ایس پی ہیڈکوارٹرز عمران احمد ملک کی پاک ساؤتھ افریقہ ٹی ٹوینٹی سیریز کے حوالہ سے میٹنگ
کرکٹ سیریز کے دوران لاجسٹک، سکیورٹی اور دیگر اہم امور بارے تبادلہ خیال
لاہور،04 فروری
ایس پی ہیڈکوارٹرز عمران احمد ملک نے کہا ہے کہ پاکستان بمقابلہ ساؤتھ افریقہ ٹی ٹوینٹی کرکٹ سیریز کے دوران فول پروف سکیورٹی انتظامات کو یقینی بنایا جا رہا ہے۔قیام گاہ اور قذافی سٹیڈیم پرشفٹوں میں تعینات نفری کے متبادل نفری بروقت پہنچائی جائے۔ ان خیالات کا اظہار انہوں نے آج پولیس لائنز قلعہ گجر سنگھ میں پاک ساؤتھ افریقہ کرکٹ سیریز کے حوالہ سے پولیس لائنز سٹاف سے میٹنگ کے دوران کیا۔ ڈی ایس پیز فرحت عباس، سہیل کاظمی،قیصر مشتاق، آر آئی لائن محمد نعمان اور لائن آفیسر سمیت دیگر متعلقہ افسران نے میٹنگ میں شرکت کی۔ میٹنگ میں کرکٹ سیریز کے دوران لاجسٹک، سکیورٹی اور دیگر اہم امور بارے تبادلہ خیال کیا گیا۔عمران احمد ملک نے کہا کہ کرکٹ ٹیموں کی قیام گاہ، قذافی اسٹیڈیم میں تعینات اہلکاروں کو پروگرام کے مطابق بروقت کھانا مہیا کیا جا ئے۔
مزید برآں ایس پی ہیڈ کوارٹرز عمران احمد ملک نے پولیس لائنز کا دورہ کیا۔ انہوں نے فائرنگ رینج، وردی گودام،ایم ٹی سیکشن، میس، کینٹین اور ہاسپٹل سمیت مختلف شعبوں کا تفصیلی جائزہ لیا۔ ایس پی عمران احمد ملک نے پولیس لائنز عملہ سے بھی ملاقات کی۔ تمام شعبوں کے انچارجز نے ایس پی ہیڈ کوارٹرز کو اپنے اپنے سیکشن بارے تفصیلی بریفنگ دی۔

ڈی آئی جی آپریشنز لاہورساجد کیانی نے کہا ہے کہ جرائم پیشہ عناصر کی سرکوبی کیلئے مزید بہتر اقدامات جاری ہیں۔ شہریوں میں احساس تحفظ پیدا کرنے کیلئے ڈولفن اور پولیس رسپانس یونٹس کی طرف سے کئے جانے والے گشت کو موثر بنایا جا رہا ہے۔ ساجد کیانی نے کہا کہ عدالتوں سے ضمانتوں پر رہائی پانے والے ڈکیت گینگز اور انکے کارندوں کا ریکارڈ مرتب کیا جا رہا ہے۔ شہریوں کی جان و مال کی حفاظت کیلئے تمام ممکنہ اقدامات کئے جا رہے ہیں۔لاہور شہر کو امن کاگہوارہ بنانے میں شہریوں کا تعاون ناگزیر ہے۔

تفصیلات سے آگاہ کرتے ہوئے ڈی آئی جی آپریشنزساجد کیانی نے کہا کہ دوران ڈکیتی، سرقہ بالجبر، نقب زنی جیسی وارداتوں میں ملوث 89گینگزکے203 ملزمان گرفتار کئے۔ گرفتار ملزمان کے قبضہ سے01کروڑ04لاکھ روپے سے زائدمالیت مال مسروقہ برآمد کر کے ورثا کے حوالے کیا گیا۔صدر ڈویژن پولیس نے41، سٹی 50، ماڈل ٹاؤن43،اقبال ٹاؤن26، کینٹ 33 جبکہ سول لائنز ڈویژن پولیس نے10 گینگز گرفتار کئے۔ساجد کیانی نے کہا کہ دورانِ تفتیش ملزمان سے مزید120 مقدمات ٹریس ہوئے۔گرفتار مجرمان میں سے200 سے زائد مجرمان سنگین جرائم میں سابقہ ریکارڈ یافتہ بھی پائے گئے۔ڈی آئی جی آپریشنز نے پولیس افسران کو ہدایات دیتے ہوئے کہا کہ کرائم ہاٹ سپاٹ کی نشاندہی کریں اور ان علاقوں میں پٹرولنگ موثر بنائی جائے۔شہریوں کو ان کے اثاثوں سے محروم کرنے والوں کے ساتھ آہنی ہاتھوں سے نمٹا جائے گا۔

04-02-2021
لاہور( )تحریک لبیک یار سول اللہ صلی اللہ علیک وسلم کے سربراہ ڈاکٹر محمدا شرف آصف جلالی نے ”یوم صدیق اکبر رضی اللہ تعالیٰ عنہ“ کے موقع پر کہا: قیامت تک نظام اسلام کا محور خلافت صدیق اکبر رضی اللہ تعالیٰ عنہ پر ہے۔ حکمرانوں کو فرانس کی گستاخانہ جسارت کا بدلہ لینے کے لیے حضر ت صدیق اکبر رضی اللہ تعالیٰ عنہ کے نقش قدم پر چلنا ہوگا۔ حضرت صدیق اکبر رضی اللہ تعالیٰ عنہ نے مسیلمہ کذاب کی سرکوبی کرکے تحفظ ختم نبوت کا طریقہ بتا دیا۔ حضرت سیدنا صدیق اکبر رضی اللہ تعالیٰ عنہ کی شخصیت بیک وقت سلاطین اور مقرّبین کیلئے درس گاہ کی حیثیت رکھتی ہے۔آپ صرف خلیفہ راشد ہی نہیں تھے بلکہ دیگر خلفاء راشدین کے لیے رہبرورہنما بھی تھے۔آپ نے نظام مصطفی ٰ ﷺ کی قوّت سے تمام فتنوں کا مقابلہ کیا آپ نے نہایت گھمبیر حالات میں امت کو سہارا دیا اور دین مصطفی ٰ ﷺ کی حفاظت کا حق ادا کر دیا آپ کے خطبے خاندان رسول ﷺ کی محبت سے لبریز ہیں آپکی خلافت بلا فصل سے دیگر خلفائے راشدین نے بھی راہنمائی حاصل کی۔ جن حالات میں آپ نے ملّت کی کشتی کنارے پر لگائی وہ آپ ہی کا حصہ ہے۔ عقیدہ ختم نبوت کے تحفظ، ناموس رسالت ﷺ کی حفاظت اور دین اسلام کے دفاع کیلئے آپکی خدمات تاریخ اسلام کا عظیم سہرا ہیں۔ملک میں قادیانی لابی کی بڑھتی ہوئی ارتدادی شرانگیزیاں تشویشناک ہیں۔ عقیدہ ختم نبوت کے تحفظ کیلئے سیدنا صدیق اکبر رضی اللہ تعالیٰ عنہ کی تعلیمات پر عمل کرنا ہوگا۔ حضرت سیدنا صدیق اکبر رضی اللہ تعالیٰ عنہ کا دورہ خلافت حکمرانوں کیلئے مشعل راہ ہے۔ ملک سے الحادی اور گستاخانہ سوچوں کا خاتمہ سیدنا صدیق اکبر رضی اللہ تعالیٰ عنہ کی روشن تعلیمات پر عمل پیر اہوکرہی کیا جاسکتا ہے

لاہور میں برطانوی ہائی کمشنر کا صوبائی نمائندہ پنجاب ایلیکس بلینگر اور سیکنڈسیکرٹری میری تھامسن کی پی ٹی آئی پنجاب سیکرٹریٹ کینال ویو آمد- وفد کا پاکستان تحریک انصاف سنٹرل پنجاب کے صدر اعجازاحمدچوہدری نے پارٹی سیکرٹریٹ کا دورہ کرنے پر برطانوی وفد کا خیر مقدم کیا، برطانوی ہائی کمشنر کے وفد نے پی ٹی آئی سنٹرل پنجاب کے صدر اعجازاحمدچوہدری سے ملاقات کی- ملاقات میں پاکستان اور برطانیہ کے درمیان ٹریڈ، ایگریکلچر، ٹیکنالوجی، تعلیم سمیت دیگر امور پر تبادلہ خیا ل کیا- برطانوی ہائی کمشنر کے وفد نے پی ٹی آئی حکومت کے احساس پروگرام اور کورونا سے نمٹنے کی حکمت عملی کا سراہا- برطانوی وفد نے پنجاب میں سرمایہ کاری کے اندر خصوصی دلچسپی کا اظہار کیا، وفدسے ملاقات کے موقع پر گفتگو میں اعجازاحمدچوہدری کا کہنا تھا کہ وزیراعظم عمران خان کی موثر حکمت عملی سے کورونا وباء پر قابو پایا وہ دنیا کے لئے مثال ہے، وزیراعظم عمران خان کی قائدانہ صلاحیتوں سے دنیا معترف ہے، دنیا کورونا سے نمٹنے اور قابوپانے کی پالیسیوں کو سراہا رہی ہے، صنعتی اور تعمیراتی سیکٹر ترقی کی بلند سطح پر ہیں۔

تحریک انصاف شمالی و جنوبی لاہور 5 فروری کو یوم یکجہتی کشمیر کے موقع پر کشمیری عوام سے بھرپور اظہار یکجہتی کرے گی، اس سلسلے میں بھارتی مظالم کے خلاف مال روڈ چیئرنگ کراس پر احتجاج کریں گے، احتجاج کے شرکاء سے پی ٹی آئی سنٹرل پنجاب کے صدر اعجازاحمدچوہدری، صدر شمالی لاہور غلام محی الدین دیوان، صدر جنوبی لاہور ملک ظہیرعباس کھوکھر سمیت دیگر قائدین خطاب کریں گے، جس میں پی ٹی آئی کے عہدیداران، کارکنان اور کشمیری عوام شرکت کرے گی۔

4 فروری 2021ء
کشمیر مارچ کی تیاریوں کے حوالے سے اجلاس ہوا ۔
اجلاس لٹن روڈ دفتر جماعت میں امیر جماعت اسلامی لاہور میاں ذکر اللہ مجاہد کی زیر صدارت ہوا۔اجلاس میں سیکرٹری جنرل جماعت اسلامی لاہور انجینئر اخلاق احمد، امیر جنوبی لاہور خالد احمد بٹ، صدر جے آئی یوتھ صہیب شریف کی شرکت۔
جماعت اسلامی لاہور کل سٹیٹ بنک چوک مال روڈ پر عظیم الشان کشمیر مارچ کریگی۔ کشمیر مارچ صبح 10 بجے امیر جماعت اسلامی پاکستان سینیٹر سراج الحق کی قیادت میں شروع ہوگا۔کشمیر مارچ میں لاہور کے تاجر، مزدور، طلبہ و اساتذہ، ڈاکٹرز، وکلاء اور علماء کرام سمیت تمام مکاتب فکر سے تعلق رکھنے افراد بڑی تعداد میں شریک ہوں گے۔ کشمیر مارچ میں لاہور کے مردو خواتین اور بچوں کی بڑی تعداد کشمیری بھائیوں کے ساتھ اظہار یکجہتی کیلئے اپنی آواز بلند کریں گے۔امیر جماعت اسلامی لاہور
5 فروری کو یوم یکجہتی کشمیر کے موقع پر سینیٹرسراج الحق کی قیادت میں کشمیری بھائیوں کیساتھ یکجہتی کیلئے اپنے گھروں سے نکلیں ۔ کشمیر کی مائیں، بہنیں، بیٹاں اور بھائی سب پاکستان کا پرچم لہرا رہے ہیں۔
بہادر کشمیری مسلمان بھارتی فوج کے سامنے سیسہ پلائی دیوار بنے مدد کے منتظر ہیں۔ کشمیر کی آزادی کے لیے ہمارے حکمران اور عالمی برداری فیصلہ کن کردار ادا کرے۔امیر جماعت اسلامی لاہور
جماعت اسلامی کشمیری بھائیوں کی پشتی بان ہے اور کشمیر کی آزادی تک ان کی جدوجہدمیں ہر طرح سے شامل ہے۔میاں ذکر اللہ مجاہد۔