Category: لاہور

اڈیالہ جیل میں بانی پی ٹی آئی کی طبی حالت کے حوالے سے پیش رفت سامنے آئی ہے، جہاں پمز (PIMS) اور الشفاء ٹرسٹ آئی اسپتال کے ماہرین پر مشتمل ایک خصوصی میڈیکل ٹیم نے ان کی متاثرہ آنکھ کا طبی معائنہ کیا۔ اس ٹیم میں ریٹینا اسپیشلسٹ ڈاکٹر ندیم قریشی کے ساتھ ڈاکٹر عارف اور ڈاکٹر اوصل بھی شامل تھے۔ اس ٹیم نے جدید طبی آلات اور ضروری سہولیات سے لیس گاڑی کے ساتھ جیل کا دورہ کیا، جہاں جیل اسپتال کے عملے نے بھی ان کی معاونت کی۔ ڈاکٹروں نے بانی پی ٹی آئی کی آنکھ کا تفصیلی فالو اپ چیک اپ مکمل کیا اور جانچ کے بعد وہاں سے روانہ ہو گئے۔
طبی معائنے کے عمل کے ساتھ ساتھ جیل حکام نے بانی پی ٹی آئی کی اہلیہ، بشریٰ بی بی کے ساتھ ان کی ملاقات بھی کرائی۔ یہ ملاقات جیل کے کانفرنس روم میں منعقد کی گئی، جو جیل مینوئل کے طے شدہ ضوابط کے عین مطابق تھی۔ یہ ملاقات تقریباً 40 منٹ تک جاری رہی، جس کے دوران بشریٰ بی بی نے ان کی طبیعت اور آنکھ کے طبی معائنے کے بارے میں دریافت کیا۔ اس تمام عمل کے دوران جیل انتظامیہ سیکیورٹی اور دیگر انتظامی امور کی نگرانی کرتی رہی۔

مرکزی مسلم لیگ کے صدر خالد مسعود سندھو نے کہا ہے کہ افغانستان کی بلا اشتعال جارحیت پر پاکستانی قوم مسلح افواج کے ساتھ کھڑی ہے ۔ افغان طالبان فیصلہ کر لیں وہ دہشت گردی کا ساتھ دیں گے یا پاکستان کا ، فتنہ الخوارج ملک و ملت کے دشمن، قیام امن کے لئے قومی اتحاد کی ضرورت ہے۔ ہماری لڑائی افغان عوام کے ساتھ نہیں بلکہ دہشت گردوں کے ساتھ ہے

ان خیالات کا اظہار انہوں نے لاہور کے نجی ہوٹل میں سینئر صحافیوں کے اعزاز میں افطار ڈنر کی تقریب سے خطاب کرتے ہوئے کیا ۔ اس موقع پر مرکزی ترجمان تابش قیوم ، سیکرٹری جنرل مرکزی مسلم لیگ لاہور مزمل اقبال ہاشمی نے بھی خطاب کیا۔ مرکزی مسلم لیگ کے صدر خالد مسعود سندھو کا کہنا تھا کہ مرکزی مسلم لیگ کی سیاست خدمت کی سیاست ہے۔ سیاسی جماعتوں کا کام صرف الیکشن لڑنا نہیں۔ مرکزی مسلم لیگ کی خدمت کی سیاست صحافیوں نے خود دیکھی۔ پاکستان میں دہشت گردی کے واقعات ہوئے امام بارگاہ پر حملہ سازش تھی ۔ افغانستان سے ہمارے ملک میں دہشت گردی ہوئی ان 5 سالوں میں دس ہزار کے قریب شہری شہید ہوئے۔برداشت کی ایک حد ہوتی یے ۔ پاکستان نے افغانوں کی میزبانی کی لیکن انہوں نے بھلائی کا بدلہ بھلائی میں نہ دیا ۔مسلح افواج عوام پر حملے قابل برداشت نہیں۔ اب افغان انڈیا کی گود میں جا کر بیٹھ گئے۔ ایک بار پھر کہتا ہوں اسرائیل و انڈیا کی لڑائی افغانستان میں نہ لڑیں ۔ آج وقت ہے ایک قوم کی حیثیت سے متحد ہو کر اس ملک کے لیے سوچنا ہو گا مسلح افواج کے ساتھ قوم بھر پور طریقے سے کھڑی یے ۔ پاکستان وہ ملک ہے جس کی طرف امت مسلمہ دیکھتی ہے۔ ہماری افغان عوام کے ساتھ لڑائی نہیں ہماری جنگ ان دہشت گردوں کے ساتھ ہے جو ہمارے عوام پر حملہ کرتے ہیں۔ ملک میں دہشت گردی برداشت نہیں کریں گے۔ جو بھی ملک کا امن برباد کرنے کی کوشش کرے گا اس کو پاش پاش کریں گے ہماری شناخت پاکستان ہے ۔ یہ قائم دائم رہے گا

مزمل اقبال ہاشمی نے کہا کہ مرکزی مسلم لیگ ملکی سیاست میں بڑی تبدیلی کی جانب گامزن ہے۔ عوام کو قیادت کا حق دینا چاہتے ہیں لاہور کی 274 یونین میں سے 148 یونین کونسل میں انٹرا پارٹی انتخابات کروا چکے ہیں۔ رمضان کے بعد باقی یونین کونسل میں انتخابات کروائیں گے۔۔

پاکستان مرکزی مسلم لیگ نے افغا ن طالبان کی بلا اشتعال جارحیت پر گہری تشویش کا اظہار کرتے ہوئے واضح کیا ہے کہ وطنِ عزیز کی حرمت اور سرحدوں کے دفاع پر کوئی سمجھوتہ نہیں کیا جائے گا۔ صدر مرکزی مسلم لیگ خالد مسعود سندھو نے کہا کہ انتہائی افسوس کا مقام ہے کہ رمضان المبارک جیسے مقدس مہینے میں بھی افغانستان میں پناہ گزین دہشت گردوں نے پاکستانی عوام اور افواج کا خون بہایا، جس کے جواب میں افواجِ پاکستان نے اپنے دفاع کا بھرپور حق استعمال کرتے ہوئے دہشت گردوں کے ٹھکانوں کو کامیابی سے نشانہ بنایا۔ اس تناظر میں پاکستان مرکزی مسلم لیگ فتنۃ الخوارج کی حمایت میں سرحد پار سے ہونے والی جارحیت کے خلاف ‘آپریشن غضب للحق’ کی بھرپور تائید و حمایت کرتی ہے۔

خالد مسعود سندھو نے کہا کہ آج ایک طرف تو ہماری فورسز کو نشانہ بنایا جا رہا ہے، آپ دیکھتے ہیں کہ روزانہ شہادتیں ہورہی ہیں اور جوان شہید ہو رہے ہیں۔ بلوچستان کی صورتحال سب کے سامنے ہے، جبکہ خیبر پختونخوا کے حالات بھی واضح ہیں،روزانہ کہیں نہ کہیں حملے ہو رہے ہیں، جن میں جہاں فورسز کے لوگ شہید ہوتے ہیں وہاں ہمارے عام شہری بھی اپنی جانوں کے نذرانے پیش کررہے ہیں ۔انہوں نے افغان حکومت کو مخاطب کرتے ہوئے کہا کہ پاکستانی عوام نے ہمیشہ افغان طالبان کی بیرونی قوتوں سے آزادی کے لیے دعائیں کیں اور لاکھوں افغان مہاجرین کو دہائیوں تک اپنے سینے سے لگائے رکھا۔ انہوں نے کہا کہ مجھے آج بہت افسوس سے بات کرنی پڑتی ہے کہ افغانی جو ہمارے بھائی تھے، جن کا ہم نے ایک لمبے عرصے تک بوجھ اٹھایا، آج پتہ نہیں وہ کیوں گمراہ ہو گئے ہیں اور آج وہ ان کی جھولی میں جا بیٹھے ہیں جنہوں نے ساری عمر ان کی مخالفت کی اور ان کے خلاف جنگ لڑی۔

انہوں نے مزید کہا کہ آج وہی افغان سرزمین پاکستان پر ان دہشت گردوں کو مسلط کرنے کے لیے استعمال ہو رہی ہے جو اسلام اور انسانیت کے دشمن ہیں، جن کا ایجنڈا صرف اور صرف پاکستان میں خونریزی اور انتشار پھیلانا ہے۔ ایک طرف ہندوستان اور دوسری طرف سے افغانستان کی جانب سے پاکستان پر جنگ مسلط کرنے کی کوشش کی جا رہی ہے۔ یہ بات انتہائی لمحہ فکریہ ہے کہ اسلام کا نام لینے والے افغان حکمران آج ہندوتوا کی پیروکار بھارتی حکومت سے پینگیں بڑھا رہے ہیں۔ افغان طالبان کو چاہیے تھا کہ وہ اللہ کی دی ہوئی آزادی اور عزت کو مسلمانوں کے خلاف استعمال کرنے کے بجائے فلسطین اور کشمیر کے مظلوم مسلمانوں کی آزادی کے لیے وقف کرتے، مگر افسوس کہ وہ اس وقت ظلم کا حصہ بن رہے ہیں۔انہوں نے کہا کہ پاکستان افغان عوام کا دشمن نہیں ہے اور نہ ہی ہماری لڑائی افغان بھائیوں سے ہے، بلکہ پاکستان کی یہ جنگ صرف فتنے کے خاتمے اور دہشت گردی کی بیخ کنی کے لیے ہے

پاکستان مرکزی مسلم لیگ نے دو ٹوک پیغام دیتے ہوئے کہا کہ افواجِ پاکستان نہ صرف اپنی سرحدوں کا دفاع کرنا جانتی ہیں بلکہ سرحد پار بیٹھے دشمن کو اس کے گھر میں گھس کر سبق سکھانے کی مکمل صلاحیت رکھتی ہیں۔ پوری قوم اپنی افواج کے شانہ بشانہ کھڑے ہو کر دشمن کو منہ توڑ جواب دینے کے لیے متحد ہے اور ملک کی حرمت پر کسی کو آنچ نہیں آنے دی جائے گی۔