Category: لاہور

اہل لاہور کےلئے بڑی خوشخبری ، شیریں آواز اور وجد آفریں لہجہ کے حامل قاری ِ قرآن ڈاکٹر سبیل اکرام اس بار بھی پاکستان کی تیسری بڑی مسجد بحریہ ٹاﺅن لاہور میں نماز تروایح کی امامت کرائیں گے ۔ڈاکٹر سبیل اکرام بلند آہنگ اور مسحور کن لہجہ کے حامل ہیں وہ جب خوبصورت آواز میں قرآن مجیدپڑھتے ہیں تو سننے والوں پر رقت طاری ہوجاتی ہے ۔ ڈاکٹر سبیل اکرام کی قرآن مجید کے ساتھ والہانہ محبت کا اندازہ اس بات سے کیا جاسکتا ہے کہ انھوں نے صرف دس ماہ کے کم وقت میں قرآن مجید حفظ کرلیا تھا ۔ وہ مسلسل 25برس سے نماز تراویح پڑھا رہے ہیں ۔ وہ سعودی عرب کے شہر ریاض میں قرآن مجید حفظ کرنے کی سعادت سے بہرہ مند ہوئے ، سب سے پہلے انھوں نے ریاض میں ہی نماز تراویح پڑھائیں ، اس کے بعد کراچی میں نماز تروایح کی امامت کی پھر وہ کئی سال تک مرکز قرآن وسنہ لاہور میں نماز تراویح پڑھاتے رہے ہیں ۔ گذشتہ سال انھوں نے پاکستان کی تیسری بڑی مسجد بحریہ ٹاﺅن لاہور میں نماز تراویح کی امامت کروائی جہاں ہزاروں لوگ روزانہ ان کے پیچھے دور دراز کے علاقوں سے نماز تراویح ادا کرنے کےلئے آتے تھے ۔ ڈاکٹر سبیل اکرام کہتے ہیں قرآن مجید کا پڑھنا اور سننا باعث ثواب اور اس پر عمل کرنا باعث نجات ہے، ضروری ہے کہ رمضان المبارک کی آمد سے قبل ہم اپنی کاروباری مصروفیات محدود کریں اور ماہ مبارک میں قرآن مجید کے ساتھ اپنا تعلق مضبوط کریں اس لئے کہ رمضان نزول قرآن کا مہینہ ہے ۔ والدین کو بھی چاہئے کہ وہ عام حالات میں بھی اپنے بچوں کے دین اور قرآن کے ساتھ تعلق کو مضبوط کرنے کی کوشش کریں خصوصاََ رمضان المبارک میں بچوں کی مصروفیات کا شیڈول خود ترتیب دیں ۔میں نوجوانوں سے کہوں گا کہ اگر وہ حقیقی کامیابی اور عزت چاہتے ہیں تو قرآن مجید کے ساتھ اپنا تعلق مضبوط کریں اس کے احکامات پر عمل کریں میوزک اور دیگر فضول کامیوں میں وقت ضائع کرنے کی بجائے قرآن مجید سنیں۔ بے پناہ کاروباری مصروفیات کے باوجود مجھے قرآن مجید یاد ہے تو اس کی وجہ یہ ہے کہ میں دوران سفر بھی قرآن مجید سنتا ہوں ۔

وزیراعلیٰ پنجاب مریم نوازشریف نے پنجاب میں پانچ سالہ ٹرانسپورٹ پلان کی منظوری دے دی ہے۔ وزیراعلیٰ مریم نوازشریف کی زیر صدارت ٹرانسپورٹ سے متعلق خصوصی ویڈیولنک اجلاس منعقد ہوا جس میں صوبے بھر میں نیا جدید ٹرانسپورٹ سسٹم کے بارے میں جائزہ لیا گیا۔ اجلاس میں پنجاب بھر جدیدترین آٹو میٹڈ ریپڈ ٹرانسپورٹ سسٹم متعارف کرانے کا فیصلہ کیا گیا۔ وزیراعلیٰ مریم نوازشریف نے اے آر ٹی کے فوری ٹرائل رن کا حکم دے دیا۔ وزیراعلیٰ مریم نوازشریف کو بریفنگ میں بتایا گیا کہ آٹو میٹڈ ریپڈ ٹرانسپورٹ سسٹم ملایشیاء، ابوظہبی اور قطر سمیت دنیا بھر میں ماس ٹرانزٹ کا کامیاب سسٹم ہے۔ عام بس کی نسبت اے آر ٹی کے لئے روڈ پر کم جگہ درکارہوگی۔ اے آرٹی تین کوچز پر مشتمل بس میں 300 سے زائد مسافر وں کی گنجائش ہوگی۔ بریفنگ میں مزید بتایا گیا کہ اے آر ٹی سمارٹ اسٹیشن پر بس کھڑے کھڑے چند منٹ میں چارج ہوجائے گی۔ اے آر ٹی میں مسافروں کے لئے فارسٹ چارجنگ، وائی، مانیٹرنگ کیمرے اور دیگر سہولیات میسر ہونگی۔ اے آر ٹی روایتی فیول کی بجائے مکمل سولرائزڈ ٹرانسپورٹ سسٹم ہوگا۔ پہلے مرحلے میں لاہور،فیصل آباد اور گوجرانوالہ سمیت دیگر شہروں میں اے آر ٹی ٹرانسپورٹ سسٹم متعارف کرایا جائے گا۔ بریفنگ میں بتایا گیا کہ تین مراحل میں دس دس شہروں میں نیا ٹرانسپورٹ سسٹم متعارف کرایا جائے گا۔ آٹو میٹڈ ریپڈ ٹرانسپورٹ سسٹم کے ساتھ ہر شہر میں فیڈر بسیں بھی چلائی جائیں گی۔وزیراعلیٰ مریم نوازشریف نے اجلاس میں گفتگو کرتے ہوئے کہا کہ آٹو میٹڈ ریپڈ ٹرانسپورٹ پنجاب بھر میں چار سال میں مکمل کرنا چاہتے ہیں۔جدت کا ٹچ دینے کے لئے ہر شہر میں نیا ٹرانسپورٹ سسٹم ضروری ہے۔ ہر شہر میں ”اینڈ ٹو اینڈ“سسٹم متعارف کرانے چاہتے ہیں۔ آٹو میٹڈ ریپڈ ٹرانسپورٹ سسٹم چھوٹے شہر میں رہنے والوں کا بھی حق ہے محرومیاں دور کرنا چاہتے ہیں۔جدید ٹرانسپورٹ سسٹم سے لوگوں کے معیار زندگی میں بہتری آئے گی۔

مرکزی مسلم لیگ کے صدر خالد مسعود سندھو نے کہا ہے کہ 27 فروری 2019 کو پاکستانی افواج نے ثابت کر دیا کہ وہ ملکی سالمیت اور خودمختاری کے دفاع کے لیے ہمہ وقت تیار ہیں۔ 27 فروری کا دن پاکستان کے دفاعی عزم اور طاقت کا نشان بن چکا ہے. پاکستان ہمسایہ ممالک سے اچھے تعلقات کا خواہاں لیکن قومی سلامتی پر سمجھوتہ نہیں کیا جاسکتا .

خالد مسعود سندھو نے 27 فروری کو آپریشن سوئفٹ ریٹارٹ کے 6 برس مکمل ہونے پر افواج پاکستان کو خراج تحسین پیش کرتے ہوئے کہا کہ قومیں متحد ہوں تو بڑے سے بڑا دشمن ناکام ہوجاتا ہے،27 فروری والے جذبوں کی ہمیشہ ضرورت ہے، مسلح افواج نے بھارتی غرور،جنگی جنون خاک میں ملا کر ثابت کیا کہ پاکستان دفاع کیلئے ہر وقت تیار ہے. بھارتی دہشت گردی کا منہ توڑ جواب دے کر مسلح افواج نے قوم کے دل جیتے،پاکستان امن کا خواہاں ہے، پاکستان کی سرزمین کسی ملک کے خلاف استعمال نہیں ہورہی،بھارتی دہشت گردی، تخریب کاری کے منصوبے دنیا کے سامنے عیاں ہو چکے ہیں.پاکستان ہمسایہ ممالک سے اچھے تعلقات کا خواہاں لیکن قومی سلامتی پر سمجھوتہ نہیں کیا جاسکتا . پاکستانی قوم کو اپنے بہادر سپاہیوں پر فخر ہے جنہوں نے دشمن کو منہ توڑ جواب دے کر پاکستان کی عزت و وقار کو بلند رکھا۔کشمیر کی آزادی تک تحریک آزادی کشمیر کی حمایت جاری رکھیں گے۔

خالد مسعود سندھو کا مزید کہنا تھا کہ دفاع پاکستان کے لئےمرکزی مسلم لیگ کے کارکنان سمیت پوری قوم افواج پاکستان کے شانہ بشانہ کھڑی ہے. پاکستان اسلام کے نام پر حاصل کیا گیا ملک ہے. وطن عزیز کی طرف کوئی میلی آنکھ سے نہیں دیکھ سکتا. مودی سرکار کو فروری 2019 خوابوں میں بھی یاد آتا رہے گا. 27 فروری ہمیں اتحاد، یکجہتی اور قومی استحکام کا درس دیتا ہے

مرکزی مسلم لیگ کے سیکرٹری جنرل سیف اللہ خالد نے شجر کاری مہم کا آغاز کر دیا۔ اس موقع پر انہوں نے ایک یادگاری پودا لگا کر مہم کا باضابطہ افتتاح کیا۔مرکزی مسلم لیگ لیگ شجرکاری مہم کے تحت ملک بھر میں ہزاروں پودے لگائے گی

مرکزی مسلم لیگ کی شجرکاری مہم کے آغاز کے موقع پر کارکنان اور مقامی شخصیات بھی شریک ہوئیں، اس موقع پر سیف اللہ خالد نے خطاب کرتے ہوئے کہا کہ مرکزی مسلم لیگ کی شجرکاری مہم کا مقصد ماحولیاتی آلودگی پر قابو پانے، موسمیاتی تبدیلی کے اثرات کو کم کرنے اور پاکستان کو سرسبز و شاداب بنانے کے لیے عوامی شعور بیدار کرنا ہے۔موسمیاتی تبدیلی سے نمٹنے کے لیے درختوں کی اہمیت کو نظرانداز نہیں کیا جا سکتا۔کارکنان ملک بھر میں شجر کاری مہم کے تحت زیادہ سے زیادہ درخت لگائیں تاکہ آنے والی نسلوں کو ایک بہتر اور صاف ستھرا ماحول فراہم کیا جا سکے۔ مرکزی مسلم لیگ ملک بھر میں لاکھوں درخت لگائے گی.

سیف اللہ خالد نے شجر کاری مہم کے آغاز کے موقع پر قوم سے اپیل کی اس مہم میں بھرپور حصہ لیں۔ اپنے گھروں، محلوں اور تعلیمی اداروں میں درخت لگانے کے رجحان کو فروغ دیا جائے. شجر کاری مہم کے دوران عوام میں شعور اجاگر کرنے کے لیے سوشل میڈیا مہم بھی شروع کی جائے گی، تاکہ زیادہ سے زیادہ لوگ اس میں شامل ہوں۔اگر ہم سب مل کر ایک ایک درخت لگانے کا عہد کر لیں، تو ہمارا ملک موسمیاتی بحران سے بچ سکتا ہے.