Category: لاہور

لاہور میں کرسمس اور نئے سال کی مناسبت سے ایک پُروقار اور خوشگوار تقریب کا انعقاد کیا گیا، جس میں مسیحی برادری کے ممتاز مذہبی رہنما ڈاکٹر مجیدابیل، ڈی آئی جی آپریشنز لاہور فیصل کامران، جاوید خان ، ڈی ایس پی اور ایس ایچ او نولکھا سمیت دیگر معزز شخصیات نے شرکت کی۔

تقریب کے آغاز پر ریورنڈڈاکٹر مجید ابیل نے کرسمس اور نئے سال کی روح پر روشنی ڈالتے ہوئے کہا کہ یہ دن محبت، امن، برداشت اور انسانیت کی خدمت کا پیغام دیتے ہیں۔ انہوں نے پاکستان میں مذہبی ہم آہنگی اور اقلیتوں کے حقوق کے تحفظ پر زور دیتے ہوئے کہا کہ مختلف مذاہب کے ماننے والوں کا باہمی احترام ہی ایک مضبوط اور پُرامن معاشرے کی بنیاد ہے۔اس موقع پر ڈی آئی جی آپریشنز لاہور فیصل کامران نے مسیحی برادری کو کرسمس اور نئے سال کی مبارکباد دیتے ہوئے کہا کہ لاہور پولیس شہریوں کے جان و مال کے تحفظ کے لیے ہر وقت تیار ہے۔ انہوں نے کہا کہ تہواروں کے دوران سکیورٹی کے خصوصی انتظامات کیے گئے تاکہ تمام شہری بلاخوف و خطر اپنی خوشیاں منا سکیں۔ فیصل کامران کا کہنا تھا کہ پولیس اور عوام کا باہمی تعاون امن و امان کے قیام میں کلیدی کردار ادا کرتا ہے۔

تقریب کے دوران کیک کاٹا گیا، خصوصی دعائیں کی گئیں اور ملکی سلامتی، ترقی اور خوشحالی کے لیے نیک تمناؤں کا اظہار کیا گیا۔

یونیورسٹی آف لاہور میں طالبہ کی مبینہ خودکشی کا واقعہ، یونیورسٹی کو اگلے احکامات تک بند کر دیا۔

یونیورسٹی انتظامیہ نے تمام کلاسز کو آن لائن موڈ پر منتقل کر دیا، انتظامیہ نے سکیورٹی کو بہتر کرنے کے لئے یونیورسٹی کو بند کیا،قبل ازیں لاہور میں واقع نجی یونیورسٹی کی 21سالہ طالبہ نےبلڈنگ کی دوسری منزل سےچھلانگ لگا دی تھی، طالبہ کوتشویشناک حالت میں یونیورسٹی کےہسپتال منتقل کیاگیا۔

خود کشی کرنے والی 21 سالہ طالبہ فاطمہ شیخوپورہ کے علاقہ نارنگ منڈی کی رہائشی تھی۔یونیورسٹی انتظامیہ کے مطابق بچی کا تین ماہ قبل داخلہ ہوا تھا اور ابھی تک اس کا سی جی پی اے 3.14 تھا۔ بچی کی حاضری بھی مکمل تھی یونیورسٹی انتظامیہ کی اب تک کی تحقیقات کے مطابق بچی کو یونیورسٹی سے کسی قسم کا کوئی مسئلہ نہیں تھا۔ فاطمہ آج اپنی والدہ کے ہمراہ یونیورسٹی پہنچی تھی۔یونیورسٹی کی تحقیقاتی کمیٹی اویس سلطان اور فاطمہ کے اس خودکشی کے کیس کے حوالے سے تحقیقات کر رہی ہے۔

وزیراعلیٰ پنجاب مریم نواز نے کہا ہے کہ کسان کی ترقی پاکستان کی مجموعی ترقی کے لیے ناگزیر ہے، اور صوبے میں متعارف کرایا گیا کسان کارڈ پنجاب کی زراعت کی سمت یکسر بدل چکا ہے، جس کے نتیجے میں کھیتوں میں اعتماد، سرمایہ کاری اور جدید زرعی رجحانات کی فصل بو دی گئی ہے۔

وزیراعلیٰ مریم نواز کا کہنا تھا کہ پنجاب کی زرخیز سرزمین رواں سال گندم کی بہترین اور ریکارڈ پیداوار کے لیے مکمل طور پر تیار ہے۔ انہوں نے کہا کہ کسان کارڈ کے ذریعے اب تک 100 ارب روپے کے آسان قرضے فراہم کیے جا چکے ہیں، جن میں سے کسان عملی طور پر 65 ارب روپے سے زائد رقم استعمال کر چکے ہیں، جو اس بات کا واضح ثبوت ہے کہ یہ اسکیم کسانوں میں مقبول ہو رہی ہے اور عملی فوائد فراہم کر رہی ہے۔وزیراعلیٰ نے بتایا کہ صرف دسمبر کے مہینے میں 13 لاکھ 56 ہزار میٹرک ٹن یوریا کھاد کی ریکارڈ فروخت ہوئی، جو زرعی سرگرمیوں میں تیزی اور کسانوں کے بڑھتے ہوئے اعتماد کا مظہر ہے۔ ان کا کہنا تھا کہ اب پنجاب کے کسان کے ہاتھ میں سرمایہ بھی ہے، جدید ٹیکنالوجی تک رسائی بھی حاصل ہے اور کسان کارڈ کے ذریعے شفاف طریقے سے استعمال کے لیے مالی وسائل بھی میسر ہیں۔

مریم نواز نے اس عزم کا اعادہ کیا کہ صوبائی حکومت کسان دوست پالیسیوں کے ذریعے زرعی شعبے کو مضبوط بنیادوں پر استوار کر رہی ہے۔ انہوں نے کہا کہ کسان خوشحال ہوگا تو ملک خوشحال ہوگا، کیونکہ زراعت ملکی معیشت کی ریڑھ کی ہڈی ہے۔ حکومت کا مقصد کسان کو بااختیار بنانا، اس کی پیداواری لاگت کم کرنا اور اسے جدید تقاضوں سے ہم آہنگ کرنا ہے تاکہ پاکستان غذائی خود کفالت کی منزل حاصل کر سکے۔وزیراعلیٰ پنجاب نے مزید کہا کہ کسان کارڈ محض ایک مالی سہولت نہیں بلکہ یہ پنجاب میں زرعی انقلاب کی جانب ایک عملی قدم ہے، جس کے مثبت اثرات آنے والے دنوں میں گندم اور دیگر فصلوں کی پیداوار میں واضح طور پر نظر آئیں گے۔

یونیورسٹی آف لاہور میں ایک افسوسناک واقعہ پیش آیا جہاں ڈی فارمیسی کی 21 سالہ طالبہ فاطمہ نے یونیورسٹی کی عمارت کی دوسری منزل سے چھلانگ لگا دی۔

واقعے کے فوراً بعد طالبہ کو شدید زخمی حالت میں قریبی اسپتال منتقل کیا گیا، جہاں ڈاکٹروں کے مطابق اس کی حالت تشویشناک ہے اور علاج جاری ہے۔ذرائع کے مطابق واقعہ یونیورسٹی کیمپس میں اچانک پیش آیا، جس سے طلبہ و طالبات اور عملے میں تشویش کی لہر دوڑ گئی۔ اطلاع ملتے ہی پولیس اور یونیورسٹی انتظامیہ موقع پر پہنچ گئی اور شواہد اکٹھے کرتے ہوئے ابتدائی تفتیش شروع کر دی۔ پولیس نے واقعے کی نوعیت جانچنے کے لیے طالبات، اساتذہ اور دیگر عملے کے بیانات قلم بند کرنا شروع کر دیے ہیں۔

پولیس اور انتظامیہ کے مطابق ابتدائی تحقیقات میں کسی قسم کے ناخوشگوار واقعے یا تشدد کے شواہد سامنے نہیں آئے۔ ذرائع کا کہنا ہے کہ طالبہ نے ذاتی وجوہات کی بنا پر یہ انتہائی قدم اٹھایا، تاہم حتمی نتیجہ تفتیش مکمل ہونے کے بعد ہی سامنے آئے گا۔

رپورٹ کے مطابق یونیورسٹی میں اس سے قبل بھی ڈی فارمیسی کے ایک طالب علم کی جانب سے خودکشی کی کوشش کا واقعہ پیش آ چکا ہے، جس کے باعث موجودہ واقعے نے تعلیمی ادارے میں طلبہ کی ذہنی صحت اور معاونت کے نظام پر سوالات اٹھا دیے ہیں۔

نیشنل ہائی ویز اینڈ موٹروے پولیس نے سال 2025 کی کارکردگی رپورٹ جاری کر دی ہے۔

رپورٹ کے مطابق 18000 سے زائد مسافروں کو ایمرجنسی مدد اور بروقت طبی امداد بھی فراہم کی گئی۔ 54 لاکھ سے زائد افراد کو ٹال فری ہیلپ لائن 130 کے ذریعے رہنمائی فراہم کی گئی۔18500 ڈرائیونگ لائسنس، 103 سی ای کیٹیگری لائسنس اور 1480 انٹرنیشنل ڈرائیونگ پرمٹ جاری کیے گئے۔2674 روڈ سیفٹی پروگرامز منعقد کیے گئے تاکہ عوام میں محفوظ ڈرائیونگ کا شعور اجاگر ہو۔دورانِ سفر کھو جانے والی قیمتی اشیاء، جن میں سونے کے زیورات، 186 موبائل فونز، 48 پرس اور دیگر 331 قیمتی سامان شامل ہیں، تلاش کر کے اصل مالکان کے حوالے کیے گئے۔ 48 چوری شدہ اور 17 نان کسٹم پیڈ گاڑیاں برآمد کر کے متعلقہ حکام اور اصل مالکان کے حوالے کی گئیں۔ 169 لاپتہ گمشدہ بچوں کو باحفاظت ان کے گھروں تک پہنچایا گیا۔70 خطرناک ملزمان کو گرفتار کر کے متعلقہ ضلعی پولیس کے حوالے کیا گیا۔ 29 غیر قانونی اسلحہ، 1349 راؤنڈز، 309 کلوگرام منشیات، 2450 لیٹر شراب اور 10 ہزار سے زائد نان کسٹم پیڈ سگریٹ کے کارٹن برآمد کر کے متعلقہ قانون نافذ کرنے والے اداروں کے حوالے کیے گئے۔ 7 اسمگلنگ اور 6 ڈکیتی کی وارداتیں ناکام بنائی گئیں۔

ٹریفک قوانین کی خلاف ورزی پر 13.2 ملین سے زائد چالان جاری کیے گئے۔ ٹریفک قوانین کی سنگین خلاف ورزیوں اور اوور اسپیڈنگ کے خلاف مہم کے دوران 11000 سے زائد ڈرائیوروں کے خلاف ایف آئی آر درج کی گئیں۔ 690 ٹریفک حادثات رپورٹ ہوئے، جن میں 349 مہلک اور 341 غیر مہلک حادثات شامل ہیں۔موٹروے پولیس کی سوشل میڈیا ٹیم اور ایف ایم 95 ریڈیو مسلسل شہریوں کو روڈ سیفٹی اور ٹریفک صورتحال سے آگاہ کر رہے ہیں۔ ہر ماہ شہریوں کے مسائل کے حل کے لیے براہِ راست کھلی کچہری کا بھی انعقاد کیا جا رہا ہے۔موٹروے پولیس کے یہ اقدامات اس بات کی گواہی دیتے ہیں کہ یہ ادارہ نہ صرف بلا امتیاز قانون کی عملداری بلکہ بلا تفریق شہریوں کی خدمت کے اعلیٰ معیار پر بھی کاربند ہے۔ شہریوں کو محفوظ اور باوقار سفری سہولیات فراہم کرنا موٹروے پولیس کی اولین ترجیح ہے اور ہم اس مقصد کے لیے دن رات سرگرمِ عمل ہیں۔

لاہور میں طیفی بٹ کے بہنوئی جاوید بٹ کے قتل کیس میں پولیس اور جوائنٹ انویسٹی گیشن ٹیم (جے آئی ٹی) کی کارروائیاں تیز ہو گئی ہیں۔ قتل کے مرکزی ملزم امیر فتح کی گرفتاری کے لیے شاہ عالمی میں اس کے گھر پر پولیس نے چھاپہ مارا، تاہم ملزم موقع پر موجود نہیں تھا۔

ذرائع کے مطابق پولیس جب شاہ عالمی میں واقع امیر فتح کے گھر پہنچی تو مکان بند تھا اور تالے لگے ہوئے تھے، جس کے باعث ملزم کو گرفتار نہیں کیا جا سکا۔ پولیس نے علاقے میں سرچ آپریشن کیا اور ممکنہ ٹھکانوں سے متعلق معلومات اکٹھی کیں، تاہم امیر فتح کا کوئی سراغ نہ مل سکا۔دوسری جانب جوائنٹ انویسٹی گیشن ٹیم نے کارروائی کرتے ہوئے امیر فتح کے تین ملازمین کو حراست میں لے لیا ہے۔ ذرائع کا کہنا ہے کہ زیرِ حراست افراد سے مرکزی ملزم اور دیگر ممکنہ شریک ملزمان کے بارے میں تفصیلی پوچھ گچھ کی جائے گی

واضح رہے کہ آج سیشن عدالت نے امیر فتح کی عبوری ضمانت خارج کر دی تھی، جس کے بعد قانون نافذ کرنے والے اداروں نے اس کی گرفتاری کے لیے کوششیں مزید تیز کر دی ہیں۔ جے آئی ٹی اپنی تفتیش مکمل کرتے ہوئے پہلے ہی امیر فتح کو اس قتل کیس میں قصوروار قرار دے چکی ہے۔یاد رہے کہ جاوید بٹ کو گزشتہ سال لاہور کے کینال روڈ پر موٹر سائیکل سوار نامعلوم ملزمان نے فائرنگ کر کے قتل کر دیا تھا۔ اس واقعے نے شہر میں سنسنی پھیلا دی تھی اور کیس کی حساس نوعیت کے پیش نظر مشترکہ تحقیقاتی ٹیم تشکیل دی گئی تھی۔ پولیس اور تفتیشی اداروں کا کہنا ہے کہ ملزم کی گرفتاری کے بعد مزید انکشافات متوقع ہیں۔

آل پاکستان رائٹرز ویلفیئر ایسوسی ایشن (اپووا) کے زیرِ اہتمام اپووا کے سینئر وائس چیئرمین ملک یعقوب اعوان کی کتاب ’’ادھورا چاند‘‘ کی ایک شاندار اور پروقار تقریبِ رونمائی لاہور کے معروف ہوٹل پاک ہیری ٹیج میں منعقد ہوئی

ادبی تقریب میں ملک کے ممتاز شعرا، ادبا، لکھاریوں اور مختلف شعبۂ ادب سے وابستہ نامور شخصیات نے بھرپور شرکت کی۔تقریب کی صدارت معروف شاعر، ادیب ناصر بشیر صاحب نے کی، جبکہ مہمانِ خصوصی کے طور پر نامور پنجابی شاعر و نغمہ نگار ایس ایم صادق، معروف شاعر ویر سپاہی شریک ہوئے۔ اس کے علاوہ معروف شاعرہ نرگس نور، نامور لکھاری اشفاق احمد خان، معروف لکھاری و مصنفہ ڈاکٹر فضیلت بانو،لیجنڈ اداکار حسیب پاشا( ہامون جادوگر)ڈی ایس پی شہزادی گلفام ، اینکر پرثناء آغا خان،معروف ادبی شخصیت مقبول چوہان سمیت ادب و ثقافت سے وابستہ متعدد معزز شخصیات کی شرکت نے تقریب کی علمی و ادبی وقعت میں مزید اضافہ کیا۔ مصنفہ قرۃ العین خالد ،لکھاری و صحافی فرسہ رانا نے بھی تقریب سے خطاب کیا ۔

تقریب کا باقاعدہ آغاز تلاوتِ کلامِ پاک سے ہوا، جس کی سعادت حافظ محمد زاہد نے حاصل کی۔ بعد ازاں خالد مسعود نے نہایت عقیدت کے ساتھ نعتِ رسولِ مقبول ﷺ پیش کی، جس سے محفل پر روحانی کیفیت طاری ہو گئی ،نائب صدرسفیان علی فاروقی نے سینئر نائب صدر حافظ محمد زاہد کے والد محترم اور بانی اپووا ایم ایم علی کے ماموں کے انتقال پر مرحومین کے ایصالِ ثواب کے لیے اجتماعی دعائے مغفرت کروائی۔

تقریب سے خطاب کرتے ہوئے مقررین نے کہا کہ ملک یعقوب اعوان کی کتاب ’’ادھوراچاند‘‘ دنیائے ادب میں ایک خوبصورت اور منفرد اضافہ ثابت ہوگی۔ مقررین نے ملک یعقوب اعوان کی شخصیت کے مختلف پہلوؤں پر روشنی ڈالتے ہوئے کہا کہ وہ نہ صرف ایک سنجیدہ اور باوقار ادبی شخصیت ہیں بلکہ ماضی میں پنجاب پولیس کے نامور افسر کے طور پر بھی خدمات انجام دے چکے ہیں، جو ان کی شخصیت کے نظم، وقار اور فکری پختگی کا مظہر ہے۔

تقریب کے اختتام پر اپووا کے عہدیدرا توصیف ملک اور اپووا کے رکن رانادانش کی سالگرہ کے کیک بھی کاٹے گئے، جس سے محفل میں خوشگوار فضا پیدا ہو گئی۔

تقریب کے آغاز سے قبل تمام شرکاء کے لیے پرتکلف بوفے ناشتے کا بھی اہتمام کیا گیا تھا۔جبکہ تقریب کے اختتام پر اپووا کے کوآرڈینیٹر قصور طارق نوید سندھو کی جانب سے شرکاء کا مٹھائی سے منہ میٹھا کروایا گیا۔یوں یہ ادبی تقریب نہایت خوش اسلوبی، فکری گہرائی اور تنظیمی حسن کے ساتھ اختتام پذیر ہوئی، جسے شرکاء نے بے حد سراہا۔