Category: لاہور

پاکستان مرکزی مسلم لیگ کے ڈپٹی سیکرٹری جنرل حافظ خالد نیک نے کہا ہے کہ غزہ میں اسرائیلی مظالم ایک طرف تو وہیں بھوک سے فلسطینی مر رہے ہیں،اقوام متحدہ کی دل دہلا دینے والی رپورٹ سامنے آئی ہے،خوراک کے حصول کی کوشش میں 798 فلسطینیوں کا شہید ہونا ایک المیہ ہے،اسرائیلی مظالم کیخلاف امت کو ایک آواز ہونے کے ساتھ امدادی سامان پہنچانے کی بھی کوشش کرنی چاہئے

حافظ خالد نیک کا کہنا تھا کہ غزہ میں مئی 2024 سے اب تک 798 فلسطینی صرف خوراک حاصل کرنے کی کوشش میں شہید ہو چکے ہیں،غزہ میں بچوں، خواتین اور بوڑھوں کو خوراک جیسی بنیادی انسانی ضرورت کی تلاش میں قتل کرنا اسرائیل کی ظالمانہ پالیسیوں کی انتہا ہے، یہ صرف جنگی جرم نہیں بلکہ منظم نسل کشی ہے، اقوام متحدہ اور انسانی حقوق کے نام نہاد ادارے کہاں ہیں، کیا فلسطینی انسان ہیں ،انکے حقوق نہیں، غزہ کی موجودہ صورتحال پر او آئی سی کو آگے بڑھنا چاہئے، پاکستان کو بھی سفارتی محاذ پر متحرک کردار ادا کرنا ہوگا، پاکستانی عوام، خصوصاً نوجوان سوشل میڈیا اور دیگر پلیٹ فارمز پر فلسطینیوں کے حق میں آواز بلند کریں،یہ صرف فلسطینیوں کا مسئلہ نہیں، یہ انسانیت کا امتحان ہے۔

وزیر اطلاعات پنجاب عظمیٰ بخاری نے کہاہے کہ انسانی حقوق کے علمبردار بلوچستان میں ہونے والے مظالم پر خاموش کیوں ہیں؟ انہوں نے بلوچستان میں روزانہ کی بنیاد پر دہشت گردوں کے خلاف کارروائیاں جاری رکھنے کی ضرورت پر زور دیا اور کہا کہ دہشت گردی سے نمٹنے کے لیے سخت اور مؤثر اقدامات کیے جائیں گے۔

لاہور میں پریس کانفرنس کرتے ہوئے عظمیٰ بخاری نے مزید کہا کہ پنجاب حکومت کا سب سے اہم ترجیحی ایجنڈا صحت کا شعبہ ہے۔ انہوں نے بتایا کہ مریم نواز اس حوالے سے دن رات محنت کر رہی ہیں تاکہ صحت کے شعبے کی بہتری کو یقینی بنایا جا سکے۔ عظمیٰ بخاری نے اس بات کی وضاحت کی کہ صحت کارڈ پروگرام کے تحت مریضوں کا علاج مسلسل جاری ہے اور اس پروگرام کو بند کرنے کی افواہیں اور پروپیگنڈہ بے بنیاد ہیں۔انہوں نے یہ بھی انکشاف کیا کہ صحت کارڈ کا استعمال نجی اسپتالوں میں تو بخوبی ہو رہا ہے لیکن سرکاری اسپتالوں میں اس کا غلط استعمال پایا گیا ہے۔ انہوں نے کہا کہ صحت کارڈ کے حوالے سے تمام آڈٹ رپورٹس جلد منظر عام پر لائی جائیں گی تاکہ عوام کو مکمل شفافیت فراہم کی جا سکے۔

وزیر اطلاعات نے پنجاب حکومت کی جانب سے پی ٹی آئی کی احتجاجی کال پر خاموشی کا ذکر کرتے ہوئے کہا کہ پنجاب حکومت نے نہ پہلے پی ٹی آئی کی احتجاج کی کال پر کوئی ردعمل دیا اور نہ ہی اب دے گی۔ انہوں نے یہ بھی کہا کہ خیبرپختونخواہ حکومت سے پی ٹی آئی کو فنڈز کی فراہمی کی خبریں ہیں، جس کی تحقیقات ہونی چاہئیں۔

بارشوں کے باعث لاہور میں پانی کے جمع ہونے کے حوالے سے سوال پر عظمیٰ بخاری نے کہا کہ طوفانی بارشوں میں پانی کا جمع ہونا ایک قدرتی عمل ہے۔ سوشل میڈیا پر جو تصاویر گردش کر رہی ہیں، وہ ڈی ایچ اے کی حدود کی ہیں اور ڈی ایچ اے پنجاب حکومت کے دائرہ اختیار میں نہیں آتا۔ انہوں نے مزید کہا کہ ڈی ایچ اے کے شہری جنہیں ووٹ دیتے ہیں ان سے پوچھیں،

بلوچستان کے ضلع ژوب میں دہشتگردی کے تازہ واقعے میں شہید ہونے والے غلام سعید کی شہادت نے میاں چنوں کے علاقے کو غم میں ڈوب دیا۔ شہید غلام سعید کا تعلق چک نمبر 72 پندرہ ایل سے تھا۔ جب ان کا جسدِ خاکی آبائی گھر پہنچا، تو ان کے والد غلام سرور کی بھی شدت غم کی وجہ سے موت ہو گئی

غلام سرور جو کافی عرصے سے بیماری کا شکار تھے، بیٹے کی شہادت کی اطلاع ملتے ہی شدید صدمے میں مبتلا ہو گئے اور موقع پر ہی دم توڑ گئے۔ غلام سعید کے بیٹے کی خبر سن کر وہ چھٹی لے کر گھر واپس آ رہے تھے، مگر قسمت کو کچھ اور ہی منظور تھا۔میاں چنوں میں واقع ان کے آبائی گاؤں 72 پندرہ ایل کے اسکول گراؤنڈ میں شہید غلام سعید اور ان کے والد غلام سرور کی مشترکہ نماز جنازہ ادا کی گئی۔ نماز جنازہ میں فوج کے دستے کے علاوہ سیاسی رہنماؤں، سماجی کارکنوں، پولیس اہلکاروں اور عام شہریوں کی کثیر تعداد نے شرکت کی، جنہوں نے شہید کی قربانی کو خراج عقیدت پیش کیا۔نماز جنازہ میں شریک افراد نے دہشتگردی کے خلاف یکجہتی کا مظاہرہ کیا اور حکومت سے مطالبہ کیا کہ وہ شہداء کے خون کا انصاف کرے اور علاقے کو دہشتگردی سے پاک کرے تاکہ عوام سکون سے زندگی گزار سکیں۔

کراچی کے پوش علاقے ڈیفنس فیز 6 میں مقامی فلیٹ سے معروف اداکارہ حمیرا اصغر کی مردہ حالت میں لاش برآمد ہوئی ہے۔ واقعے کے بعد ادکارہ کے قریبی رشتہ دار، خاص طور پر ان کے چچا محمد علی نے لاہور میں میڈیا سے گفتگو کرتے ہوئے اہم اطلاعات فراہم کیں۔

محمد علی کا کہنا تھا کہ انہیں کراچی میں حمیرا اصغر کے رہائشی پتے کا علم نہیں تھا اور ان کا رابطہ زیادہ تر فون کے ذریعے ہوتا تھا۔ "جب بھی وہ لاہور آتی تھی تو گھر ضرور آتی تھی، لیکن کراچی میں ان کے گھر کا پتہ ہمیں معلوم نہیں تھا”، انہوں نے کہا۔اداکارہ کے چچا نے بتایا کہ حمیرا اصغر شوبز انڈسٹری میں کام کرنے کی خواہش مند تھیں اور اس شعبے میں اپنی شناخت بنانا چاہتی تھیں۔ "وہ وہاں خوش تھیں لیکن ان کے والدین اس فیصلے سے خوش نہیں تھے، اور یہی وجہ ہے کہ ہمارے روابط میں کمی آئی۔” محمد علی نے مزید کہا کہ جب ان کا فون بند ہوگیا تو کوئی بھی حمیرا سے رابطہ نہیں کر سکا۔

محمد علی نے اپنی بہن کی وفات کا بھی ذکر کیا جو ان کے خاندان کے لیے ایک بہت بڑا صدمہ تھا۔ "ہم اس غم میں مبتلا تھے ، حمیرا نے 2018 میں کراچی منتقل ہونے کا فیصلہ کیا۔ حمیرا تعلیم یافتہ تھیں، پینٹنگز بنانے کا شوق رکھتی تھیں اور اپنے فن میں خوش رہتی تھیں۔

تحریک انصاف اراکین اور اسپیکر پنجاب اسمبلی کے درمیان مذاکرات جاری رکھنے پر اتفاق کیا گیا ہے۔

ذرائع کے مطابق پی ٹی آئی کے 26 ارکان کی نااہلی کے ریفرنس کے معاملے پر اسپیکر پنجاب اسمبلی اور اپوزیشن اراکین کے درمیان اہم ملاقات ہوئی ہے،معطل اپوزیشن اراکین نے اپوزیشن لیڈر ملک احمد خان بچھر کی قیادت میں اسپیکر پنجاب اسمبلی ملک احمد خان سے ملاقات کی جو گھنٹے سے زائد جاری رہی جس میں مختلف امور زیر غور آئے،دونوں جانب سے مذاکرات جاری رکھنے پر اتفاق کیا گیا ہے جب کہ اسپیکر اور معطل ارکان میں آج ہی مذاکرات کا دوسرا سیشن ہونے کا امکان ہے۔

خیال رہے کہ 27 جون کو اسمبلی اجلاس میں اپوزیشن ارکان نے شور شرابہ کیا تھا اور توڑ پھوڑ کی تھی جس کے بعد اسپیکر نے اپوزیشن کے 26 ارکان کی رکنیت معطل کرتے ہوئے ان کی نااہلی کے لیے ریفرنس الیکشن کمیشن بھیجنےکا اعلان کیا تھا۔