Category: لاہور

لاہور میں ڈکیتی کی انوکھی واردات ہوئی ہے جہاں لٹنے والا شہری خود ڈاکو کو گھر لے گیا،لوٹ مار کروائی اور پھر واپس بھی چھوڑ آیا،

لاہور کے علاقے شالیمار میں انوکھی واردات ہوئی جہاں متاثرہ شہری حسن شہزاد کے مطابق وہ 19 اپریل صبح ساڑھے 8 بجے موٹرسائیکل پر جا رہا تھا کہ سیٹھاں والی باغیچی کے قریب ایک راہ گیر نے راستہ پوچھنے کے لیے روکا اور ایک ڈیوائس اس کی جیب میں ڈال دی اور کہایہ بم ہے ،مزاحمت کی توبم سے اُڑا دوں گا۔ پھر کہا اپنے گھر لے چلو،گھر پہنچ کر اس نے زیورات ،نقدی،موبائل فون،کریڈٹ کارڈز لیے اور کہا ،اب واپس چھوڑ آؤ،سی سی ٹی وی میں ڈاکو شہری حسن شہزاد کے ساتھ موٹرسائیکل پر بیٹھا نظر آتا ہے۔

دوسری جانب پولیس نے 2 دن بعد ڈکیتی کی بجائے چوری اور دھوکا دہی کا مقدمہ درج کر لیا،ایس پی اثر علی چوہدری کے مطابق مقدمہ درج کرلیا اور ملزم کی گرفتاری کیلئے ٹیم بھی تشکیل دےدی ہے، مقدمہ درج کرنے میں تاخیر اور دفعات سے متعلق ایس ایچ او سے وضاحت طلب کی جائے گی۔

حکومت سیاسی جماعت کے عہدیدار کیخلاف بھارتی بے بنیاد پروپیگنڈےکا جواب دے،سیف اللہ قصوری

پاکستان مرکزی مسلم لیگ کے سیکرٹری جنرل سیف اللہ قصوری نے کہا ہے کہ مقبوضہ کشمیر پہلگام میں سیاحوں کے ساتھ پیش آنے والے افسوسناک واقعہ پر گہری تشویش کا اظہا رکرتے ہیں۔ معصوم انسانی جانوں کے ضیاع کی پرزور مذمت کرتے ہیں۔

اپنے ایک بیان میں سیف اللہ قصوری کا کہنا تھا کہ بھارت ماضی میں کشمیریوں کی حق خود ارادیت کے لیے جائز تحریک کو دہشت گردی سے جوڑنے کے لیےسازشیں کرتا رہا ہے۔حالیہ واقعہ کے بعد بھی جس طرح بھارتی میڈیا پاکستان کے خلاف مہم بنا کر پروپیگنڈا کررہا ہے یہ بھی بھارت کی طرف سے کشمیریوں کی حق خود ارادیت کے لیے جاری تحریک کو سبوتاژ کرنے کی ایک سازش معلوم ہوتی ہے۔بھارت نہ صرف مقبوضہ کشمیر میں انسانی حقوق کی سنگین خلاف ورزیاں کر رہا ہے بلکہ پورے خطے میں دہشت گردی اور عدم استحکام کو ہوا دینے میں بھی ملوث ہے،کلبھوشن یادیو کی پاکستان سے گرفتاری بھارتی دہشتگردی کا دنیا کے سامنے واضح ثبوت ہے،کینیڈا و دیگر ممالک میں بھارتی دہشت گردی و سازشیں عالمی دنیا کے سامنے آ چکی ہیں.

سیف اللہ قصوری کا مزید کہنا تھا کہ بطور سیکرٹری جنرل پاکستان مرکزی مسلم لیگ بھارت کی ان تمام سازشوں اور دنیا بھر میں معصوم انسانی جانوں کے ضیاع کی بھرپور مذمت کرتا ہوں ۔ میرے حوالے سے بھارتی میڈیا کا پروپیگنڈا انتہائی بے بنیاد اور لغو ہے۔ میں پاکستان کا ایک پر امن شہری ہوں اور ایک پر امن سیاسی جماعت کا عہدیدار ہوں۔ حکومت پاکستان بھارت کی طرف سے ایک سیاسی جماعت کے عہدیدار کے خلاف ہونے والے بے بنیاد پروپیگنڈےکا جواب دے اور عالمی سطح پر بھارت کی سازشی پالیسیوں کو بے نقاب کرے،

پاکستانی قوم فلسطینی بھائیوں کے ساتھ کھڑی ہے۔حافظ طلحہ سعید،قاری یعقوب شیخ،حافظ خالد نیک

پاکستان مرکزی مسلم لیگ کے رہنماؤں نے کہا ہے کہ غزہ میں اسرائیل کی درندگی، نسل کشی اور بربریت نے انسانیت، بین الاقوامی قوانین اور اخلاقیات کو روند ڈالا ہے،ہسپتالوں، اسکولوں اور رہائشی علاقوں کو نشانہ بنانے والے اسرائیلی درندے دراصل جدید دور کے نمرود ہیں۔ پاکستانی قوم اور پوری امت مسلمہ فلسطینی بھائیوں کے ساتھ کھڑی ہے۔مرکزی مسلم لیگ اعلان کرتی ہے کہ اہل غزہ کو تنہا نہیں چھوڑا جائے گا،اسرائیلی مصنوعات کا بائیکاٹ جاری رکھا جائے،

ان خیالات کا اظہار مرکزی مسلم لیگ کے سیکرٹری جنرل سیف اللہ قصوری، نائب صدر حافظ طلحہ سعید، جوائنٹ سیکرٹری قاری محمد یعقوب شیخ، ڈپٹی سیکرٹری جنرل حافظ خالد نیک نے مختلف تقریبات و کارکنان سے ملاقاتوں کے دوران گفتگو کرتے ہوئے کیا، سیف اللہ قصوری کا کہنا تھا کہ اسرائیل نے درحقیقت دہشت گردی اور وحشت کی تمام حدیں پار کر دی ہیں، اور عالمی برادری کی مجرمانہ خاموشی اس ظلم میں برابر کی شریک ہے، شیلٹر اسکول پر بمباری، بچوں کو زندہ جلانا، اسپتالوں کو کھنڈر بنانا ، یہ سب اسرائیلی فوج کی بربریت نہیں بلکہ حیوانیت کی بدترین مثالیں ہیں،مرکزی مسلم لیگ اہل غزہ کے ساتھ ہے

مرکزی مسلم لیگ کے نائب صدر حافظ طلحہ سعید، قاری محمد یعقوب شیخ، حافظ خالد نیک کا کہنا تھا کہ اسرائیل دہشت گردوں کا مسکن ہے، جہاں درندے وردی پہن کر بچوں کو آگ میں جھونک رہے ہیں، پناہ گزین اسکول پر بمباری اور معصوم بچے کا زندہ جل جانا انسانیت نہیں، درندگی کا وہ نمونہ ہے جس پر اگر امت مسلمہ خاموش رہی، تو وہ کل قیامت کے دن جواب دہ ہوگی۔ اسرائیل کے جرائم پر خاموش رہنے والے شریک جرم ہیں،اسرائیلی مصنوعات کے بائیکاٹ کا سلسلہ جاری رکھا جائے،

سینئر رہنما پاکستان تحریک انصاف، ترجمان پی ٹی آئی پنجاب اسمبلی ،ممبر صوبائی اسمبلی ندیم قریشی نےعظمی بخاری اور عاشق کرمانی کی پریس کانفرنس کے ردعمل میں کہا ہے کہ ن لیگ کی نااہل حکومت نے کسانوں کو آئی ایم ایف کے رحم و کرم پر چھوڑ دیا ہے ،

ندیم قریشی کا کہنا تھا کہ ن لیگی رہنماؤں کی پریس کانفرنس کسانوں کو زندہ درگور کرنے کے بعد ان کے ارمانوں پر فاتحہ خوانی پڑھنے کی تقریب تھی،حکومت کی آئینی ذمہ داری ہے کہ وہ فوڈ سکیورٹی کو یقینی بنائے،پنجاب حکومت کی کسان کیلئے پالیسی چوں چوں کا مربہ ہے،ن لیگ حکومت کی زراعت پالیسی مڈل مین اور انویسٹر کو سپورٹ کرنے کیلئے ہے،جب کسان مجبور ہو کر دو ہزار میں اپنی گندم بیچ دے گا تو سرمایہ دار سٹور کرلے گا، دو تین ماہ بعد جب گندم قیمت بڑھ جائے گی تب انویسٹر فائدے سمیٹے گاکسان کو پنجاب حکومت کی پالیسی کا رتی برابر بھی فائدہ نہیں ہوگا،ن لیگ کی قاتل حکومت نے کسان کی کمر توڑ دی ہے،اگر پنجاب حکومت کی کسان پالیسی اچھی ہوتی تو کسان سڑکوں پر کیوں احتجاج کررہا ہوتا؟کیوں کسان لاہور کی طرف مارچ کررہے ہیں

وزیر اطلاعات پنجاب عظمیٰ بخاری نے کہا ہے کہ کینالز منصوبے میں سیلاب کا پانی استعمال ہوگا اور اس پر سندھ ہمیں ڈکٹیشن نہیں دے سکتا۔

لاہور میں میڈیا سے گفتگو کرتے ہوئے عظمیٰ بخاری نے کہا کہ پیپلزپارٹی کوسندھ کے کسانوں کی فکرکیوں نہیں ہوتی؟ پیپلزپارٹی سندھ میں 16 سال سے اقتدارمیں ہے، اپنی کارکردگی پردھیان دے، اگرپیپلزپارٹی غلط بیانی سے کام لےگی توجواب دینا پڑے گا، ابھی تک کوئی نہربننا شروع نہیں ہوئی مگر ایسا نہیں کہہ رہی کہ اتفاق رائے نہیں ہوا تونہریں نہیں بنیں گی، مذاکرات دھمکیوں کےذریعے نہیں ہوتے، اس منصوبے میں سیلاب کا پانی استعمال ہوگا، سندھ ہمیں ڈکٹیشن تونہیں دے سکتا کہ ہم سیلاب کے پانی کا کیا کریں گے۔

واضح رہے کہ دریائے سندھ سے 6 کینالز نکالنے کے خلاف سندھ کے مختلف شہروں میں احتجاج جاری ہے جب کہ وکلا کی جانب سے سکھر ببرلو بائی پاس پر دیا گیا دھرنا بھی تاحال جاری ہے جس کے باعث سندھ اور پنجاب کے درمیان ٹریفک معطل ہے۔

دوسری جانب وزیراعظم کے مشیر برائے سیاسی امور رانا ثنااللہ اور وزیر اطلاعات سندھ شرجیل میمن کے درمیان اس معاملے پر مذاکرات کرنے اتفاق ہوا تھا۔

من وامان کی فضاء برقرار رکھنے کیلئے لاہو رپولیس کی جرائم پیشہ افراد کے خلاف بھرپورکارروائیاں جاری ہیں۔

تفصیلات کے مطابق نواب ٹاؤن چوکی ایل بلاک پولیس نے سوشل میڈیا پر اسلحہ کی نمائش وہوائی فائرنگمیں ملوث ملزم کوگرفتار کر لیا۔گرفتار ملزم محمد مزمل کی میر داد چوک کے قریب شناخت کی گئی۔ملزم کے قبضہ سے 223 بور رائفل و گولیاں برآمدکی گئیں۔ اسی طرح لوہاری گیٹ پولیس نے واردات کی منصوبہ بندی ناکام بنا دی۔گندے نالے کے قریب چھپے دو رکنی ریکارڈ یافتہ موٹر سائیکل چور گروہ کو گرفتارکر لیا۔ گرفتار ملزمان میں ثاقب اور ساتھی ذیشان شامل ہیں۔ ملزمان کے قبضہ سے دو موٹر سائیکلیں،غیر قانونی اسلحہ اور ماسٹر چابیاں برآمدکی گئیں۔ ملزمان سٹریٹ کرائم کی وارداتوں میں پولیس کو مطلوب تھے۔

مصطفی آباد پولیس نے دوران پٹرولنگ 02 منشیات فروش گرفتار کر لیئے۔ منشیات فروش خالد اور احتشام کو سپلائی دیتے ہوئے رنگے ہاتھوں کو گرفتار کیا گیا۔ ملزمان کے قبضہ سے 300 گرام آئس، پستول اور گولیاں برآمدہوئیں۔ ملزمان نے تعلیمی اداروں،ہوسٹلز، کالجز کے اطراف میں منشیات بیچنے کا اعتراف کیا۔ چوکی نیاز بیگ پولیس نے کارروائی کرتے ہوئے سنوکر پر جواء کھیلتے ہوئے 7 قمار باز گرفتار کر لئے۔ ملزمان میں عدنان، محبوب، سمران، عمران، الماس، حسیب اور عمران شامل ہیں۔ ملزمان کے قبضہ سے ہزاروں روپے ٹکڑی رقم برآمد کی گئی۔ ملزمان نعیم سنوکر کلب سرشاد ٹاؤن گلی نمبر 3 میں سنوکر پر چیک جواء کھیل رہے تھے۔