Category: لاہور

محسن نقوی کو وزیر داخلہ اور چیئرمین پی سی بی کے عہدے سے ہٹانے کے لیے درخواست دائر کر دی گئی ہے

خاتون اشبا کامران کی درخواست میں سابق وزیراعظم اور محسن نقوی سمیت دیگر کو فریق بنایا گیا ہے،درخواست میں مؤقف اختیار کیا گیا ہے کہ الیکشن کمیشن بتائے کہ کیوں نگران حکومت نے محسن نقوی کو غیر قانونی طور پر چئیرمین پی سی بی تعینات کیا،الیکشن ایکٹ 2017 نگران حکومت کو اداروں کے سربراہ تعینات کرنے سے روکتا ہے، آئینی پابندی کے باوجود نگران وزیراعظم انوار الحق پنوں نے محسن نقوی کو چیئرمین پی سی بی تعینات کیا، محسن نقوی کی بطور چیئرمین پی سی بی تعیناتی کو غیر قانونی قرار دیا جائے،محسن نقوی کو وزیر داخلہ اور چیئرمین پی سی بی کے عہدے سے فوراً ہٹایا جائے،

یوٹیوبر رجب بٹ، نے ایک بار پھر اپنے 295 پرفیوم کے نام پر معافی مانگ لی ہے۔ ان کا نیا پرفیوم جب تنازعے کا شکار ہوا، تو وہ سعودی عرب پہنچ گئے اور وہاں عمرے کی سعادت حاصل کی۔ رجب بٹ نے خانہ کعبہ کے سامنے حرم شریف میں کھڑے ہو کر حالتِ احرام میں اس بات کا اظہار کیا کہ وہ کسی بھی بات کو جان بوجھ کر نہیں کر رہے تھے۔

رجب بٹ نے حرم شریف میں ریکارڈ کی گئی اپنی نئی ویڈیو میں کہا کہ "میں اس پاک جگہ پر کھڑے ہو کر حلفاً کہتا ہوں کہ میں نے کچھ بھی جان بوجھ کر نہیں کیا۔” انہوں نے انسٹاگرام پر شیئر کی گئی ویڈیو میں کہا کہ "سوشل میڈیا پر میرے بارے میں جو مسائل چل رہے ہیں، میں اس مقدس جگہ پر کھڑے ہو کر اور حلف لے کر یہ بات کہتا ہوں کہ میں نے کسی بھی طرح کا کوئی جان بوجھ کر عمل نہیں کیا۔”رجب بٹ نے مزید کہا کہ "جو کچھ بھی لاعلمی میں ہوا، اس کے لیے میں پہلے بھی معذرت کر چکا ہوں اور ایک بار پھر دل سے معذرت کرتا ہوں۔” انہوں نے لوگوں سے اپیل کی کہ "اپنے دلوں کو میرے لیے صاف کر لیں۔”

ویڈیو میں رجب بٹ نے علمائے کرام، پنجاب حکومت اور پاک فوج سے بھی اپیل کی کہ ان کے خلاف پیکا ایکٹ کے تحت درج مقدمے پر نظرثانی کی جائے اور انہیں انصاف دلوایا جائے۔ رجب بٹ نے اپنے وی لاگ میں اس بات کا ذکر کیا تھا کہ دفعہ 295 جو ان پر لگائی جا رہی ہے، وہ جھوٹ ہے، لیکن اس کے باوجود اس پر فتویٰ دیا گیا تھا۔آخر میں رجب بٹ نے کہا کہ "میں ایک بار پھر اللہ اور اس کے رسول ﷺ اور تمام مسلمانوں سے دل کی گہرائیوں سے معذرت کرتا ہوں۔”

پاکستانی قوم احتجاج میں شریک ہو کر غزہ کے باسیوں کے ساتھ یکجہتی کا ثبوت دے.سیف اللہ قصوری

پاکستان مرکزی مسلم لیگ کے سیکرٹری جنرل سیف اللہ قصوری نے پاکستانی قوم سے اپیل کی ہے کہ 27 رمضان ،جمعہ المبارک کو فلسطینی عوام سے اظہار یکجہتی اور اسرائیلی بربریت کے خلاف ملک گیر احتجاج کیا جائے،پوری قوم کو غزہ کے باسیوں کے ساتھ یکجہتی کرنی چاہئے تاکہ عالمی برادری کو واضح پیغام دیا جا سکے کہ پاکستانی عوام مظلوم فلسطینیوں کے ساتھ کھڑے ہیں۔مرکزی مسلم لیگ کے زیر اہتمام ملک بھر میں بعد نماز جمعہ احتجاجی مظاہرے کئے جائیں گے،سحر و افطار میں کانفرنسز و سیمینارز کا انعقاد کیا جائے گا

سیف اللہ قصوری کا کہنا تھا کہ اسرائیلی بربریت کا سلسلہ ماہ رمضان میں نہیں رکا، اسرائیل نے جنگ بندی توڑی،غزہ میں خواتین ، بچوں ،بزرگوں کو شہید کیا جا رہا،ایسے میں پاکستانی قوم کسی صورت خاموش نہیں رہ سکتی، مرکزی مسلم لیگ کے زیر اہتمام جمعہ کو ملک گیر احتجاج میں فلسطینیوں کے ساتھ اظہار یکجہتی کیا جائے گا،غزہ کےباسیوں نے حکومتوں، طاقتوں کی طرف دیکھنے، منتیں‌،التجائیں کرنے کی بجائے خود تیاری کی اور اللہ کی نصرت کے سہارے اسرائیل کے مقابلے میں خود میدان میں اترے، 15 ماہ کی جنگ میں فلسطینیوں نے اسرائیل کو جھکنےپر مجبور کر دیا، اسرائیل نے مسجدوں، ہسپتالوں،تعلیمی اداروں، شہروں پر حملے کئے،ہر طرف تباہی کا سامان پیدا کیا، 15 ماہ میں اسرائیل نے غزہ کو ملبےکا ڈھیر بنا دیا لیکن یہ اس سے بڑی حقیقت ہے کہ اسرائیل غزہ کی جنگ ہار چکا ہے.

سیف اللہ قصوری کا مزید کہنا تھا کہ غزہ میں اسرائیلی دہشت گردی بڑھتی رہی اورعالمی دنیا اس پر خاموش رہی، دنیا ظالم کے ساتھ کھڑی ہوئی،آج کے دور کی سب سے بڑی ہجرت غزہ کے باسیوں نے کی، غزہ فلسطینیوں کا ہے ، فلسطینیوں کووہاں سے کوئی نہیں نکال سکتا، پاکستانی قوم جمعہ کو اسرائیلی بربریت کے خلاف ہونے والے احتجاج میں شریک ہو کر غزہ کے باسیوں کے ساتھ یکجہتی کا ثبوت دے.پاکستان مرکزی مسلم لیگ فلسطینی مسلمانوں کی آزادی کے لئے آواز بلند کرتی رہے گی.

پاکستان کےاستحکام کے لیے اختلافات بھلا کر یکجہتی کا مظاہرہ کرنا ہوگا ، خالد مسعود سندھو
عوام کے حقوق کے تحفظ کے لیے ہر ممکن جدوجہد کریں گے.صدر مرکزی مسلم لیگ

پاکستان مرکزی مسلم لیگ کے صدر خالد مسعود سندھو نے کہا ہے کہ جعفر ایکسپریس پر حملہ عوام پاکستان اور ریاست پاکستان پر حملہ تھا،بدقسمتی سے ہم دہشتگردی کے خلاف بھی متحد نظر نہیں آ رہے ، وطن عزیز پاکستان کی سالمیت اور استحکام کے لیے آپسی اختلافات کو بھلا کر یکجہتی کا مظاہرہ کرنا ہوگا،میڈیا معاشرے کی اصلاح کا کام کرے، پاکستان میں قیام امن کیلئے مرکزی مسلم لیگ کام کر رہی ہے،عید کے بعد ملک گیر تحریک چلا کر قوم کو متحد کریں گے،اس ضمن میں میڈیا کا تعاون،ذمہ داری انتہائی اہم ہے

ان خیالات کا اظہار انہوں نےصحافیوں کے اعزاز میں منعقدہ افطار ڈنر کی تقریب کے موقع پر گفتگو کرتے ہوئے کیا، اس موقع پر مرکزی مسلم لیگ کے ترجمان تابش قیوم، انجنئیر مبین صدیقی، میڈیا کوآرڈینیٹر عبدالقدوس اور دیگر بھی موجود تھے، خالد مسعود سندھو کا کہنا تھا کہ آزاد صحافت پاکستان کی پہچان ہے،میڈیا معاشرے کی آنکھ اور کان ہے،میڈیا کا استعمال معاشرے کی تعمیر اور اصلاح کے لئے ہونا چاہئے، موجودہ حالات میں جہاں ملک میں دہشت گردی، بدامنی، بے روزگاری، غربت بڑھ چکی ہے،سیاسی تقسیم، انتشار ہے،قوم کو متحد کرنے کیلئے میڈیا کا کردار بہت اہم ہے.کوئی بھی معاشرہ عدل و انصاف کے بغیر کامیاب نہیں ہوسکتا،پاکستان مرکزی مسلم لیگ معاشرے کی تعمیر کیلئے کام کر رہی ہے،عوام کے حقوق کے تحفظ کے لیے ہر ممکن جدوجہد کریں گے۔

خالد مسعود سندھو کا مزید کہنا تھا کہ پاکستان مرکزی مسلم لیگ کراچی سے شروع ہونے والے روزگار سہولت پروگرام کا دائرہ کار پورے ملک میں بڑھا رہی ہے.عید کے بعد ملک بھر میں آئی ٹی ٹریننگ پروگرام کا آغاز کر کے نوجوانوں کو ہنر مند بنائیں گے،جس کا مقصد بےروزگار نوجوانوں کو روزگار کے مواقع فراہم کرنا اور معاشی استحکام کو فروغ دینا ہے۔

بارشیں اللہ کی رحمت، رمضان میں رب سے گناہوں کی معافی مانگنی چاہئے،سیف اللہ قصوری

پاکستان مرکزی مسلم لیگ کے سیکرٹری جنرل سیف اللہ قصوری نے محکمہ موسمیات کی جانب سے خشک سالی کا الرٹ جاری ہونے پر گہری تشویش کا اظہار کرتے ہوئے کہا ہے کہ بارشیں اللہ تعالیٰ کی رحمت ہیں،ماہ رمضان رحمتوں کا مہینہ، ہمیں رب سے گناہوں کی معافی مانگنی چاہئے،تاکہ رحمتوں والی بارش کا نزول ہو.

سیف اللہ قصوری کا کہنا تھا کہ پاکستان کو موسمیاتی تبدیلیوں کے باعث خشک سالی جیسے خطرناک چیلنجز کا سامنا ہے۔ موجودہ صورتحال زراعت، معیشت اور عوام کی روزمرہ زندگی پر سنگین اثرات ڈال سکتی ہے، اگر بروقت اقدامات نہ کیے گئے تو پانی کی قلت سے خوراک کا بحران پیدا ہو سکتا ہے،حکومت کو ہنگامی بنیادوں پر پانی کے ذخائر کی حفاظت اور آبی وسائل کے بہتر انتظام کے لیے فوری پالیسی بنانی چاہئے.

سیف اللہ قصوری نے پاکستانی قوم سے اپیل کرتے ہوئے کہا کہ رمضان المبارک کے بابرکت مہینے میں کثرت سے استغفار کریں، اپنے گناہوں کی معافی مانگیں اور رب تعالیٰ سے دعا کریں کہ وہ اپنی رحمت کے دروازے کھول دے ،بارشوں کا نزول ہو،ہمیں چاہیے کہ رمضان المباک کے بابرکت ایام میں نہ صرف اپنی اصلاح کریں بلکہ بطور قوم اللہ کی طرف رجوع کریں، تاکہ اس کی نعمتوں اور رحمتوں کا نزول ہو۔

لاہور: معروف ڈیلی وی لاگر، یوٹیوبر اور کانٹینٹ کری ایٹر رجب بٹ کے خلاف پیکا ایکٹ کے تحت ایک اور مقدمہ درج کر لیا گیا ہے۔ اس مقدمے میں جذبات کو مجروح کرنے کی دفعات بھی شامل کی گئی ہیں۔

میڈیا رپورٹس کے مطابق رجب بٹ کے خلاف درج کی گئی ایف آئی آر میں ان کی جانب سے حال ہی میں متعارف کروائے گئے نئے پرفیوم کا بھی ذکر کیا گیا ہے۔ مقدمے میں پیکا ایکٹ (پریوینشن آف الیکٹرانک کرائمز ایکٹ) کی مختلف دفعات کو شامل کیا گیا ہے۔یہ نیا مقدمہ لاہور کے تھانہ نشتر کالونی میں درج کیا گیا ہے۔ ذرائع کے مطابق، اس مقدمے میں رجب بٹ پر یہ الزام لگایا گیا ہے کہ ان کے متعارف کردہ پرفیوم کے نام اور اس کی تشہیری مہم نے مختلف حلقوں کے جذبات کو ٹھیس پہنچائی ہے۔

رجب بٹ کی جانب سے حال ہی میں لانچ کیے گئے پرفیوم پر سوشل میڈیا پر شدید ردِعمل دیکھنے میں آیا ہے۔ مختلف طبقات نے اس پرفیوم کے نام اور اس سے جڑی مارکیٹنگ حکمت عملی پر سخت تنقید کی ہے۔پولیس حکام کا کہنا ہے کہ ملزم کے خلاف قانون کے مطابق کارروائی عمل میں لائی جائے گی۔ مقدمے کے اندراج کے بعد مزید تحقیقات شروع کر دی گئی ہیں تاکہ معاملے کی گہرائی تک پہنچا جا سکے۔

یہ پہلا موقع نہیں کہ رجب بٹ کسی تنازع کا شکار ہوئے ہیں۔ اس سے پہلے بھی وہ اپنے متنازع بیانات اور سوشل میڈیا پر پوسٹ کیے گئے مواد کی وجہ سے خبروں میں رہ چکے ہیں۔ ان کے خلاف متعدد مقدمات پہلے بھی درج کیے جا چکے ہیں۔ماہرین کا کہنا ہے کہ اگر تحقیقات کے دوران رجب بٹ پر لگائے گئے الزامات ثابت ہو جاتے ہیں تو انہیں قانونی نتائج کا سامنا کرنا پڑ سکتا ہے۔ تاہم، اس کیس کی مزید پیش رفت آئندہ چند دنوں میں سامنے آئے گی۔