پیش ہونے کا فیصلہ کیا ہے۔

باغی تی وی کی رپورٹ کے مطابق سپریم کورٹ کے از خود نوٹس کے بعد منی لانڈرنگ کیس میں اہم پیش رفت سامنے آئی ہے، لاہور کی اسپیشل سنٹرل عدالت میں شوگر ملز کاروبار کے ذریعے 16 ارب روپے کی منی لانڈرنگ کیس میں نامزد وزیراعظم شہباز شریف اور وزیر اعلیٰ پنجاب حمزہ شہباز شریف نے لاہور کی ایف آئی اے اسپیشل سینٹرل عدالت میں پیش ہونے کا فیصلہ کیا ہے۔

ذرائع کا کہنا ہے کہ وزیراعظم کے وکیل امجد پرویز نے وزیراعظم شہباز شریف کو عدالت میں پیش ہونے کی تجویز دی تھی۔ وکیل امجد پرویز کے مطابق عدالت نے فرد جرم کے لیے شہباز شریف، حمزہ شہباز سمیت دیگر ملزمان کو طلب کر رکھا ہے، شہباز شریف گزشتہ 3 پیشیوں سے حاضری استثنیٰ کی درخواست جمع کروا رہے تھے، تاہم وہ کل ذاتی حیثیت سے عدالت کے سامنے پیش ہوں گے

واضح رہے کہ لاہور کی اسپیشل سینٹرل عدالت نے 16 ارب روپے کی مبینہ منی لانڈرنگ کیس میں شہبازشریف اور ان کے صاحبزادے حمزہ شہباز کو فرد جرم عائد کرنے کے لئے متعدد بار ذاتی حیثیت میں پیش ہونے کا حکم دیا تھا، تاہم ہر بار فرد جرم عائد نہ ہوسکی.

رواں ماہ 14 مئی کو بھی اسپیشل سینٹرل عدالت میں وزیراعظم شہباز شریف اور وزیر اعلیٰ پنجاب حمزہ شہباز شریف کے خلاف شوگر ملز کاروبار کے ذریعے 16ارب روپے کی منی لانڈرنگ کرنے کے مقدمے کی سماعت ہوئی تھی، جس میں حمزہ شہباز نے عدالت میں پیش ہوکر حاضری مکمل کروائی جبکہ ان کے والد پیش نہ ہوئے اور ایک روزہ حاضری معافی کی درخواست دائر کی۔ وزیر اعظم کے وکیل امجد پرویز نے موقف اختیار کیا کہ وزیراعظم شہباز شریف میڈیکل چیک اپ کے لیے بیرون ملک ہیں، انہیں کمر درد کا مسئلہ ہے۔

پنجا ب اسمبلی کے آفیسروں اور ملازمین کی گرفتاریوں کے خلاف ملازمین نے پنجا ب پولیس کے خلاف اسمبلی کی سیڑھیوں پر احتجاج کیا اورپنجا ب اسمبلی کی پرانی بلڈنگ سے نئی بلڈنگ تک احتجاجی ریلی بھی نکالی.

سیکرٹری اسمبلی محمد خان بھٹی۔ سیکرٹری کوارڈینیشن عنائت اللہ لک۔ڈی جی پارلیمانی امور رائے ممتاز بھی مظاہرے میں شریک ہوئے ،ملازمین نے پولیس کے خلاف احتجاجی نعرے بازی کی ،مظاہرین کا مطالبہ تھا کہ انہیں ہراساں کرنے کا سلسلہ بند کیا جائے اور اسمبلی ملازمین کے خلاف درج جھوٹے مقدمات واپس لیے جائیں ،اسمبلی ملازمین کو گرفتار کرنا اورجھوٹے مقدمات بنانا قابل مذمت ہے.

مطاہرین کا کہنا تھا کہ پنجاب پولیس نے اسمبلی کے متعددآفیسرز سمیت کئی ملازمین کو مقدمات درج کرکے گرفتارکیا اورکچھ آفیسرز کو تین ایم پی اے کے تحت نظر بند کیاگیا÷
ملازمین ضمانت کے بعد رہا ہوئے اوررہائی پاتے ہی پنجاب اسمبلی میں احتجاگ کیا.

احتجاج سے قبل سیکرٹری اسمبلی محمد خان بھٹی نے اسمبلی ملازمین سے ملاقات کی،ملاقات میں سیکرٹری کوارڈینشن عنائت اللہ لک اور اسمبلی کے دیگر آفیسرز بھی شریک پوئے. سیکرٹری اسمبلی محمد خان بھٹی نے کہا کہ پنجاب اسمبلی میں گزشتہ دنوں جو واقعات ہوئے انکی تاریخ میں مثال نہیں ملتی،پارلیمنٹ سپریم ہے،سولہ اپریل کو پولیس نے ایوان میں داخل ہوکر اس کا تقدس پامال کیا.پولیس نے نہ صرف ارکان اسمبلئ بلکہ اسمبلی سٹاف کو بھی تشدد کا نشانہ بنایا،خواتین ایم پی ایز پر جس طرح پولیس نے تشدد کیا وہ کبھی نہیں بھولے گا۔
پولیس نے ایوان میں داخل ہوکر جو بدنما داغ لگایا۔ ذمہ داران کو سزا دیکر اس کو صاف کریں گے۔ مجھ سمیت اسمبلی کے کئی آفیسرز اور ملازمین کے خلاف جھوٹے مقدمات درج کرکے گرفتاریاں کی گئیں،اسمبلی ملازمین کی فیملیز کو گھروں پر چھاپے مار کر ہراساں کیا جارہا ہے ، ملازمین نے مشکل کے اس وقت میں یکجہتی کا مظاہرہ کیا ،اسمبلی ملازمین مشکل کے اس وقت میں ڈٹ کر کھڑے ہوئے۔

سیکرٹری اسمبلی محمد خان بھٹی کا کہنا تھا کہ کچھ عناصر نے میر جعفر اور میر صادق کا کردار ادا کیا انکے خلاف کوئی انتقامی کارروائی نہیں ہوگی تاہم قانون اپنا راستہ خود بنائے گا۔اسمبلی مئں جو کام ہوگا میرٹ پر ہوگا رولز کے مطابق ہوگا۔ سیکرٹری کوارڈینیشن عنایت اللہ لک نے کہا کہ پارلیمانی تاریخ میں پہلی بار پولیس ایوان میں داخل ہوئیی ،پولیس نے پارلیمانی تقدس کو پامال کیا۔اسپیکر پنجاب اسمبلی چوہدری پرویز الہی نے جرات مندانہ کردار ادا کیا۔

وزیر اعلی پنجاب حمزہ شہباز نے صوبے بھر میں سستے آٹے کی سپلائی یقینی بنانے کی ہدایت جاری کر دی ہیں جبکہ چینی اور گھی کی قیمتیں بھی کم کرنے کا عندیا دے دیا ہے.

وزیر اعلی پنجاب حمزہ شہباز کا کہنا ہے کہ ہر قصبے اور چھوٹے بڑے شہر میں 490 روپے میں 10 کلو آٹے کے تھیلے کی وافر دستیابی یقینی بنائی جائے،پنجاب بھر میں 10 کلو آٹے کا تھیلا 160 روپے سستا کر دیا گیا ہے۔ اجلاس سے خطاب کرتے ہوئے حمزہ شہباز نے کہا کہ فلور ملوں کو سرکاری گندم کی فراہمی کا آغاز ہو چکا ہے۔ فلور ملوں سے مارکیٹ تک سستے آٹے کی سپلائی چین کیلئے فول پروف میکانزم وضع کیا گیا ہے۔

وزیراعلیٰ حمزہ شہباز نے چینی اور گھی کی قیمتوں میں کمی کیلئے جلد حتمی سفارشات پیش کرنے کی ہدایت کرتے ہوئے کہا کہ ہمارا یہ اقدام اللہ کی مخلوق کی مشکلات کم کرنے کی حقیر کاوش ہے۔ چینی اور گھی کی قیمتیں کم کرکے خلق خدا کیلئے مزید آسانیاں پیدا کریں گے۔
وزیراعلیٰ حمزہ شہباز کی زیر صدارت صوبہ بھر میں آٹے کی سپلائی کے حوالے سے اہم اجلاس میں سردار اویس احمد خان لغاری، چوہدری محمد اقبال،بلال یاسین، مسلم لیگ (ن) کے رہنما عطا تارڑ،پرنسپل سیکرٹری وزیراعلیٰ،سیکرٹری خوراک، ڈائریکٹر خوراک اور متعلقہ حکام نے شرکت کی.

قیامت خیز گرمی سے پریشان عوام کیلئے اچھی خبر آگئی، محکمہ موسمیات نےگرج چمک کیساتھ بارش کی پیشگوئی کردی۔

محکمہ موسمیات کے مطابق آئندہ چند دنوں میں گرمی کی لہر کم ہوجائے گی، مغربی ہواؤں کاسلسلہ آج رات پاکستان کے بالائی علاقوں میں داخل ہو کر 24 مئی تک موجود رہے گا جبکہ مختلف علاقوں میں رات کے اوقات میں آندھی اور گرج چمک کےساتھ بارش سے گرمی کا زور ٹوٹ جائےگا۔

محکمہ موسمیات کا کہنا ہےکہ مغربی ہواؤں، بارش اورتیز ہواؤں سے بیشتر علاقوں میں درجہ حرارت کم ہوجائےگا، رات کےاوقات میں اسلام آباد، راولپنڈی ، میانوالی، سرگودھا، خوشاب، اٹک، چکوال اور جہلم میں بھی بارش کا امکان ہے۔اس کے علاوہ لاہور، حافظ آباد، منڈی بہاؤالدین، سیالکوٹ، نارووال، شیخوپورہ، فیصل آباد اور جھنگ میں آندھی کے ساتھ بارش ہوسکتی ہے۔

سینٹرل پاورپرچیزنگ ایجنسی نے بجلی کی قیمت میں اضافے کی درخواست کردی، جبکہ بجلی کا شارٹ فال بڑھ کر 6 ہزار580 میگاواٹ ہو گیا ہے

سینٹرل پاور پرچیزنگ ایجنسی نے بجلی کی قیمت میں اضافے کےلیے نیپرا کو درخواست دی ہے جس میں بجلی کی فی یونٹ قیمت میں 4 روپے 5 پیسے اضافے کی درخواست کی گئی ہے۔ نیپرا کا کہنا ہےکہ سینٹرل پاور پرچیزنگ ایجنسی نے اپریل کی فیول پرائس ایڈجسٹمنٹ کیلئے درخواست دی ہے جس پر سماعت 31 مئی کو ہوگی۔

ذرائع کا کہناہے کہ بجلی کی قیمت میں اضافے سے صارفین پر 59 ارب 45 کروڑ روپے اضافی بوجھ منتقل ہوسکتا ہے۔ فیول پرائس ایڈجسٹمنٹ کی درخواست کے الیکٹرک کے سوا تمام بجلی تقسیم کار کمپنیوں کیلئے ہے۔

دوسری جانب ملک میں بجلی کی پیداوار 19 ہزار 420 میگا واٹ رہ گئی جب کہ طلب 26 ہزار میگا واٹ سے زائد ہے۔ پاور ڈویژن ذرائع کے مطابق ایندھن کی کمی کے باعث بجلی کی پیداوارمزید کم ہو گئی ہے اور بجلی کا شارٹ فال بڑھ کر 6 ہزار580 میگاواٹ ہو گیا ہے۔ ذرائع کے مطابق بجلی کی پیداوار 19 ہزار 420 میگاواٹ رہ گئی ہے اور بجلی کی کل طلب 26 ہزار میگاواٹ سے زائد ہے، اس وقت میں ملک کے مختلف علاقوں میں 12 سے 16 گھنٹے تک لوڈشیڈنگ کی جارہی ہے۔

ذرائع کا کہنا ہے کہ سرکاری اور نجی پاور پلانٹس کو کوئلے اور ایل این جی کی پوری مقدار نہیں مل رہی، ایندھن کی کمی سے کوئلے اور ایل این جی والے پلانٹس بند ہونے سے پیداوار میں کمی آئی، حکومت نے ایل این جی کے سودے کر لئے ہیں اور رسد کیلئے ڈالروں میں ادائیگی ضروری ہے، لیکن ادائیگی نہ ہونے سے ایندھن کی فراہمی نہیں ہو رہی۔

ذرائع پاور ڈویژن کے مطابق سرکاری تھرمل پاور پلانٹس 1 ہزار 84 میگاواٹ بجلی پیدا کررہے ہیں، نجی شعبے کے بجلی گھروں کی پیداوار 10 ہزار 156 میگاواٹ ہے، ہوا سے 700ہزار میگاواٹ سولر سے بجلی کی پیداوار 112 میگاواٹ ہے، بگاس سے چلنے والے پاور پلانٹس 166 میگاواٹ بجلی پیدا کررہے ہیں، جوہری ایندھن سے بجلی کی پیداوار 2 ہزار 274 میگاواٹ ہے، پن بجلی ذرائع سے بجلی کی پیداوار 4 ہزار 916 میگاواٹ ہے، بجلی پیدا کرنے کی مجموعی صلاحیت 36 ہزار 39 میگاواٹ ہے ۔