Category: لاہور

عمران خان کی قیادت میں پاکستان ایک عظم فلاحی ریاست بنے گا ‘ملک شاہ محمدخان

پشاور ۔ 31 جولائی (اے پی پی)پاکستان تحریک انصاف پی کے89بنوں کے ایم پی اے ملک شاہ محمد خان نے کہا ہے کہ وزیر اعظم عمران خان نے قوم سے کئے ہوئے وعدے پورے کئے ہیں سابق وزیر اعظم سمیت کرپشن کے بڑے بڑے سیاستدانوں کو جیلوں میں بند کردیا ہے اور امریکہ سمیت تمام ممالک میں پاکستان کو عزت دی ہے اور باقی وعدے بھی انشاء اللہ جلد پورے کریں گے موجودہ مہنگائی کی ذمہ داری سابقہ حکومتوں پر عائد ہوتی ہے سابقہ حکمرانوں کے کرپشن کی وجہ سے پاکستان قرضوں کے دلدل میں ڈوب گیا ‘ان خیالات کا اظہار انہوں نے میڈیا سے بات چیت کرتے ہوئے کہا انہوں نے کہا کہ وزیر اعظم عمران خان کی قیادت میں پاکستان ایک عظم فلاحی ریاست بنے گا ‘عمران خان نے مشکل وقت میں اقتدار سنبھالا ہے لیکن ان کا حوصلہ بلند ہے اپوزیشن جماعتوں کا احتجاج عوام کے مسائل کے حل کیلئے نہیں بلکہ جمہوری نظام کی گاڑی کو پٹڑی سے اتارنے کیلئے ہے لیکن عوام کے سامنے ان کا چہرہ بے نقاب ہوگیا ہے 25مئی کی طرح اکتوبر کا ڈرامہ بھی فلاپ ہوگا ‘انہوں نے کہا کہ ضم شدہ قبائلی اضلاع میں حالیہ انتخابات میں تحریک انصاف کی کامیابی اس بات کی دلیل ہے کہ تحریک انصاف قبائلی اضلاع میں بھی مقبول ترین پارٹی بن چکی ہے اور قبائلی اضلاع کی عوام میں اب شعور آگیا ہے ۔

انجینئرنگ یونیورسٹی میں فائنل ائیر طلبہ کے پراجیکٹس کی نمائش

پشاور ۔ 31 جولائی (اے پی پی)انجینئرنگ یونیورسٹی پشاور میں میکینکل انجینئرنگ ڈیپارٹمنٹ کے فائنل ائیر کے طلبہ کے پراجیکٹس کی نمائش منعقد ہوئی جس میں 43 پراجیکٹس نمائش کیلئے رکھے گئے تھے نمائش میں 200طلبہ نے حصہ لیا ۔ رجسٹرار انجینئر ڈاکٹر خضر اعظم خان نے نمائش کا افتتاح کیا ۔ انہوں نے طلبہ کی کوششوں کو سراہتے ہوئے کہا کہ طلبہ پر فخر ہے جوہ تعلیمی سرگرمیوں میں نمایاں کارکردگی کے ساتھ ساتھ تخلیقی کاموں میں بھی بڑھ چڑھ کر حصہ لے رہے ہیں ، یہ امر خوش آئند ہے کہ طلبہ نے تخلیقی کام کے ساتھ ساتھ تحقیق کو بھی اپنے پراجیکٹس کا حصہ بنایا ہے ۔ انہوں نے انڈسٹری پرزور دیا کہ اپنی ضروریات کو پورا کرنے کیلئے طلبہ کو موقع دیں تاکہ وہ اپنی صلاحیتوں کو بروئے کار لاتے ہوئے ملک کو درپیش مسائل کے حل میں کردار ادا کرسکیں ۔ اختتامی تقریب کے مہمان خصوصی چیئرمین میکینکل ڈیپارٹمنٹ پروفیسر ڈاکٹر محمد نعیم خان تھے جنہوں نے نمائش میں طلبہ کو خراج تحسین پیش کیا ۔

افسران عوام کے خادم، سہولیات کی فراہمی میں دقیقہ فروگزاشت نہیں کریں گے، محمدعابد خان

پشاور ۔ 31 جولائی (اے پی پی) جوڈیشل کمپلیکس کاٹلنگ مردان میں کھلی کچہری، ڈپٹی کمشنر محمد عابد خان وزیر ، ایم پی اے ملک شوکت اور تمام محکموں کے سربراہان کی شرکت، عوام نے مسائل اور شکایات کے انبا ر لگادئیے ۔ ڈپٹی کمشنر مردان محمد عابد خان وزیر اور ایم پی اے ملک شوکت نے ماتحت محکموں کے افسران پر واضح کیا کہ وہ سروسز کے فراہمی میں کوئی دقیقہ فروگزاشت نہیں کریں گے ۔ کیونکہ وہ حاکم نہیں بلکہ خادم بنا دیے ہیں ۔ کھلی کچہریوں کا مقصد عوام کے مسائل ان کے دہلیز پر حل کرنا ہوتا ہے ۔ گڈ گورنس ترقی کی بنیادی اکائی ہے ۔ عوام اپنے حقوق کے حصول کے لئے سوشل پریشر برقرار رکھیں اور حکومتی اداروں سے تعاون کریں ۔ انہوں نے ایڈیشنل اسسٹنٹ کمشنر کے سربراہی میں کمیٹی تشکیل دی ۔ جو کہ واپڈا اور ٹرانسفارمروں کی خرابی کا جائزہ لے گی اور یہ چھان بین کرے گی کہ سروسز کی فراہمی میں عوام سے کوئی پیسہ تو وصول نہیں کیا جارہا ۔ بائیزئی ایریگیشن سکیم کے حوالے سے انہوں نے کہا کہ مردان کی سطح پر تشکیل دیا گیا ٹاسک فورس میں یہ مسئلہ اٹھایا جائے گا ۔ تاکہ واٹرمنیجمنٹ کے درپیش مسائل ہنگامی بنیادوں پر حل کئے جائیں اور آبپاشی کے معاملات درست سمت کی طرف موڑ سکیں ۔ سوات موٹر وے کے متاثرین کو معاوضے کے ادائیگی کے لئے خصوصی ہدایات جاری کئے گئے ۔

سی سی پی او کریم خان کی تھانہ جات کے محرران کیساتھ اجلاس کا انعقاد

پشاور ۔ 31 جولائی (اے پی پی)سی سی پی او پشاو کریم خان نے ملک سعد شہید پولیس لائن میں ضلع بھر کے تمام تھانوں کے محرران کے ساتھ خصوصی اجلاس کا انعقاد کیا ۔ تفصیلات کے مطابق گزشتہ روز ملک سعد شہید پولیس لائن میں سی سی پی او کریم خان کی محرران کیساتھ اہم اجلاس کا انعقاد کیا گیا جس میں ضلع بھر کے تمام تھانوں کے محرران نے شرکت کی ۔ اجلاس کے دوران سی سی پی ا و کریم خان نے پولیس محررزکو تھانہ میں آنے والے سائلین کیساتھ خوش اسلوبی سے پیش آنے اور ان کے ساتھ ہر قسم کے تعاون کی ہدایت کی جبکہ سائلین کو درپیش مسائل کا بر وقت ازالہ کرنے کی ہدایت بھی کی ۔ انہوں نے کہا کہ روز مرہ کے حالات اورہونے والے کارروائیوں کا اندراج روزنامچے میں یقینی بنائےں ،تھانے کی سطح پر محرر سٹاف سے میڈیا فوکل پرسن کا انتخاب کریں اور جو واقعہ رونما ہونے کی صورت میں میڈیا حضرات کو حالات سے بر وقت آگاہ کریں ۔ سی سی پی او کریم خان نے کہاکہ اپنے پیشہ ورانہ امور میں دلچسپی لے کر مہارت حاصل کریں ۔ انہوں نے آخر میں تمام محرران کو اگاہ کر تے ہوئے کہا کہ عوام کو یہ پیغام جانا چاہیے کہ ہم آپ کے مدد گار ہیں اور ہر مشکل یا تکلیف میں پولیس کو مدد کے لئے مدد پکار سکتے ہیں ،پولیس فوری طور انکی ہر آواز پر لبیک کہے گی ۔

ترجمان وزیراعلی پنجاب ڈاکٹر شہباز گل کا سنٹرل پولیس آفس کادورہ

 آئی جی پنجاب کیپٹن (ر) عارف نواز خان سے ملاقات کے دوران پبلک سروس ڈلیوری کے پراجیکٹس پر تبادلہ خیال کیا گیا
حوالات میں مانیٹرنگ کیلئے کیمروں کی تنصیب اور اورتمام اضلاع میں موبائل خدمت مراکز کا قیام قابل ستائش ہے۔ڈاکٹر شہباز گل
لاہور31جولائی:……  وزیر اعلی پنجاب کے ترجمان ڈاکٹر شہباز گل نے سنٹرل پولیس آفس میں آئی جی پنجاب کیپٹن (ر) عارف نواز خان سے ملاقات کی۔ دوران ملاقات عوامی شکایات کے بروقت ازالے کیلئے کئے جانے والے اقدامات بالخصوص 8787آئی جی پی کمپلینٹ مینجمنٹ سروس، پولیس خدمت مراکز اور پولیس اسٹیشن ریفارمزکے متعلق تفصیلی تبادلہ خیال کیا گیا۔ آئی جی پنجاب نے ڈاکٹر شہباز گل کو سمارٹ اینڈ کمیونٹی پولیسنگ کے حوالے سے شروع کئے گئے پراجیکٹس کے بارے میں آگاہ کرتے ہوئے بتایا کہ موجودہ حکومت کے ویژن کے مطابق عوامی مسائل کا فوری ازالہ اور شہریوں کو ہر ممکن سہولیات کی فراہمی پنجاب پولیس کی اولین ترجیحات میں شامل ہے اسی لئے انفارمیشن ٹیکنالوجی کے استعمال سے شروع کئے گئے پراجیکٹس بالخصوص فرنٹ ڈیسک، 8787آئی جی پی کمپلینٹ سنٹر اور پولیس خدمت مراکزکی ورکنگ کو مزید موثر بنایا جارہا ہے جبکہ پولیس کے ورکنگ سسٹم کو جدید سافٹ وئیرز کی مدد سے عصر حاضر کے تقاضوں سے ہم آہنگ کرتے ہوئے جدید خطوط پر استوار کردیا گیا ہے جس سے نہ صرف شہریوں کو درپیش مسائل کا حل ترجیحی بنیادوں پر ممکن ہورہا ہے بلکہ عوام اور پولیس کے درمیان اعتماد سازی کی فضا بھی مضبوط ہورہی ہے۔ انہوں نے مزید کہا کہ تمام اضلاع میں ایس پی کمپلینٹس کی تعیناتی سے شہریوں کو ایف آئی آر کے اندراج میں حائل مشکلات میں خاطر خواہ کمی آئی ہے۔
    ڈاکٹر شہباز گل نے8787 آئی جی پی کمپلینٹ سنٹر اور مانیٹرنگ روم کے دورے کے دوران مختلف پراجیکٹس کی ورکنگ کا جائزہ بھی لیا۔ اس موقع پر ڈی آئی جی ڈی اینڈ آئی احسن یونس اور اے آئی جی کمپلینٹس زاہد نواز مروت نے بریفنگ دیتے ہوئے بتایا کہ 8787آئی جی پی کمپلینٹ سروس پر صوبے کے تمام اضلاع سے موصول ہونے والی درخواستوں پر بروقت کاروئی کو یقینی بنایا جاتا ہے اور ایس او پیز کی خلاف ورزی پر ہر مہینے سینکڑوں ایف آئی آر درج کروائی جارہی ہیں۔ مانیٹرنگ روم کے دورے کے دوران ڈاکٹر شہباز گل نے حوالات میں کیمروں کی تنصیب اور مانیٹرنگ کو انقلابی اقدام قرار دیتے ہوئے کہا کہ آئی جی پنجاب کایہ اقدام روایتی تھانہ کلچر کی تبدیلی میں انقلابی کردار ادا کرے گا۔ انہوں نے مزید کہا کہ جدید ٹیکنالوجی کے استعمال سے پنجاب پولیس کے شروع کردہ تمام پراجیکٹس قابل ستائش ہیں اور ان سے پنجاب پولیس کو عوام دوست اور پیشہ ورانہ طور پر مزید مضبوط فورس بنانے کا عمل تیز ہوجائے گا۔ انہوں نے مزید کہا کہ دہشت گردی کے خلاف جنگ میں پنجاب پولیس کے جوان فرنٹ لائن سولجرز کا کردار ادا کررہے ہیں اور معاشرے میں امن و امان کی فضا برقرار رکھنے میں پنجاب پولیس کے افسران وجوانوں کی قربانیاں لازوال ہیں۔ اس موقع پر ایڈیشنل آئی جی آپریشنز انعام غنی، ڈی آئی جی لیگل جواد احمد ڈوگر اور اے آئی جی کمپلینٹس زاہد نواز مروت سمیت دیگر افسران بھی موجود تھے۔ملاقات کے اختتام پر آئی جی پنجاب نے ڈاکٹر شہباز گل کو پنجاب پولیس کا یادگاری سووینئیر بھی دیا۔
٭٭٭٭

پاکستان فزیکل ڈس ایبیلٹی کرکٹ ٹیم ورلڈ سیریز میں شرکت کیلئے لندن روانہ ہو گئی

کراچی ۔ 31 جولائی (اے پی پی) پاکستان فزیکل ڈس ایبیلٹی کرکٹ ٹیم نہار عالم کی قیادت میں شیڈول نیٹ ویسٹ فزیکلی ڈس ایبیلیٹی ورلڈ سیریز میں شرکت کیلئے بدھ کی صبح قائد اعظم انٹر نیشنل ایئرپورٹ سے لندن روانہ ہوگئی ۔ پاکستانی ٹیم میزبان انگلینڈ کے علاوہ بھارت، بنگلہ دیش اور افغانستان کے خلاف ورلڈ سریز میں سنگل لیگ کی بنیاد پر مقابل ہونگی ۔ پوائنٹس ٹیبل پر ٹاپ کرنے والی ٹیم براہ راست فائنل کےلئے کوالیفائی کرے گی جبکہ دوسری اور تیسری پوزیشن کی ٹی میں پلے آف میچ میں مدمقابل آئیں گی ۔ پلے آف میچ کی فاتح ٹیم فائنل کےلئے کوالیفائی کرے گی ۔ فائنل اور سیمی فائنل میچز 13 اگست کو کھیلے جائیں گے ۔ ٹیم کی روانگی سے قبل ائیر پورٹ پر میڈیا سے گفتگو کرتے ہوئے قومی ٹیم کے کپتان نہار عالم نے کہا کہ قومی ٹیم کے تمام کھلاڑیوں نے بھرپور تیاری کی ہے اور میں پر امید ہوں جس طرح پاکستان نے گزشتہ سال 2018ء میں ٹرانیشن سیریز میں میزبان انگلینڈ کو شکست دی تھی ہماری ٹیم ورلڈ سیریز جیت کر قوم کو جشن آزادی کا تحفہ دے گی ۔ نہار عالم نے مزید کہا کہ ہم ہر میچ کو صرف میچ سمجھ کر کھیلیں گے ۔ روایتی حریف بھارت پاکستان کا ٹاکرا 9 اگست کو ہوگا ۔ کوچ سابق فرسٹ کلاس کرکٹرز محمد جاوید نے کہا کہ قومی ٹیم تمام ٹریننگ میں اور اس قبل فٹنس پر کافی محنت کی ہے اور امید ہے کہ سیریز میں تمام ٹیموں کو ٹف ٹائم دیں گے ۔ آخر میں ٹیم مینجر اور ٹور ہیڈ امیرالدین انصاری نے قومی ٹیم کے ٹائیل اسپانسر انٹر لوپ لیمٹڈ سپورٹرز ہنکون اور سندھ گورنمنٹ کا دل کی گہرائیوں سے شکریہ ادا کیا ۔ انہوں نے کہا کہ ہم پی سی بی کے اور خاص طور پر ایم ڈی وسیم خان کا بے حد شکریہ ادا کرتے ہیں جن کی ذاتی توجہ سے ٹریننگ کیمپ کےلئے کھلاڑیوں کی این سی اے کراچی میں رہائش، نیٹ پریکٹس اور میچیز کھیلنے میں بہت آسانی ہوئی ۔ 16 رکنی ٹیم میں نہار عالم (کپتان)، جہانزیب ٹوانہ (نائب کپتان)، مطلوب قریشی، محمد شہباز، حسنین عالم، سیف اللہ (وکٹ کیپر)، عبدا اللہ اعجاز، فرحان سعید، واجد عالم، ماجد حسین، حمزہ حمید، حماد شوکت، زبیر سلیم، واقف شاہ، کاشف نواز اور محمد حارث شامل ہیں ۔ ٹیم آفیشلز میں امیر الدین انصاری (ٹیم منیجر)، محمد جاوید(کوچ)، اقبال امام(کوچ)، جاوید اشرف(اسسٹینٹ منیجر کم کوچ)، راشد قریشی (ٹرینر)، آصف گلزار(فزیو)، محمد نظام (میڈیا منیجر) شامل ہیں ۔

پاک سرزمین پارٹی کے چیئرمین سید مصطفیٰ کمال نے کہا کہ 12 سال میں کے ای ایس سی کا نام تبدیل کر کے کراچی الیکٹرک رکھنے کے علاوہ اس میں کوئی مثبت تبدیلی نہیں آئی ہے.

اب اسے اپنا نام قاتل الیکٹرک رکھ لینا چاہیے۔ شہر میں صرف چند گھنٹوں کی بارش میں کرنٹ لگنے کے واقعات میں 21 لوگ جانبحق ہو گئے جن میں چار معصوم بچے بھی شامل ہیں۔ وزیراعظم عمران خان اور وزیر اعلیٰ سندھ مراد علی شاہ خاموش تماشائی بنے ہوئے ہیں۔ کوئی بھی دل رکھنے والا شخص ان واقعات پر دہل جائے لیکن حکمرانوں کے کانوں پر جوں تک نہیں رینگی۔ 12 سال پہلے بھی لوگ مرا کرتے تھے اور آج بھی لوگ کرنٹ لگنے سے مر رہے ہیں۔ بارشوں میں صرف کے الیکٹرک کی بے حس انتظامیہ ہی نہیں بلکہ ملک کو چلانے والی اشرافیہ بے نقاب ہو گئی ہے۔ عوام اب حکمرانوں سے مایوس ہو چکے ہیں۔

کراچی کی عوام میں احساس محرومی بڑھ رہا ہے، یہاں لوگ مر رہے ہیں اور ان کا کوئی پرسانِ حال نہیں۔ ان خیالات کا اظہار سید مصطفیٰ کمال نے پارٹی کے بزنس فورم کے ذمے داران سے گفتگو کرتے ہوئے کیا۔ انہوں نے کہا کہ کے الیکٹرک کراچی والوں کو مہنگی ترین بجلی دینے کے باوجود عوام کی جان و مال کا تحفظ تک یقینی بنانے میں مکمل طور پر ناکام ہو چکا ہے۔ عوام کا مالی تحفظ تو درکنار 12 سال گزرنے کے باوجود کے الیکٹرک نے کراچی سے بجلی کی لوڈ شیڈنگ کا مکمل خاتمہ تک نہیں کیا ہے۔ کراچی میں کاروباری زندگی مفلوج ہو کر رہ گئی ہے۔ صنعتیں بند ہو رہی ہیں، بے روزگاری تیزی سے پھیل رہی ہے۔ حکمرانوں کو کراچی سے ٹیکسز تو چاہئے لیکن اس کی دن بدن بگڑتی ہوئی صورتحال کو بہتر بنانے کی ذمے داری لینے کے لیے کوئی تیار نہیں ہے۔

ٹیکس کے بدلے عوام کو سہولیات تو دور بنیادی انسانی حقوق تک میسر نہیں ہیں۔ وفاقی حکومت سارا ملبہ صوبائی حکومت پر جبکہ صوبائی حکومت شہری انتظامیہ پر ڈالنا چاہتی ہے جو اختیارات کا رونا روتے رہتے ہیں جبکہ پی ایس پی موجودہ اختیار کے ساتھ بھی کراچی کو پہلے کی طرح بحال کر سکتی ہے۔ ان حالات میں عوام کس سے سوال کریں، موجودہ حکمران ان بے گناہ لوگوں کے گھروں تک بھی نہیں گئے بلکہ مذمتی بیانات دے کر اپنی ذمے داریاں پوری کر رہے ہیں۔ انہیں قبر اور آخرت تک کا خوف نہیں ہے۔ پاک سرزمین پارٹی ان سب مظالم پر خاموش نہیں رہے گی بلکہ ہر ممکن سطح پر کراچی والوں کی آواز بلند کرے گی۔ انہوں نے کہا کہ عوام کو بھی سوچنا ہوگا کہ وہ کب تک ظلم برداشت کریں گے اور یونہی مرتے رہیں گے، خاموش رہ کر ظلم سہنے والے ظالموں کے ساتھی ہیں، بارشیں گزرنے کے بعد لوگ اس قیمتی انسانی جانوں کے ضیاع کو بھول جائیں گے اور کیا ضمانت ہے کہ اگلے سال اسی قسم کے واقعات دوبارہ رونما نہیں ہونگے۔

سپریم کورٹ کے جسٹس سید منصور علی شاہ اور جسٹس یحییٰ آفریدی کا لاہور ہائیکورٹ کا دورہ

لاہور ۔ 31 جولائی(اے پی پی )سپریم کورٹ کے جسٹس سید منصور علی شاہ اور جسٹس یحییٰ آفریدی گز شتہ روز لاہور ہائیکورٹ دورے پر آئے ۔ چیف جسٹس لاہور ہائیکورٹ نے سپریم کورٹ کے ججز کا استقبال کیا ۔ سپریم کورٹ کے جسٹس سید منصور علی شاہ اور جسٹس یحییٰ آفریدی کو چیف جسٹس لاہور ہائیکورٹ سردار شمیم خان نے چائے پر مدعو کیا تھا، ملاقات میں لاہور ہائیکورٹ کے سینئر ترین جج جسٹس مامون الرشید، جسٹس شاہد مبین ، جسٹس طارق سلیم شیخ سمیت دیگر ججز نے بھی شرکت کی ۔ ملاقات میں سپریم کورٹ کے ججز نے ماڈل کورٹس کی کارکردگی اور جینڈر بیس وائلنس سے متعلق ورکشاپ کے انعقاد پر چیف جسٹس لاہور ہائیکورٹ کے اقدامات کی تعریف کی ۔

وزیراعلیٰ پنجاب کا مختلف محکموں کا اچانک دورہ، سیکرٹریز کے کمروں میں گئے، حاضری چیک کی

 وزیراعلیٰ نے اپنے کام کیلئے آئے لوگوں سے ہاتھ ملایا، ان کے مسائل کے حل کیلئے ہدایات جاریں کیں. لاہور31 جولائی:  وزیراعلیٰ پنجاب سردار عثمان بزدارنے آج مختلف محکموں کا اچانک دورہ کیا۔ وزیراعلیٰ نے بغیر اطلاع لائیوسٹاک، خوراک، زراعت، صنعت اور دیگر محکموں کا دورہ کیا اور افسران کی حاضری چیک کی۔ وزیراعلیٰ سیکرٹریز کے کمروں میں بھی گئے۔ وزیراعلیٰ نے اپنے کام کیلئے آئے لوگوں سے مسائل پوچھے اور بزرگ خاتون سے فائل لے کر مسئلہ فوری طور پر حل کرنے کیلئے ہدایات دیں۔ وزیراعلیٰ نے اس موقع پر گفتگو کرتے ہوئے کہا کہ بغیر اطلاع محکموں کے دورے کرنے سے حقائق کا علم ہوتا ہے اور مجھے خوشی ہے کہ آج دفاتر میں افسران موجود ہیں۔ عوام کے مسائل کے حل کیلئے اوپن ڈور پالیسی پر سختی سے عملدرآمد کرایا جا ئے گا۔ وزیراعلیٰ نے کہا کہ تحریک انصاف کی حکومت نے سرکاری محکموں کا روایتی کلچر یکسر بدل دیا ہے اور اب سرکاری محکموں کے دروازے عوام کیلئے کھلے ہیں۔ انہوں نے کہا کہ عوام ہی میرا اثاثہ ہیں، ان کے مسائل کو ذاتی سمجھ کر حل کرتا ہوں۔ وزیراعلیٰ نے اپنے مسائل کے حل کیلئے آئے لوگوں سے ہاتھ ملایا ان کے مسائل کے حل کیلئے ہدایات جاریں کیں۔