Category: ننکانہ

واربرٹن(نامہ نگارعبدالغفار چوہدری) واربرٹن پولیس نے منشیات فروشوں کے خلاف اپنی کارروائیاں تیز کرتے ہوئے ایک بڑے آپریشن میں بدنام زمانہ منشیات فروش بابر اور اس کی بیوی نائلہ کو رنگے ہاتھوں گرفتار کر لیا۔ پولیس نے ان کے قبضے سے ساڑھے 3 کلو سے زائد منشیات برآمد کی ہے۔

ایس ایچ او سیف ورک کی سربراہی میں تھانہ واربرٹن پولیس نے منشیات کی سپلائی کی ایک کوشش کو ناکام بنایا اور دونوں ملزمان کو گرفتار کر لیا۔ ملزم بابر ایک ریکارڈ یافتہ مجرم ہے جس کے خلاف ڈکیتی، چوری اور منشیات فروشی سمیت 16 مقدمات درج ہیں۔

پولیس نے ملزمان کے خلاف مقدمہ درج کر کے مزید تفتیش کا آغاز کر دیا ہے۔

ڈی پی او ننکانہ، فراز احمد نے اس موقع پر کہا کہ ضلع کو منشیات کی لعنت سے پاک کرنا ان کی اولین ترجیح ہے۔ انہوں نے واضح کیا کہ نشے کا ناسور پھیلانے والے کسی بھی صورت قابلِ معافی نہیں ہیں۔

ننکانہ صاحب (باغی ٹی وی،نامہ نگار احسان اللہ ایاز)ننکانہ صاحب کے علاقے شاہکوٹ میں تھانہ صدر کی حدود میں ڈکیتی کی واردات کے بعد پولیس کے ساتھ مقابلے میں دو ڈاکو ہلاک ہو گئے۔

پولیس کو 15 پر اطلاع ملی کہ تین نامعلوم افراد ایک شہری سے واردات کر کے فرار ہو رہے ہیں۔ اطلاع ملتے ہی پولیس نے فوری طور پر ملزمان کا تعاقب شروع کیا۔ تعاقب کے دوران ملزمان نے پولیس پر فائرنگ کر دی۔

پولیس نے اپنی حفاظت میں جوابی فائرنگ کی جس کے نتیجے میں دو ملزمان اپنے ہی ایک ساتھی کی فائرنگ سے ہلاک ہو گئے۔ ایک ملزم جائے وقوعہ سے فرار ہونے میں کامیاب ہو گیا۔ ہلاک ہونے والے ملزمان کی شناخت کا عمل جاری ہے۔

پولیس نے ہلاک ملزمان کے قبضے سے واردات میں چھینا گیا مال مسروقہ اور اسلحہ برآمد کر لیا ہے۔ فرار ہونے والے ملزم کی گرفتاری کے لیے پولیس کی ٹیمیں علاقے میں سرچ آپریشن کر رہی ہیں۔

پولیس کے مطابق، ہلاک ہونے والے دونوں ملزمان وہی تھے جنہوں نے گذشتہ روز دو پولیس کانسٹیبلز کو زخمی کر کے فرار ہونے میں کامیابی حاصل کی تھی۔

ننکانہ صاحب (باغی ٹی وی،نامہ نگار احسان اللہ ایاز)ننکانہ صاحب میں ضلعی انتظامیہ اور پولیس سیلاب سے متاثرہ علاقوں میں امدادی کارروائیوں میں مصروف ہے۔ ڈپٹی کمشنر محمد تسلیم اختر راؤ اور ڈسٹرکٹ پولیس آفیسر (DPO) فراز احمد نے منڈی فیض آباد کے سیلاب زدہ علاقوں کا دورہ کیا۔

اس دورے میں ان کے ہمراہ اسسٹنٹ کمشنر عطیہ عنایت، ریسکیو 1122 اور دیگر متعلقہ محکموں کے افسران بھی تھے۔ افسران نے نواں کوٹ اور جٹاں دا واڑہ کے علاقوں کا جائزہ لیا۔ انہوں نے ریلیف کیمپس میں فراہم کی جانے والی سہولیات اور امدادی کارروائیوں میں استعمال ہونے والے آلات کا بھی معائنہ کیا۔

ضلعی انتظامیہ کی جانب سے لوگوں اور مال مویشیوں کو محفوظ مقامات پر منتقل کرنے کے انتظامات کیے جا رہے ہیں۔ اس سلسلے میں ریسکیو 1122، محکمہ صحت، ایریگیشن اور لائیو سٹاک سمیت دیگر اداروں کے تعاون سے ریلیف کیمپس قائم کیے گئے ہیں۔

ڈپٹی کمشنر محمد تسلیم اختر راؤ نے بتایا کہ سیلاب کی صورتحال کے پیش نظر تمام متعلقہ اداروں کے افسران و عملے کی چھٹیاں منسوخ کر دی گئی ہیں۔ ڈی پی او فراز احمد نے کہا کہ ضلعی انتظامیہ اور پولیس عوام کی جان و مال کے تحفظ کے لیے مل کر کام کر رہے ہیں۔

ننکانہ صاحب(نامہ نگاراحسان اللہ ایاز) مون سون کی پہلی ہی بارش نے ننکانہ صاحب میں میونسپل کمیٹی کی کارکردگی کا پول کھول دیا۔ شہر کے مختلف علاقے، جن میں حرا چوک، ڈاکٹر والا بازار، ہاؤسنگ کالونی، کلمہ چوک اور کیارہ صاحب شامل ہیں، بارش کے پانی میں ڈوب گئے، جس سے شہریوں کو شدید مشکلات کا سامنا کرنا پڑا۔

میونسپل کمیٹی کے افسران کی نااہلی اور غفلت کی وجہ سے شہر کا سیوریج کا نظام مکمل طور پر تباہ ہو چکا ہے۔ معمولی بارش بھی سیوریج کے پانی کو گلیوں اور بازاروں میں لے آتی ہے، جس سے بدبو اور گندگی کا راج قائم ہو جاتا ہے۔

شہر کو ماڈل سٹی بنانے کے بلند و بانگ دعوے مون سون کی بارش کے ساتھ ہی حقیقت سے دور ہوتے نظر آ رہے ہیں۔ سیوریج کے ناقص نظام کی وجہ سے شہری پریشانی کا شکار ہیں۔

شہریوں نے ڈپٹی کمشنر ننکانہ صاحب اور دیگر اعلیٰ حکام سے اپیل کی ہے کہ وہ ننکانہ کے سیوریج سسٹم کو بہتر بنانے کے لیے ہنگامی بنیادوں پر اقدامات کریں تاکہ مستقبل میں اس طرح کی پریشانیوں سے بچا جا سکے۔

ننکانہ صاحب (نامہ نگار احسان اللہ ایاز، باغی ٹی وی) وزیراعلیٰ پنجاب مریم نواز شریف کی جانب سے صحت کے شعبے میں انقلابی اصلاحات کے بلند و بانگ دعووں کے باوجود، ڈسٹرکٹ ہیڈ کوارٹر ہسپتال ننکانہ صاحب کی لیبارٹری کئی ہفتوں سے انتہائی اہم ٹیسٹوں کی سہولت فراہم کرنے میں ناکام ہے۔ رپورٹس کے مطابق، اہم ترین ٹیسٹ جیسے LFT (جگر کا ٹیسٹ)، HIV اور UPT (خواتین کے لیے) کے لیے درکار کٹس اور کیمیکل ختم ہو چکے ہیں، جس سے مریضوں اور ان کے لواحقین کو شدید مشکلات کا سامنا ہے۔

غریب اور دیہی علاقوں سے تعلق رکھنے والے مریضوں کو مجبوری کے عالم میں پرائیویٹ لیبارٹریز کا رخ کرنا پڑ رہا ہے، جہاں انہیں بھاری فیسیں ادا کرنا پڑ رہی ہیں۔ اس صورتحال نے نہ صرف ان کے علاج کو متاثر کیا ہے بلکہ انہیں معاشی طور پر بھی شدید پریشانی میں مبتلا کر دیا ہے۔

ذرائع کے مطابق، HIV ٹیسٹ، جو گائنی آپریشنز اور دیگر سرجریز سے قبل لازمی ہوتا ہے، کئی ہفتوں سے دستیاب نہیں ہے۔ اسی طرح جگر کی کارکردگی جانچنے والا LFT اور خواتین کے علاج و آپریشن کے لیے ضروری UPT بھی بند پڑے ہیں۔

عوامی اور سماجی حلقوں نے اس صورتحال پر شدید تشویش کا اظہار کرتے ہوئے سوال اٹھایا ہے کہ جب وزیراعلیٰ صحت کے شعبے میں بہتری کی بات کر رہی ہیں تو ضلعی سطح پر یہ بدانتظامی کیوں ہے؟ شہریوں نے سی ای او ہیلتھ ڈاکٹر روحیل اختر اور ڈپٹی کمشنر محمد تسلیم اختر راؤ سے اس معاملے پر جوابدہی کا مطالبہ کیا ہے اور کہا ہے کہ عوام کو بنیادی سہولیات کیوں فراہم نہیں کی جا رہیں۔

شہریوں نے مزید کہا کہ ضلعی افسران کی یہ ناکامی وزیراعلیٰ کے اقدامات پر سوالیہ نشان ہے اور اگر مقامی افسران اپنی ذمہ داریاں پوری کرنے میں ناکام رہے تو صحت کی اصلاحات صرف کاغذوں تک محدود رہ جائیں گی۔ عوام نے وزیراعلیٰ پنجاب سے فوری نوٹس لینے کی اپیل کی ہے تاکہ ڈی ایچ کیو ہسپتال ننکانہ صاحب میں ٹیسٹوں کی فراہمی کو یقینی بنایا جا سکے اور غریب مریضوں کو پرائیویٹ لیبارٹریز کے رحم و کرم پر نہ چھوڑا جائے۔

ننکانہ صاحب (باغی ٹی وی، نامہ نگاراحسان اللہ ایاز) ڈسٹرکٹ ہیڈ کوارٹر ہسپتال ننکانہ صاحب ایک بڑے کرپشن اسکینڈل کی زد میں آ گیا ہے جہاں مبینہ طور پر ہسپتال کے اندر موجود کرپٹ مافیا 60 اور 50 KVA کے دو بڑے جنریٹر غائب کرنے میں کامیاب ہو گیا ہے۔ ذرائع کے مطابق، یہ انتہائی قیمتی سامان ہسپتال کے ریکارڈ سے تو ظاہر ہے لیکن عملی طور پر غائب ہو چکا ہے، اور اس بارے میں کوئی بھی ذمہ دار شخص جواب دینے کو تیار نہیں۔

اس واقعے نے ہسپتال انتظامیہ کی کارکردگی پر شدید سوالات اٹھا دیے ہیں اور عوامی حلقوں میں غم و غصے کی لہر دوڑ گئی ہے۔ یہ کوئی معمولی چوری نہیں بلکہ لاکھوں روپے مالیت کے بڑے آلات کا ہضم ہو جانا ایک ایسے منظم مافیا کی نشاندہی کرتا ہے جو ہسپتال کے اثاثوں کی بندر بانٹ میں مصروف ہے۔

عوامی نمائندوں اور سماجی کارکنوں نے اس سنگین معاملے پر فوری تحقیقات کا مطالبہ کیا ہے۔ ان کا کہنا ہے کہ اعلیٰ حکام کو اس معاملے کا نوٹس لینا چاہیے اور ذمہ داران کے خلاف سخت کارروائی کرنی چاہیے تاکہ ہسپتال میں موجود قیمتی سامان کا تحفظ یقینی بنایا جا سکے۔

یہ اسکینڈل ہسپتال میں پہلے سے موجود بدانتظامی اور کرپشن کی شکایات کو مزید تقویت دیتا ہے۔ ضرورت اس امر کی ہے کہ نہ صرف غائب ہونے والے جنریٹروں کا سراغ لگایا جائے بلکہ ان تمام افراد کا محاسبہ بھی کیا جائے جو اس واردات میں ملوث ہیں۔