Category: مظفرآباد

راولا کوٹ اور دریائے نیلم کے علاقوں میں گاڑیوں کے دو افسوسناک حادثات پیش آئے جن میں مجموعی طور پر 6 افراد جان کی بازی ہار گئے۔

پولیس کے مطابق راولا کوٹ کے قریب پونچھ یونیورسٹی کے تراڑ کیمپس کے پاس ایک کار نالے میں بہہ گئی۔ اس حادثے میں پونچھ یونیورسٹی کی ایک خاتون لیکچرار جان بحق ہوگئیں۔ متاثرہ خاتون کا نام گل لالہ بتایا گیا ہے جو راولا کوٹ کے نواحی علاقے کھڑک سے تعلق رکھتی تھیں۔پولیس نے بتایا کہ لیکچرار کی گاڑی تراڑ کیمپس کے قریب نالے سے گزر رہی تھی کہ اچانک گاڑی بند ہوگئی۔ اس دوران نالے میں پانی کی سطح اچانک بڑھ گئی اور گاڑی بہہ گئی۔ حادثے کے بعد نالے میں بہہ جانے والی گاڑی میں موجود ڈاکٹر گل لالہ کی تلاش شروع کردی گئی ہے۔

دوسری جانب گریس ویلی کے علاقے میں ایک اور گاڑی دریائے نیلم میں گر گئی جس کے نتیجے میں 5 افراد جاں بحق ہو گئے۔ پولیس نے موقع پر پہنچ کر ریسکیو آپریشن شروع کر دیا ہے اور تحقیقات جاری ہیں کہ گاڑی کیوں اور کیسے نیلم میں گری۔دونوں حادثات نے علاقے میں غم و الم کی لہر دوڑا دی ہے۔ مقامی انتظامیہ اور ریسکیو ٹیمیں لاشوں کی بازیابی اور مزید تفتیش میں مصروف ہیں۔

آزاد کشمیر کا ایک اور سپوت مادر وطن پر قربان، میجر رب نواز گیلانی بلوچستان میں شہید ہو گئے

مظفرآباد سے تعلق رکھنے والے پاک فوج کے آفیسر، میجر رب نواز گیلانی، بلوچستان میں "فتنہ الہند” کے خلاف آپریشن کے دوران جامِ شہادت نوش کر گئے۔شہید کی نمازِ جنازہ مظفرآباد میں ادا کی گئی، جس میں جی او سی مری میجر جنرل محمد عرفان سمیت اعلیٰ عسکری و سول حکام اور شہریوں کی بڑی تعداد نے شرکت کی۔شہید کو پاک فوج کے دستے نے گارڈ آف آنر پیش کیا اور پاک فوج کی جانب سے شہید کی قبر پر پھولوں کی ریت چڑھائی گئی۔والد شہید میجر رب نواز گیلانی کا کہنا تھا کہ میرے بیٹے کو بچپن سے فوج میں جانے کا شوق تھا اور ایک مشن تھا جو آج شہادت کی صورت مکمل ہوا –

شہریوں نے شہید میجر رب نواز گیلانی کو شاندار الفاظ میں خراجِ عقیدت پیش کیا اور ان کی قربانی کو وطن سے سچی محبت کی عظیم مثال قرار دیا

آزاد کشمیر کے سیاحتی علاقے وادی نیلم میں ایک افسوسناک حادثہ پیش آیا ہے جہاں سیاحوں کی ایک گاڑی بے قابو ہو کر دریائے نیلم میں جاگری، جس کے نتیجے میں پانچ خواتین سمیت چھ افراد جاں بحق ہو گئے، جبکہ ایک بچہ تاحال لاپتہ ہے۔

ضلعی ڈیزاسٹر مینجمنٹ اتھارٹی کا کہنا ہے کہ یہ دلخراش واقعہ چلہانہ کے مقام پر پیش آیا، جہاں سیاحوں کی گاڑی اچانک توازن کھو بیٹھنے کے بعد گہری کھائی میں جاگری اور سیدھا دریائے نیلم میں جاپہنچی۔ گاڑی میں مجموعی طور پر سات افراد سوار تھے جن میں پانچ خواتین، ایک بچہ اور ایک مرد شامل تھے۔ریسکیو اہلکاروں اور مقامی پولیس نے فوری طور پر کارروائی کرتے ہوئے چھ لاشوں کو دریا سے نکال لیا ہے۔ لاپتہ بچے کی تلاش کے لیے ریسکیو ٹیموں کا سرچ آپریشن تاحال جاری ہے۔حادثے میں جاں بحق ہونے والے تمام افراد کا تعلق آزاد کشمیر کے دارالحکومت مظفرآباد سے بتایا گیا ہے، جو سیاحت کی غرض سے وادی نیلم آئے تھے۔ ڈی ڈی ایم اے، ریسکیو 1122 اور دیگر اداروں کی مشترکہ ٹیمیں علاقے میں موجود ہیں اور لاپتہ بچے کی تلاش کے لیے ڈرون اور غوطہ خوروں کی مدد سے سرچ آپریشن کیا جا رہا ہے۔

ضلعی انتظامیہ نے حادثے پر گہرے دکھ اور افسوس کا اظہار کرتے ہوئے متاثرہ خاندانوں سے ہمدردی کا اظہار کیا ہے، جبکہ حکومت کی جانب سے واقعے کی مکمل تحقیقات کا حکم بھی دے دیا گیا ہے۔

آزاد جموں و کشمیر سپریم کورٹ کے فل بینچ نے ایک اہم توہینِ عدالت کیس کا فیصلہ سناتے ہوئے سیشن جج حویلی، راجہ امتیاز کو تین دن قید کی سزا سنائی ہے۔ چیف جسٹس راجہ سعید اکرم خان کی سربراہی میں قائم فل بینچ نے فیصلہ سنایا، جس کے بعد عدالت نے جج کو کمرۂ عدالت ہی سے گرفتار کرنے کا حکم جاری کیا۔

پولیس نے فوری کارروائی کرتے ہوئے سیشن جج راجہ امتیاز کو عدالت کے اندر سے حراست میں لے لیا، جس کے مناظر عدالت میں موجود افراد نے حیرت اور سنجیدگی سے دیکھے۔فیصلے میں سپریم کورٹ نے سخت ریمارکس دیتے ہوئے کہا کہ "سیشن جج راجہ امتیاز نے سپریم کورٹ کی اتھارٹی کو چیلنج کیا، اور اعلیٰ عدالتی احکامات کے برعکس ایک منشیات کے ملزم کی ضمانت منظور کی۔”عدالت نے مزید کہا کہ راجہ امتیاز نے عدالت میں جھوٹ بول کر نہ صرف عدالتی وقار کو مجروح کیا بلکہ انصاف کے عمل کو بھی نقصان پہنچایا۔ چیف جسٹس نے فیصلے میں یہ بات واضح کی کہ کسی بھی جج کو آئین و قانون سے بالا تر سمجھا نہیں جا سکتا اور عدالتی احکامات کی خلاف ورزی ناقابلِ قبول ہے۔

اس فیصلے کے بعد عدالتی و قانونی حلقوں میں شدید ردِعمل سامنے آیا ہے۔ ماہرینِ قانون کا کہنا ہے کہ یہ فیصلہ ایک واضح پیغام ہے کہ آزاد جموں و کشمیر کی اعلیٰ عدلیہ اپنے فیصلوں پر عملدرآمد کو یقینی بنانے کے لیے کسی بھی حد تک جا سکتی ہے، چاہے مخاطب عدالتی نظام کا کوئی رکن ہی کیوں نہ ہو۔

توہینِ عدالت کا یہ کیس اس وقت سامنے آیا جب سیشن جج راجہ امتیاز نے ایک ایسے ملزم کو ضمانت پر رہا کیا جس کی درخواستِ ضمانت کو سپریم کورٹ پہلے ہی مسترد کر چکی تھی۔ اس اقدام کو سپریم کورٹ نے اپنی اتھارٹی کو چیلنج کرنے کے مترادف قرار دیا۔

آزاد کشمیر: وادی نیلم کے علاقے دودگئی میں برفانی تودے تلے دب کر جاں بحق ہونے والے تیسرے نوجوان کی لاش چار ماہ بعد نکال لی گئی ہے۔ آزاد کشمیر پولیس کے مطابق جاں بحق نوجوانوں میں سے پہلے دو کی لاشیں پہلے ہی ورثاء کے حوالے کی جا چکی ہیں۔

پولیس کے مطابق یہ نوجوان 24 فروری کو برفانی تودے کے نیچے دب گئے تھے اور ان میں سے تیسرے نوجوان کی لاش اب تک برف کے نیچے دبی رہی تھی، جسے محنت اور مسلسل کوششوں کے بعد نکالا گیا ہے۔جان بحق ہونے والے تینوں نوجوان پھلاوائی گریس ویلی کے رہائشی تھے اور وہ ایک دوسرے کے قریبی دوست تھے۔ اس المناک واقعے نے آزاد کشمیر کے علاقے میں غم کی لہر دوڑا دی ہے اور مقامی لوگوں نے متاثرہ خاندانوں سے ہمدردی کا اظہار کیا ہے۔پولیس اور ریسکیو ٹیموں نے برفانی تودے کے خطرناک اور مشکل علاقے میں بازیابی کے لیے خصوصی اقدامات کیے اور موسمی حالات کی بہتری کے ساتھ لاش نکالنے میں کامیابی حاصل کی۔

واقعے کے بعد علاقے میں برفانی تودے کی حفاظتی تدابیر پر بھی زور دیا جا رہا ہے تاکہ مستقبل میں ایسے حادثات سے بچا جا سکے۔

لاہور(خالدمحمودخالد) بھارتی مقبوضہ کشمیر میں رہنے والے بچوں کے دلوں میں یہ بات گھر کر چکی ہے کہ مقبوضہ کشمیر بھارت کا نہیں بلکہ پاکستان کا حصہ ہے۔ بھارت کی معروف خاتون صحافی ادیتی تیاگی کو اس وقت سخت شرمندگی کا سامنا کرنا پڑا جب ان کے بھارتی مقبوضہ کشمیر کے دورہ کے موقعہ پر ایک چھوٹے سے بچے نے انہیں صاف الفاظ میں بتا دیا کہ مقبوضہ کشمیر دراصل پاکستان ہے۔

ادیتی تیاگی نے مقبوضہ کشمیر کے علاقے لولاب ویلی میں ایک بچے برہان سے پوچھا کہ کیا اس کی پسندیدہ کرکٹ ٹیم آرسی بی ہے۔ جواب میں برہان کا کہنا تھا نہیں اس کی پسندیدہ ٹیم پاکستان کی ہے۔ بھارتی صحافی نے کہا کہ پاکستانی ٹیم تو ہارتی رہتی ہے تمہیں کیوں پسند ہے۔ برہان نے جواب دیا کہ ہارجیت تو ہوتی رہتی ہے پاکستان تو ہمارا ملک ہے اس لیے مجھے پسند ہے۔ ادیتی نے کہا کہ تم تو بھارت میں رہتے ہو تمہیں کس نے پڑھایا ہے کس نے سکھایا ہے کہ تم پاکستان میں رہتے ہو۔ جب  برہان نے جواب دیا کہ اس نے خود سے سیکھا ہے وہ پاکستان میں رہتا ہے بھارت میں نہیں تو اس پر ادیتی اپنا سا منہ لے کر وہاں سے چلی گئی۔