Category: لاہور

محکمہ داخلہ پنجاب نے جمعۃ الوداع، یوم القدس اور عیدالفطر سیکیورٹی کے حوالے سے اہم احکامات جاری کر دیئے ہیں.

ترجمان محکمہ داخلہ پنجاب کے مطابق جمعۃ الوداع اور عیدالفطر کے موقع پر فول پروف حفاظتی انتظامات کے لیے قانون نافذ کرنے والے اداروں کو ہدایات جاری کی گئی ہیں۔ محکمہ داخلہ پنجاب کے مراسلے میں درج ہے کہ نماز کے دوران 3 ٹئیرز پر مبنی فول پروف سیکیورٹی انتظامات یقینی بنائے جائیں، تمام عبادت گاہوں کی کڑی نگرانی کی جائے اور اضافی سیکیورٹی اہلکاروں کو تعینات کیا جائے۔ عبادت گاہوں کیلئے ایک مرکزی داخلی دروازہ رکھا جائے اور تمام شہری اسی دروازے کو استعمال کریں۔ اہم مقامات پر خصوصی پکٹس قائم کی جائیں جہاں سیکیورٹی اہلکار حفاظتی کٹ میں ہوں۔ خواتین نمازیوں کے لیے عبادت گاہوں پر لیڈی پولیس اہلکار تعینات ہوں گی۔

محکمہ داخلہ پنجاب نے ہدایت کی ہے کہ سپیشل برانچ اور بم ڈسپوزل سکواڈز کے ذریعے ضروری آپریشن بروقت مکمل کیے جائیں۔ واک تھرو گیٹس، سی سی ٹی وی کیمرے نصب ہوں اور عبادت گاہوں میں داخل ہونے والے ہر شخص کی بذریعہ میٹل ڈیٹیکٹر جسمانی تلاشی لی جائے۔ اسی طرح مناسب پارکنگ ایریاز پنڈال سے محفوظ فاصلے پر مختص کیے جائیں اور مساجد اور امام بارگاہوں کے اطراف میں موثر کومبنگ آپریشنز مکمل کیے جائیں۔ ہوٹلز، ریسٹورنٹس، عید بازاروں اور عوامی مقامات کی سیکیورٹی پر خصوصی توجہ دی جائے۔محکمہ داخلہ پنجاب نے ہدایت کی ہے کہ ضلعی انتظامیہ بین المذاہب ہم آہنگی کو برقرار رکھنے کیلئے متعلقہ رہنماؤں سے رابطے میں رہیں۔ قابل اعتراض تقاریر اور لاؤڈ سپیکر کے غلط استعمال پر فوری کاروائی کی جائے اور عبادت گاہوں کے ارد گرد بھکاریوں پر کڑی نظر رکھی جائے۔ کالعدم تنظیموں اور فورتھ شیڈول میں شامل افراد کی سخت نگرانی کو یقینی بنایا جائے۔ عبادت گاہوں کے اطراف ٹریفک کی روانی کیلئے مؤثر ٹریفک پلان ترتیب دیا جائے۔ پنجاب بھر میں آتشیں اسلحہ رکھنے اور اسکی نمائش پر پابندی کا نفاذ کیا جائے۔ تمام شہروں اور بین الصوبائی داخلی خارجی راستوں پر حفاظتی چیک پوسٹس قائم کی جائیں۔ دوران عید تفریحی مقامات کی حفاظت کا بھی خیال رکھا جائے اور ممتاز مذہبی و سیاسی رہنماؤں کے تحفظ کیلئے خصوصی اقدامات کیے جائیں۔ ڈیزاسٹر مینجمنٹ سے متعلق اداروں ریسکیو 1122، سول ڈیفنس، بم ڈسپوزل سکواڈ اور محکمہ صحت کو ہائی الرٹ پر رکھا گیا ہے۔ کسی بھی ناخوشگوار واقعے سے بچنے کیلئے تمام متعلقہ سٹیک ہولڈرز کے ساتھ بروقت انفارمیشن شیئرنگ کی ہدایت کی گئی ہے، محکمہ داخلہ پنجاب نے ہدایت کی ہے کہ تمام ڈپٹی کمشنرز، سی سی پی او لاہور، سی پی اوز اور ڈی پی اوز سیکیورٹی پلان پر عملدرآمد یقینی بنائیں۔

پاکستان مسلم لیگ کے صدر چودھری شجاعت حسین نے کہا ہے کہ بلوچستان کا مسئلہ سیاسی ہے، نواز شریف آگے آئیں اہل سیاست ان کے ساتھ کھڑے ہوں گے۔

نجی ٹی وی دنیا نیوز سے بات چیت کرتے ہوئے چودھری شجاعت حسین نے کہا کہ عید کے بعد نواز شریف کے پاس جاتی امرا جاوں گا، بلوچ لیڈرشپ کو اعتماد میں لے کر مسائل کا حل نکالا جا سکتا ہے،نواز شریف نے اپنی حکومت میں بلوچ لیڈر شپ پر اعتماد کیا تھا، دہشت گردی کے خلاف فوج کا کردار ڈھکا چھپا نہیں، قومی قیادت کو ان کے پیچھے کھڑا ہونا ہو گا، فوج قومی ہے، قوم اس کی پشت پر کھڑی ہے، دشمن کے عزائم ڈھکے چھپے نھیں ہم آنکھیں کھولنے کو کیوں تیار نہیں، دشمن بلوچستان کی معاشی اہمیت سے واقف ہے اسی لئے ٹارگٹ کر رہا ہے۔ عوام کے لئے روزی روٹی حکومت کی ترجیح ہونی چاہئے، سیاست میں دشمنی کا رحجان ختم ہونا چاہئے، سیاستدانوں کے سر جوڑے بغیر سیاسی تناو ختم نہیں ہو گا، دہشت گردی کے خلاف اپوزیشن سے بات کرنا ہو گی۔

بانی پاکستان تحریک انصاف (پی ٹی آئی) عمران خان نے 9 مئی کےآٹھ مقدمات میں ضمانتوں کی درخواستوں کی جلد سماعت کے لیے لاہور ہائیکورٹ سے رجوع کر لیا ہے۔

عمران خان نے اپنے وکیل بیرسٹر سلمان صفدر کی وساطت سے لاہور ہائیکورٹ میں متفرق درخواستیں دائر کیں۔ درخواست میں بانی پی ٹی آئی نے موقف اختیار کیا کہ انہیں سیاسی انتقام کا نشانہ بناتے ہوئے سازش کے تحت ان مقدمات میں نامزد کیا گیا ہے۔بانی پی ٹی آئی نے درخواست میں مزید کہا کہ 24 مارچ کو دو رکنی بنچ نے ان کیسز کی سماعت کے لیے تاریخ مقرر کی تھی، لیکن بنچ کی عدم دستیابی کی وجہ سے سماعت نہ ہو سکی اور کاز لسٹ منسوخ کر دی گئی۔دائر کردہ درخواست میں عدالت سے استدعا کی گئی ہے کہ 9 مئی کے آٹھ مقدمات میں عمران خان کی درخواست ضمانتوں کی جلد سماعت کے لیے نیا شیڈول مقرر کیا جائے تاکہ ان کے مقدمات کا فوری طور پر فیصلہ کیا جا سکے۔

لاہور ہائیکورٹ ،نظر بندی کے قانون کے خلاف دائر درخواست پر سماعت ہوئی

عدالت نے درخواست پر فیصلہ محفوظ کرلیا ،چیف جسٹس مس عالیہ نیلم نے زینب عمیر کی درخواست پر سماعت کی ،ایڈووکیٹ جنرل پنجاب امجد پرویز عدالت کے روبرو پیش ہوئے ،وکیل درخواست گزار نے کہا کہ ایڈووکیٹ جنرل آفس نے 27 اے کے نوٹس کا جواب فائل کیا جو ایک دو دن پہلے ملا ،یہ کیس سننے کا اختیار اس بینچ کے پاس نہیں ہے،یہ کیس جسٹس امجد رفیق کے پاس لگنا تھا بڑی تفصیل سے انہوں نے کیس سنا ،جسٹس امجد رفیق نے قانون کے مطابق حکم امتناع دیا،

چیف جسٹس لاہور ہائیکورٹ جسٹس عالیہ نیلم نے کہا کہ جسٹس امجد رفیق ملتان بینچ میں کیسز کی سماعت کررہے ہیں ،وکیل درخواست گزاری نے کہا کہ جسٹس امجد رفیق کا بنچ 21 مارچ کو لاہور میں تھا،یہ کیس اس بنچ میں فیکس نہیں ہوسکتا ،جب سے نظر بندی کا سیکشن 3 معطل ہوا ہے نا آسمان گرا نا زمین کو کچھ ہوا،اب حکومت کو کیا ایسی ایمرجنسی ہوئی ہے وہ نظر بندی کے قانون پر حکم امتناع ختم کرنا چاہتی ہے،ایڈوکیٹ جنرل پنجاب نے کہا کہ ہماری متفرق درخواست صرف کیس پر جلد سماعت کی تھی،اس قانون کے حوالے سے سپریم کورٹ کے فیصلے موجود ہیں،وکیل اظہر صدیق نے کہا کہ یہ تمام دلائل اور سپریم کورٹ کے فیصلے جسٹس امجد رفیق سن چکے ہیں ،عدالت نے استفسار کیا کہ جسٹس امجد رفیق کون ہیں ،آپ خاموش رہے ایڈووکیٹ جنرل کو دلائل دینے دیں ،وکیل اظہر صدیق نے کہا کہ مائی لارڈ آپ کو کیس کا علم نہیں ہے ،چیف جسٹس لاہور ہائیکورٹ عالیہ نیلم نے کہا کہ میں سارا کیس پڑھ کر آئی ہوں آپ خاموش رہو ،وکیل اظہر صدیق نے کہا کہ میں پرسوں سے بیمار تھا میں صرف اس کیس کے لیے آیا ہوں،عدالت نے کہا کہ آپ لگ تو ٹھیک رہے ہو،ایڈوکیٹ جنرل پنجاب نے کہا کہ ہمارے ملک کی کسی عدالت نے نظر بندی کے قانون کے آپریشن کو معطل نہیں کیا .