Category: لاہور

لاہور کے فیکٹری ایریا میں سی سی ڈی ڈیفنس کی ٹیم اور مبینہ ملزمان کے درمیان پیش آنے والے پولیس مقابلے میں زیر حراست دو افراد ہلاک ہو گئے، جبکہ ایک اور علیحدہ واقعے میں سبزہ زار کے علاقے سے ایک زخمی ڈاکو کو گرفتار کر لیا گیا۔

پولیس کے مطابق سی سی ڈی ڈیفنس کی ٹیم نے مختلف مقدمات میں گرفتار دو ملزمان، مون اور حفیظ کو تفتیش کے سلسلے میں والٹن روڈ کے قریب ریکوری کے لیے لے جا رکھا تھا۔ اس دوران نامعلوم موٹر سائیکل سوار ملزمان، جو کہ مبینہ طور پر مون اور حفیظ کے ساتھی تھے، نے پولیس پارٹی پر فائرنگ کر دی۔پولیس کا کہنا ہے کہ فائرنگ کے تبادلے میں زیر حراست دونوں ملزمان گولیوں کی زد میں آکر موقع پر ہی ہلاک ہو گئے۔ ابتدائی تحقیقات کے مطابق یہ گولیاں ان کے اپنے ساتھیوں کی جانب سے چلائی گئیں۔ پولیس نے دونوں لاشوں کو جنرل ہسپتال کے مردہ خانے منتقل کر دیا ہے، جبکہ حملہ آوروں کی تلاش کے لیے علاقے میں سرچ آپریشن جاری ہے۔

ایک اور واقعہ لاہور کے سبزہ زار کے علاقے میں پیش آیا، جہاں اے وی ایل ایس اقبال ٹاؤن پولیس نے ایک مشتبہ کار چور کو مبینہ پولیس مقابلے کے بعد زخمی حالت میں گرفتار کر لیا۔پولیس ذرائع کے مطابق گرفتار ملزم کی شناخت راشد کے نام سے ہوئی ہے، جو کہ کار چوری کی متعدد وارداتوں میں پولیس کو مطلوب تھا۔ مقابلے کے دوران راشد کو گولی لگی، جس کے بعد اسے حراست میں لے کر طبی امداد کے لیے مقامی ہسپتال منتقل کر دیا گیا ہے۔پولیس کا کہنا ہے کہ راشد سے ابتدائی تفتیش جاری ہے اور اس کے دیگر ساتھیوں کی گرفتاری کے لیے چھاپے مارے جا رہے ہیں۔پولیس حکام کا کہنا ہے کہ جرائم پیشہ عناصر کے خلاف کارروائیاں جاری رہیں گی اور شہر میں امن و امان کو ہر صورت برقرار رکھا جائے گا۔ دونوں واقعات کی مکمل انکوائری کے بعد مزید تفصیلات میڈیا کے ساتھ شیئر کی جائیں گی۔

لاہور میں سابق وزیراعظم عمران خان کی 9 مئی کے مقدمات میں ضمانت منظور ہونے کے عدالتی فیصلے پر خوشی کا اظہار کرنے والے سات افراد کو گرفتار کرکے ان کے خلاف مقدمہ درج کر لیا گیا ہے۔ پولیس کے مطابق گرفتار افراد نے مال روڈ پر بلاک کر کے ٹریفک کا بہاؤ متاثر کیا تھا۔

تھانہ سول لائنز لاہور کی حدود میں گرفتار افراد کے خلاف پولیس کی مدعیت میں مقدمہ درج کیا گیا ہے، اور موقع سے کچھ خواتین کو بھی حراست میں لیا گیا۔ پولیس حکام کا کہنا ہے کہ گرفتار افراد کو قانونی کارروائی مکمل ہونے کے بعد عدالت میں پیش کیا جائے گا۔

دوسری جانب لاہور کے تھانہ سول لائن کی حدود میں عمران خان کی سپریم کورٹ سے ضمانت کی خوشی میں ایک فیملی نے کچھ افراد کے ساتھ مل کر مٹھائیاں تقسیم کیں، نتیجتاً بچوں سمیت اس فیملی کو بھی تھانے لے جایا گیا۔پی ٹی آئی کے سابق ڈپٹی اسپیکر قاسم خان سوری نے اس واقعے پر شدید ردعمل ظاہر کرتے ہوئے ٹویٹر پر کہا کہ ایس ایچ او سول لائن ندیم کمبوہ نے 3، 4 اور 5 سال کی تین بچیوں اور ایک 2 سالہ بچے کو والدین سمیت گرفتار کیا۔ ان کا جرم صرف اور صرف عمران خان کی ضمانت منظور ہونے کی خوشی میں مٹھائی تقسیم کرنا تھا۔ قاسم خان سوری کی جانب سے جاری کی گئی ویڈیو میں دیکھا جا سکتا ہے کہ خواتین تھانے کے کمرے میں موجود ہیں، جہاں ایک پولیس اہلکار بغیر کسی لحاظ کے سیگریٹ پی رہا ہے پی ٹی آئی کے آفیشل پیج پر جاری بیان میں مزید بتایا گیا کہ بالآخر ننھے بچوں اور فیملی کو رہا کرا لیا گیا ہے۔ بیان میں کہا گیا کہ تاریخ میں یاد رکھا جائے گا کہ پاکستان میں دو سے پانچ سال کے بچوں کو مٹھائی بانٹنے کے جرم میں تھانے میں حبس بےجا میں رکھا گیا۔

لاہور کی انسداد دہشتگری عدالت نے 9 مئی 2023 کو جناح ہاؤس پر حملے کے کیس میں تحریک انصاف کے بانی عمران خان کی ہمشیرہ علیمہ خان کے بیٹے شاہ ریز کا 8 دن کا جسمانی ریمانڈ منظور کرلیا۔

قبل ازیں انسدا دہشتگردی عدالت نے 9مئی مقدمات میں گرفتار بانی پی ٹی آئی کے بھانجے شاہ ریز خان کے جسمانی ریمانڈ کی درخواست پر فیصلہ محفوظ کرلیا تھا

بانی پی ٹی آئی کے گرفتار بھانجے شاہ ریز خان کوعدالت پیش کردیاگیا،پولیس کی جانب سے شاہ ریز خان کے جسمانی ریمانڈ کی درخواست کی گئی ہے۔اے ٹی سی جج منظر علی گل نےکیس کی سماعت کی،دوران سماعت تفتیشی افسر نے عدالت میں کہاکہ شاہ ریزخان جناح ہاؤس حملہ کیس میں نامزد ہے،عدالت نے استفسار کیا کہ ملزم کو کب نامزد کیاگیا؟تفتیشی افسر نے کہاکہ 23ستمبر 2023سے شاہ ریز خان مقدمے میں نامزد ہے،ملزم کو ضمنی بیانات کی روشنی میں نامزدکیاگیا، عدالت نے ملزم شاہ ریز خان کے جسمانی ریمانڈ کی درخواست پر فیصلہ محفوظ کرلیاتھا جو اب سنا دیا گیا ہے

تحریک انصاف عمران خان کی بہن علیمہ خان کا کہنا ہے کہ 4 مسلح نقاب پوش میرے بیٹے شاہریز کو اغواء کرکے لے گئے۔

علیمہ خان نے الزام عائد کیا کہ شاہریز کو لاہور میں میرے گھر سے اغواء کیا گیا، سادہ کپڑوں میں ملبوس چار مسلح افراد کچن کے راستے گھر میں داخل ہوئے، میرا بیٹا اپنی بیوی اور والد کے ہمراہ گھر کی بالائی منزل پر تھا، مسلح افراد نے گھر میں ڈائیورز کو بھی ہراساں کیا۔

دوسری جانب سلمان اکرم راجہ نے بھی الزام عائد کرتے ہوئے کہا کہ علیمہ خان کی لاہور کی رہائشگاہ پر سادہ لباس میں افراد حملہ آور ہوئے،علیمہ خان کے بیٹے شاہ ریز کو اغواء کر لیا گیا، اہلخانہ کو ہراساں کیا، بانی پی ٹی آئی کی بہن کے گھر کے ملازمین کو مارا پیٹا گیا ہے۔

علاوہ ازیں ترجمان پاکستان تحریک انصاف کا کہنا ہے کہ مسلح افراد دروازے توڑ کر شاہ ریز کو بیڈ روم سے اغواء کر کے لے گئے۔پی ٹی آئی ترجمان نے الزام عائد کیا کہ شاہ ریز خان کے دو بچوں کے سامنے کمرے میں گھس کر تشدد کیا گیا، گزشتہ روز شاہ ریز خان کو اہلیہ کے ہمراہ لاہور ایئرپورٹ سے غیر قانونی آف لوڈ کیا گیا شاہ ریز خان کا کسی سیاسی سرگرمی سے کوئی تعلق نہیں، چیف جسٹس سے فوری نوٹس لینے اور شاہ ریز خان کو بازیاب کروانے کا مطالبہ کرتے ہیں۔