Category: ننکانہ

ننکانہ صاحب (نامہ نگار احسان اللہ ایاز، باغی ٹی وی) وزیراعلیٰ پنجاب مریم نواز شریف کی جانب سے صحت کے شعبے میں انقلابی اصلاحات کے بلند و بانگ دعووں کے باوجود، ڈسٹرکٹ ہیڈ کوارٹر ہسپتال ننکانہ صاحب کی لیبارٹری کئی ہفتوں سے انتہائی اہم ٹیسٹوں کی سہولت فراہم کرنے میں ناکام ہے۔ رپورٹس کے مطابق، اہم ترین ٹیسٹ جیسے LFT (جگر کا ٹیسٹ)، HIV اور UPT (خواتین کے لیے) کے لیے درکار کٹس اور کیمیکل ختم ہو چکے ہیں، جس سے مریضوں اور ان کے لواحقین کو شدید مشکلات کا سامنا ہے۔

غریب اور دیہی علاقوں سے تعلق رکھنے والے مریضوں کو مجبوری کے عالم میں پرائیویٹ لیبارٹریز کا رخ کرنا پڑ رہا ہے، جہاں انہیں بھاری فیسیں ادا کرنا پڑ رہی ہیں۔ اس صورتحال نے نہ صرف ان کے علاج کو متاثر کیا ہے بلکہ انہیں معاشی طور پر بھی شدید پریشانی میں مبتلا کر دیا ہے۔

ذرائع کے مطابق، HIV ٹیسٹ، جو گائنی آپریشنز اور دیگر سرجریز سے قبل لازمی ہوتا ہے، کئی ہفتوں سے دستیاب نہیں ہے۔ اسی طرح جگر کی کارکردگی جانچنے والا LFT اور خواتین کے علاج و آپریشن کے لیے ضروری UPT بھی بند پڑے ہیں۔

عوامی اور سماجی حلقوں نے اس صورتحال پر شدید تشویش کا اظہار کرتے ہوئے سوال اٹھایا ہے کہ جب وزیراعلیٰ صحت کے شعبے میں بہتری کی بات کر رہی ہیں تو ضلعی سطح پر یہ بدانتظامی کیوں ہے؟ شہریوں نے سی ای او ہیلتھ ڈاکٹر روحیل اختر اور ڈپٹی کمشنر محمد تسلیم اختر راؤ سے اس معاملے پر جوابدہی کا مطالبہ کیا ہے اور کہا ہے کہ عوام کو بنیادی سہولیات کیوں فراہم نہیں کی جا رہیں۔

شہریوں نے مزید کہا کہ ضلعی افسران کی یہ ناکامی وزیراعلیٰ کے اقدامات پر سوالیہ نشان ہے اور اگر مقامی افسران اپنی ذمہ داریاں پوری کرنے میں ناکام رہے تو صحت کی اصلاحات صرف کاغذوں تک محدود رہ جائیں گی۔ عوام نے وزیراعلیٰ پنجاب سے فوری نوٹس لینے کی اپیل کی ہے تاکہ ڈی ایچ کیو ہسپتال ننکانہ صاحب میں ٹیسٹوں کی فراہمی کو یقینی بنایا جا سکے اور غریب مریضوں کو پرائیویٹ لیبارٹریز کے رحم و کرم پر نہ چھوڑا جائے۔

ننکانہ صاحب (باغی ٹی وی، نامہ نگاراحسان اللہ ایاز) ڈسٹرکٹ ہیڈ کوارٹر ہسپتال ننکانہ صاحب ایک بڑے کرپشن اسکینڈل کی زد میں آ گیا ہے جہاں مبینہ طور پر ہسپتال کے اندر موجود کرپٹ مافیا 60 اور 50 KVA کے دو بڑے جنریٹر غائب کرنے میں کامیاب ہو گیا ہے۔ ذرائع کے مطابق، یہ انتہائی قیمتی سامان ہسپتال کے ریکارڈ سے تو ظاہر ہے لیکن عملی طور پر غائب ہو چکا ہے، اور اس بارے میں کوئی بھی ذمہ دار شخص جواب دینے کو تیار نہیں۔

اس واقعے نے ہسپتال انتظامیہ کی کارکردگی پر شدید سوالات اٹھا دیے ہیں اور عوامی حلقوں میں غم و غصے کی لہر دوڑ گئی ہے۔ یہ کوئی معمولی چوری نہیں بلکہ لاکھوں روپے مالیت کے بڑے آلات کا ہضم ہو جانا ایک ایسے منظم مافیا کی نشاندہی کرتا ہے جو ہسپتال کے اثاثوں کی بندر بانٹ میں مصروف ہے۔

عوامی نمائندوں اور سماجی کارکنوں نے اس سنگین معاملے پر فوری تحقیقات کا مطالبہ کیا ہے۔ ان کا کہنا ہے کہ اعلیٰ حکام کو اس معاملے کا نوٹس لینا چاہیے اور ذمہ داران کے خلاف سخت کارروائی کرنی چاہیے تاکہ ہسپتال میں موجود قیمتی سامان کا تحفظ یقینی بنایا جا سکے۔

یہ اسکینڈل ہسپتال میں پہلے سے موجود بدانتظامی اور کرپشن کی شکایات کو مزید تقویت دیتا ہے۔ ضرورت اس امر کی ہے کہ نہ صرف غائب ہونے والے جنریٹروں کا سراغ لگایا جائے بلکہ ان تمام افراد کا محاسبہ بھی کیا جائے جو اس واردات میں ملوث ہیں۔

ننکانہ صاحب (باغی ٹی وی ،نامہ نگاراحسان اللہ ایاز) ڈسٹرکٹ ہیڈ کوارٹر ہسپتال ننکانہ صاحب میں صفائی کے ٹھیکے کے تحت ایک سنگین کرپشن اسکینڈل بے نقاب ہوا ہے، جس نے محکمہ صحت اور ضلعی انتظامیہ کو ہلا کر رکھ دیا ہے۔ ذرائع کے مطابق "جینوریل سروسز لاہور” نامی نجی کمپنی کے سپروائزر محمد اسامہ پر الزام ہے کہ وہ ہسپتال کے تقریباً 72 مرد و خواتین ملازمین کی تنخواہوں میں سے باقاعدگی سے بھاری رقوم غیر قانونی طور پر کاٹتا رہا۔

ایک خفیہ انٹیلی جنس رپورٹ میں انکشاف ہوا کہ سپروائزر اسامہ نے جون 2025 میں ہر ملازم کی تنخواہ سے 5 ہزار روپے اور جولائی میں 4 ہزار روپے کی کٹوتی کی۔ اس غیر قانونی عمل سے جون میں تقریباً 3 لاکھ 45 ہزار روپے جبکہ جولائی میں 2 لاکھ 88 ہزار روپے ہتھیا لیے گئے۔ متاثرہ ملازمین کی ماہانہ تنخواہ تقریباً 37 ہزار روپے ہے اور وہ صفائی کے ساتھ ساتھ وارڈ بوائے کے فرائض بھی سرانجام دیتے ہیں۔

رپورٹ کے مطابق اسامہ ملازمین کو دھمکاتا تھا کہ اگر کسی نے یہ معاملہ افشا کیا تو اسے فوراً نوکری سے برخاست کر دیا جائے گا۔ اس خوف کی وجہ سے بیشتر ملازمین طویل عرصے تک خاموش رہے، جبکہ کچھ نے پسِ پردہ اعلیٰ حکام کو شکایات پہنچائیں۔

انٹیلی جنس ادارے نے اپنی رپورٹ کے ساتھ حکام کو ایک ویڈیو ثبوت بھی فراہم کیا ہے، جس میں مبینہ طور پر غیر قانونی کٹوتیوں کا اعتراف اور رقوم کی لین دین کے شواہد موجود ہیں۔ اس رپورٹ کی بنیاد پر ضلعی انتظامیہ نے اسکینڈل کی اعلیٰ سطح پر تحقیقات کا آغاز کر دیا ہے۔ ذرائع کا کہنا ہے کہ مزید حقائق اور ملوث افراد کے نام آئندہ چند روز میں منظرعام پر آنے کا امکان ہے۔

اس واقعے پر شہری اور سماجی حلقے شدید برہمی کا اظہار کر رہے ہیں۔ ان کا کہنا ہے کہ کم تنخواہ پر محنت کرنے والے ملازمین کے حقوق پر ڈاکہ ڈالنا سنگین جرم ہے، جس میں ملوث افراد کو قانون کے مطابق کڑی سزا ملنی چاہیے۔ عوامی حلقوں نے وزیراعلیٰ پنجاب اور محکمہ صحت کے اعلیٰ حکام سے مطالبہ کیا ہے کہ اس اسکینڈل میں ملوث تمام افراد کو فی الفور معطل کر کے ان کے خلاف فوجداری مقدمات درج کیے جائیں۔

ننکانہ صاحب (باغی ٹی وی، نامہ نگار احسان اللہ ایاز)پنجاب ایمرجنسی سروس ریسکیو 1122 ننکانہ صاحب میں ماہانہ کارکردگی اجلاس کا انعقاد ہوا، جس کی صدارت ڈسٹرکٹ ایمرجنسی آفیسر محمد اکرم پنوار نے کی۔ اجلاس میں مختلف شعبہ جات کے افسران نے شرکت کی جن میں کنٹرول روم انچارج محمد نوید، ریسکیو سیفٹی آفیسر علی عمران، اسٹیشن کوارڈینیٹر محمد سعید اور میڈیا کوارڈینیٹر علی اکبر شامل تھے۔

اجلاس میں بریفنگ دیتے ہوئے بتایا گیا کہ جولائی 2025 کے دوران ریسکیو 1122 کو موصول ہونے والی 17668 کالز میں سے 4424 ایمرجنسیز کالز تھیں جن پر فوری کارروائی کی گئی۔ ان ایمرجنسیز کے نتیجے میں 5470 متاثرین کو سروس فراہم کی گئی، جن میں634 روڈ ٹریفک حادثات،2724 میڈیکل کیسز،13 آگ لگنے کے واقعات،86 جھگڑے یا تشدد کے کیس،24 عمارتوں کے منہدم ہونے کے واقعات،4 پانی میں ڈوبنے کے واقعات،600 متفرق ایمرجنسیز شامل تھیں۔

ریسکیو اہلکاروں نے 2578 زخمیوں کو جائے وقوعہ پر فوری طبی امداد فراہم کی، جبکہ 2455 مریضوں کو مختلف اسپتالوں میں منتقل کیا گیا۔ افسوسناک طور پر 98 متاثرین جانبر نہ ہو سکے۔

علاوہ ازیں، ضلعی سطح پر علاج کی سہولیات نہ ہونے کے باعث 339 مریضوں کو ریفر کیا گیا، جنہیں پیشنٹ ٹرانسفر سروس کے ذریعے لاہور اور فیصل آباد کے بڑے اسپتالوں تک بلا معاوضہ اور محفوظ طریقے سے منتقل کیا گیا۔

اس موقع پر ڈسٹرکٹ ایمرجنسی آفیسر محمد اکرم پنوار نے موسم برسات کے خطرات سے بچاؤ کے لیے شہریوں سے اپیل کی کہ:
"برسات کے دوران بجلی کے کھمبوں سے محفوظ فاصلہ رکھیں، بچوں کو گھروں سے باہر نہ نکلنے دیں، اور گھروں کی چھتوں و نالیوں کی صفائی کا خاص خیال رکھیں تاکہ کسی قسم کے جانی و مالی نقصان سے بچا جا سکے۔”

ریسکیو 1122 کی ماہانہ رپورٹ ضلعی ایمرجنسی سروسز کی پیشہ ورانہ کارکردگی اور عوامی خدمت کے جذبے کی بھرپور عکاسی کرتی ہے۔

ننکانہ صاحب(باغی ٹی وی رپورٹ) متروکہ وقف املاک بورڈ (ETPB) ننکانہ صاحب کے دفتر سے آنے والی خبروں نے ایک بڑے سکینڈل کا پردہ چاک کر دیا ہے جہاں ایک سیکیورٹی سپروائزر مبینہ طور پر پورے محکمے کو اپنی مٹھی میں لیے ہوئے تھا! محمد ارسلان نسیم، ایک سیکیورٹی سپروائزر کے معمولی عہدے پر فائز ہونے کے باوجود، ایسے سنگین الزامات کی زد میں ہے جنہوں نے نہ صرف اپنے اختیارات کی تمام حدیں پھلانگ دیں بلکہ رشوت کے عوض سرکاری زمینوں اور دکانوں پر ناجائز قبضے کی سرپرستی کا مکروہ کھیل بھی کھیلا۔

ذرائع سےسنسنی خیز تفصیلات کے مطابق ارسلان نسیم کی اصلی تعیناتی محض سیکیورٹی سپروائزر کے طور پر تھی، لیکن ایک پراسرار سازش کے تحت وہ لمبے عرصے سے ایڈمنسٹریٹر کے ریڈر کا غیر قانونی عہدہ سنبھالے ہوئے تھا۔ یہ ایک ایسا عہدہ تھا جسے اختیار کرنے کا اسے کوئی قانونی حق نہیں تھا، اور اسی کی آڑ میں مبینہ طور پر اس نے کرپشن کا ایک وسیع جال بچھا دیا۔

چند ماہ قبل ڈپٹی ایڈمنسٹریٹر نے خود ارسلان نسیم کے خلاف تھانہ سٹی ننکانہ صاحب میں ایف آئی آر درج کروائی۔ اس ایف آئی آر میں اس پر ناجائز تعمیرات کی اجازت دینے، قبضہ گروپوں کی پشت پناہی کرنے، اور بھاری رشوت وصول کرنے جیسے سنگین الزامات عائد کیے گئے تھے! اس کے بعد اسے لاہور منتقل کر دیا گیا، لیکن حیران کن طور پر اس نے عدالت سے حکم امتناع حاصل کر لیا۔ اگرچہ وہ حکم امتناع اب ختم ہو چکا ہے، لیکن یہ بدعنوان عنصر اب بھی غیر قانونی طور پر ننکانہ آفس میں ڈیرہ جمائے ہوئے ہے!

ذرائع کا دعویٰ ہے کہ محمد ارسلان نے مبینہ طور پر چیئرمین آفس میں بھاری رشوت دے کر اپنا تبادلے کا آرڈر دبوا رکھا ہے اور وہ اب بھی دندناتا پھر رہا ہے۔ سب سے حیران کن انکشاف یہ ہے کہ ڈپٹی ایڈمنسٹریٹر کی غیر موجودگی کا فائدہ اٹھاتے ہوئے، اس نے بچیکی اور واربرٹن روڈ پر واقع 70 سیل شدہ دکانیں بھاری رشوت لے کر دوبارہ کھلوا دیں! بتایا جاتا ہے کہ بعض دکان داروں سے 3 سے 5 لاکھ روپے تک کی وصولی کی گئی اور بعض کے لیے تو جعلی کرائے نامے بھی تیار کیے گئے!

اس خوفناک صورتحال کے باوجود، عوامی نمائندوں نے بارہا ایڈمنسٹریٹر کو آگاہ کیا، لیکن اس نے کوئی نوٹس نہیں لیا، بلکہ ذرائع کے مطابق وہ بھی اس سارے عمل میں یا تو آنکھیں بند کیے ہوئے ہے یا پھر خود ملوث ہے! دکانوں میں بدستور کاروبار جاری ہے، جو اس پورے معاملے کی سنگینی کی چیخ چیخ کر گواہی دے رہا ہے۔

عوامی اور سماجی حلقوں نے اس شرمناک صورتحال پر شدید احتجاج کرتے ہوئے اعلیٰ حکام سے فوری، شفاف اور غیر جانبدارانہ انکوائری کا مطالبہ کیا ہے۔ ان کا کہنا ہے کہ بدعنوان عناصر کے خلاف سخت ترین محکمانہ کارروائی کی جائے تاکہ متروکہ وقف املاک بورڈ جیسے اہم ادارے میں قانون کی بالادستی قائم ہو سکے۔

کیا اعلیٰ حکام اس کرپشن کے عفریت کو لگام ڈال سکیں گے؟ یا یہ بدعنوان عناصر اسی طرح آزادانہ گھومتے رہیں گے؟

واربرٹن (باغی ٹی وی، عبدالغفار چوہدری)پولیس تھانہ واربرٹن نے جرائم پیشہ عناصر کے خلاف کارروائیوں کا سلسلہ جاری رکھتے ہوئے دو منشیات فروشوں کو رنگے ہاتھوں گرفتار کر لیا۔ ایس ایچ او مجاہد عباس ملہی کی سربراہی میں کی گئی کارروائی کے دوران ملزم نوازش سے 5460 گرام جبکہ اسامہ سے 560 گرام منشیات برآمد ہوئی۔

پولیس نے دونوں ملزمان کے خلاف مقدمات درج کر کے مزید تفتیش شروع کر دی ہے۔ ڈی پی او ننکانہ سید ندیم عباس کا کہنا ہے کہ نشے کا کاروبار کرنے والے معاشرے کے دشمن ہیں، انہیں کسی صورت برداشت نہیں کیا جائے گا۔ ضلع کو منشیات سے پاک کرنا پولیس کی اولین ترجیح ہے۔