Category: لاہور

لاہور پولیس نے طالبہ کو ہراساں کرنے والے شخص کو گرفتار کرلیا۔

پولیس کے مطابق طالبہ نے 15 پر کال کی جس پر لٹن روڈ پولیس نے فوری کارروائی کرتے ہوئے ملزم کو موقع پر گرفتار کرلیا،ملزم حیب شمسی نے طالبہ کو ہراساں کرنے کے لیے تصاویر بنائیں تھیں۔ پولیس نے ملزم کا موبائل فون تحویل میں لے کر طالبہ کی تصاویر ڈیلیٹ کردیں۔ ملزم کے خلاف تحقیقات شروع کردی گئی ہیں۔

ایس پی سول لائنز ڈاکٹر عبدالحنان نے ایس ایچ او تھانہ لٹن روڈ رانا وقاص اشرف اور پولیس ٹیم کو بروقت کارروائی کرنے پر شاباش دی۔ ایس پی سول لائنز کا کہنا تھا کہ خواتین کو ہراساں اور تشدد کرنے والوں کے خلاف زیرو ٹالرینس پالیسی ہے۔

لاہور میں پولیس نے تھانہ ماڈل ٹاؤن کے تین اہلکاروں کو بھتہ خوری کے الزام میں گرفتار کر لیا ہے۔ پولیس کے مطابق، ان اہلکاروں پر ایک ڈاکٹر کو اغوا کرنے اور 5 لاکھ روپے کا بھتہ وصول کرنے کا الزام ہے، جس پر تینوں ملزمان کو گرفتار کیا گیا ہے۔

ڈی آئی جی آپریشنز فیصل کامران نے اس بات کی تصدیق کرتے ہوئے بتایا کہ گرفتار ہونے والوں میں کانسٹیبل وقاص، نفیس اور کانسٹیبل آصف شامل ہیں۔ اس کے علاوہ، دو مزید ملزمان رانا قربان اور عدنان کی گرفتاری کے لیے چھاپے مارے جا رہے ہیں۔ڈی آئی جی نے مزید کہا کہ گرفتار اہلکاروں کو شناخت پریڈ کے لیے بھجوا دیا گیا ہے اور ان کے خلاف محکمانہ کارروائی بھی شروع کر دی گئی ہے۔فیصل کامران کے مطابق، ملزمان نے 9 فروری کو ڈاکٹر مختار کو اغوا کیا اور اس سے 5 لاکھ روپے کا تاوان وصول کیا تھا۔ڈی آئی جی آپریشنز نے بتایا کہ 11 ماہ کے دوران 330 سے زائد پولیس اہلکاروں کا محکمانہ احتساب بھی کیا جا چکا ہے۔

یہ گرفتاری پولیس کی جانب سے بھتہ خوری کے مقدمات کی روک تھام اور ادارے کی ساکھ کو بچانے کے لیے ایک اہم اقدام سمجھی جارہی ہے۔

لاہور ہائیکورٹ، کیس ہارنے پر متاثرہ شخص نے خود کو آگ لگا لی

لاہور ہائیکورٹ میں افسوسناک واقعہ پیش آیا ہے،لاہور ہائیکورٹ میں ایک شحص نے کیس ہارنے کی وجہ سے دل برداشتہ ہو کر خود کو آگ لگا لی ، آصف جاوید نامی شحص کا کیس لاہور ہائی کورٹ کے جج جسٹس شجاعت علی خان کی عدالت میں زیر سماعت تھا،آصف جاوید خانیوال کا رہائشی ہے، عدالت سے کیس ہارا تو خود کو آگ لگالی، ریسکیو ٹیموں نے آصف کو فوری ہسپتال منتقل کر دیا. آصف جاوید نے نوکری کی برطرفی کے خلاف اپیل دائر کر رکھی تھی،واقعہ کی ویڈیو بھی سامنے آئی ہے جس میں پولیس اہلکار اور شہری آگ بجھانے کی کوشش کر رہے ہیں

”شالا وسدا روے پنجاب ”، رونقوں کا میلہ ہارس اینڈ کیٹل شو2025 …………بالاآخر اختتام پذیر ہوگیا۔وزیراعلیٰ مریم نوازشریف نے ہارس اینڈ کیٹل شو کی اختتامی تقریب میزبان تھی جبکہ آرمی چیف جنرل سید عاصم منیرمہمان خصوصی تھے۔فوٹریس سٹیڈیم کوشاندا ر طریقے سے سجایا گیا،دوپہر سے ہی مہمان آنا شروع ہوگئے۔

مہمانوں کی آمد پر روایتی انداز میں سینکڑوں ڈھولچیوں نے ڈھول بجائے اور نفیری پر خیر مقدمی دھن سے استقبال کیا۔ڈھولچی نے دائرے میں دیوانہ وار گھومتے ہوتے ہوئے فن کا بھرپور مظاہرہ کیا۔ روایتی لباس اور پگڑیاں پہنے خواتین گھڑ سواروں کے دستے نے پروگرام شروع کرنے کی اجازت طلب کی اوراس کا آغاز کیا۔سبز ہلالی پرچم اٹھائے برق رفتار گھڑ سواروں نے نیزوں کی انی سے آگ سے جلتے کلے اکھاڑنے کا مظاہرہ کیا۔پہلوانوں کی دو ٹیموں نے کبڈی کا رستم پنجاب نمائشی میچ کھیلا۔گھڑ سوار، رقص کرتے اونٹ، بکریاں،بھینس، بھیڑ وں کی نمائش بھی کی گئی۔رنگا رنگ لبا س پہنے مختلف فنکاروں نے علاقائی رقص پیش کئے۔سندھی، بلوچی کشمیری رقاص ٹولیاں بھی توجہ کا مرکز رہیں۔فلوٹ پر گرین پنجاب اور دیگر تھیم پیش کئے گئے۔صوفی رقاص اور چرخہ کاٹتی بچیوں کے فلوٹ بھی توجہ کا مرکز بن گئے۔16روزہ ہارس اینڈ کیٹل شوکے تمام ایونٹس کی جھلکیاں دکھائی گئیں۔تقریب میں رینجرز کے دستے نے مشعل پریڈ کا حیرت انگیز مظاہرے کئے۔تقریب میں راحت فتح علی خان کی پرفارمنس نے سماں باندھ دیا۔عارف لوہار اور ان کے گروپ نے بھی پنجاب کی روائتی جگنی پیش کی۔کوریوگرافر وہاب شاہ اور ساتھیوں نے سینکڑوں ساتھیوں کے ساتھ روایتی گیت” شالا وسدا روے پنجاب ” پیش کیا۔آتشبازی کی رنگا رنگ روشنیوں نے آسمان پر رنگ بکھیر دیئے۔

یہ امر قابل ذکر ہے کہ16روزہ ہارس اینڈ کیٹل شو میں 20بڑے ایونٹس میں لاکھوں شہریوں کی شرکت کا منفردریکارڈبن گیا۔ہارس اینڈ کیٹل شو کے ہر ایونٹ میں ہزاروں فیملیز کی بچوں سمیت شرکت سے رونق دوبالا ہوگئی۔ہارس اینڈ کیٹل شو میں 13-ترکی، دوبئی، باکو، یوکرین اور ایتھوپیا سمیت انٹرنیشنل ٹیموں کے درجنوں نامور غیر ملکی کھلاڑیوں نے شرکت کی۔غیر ملکی کھلاڑیوں نے مختلف مواقع پر تاثرات کا اظہار کرتے ہوئے ایونٹ کو بہترین قرار دیا۔لاہور میں پہلی مرتبہ شندور پولو کے مقابلوں سے بھی شہری محظوظ ہوئے۔جیلانی پارک میں ڈاگ شو میں جرمن شیفرڈ اور دیگر اعلیٰ نسل کے ڈاگ عوام بالخصوص بچوں کی دلچسپی کا مرکزبنے رہے۔7روزہ نیزہ بازی کے مقابلوں میں غیر ملکی ٹیموں نے شرکت کی۔ہارس اینڈ کیٹل شوکے ایونٹ میں بز کشی،تیر اندازی اور گھڑ سواروں کے سنسنی خیز کے مقابلے ہوئے۔ہارس اینڈ کیٹل شو میں پنجاب کلچرل نائٹس میں نامور فنکاروں نے سر بکھیرے۔گلگت بلتستان کی ثقافتی سرگرمیوں پر مبنی کلچرل نائٹ بھی منائی گئی۔ہارس اینڈ کیٹل شو میں زیادہ دودھ دینے والے جانوروں کے مقابلے بھی ہوئے۔پارکس اینڈ ہارٹیکلچر اتھارٹی نے دوروزہ خصوصی پھولوں کی نمائش کا اہتمام کیا۔پھولوں کی نمائش دیکھنے کیلئے ہزاروں شہری جیلانی پارک امڈ آئے۔باغ جناح میں بچوں کی دلچسپی کے لئے چلڈرن فیسٹیول بھی منایا گیا۔جیلانی پارک میں خصوصی میوزک اینڈفوڈ فیسٹیول میں روایتی کھانوں کی بہاردیکھنے کو آئی۔ وینٹج کار شو میں سالوں پرانی نادر اور نایاب گاڑیوں کی نمائش، سینکڑوں شائقین نے دیکھی۔مین بلیوارڈ تا باغ جناح فیملی سائیکلوتھان میں ہزاروں فیملیز نے شرکت کی۔مینار پاکستان میں رستم پنجاب دنگل کے سنسنی خیز مقابلے ہوئے۔لاہور فورٹ میں صوفی فیسٹیول میں نامور گلوکاروں نے سر بکھیر کر حاضرین کو مسحور کر دیا۔لاہور ایکسپو سنیٹر میں انڈسٹریز سے متعلق پنجاب انڈسٹری اینڈ آرٹی سان نمائش بھی لگائی گئی تھی۔

پاکستان نے ہمیشہ اپنی دفاعی حکمت عملی میں ذمہ داری کا مظاہرہ کیا . سیف اللہ خالد

لاہور()مرکزی مسلم لیگ کے قائدین نے کہا ہے کہ پاکستان ایک آزاد اور خود مختار ملک ہے اور کسی بھی بیرونی مداخلت کو پاکستانی قوم قبول نہیں کرے گی۔ امریکہ کو پاکستانی ایف-16 طیاروں کی نگرانی کرنے کے بجائے بھارت کی دہشت گردی اور تخریب کاری پر نظر رکھنی چاہیے۔ کلبھوشن یادیو کی پاکستان سے گرفتاری اس بات کا واضح ثبوت ہے کہ بھارت پاکستان میں دہشت گردی میں ملوث ہے۔

ان خیالات کا اظہار صدر مرکزی مسلم لیگ خالد مسعود سندھو، سیکرٹری جنرل سیف اللہ خالد اور ڈپٹی سیکرٹری جنرل حافظ خالد نیک نے اپنے مشترکہ بیان میں کیا۔ خالد مسعود سندھو کا کہنا تھا کہ پاکستان کلمہ طیبہ کے نام پر حاصل کیا گیا ملک ہے اور ایک ایٹمی ریاست کے طور پر اسے اپنے دفاع کا مکمل حق حاصل ہے۔ کسی کو یہ جرات نہیں ہونی چاہیے کہ وہ پاکستانی دفاعی نظام کی نگرانی کرے۔ امریکہ سمیت کسی بھی ملک کی پاکستان کے اندرونی معاملات میں مداخلت ناقابل برداشت ہے۔پاکستان کے دفاعی نظام کی نگرانی کا مقصد صرف پاکستان کو دباؤ میں لانے کی کوشش ہے، پاکستانی مسلح افواج ہر قسم کی جارحیت کا جواب دینے کی مکمل صلاحیت رکھتی ہیں اور کسی بھی خطرے سے نمٹنے کے لیے ہمہ وقت تیار ہیں.

سیکرٹری جنرل سیف اللہ خالد کا کہنا تھا کہ پاکستان نے ہمیشہ اپنی دفاعی حکمت عملی میں ذمہ داری کا مظاہرہ کیا ہے اور بھارت کے خلاف کسی بھی غیر ضروری جارحیت میں ملوث نہیں رہاالبتہ بھارت نے متعدد بار پاکستان کے خلاف جارحیت کی جس کے ثبوت موجود ہیں. بھارت نہ صرف پاکستان میں دہشت گردانہ کارروائیوں میں ملوث ہے بلکہ اس نے مقبوضہ کشمیر میں بھی انسانی حقوق کی سنگین خلاف ورزیاں کی ہیں۔مقبوضہ کشمیر کے مظلوم عوام بھارتی افواج کے ظلم و ستم کا شکار ہیں، اور عالمی برادری کو اس کا نوٹس لینا چاہیے۔

ڈپٹی سیکرٹری جنرل حافظ خالد نیک نے کہا کہ پاکستان ہمیشہ خطے میں امن اور استحکام کا خواہاں رہا ہے، بھارت کی ہٹ دھرمی کی وجہ سے ہمیشہ خطے میں کشیدگی بڑھتی رہی ہے۔ اگر بھارت اپنی دہشت گردانہ پالیسیوں کو ترک نہیں کرتا تو پاکستان کو بھی ہر ممکنہ اقدام اٹھانے کا حق حاصل ہے.