Category: لاہور

وزیراعلیٰ مریم نوا زشریف نے 2026ء نوجوانوں کا سال قرار دینے کا اعلان کیا اور2026ء میں عوام کی فلاح و بہبود، خوشحالی اور ترقی کے اہداف پورے کرنے کا عزم کا اظہار کیا۔

وزیراعلیٰ پنجاب مریم نواز شریف نے سال نو کے آغاز پر اپنے پیغام پر مبارکباد دی اورملک و قوم کی خیر وعافیت کی دعاکرتے ہوئے کہا کہ دعاہے کہ سال نو پاکستان سمیت دنیا بھر کے لئے امن اور عافیت کا سال ثابت ہو۔دعاہے اللہ تعالیٰ پاکستان بالخصوص پنجاب کے عوام کو خوشیوں سے ہمکنار کرے اور2026 پاکستان کے عوام کے لئے خوشحالی کا پیامبر ثابت ہو۔انہوں نے کہا کہ دعاہے کہ اللہ تعالیٰ پاکستان کے ہر نوجوان کو بلندیوں کی راہ پر گامزن کرے۔ دعاہے کہ سال نو گزشتہ سال سے بھی بہترثابت ہو اور ہر سوخوشیاں پھیل جائیں۔ وزیراعلیٰ مریم نواز شریف نے کہا کہ الحمدللہ!2025 میں عوام سے کیے گئے تمام وعدے نبھائے، نئے سال میں بھی خوشحالی و ترقی کے تسلسل کو جاری رکھیں گے۔ 2025ء میں ایک لاکھ 20ہزار سے زائد گھر بنانے کا وعدہ پور اکیا۔ فیلڈ ہسپتال اور کلینک آن ویل کے ذریعے دوکروڑ سے زائد مریضوں کو ان کی دہلیز پر علاج کی سہولت فراہم کی گئی۔ وزیراعلیٰ مریم نواز شریف نے کہاکہ 2025 میں سیلاب متاثرین سے بحالی کے لئے مالی معاونت کا وعدہ بھی نبھایا۔ 2025 میں پنجاب کے نوجوانوں کولیپ ٹاپ بھی دیئے اور ہونہار سکالرشپ بھی ملے۔ پنجاب کے کاشتکاروں کو20ہزار ٹریکٹرز کے دوفیز تقریباً مکمل ہوگئے، مزید10ہزار ٹریکٹربھی دیں گے۔ وزیراعلیٰ مریم نواز شریف نے کہا کہ 2026 میں عوام کو نواز شریف کینسر ہسپتال، سرگودھا کارڈیالوجی اور جناح کارڈیالوجی سمیت بہت سے تحفے پیش کریں گے۔اللہ تعالیٰ کے فضل و کرم سے پنجاب میں 2024ء سے شروع ہونے والا ترقی اور خوشحالی کا سفر 2026ء میں تیز تر ہوگا۔

لاہور ہائی کورٹ میں سال 2026 کی پہلی آئینی درخواست دائر کر دی گئی ہے، جو وکلاء کی ایک نجی تنظیم کی جانب سے جمع کرائی گئی۔

درخواست میں پنجاب بھر کے تمام سرکاری اسپتالوں میں ادویات کی مفت اور بلا تعطل فراہمی کو یقینی بنانے کا مطالبہ کیا گیا ہے۔درخواست گزار کے مطابق صوبے کے مختلف سرکاری اسپتالوں میں جان بچانے والی ادویات سمیت متعدد ضروری میڈیسن کی شدید قلت سامنے آ رہی ہے، جس کے باعث مریضوں اور ان کے لواحقین کو شدید مشکلات کا سامنا ہے۔ درخواست میں مؤقف اپنایا گیا ہے کہ سرکاری اسپتالوں میں ادویات کی عدم دستیابی نہ صرف صحت کے نظام پر سوالیہ نشان ہے بلکہ یہ شہریوں کے بنیادی حقوق کی کھلی خلاف ورزی بھی ہے۔

درخواست میں واضح کیا گیا ہے کہ آئینِ پاکستان کا آرٹیکل 9 ہر شہری کو زندگی اور صحت کا بنیادی حق فراہم کرتا ہے، جبکہ آرٹیکل 25 قانون کے سامنے برابری کی ضمانت دیتا ہے۔ سرکاری اسپتالوں میں ادویات کی قلت ان آئینی شقوں کے منافی ہے، کیونکہ غریب اور مستحق مریض مہنگی ادویات خریدنے کی استطاعت نہیں رکھتے۔درخواست گزار وکلاء تنظیم نے عدالت عالیہ سے استدعا کی ہے کہ وہ پنجاب حکومت اور متعلقہ محکموں کو پابند کرے کہ صوبے کے تمام سرکاری اسپتالوں میں تمام ضروری اور جان بچانے والی ادویات فوری طور پر فراہم کی جائیں اور مستقبل میں ادویات کی بلا تعطل فراہمی کو یقینی بنانے کے لیے مؤثر نظام وضع کیا جائے۔

نیا سال 2026 پوری آب و تاب کے ساتھ شروع ہوگیا۔ باغی ٹی وی کی جانب سے اہلِ وطن کو نئے سال کی دلی مبارکباد پیش کی گئی ہے، اس اُمید کے ساتھ کہ آنے والا سال پاکستان کے لیے خوشحالی، امن اور ترقی کی نوید لے کر آئے گا۔

رات 12 بجتے ہی ملک بھر میں سال نو کے آغاز ہوا تو فضا رنگا رنگ روشنیوں سے جگمگا اُٹھی۔ مختلف شہروں میں آتش بازی کا شاندار مظاہرہ کیا گیا جبکہ شہریوں نے ایک دوسرے کو مبارکباد دے کر نئے سال کا پرتپاک استقبال کیا۔ گھڑی کی سوئیاں جیسے ہی بارہ پر پہنچیں، خوشی کے نعروں اور قہقہوں سے ماحول گونج اُٹھا۔لاہور، کراچی، اسلام آباد سمیت بڑے شہروں میں نوجوان اور خاندان جشن منانے کے لیے گھروں سے باہر نکل آئے۔ شاہراہوں، چوراہوں اور کھلے مقامات پر آتش بازی کے دلکش مناظر دیکھنے میں آئے، جہاں آسمان پر روشنیوں کے رنگ بکھر گئے۔نئے سال کی خوشی میں منچلے سڑکوں پر نکل آئے اور ہلہ گلہ کرتے دکھائی دیے، تاہم بعض شہروں میں قانون نافذ کرنے والے ادارے بھی الرٹ رہے تاکہ کسی ناخوشگوار واقعے سے بچا جا سکے۔ پولیس اور دیگر اداروں نے اہم مقامات پر سکیورٹی کے خصوصی انتظامات کیے تھے۔

شہریوں کا کہنا تھا کہ وہ 2026 سے نئی امیدیں وابستہ کیے ہوئے ہیں اور دعا ہے کہ نیا سال مہنگائی کے خاتمے، روزگار کے مواقع اور ملکی استحکام کا باعث بنے۔ بزرگوں اور نوجوانوں نے یکساں طور پر اس خواہش کا اظہار کیا کہ آنے والا سال ملک میں امن، بھائی چارے اور ترقی کی علامت ثابت ہو۔

باغی ٹی وی ایک بار پھر اہلِ وطن کو نیا سال مبارکباد پیش کرتا ہے اور دعا گو ہے کہ 2026 پاکستان کے لیے کامیابیوں، خوشیوں اور بہتر مستقبل کا سال ثابت ہو۔

سابق ڈی جی آئی ایس پی آر لیفٹیننٹ جنرل (ر) عاصم سلیم باجوہ کی والدہ انتقال کر گئیں۔

مرحومہ طویل عرصے سے بیمار تھیں اور انہیں علاج کے لیے سی ایم ایچ لاہور میں داخل کیا گیا تھا، جہاں وہ چل بسیں۔مرحومہ کی نماز جنازہ یکم جنوری 2026 کو ڈی ایچ اے فیز-8، لاہور میں ادا کی جائے گی۔ نماز جنازہ بعد نماز ظہر، تقریباً 1:30 بجے ہوگی۔ نماز جنازہ میں سیاسی، عسکری اور سماجی شخصیات کے شرکت کے امکانات ہیں، جبکہ اہل خانہ اور قریبی عزیز و اقارب بھی شرکت کریں گے۔

ترجمان پنجاب پولیس کے مطابق دسمبر 2025ء میں ہیلپ لائن 15 پر موصولہ کرائم برخلاف پراپرٹی کی کالز میں دسمبر 2024ء کی نسبت مجموعی طور پر 49 فیصد کمی ریکارڈ کی گئی،

ترجمان پنجاب پولیس کے مطابق دسمبر 2025ء میں ڈکیتی کی 15 پر موصولہ کالز میں دسمبر 2024ء کی نسبت 59 فیصد، راہزنی کی 15 کالز میں 51 فیصد کمی واقع ہوئی،دسمبر 2024ء کے مقابلے میں دسمبر 2025ء میں گاڑی چوری کی 15 کی کالز میں 55 فیصد کمی واقع ہوئی،اسی عرصے کے دوران کار چوری کی 15 کی کالز میں 73 فیصد، موٹر سائیکل چوری کی کالز میں 54 فیصد کمی ہوئی،گزشتہ سال دسمبر کی نسبت دسمبر 2025ء میں گاڑیاں چھینے جانے کی 15 کالز میں 71 فیصد، کار چھیننے کی کالز میں 46 فیصد کمی واقع ہوئی، موٹرسائیکل چھیننے کی 15 کی کالز میں گذشتہ سال کی نسبت 72 فیصد کمی ریکارڈ ہوئی،دسمبر 2024ء کے مقابلے میں دسمبر 2025ء میں قتل کی وارداتوں کی 15 کی کالز میں 36 فیصد، اغواء کی وارداتوں کی کالز میں31 فیصد کمی دیکھنے میں آئی، دسمبر 2024ء کی نسبت دسمبر 2025ء میں نقب زنی اور چوری کی 15 کی کالز میں 33 فیصد کمی ریکارڈ کی گئی،

ترجمان پنجاب پولیس کے مطابق رواں سال خواتین سے اجتماعی زیادتی کے رجسٹرڈ کیسز میں گذشتہ سال کی نسبت 44 فیصد کمی واقع ہوئی، آئی جی پنجاب ڈاکٹر عثمان انور کا کہنا ہے کہ وزیر اعلی مریم نواز شریف نے پنجاب کو محفوظ صوبہ بنانے کے لئے پولیس کو بھرپور وسائل فراہم کئے ہیں،سیف سٹیز کا دائرہ کار شہروں کے بعد اب تحصیلوں کی سطح پر بڑھایا جا رہا ہے،سنگین وارداتوں، سٹریٹ کرائم کی 15 کی کالز میں کمی کا رجحان پنجاب پولیس کی کارکردگی میں بہتری کا عکاس ہے، شہر کے تمام تھانوں میں فری رجسٹریشن آف کرائم یقینی بنایا جا رہا ہے، پنجاب پولیس کا واحد فوکس شہریوں کے جان و مال کا تحفظ، مجرموں کی سرکوبی ہے،