Category: ننکانہ

ننکانہ صاحب (باغی ٹی وی، نامہ نگار احسان اللہ ایاز) ڈپٹی کمشنر محمد تسلیم اختر راؤ کی زیر صدارت یوم آزادی کو شاندار طریقے سے منانے کے حوالے سے ایک اہم جائزہ اجلاس منعقد ہوا۔ اجلاس میں ایڈیشنل ڈپٹی کمشنر شاہد کھوکھر اور تینوں تحصیلوں کے اسسٹنٹ کمشنرز سمیت تمام ضلعی افسران نے شرکت کی۔

اجلاس میں ضلع افسران نے "معرکہ حق” اور "جشن آزادی” کی جاری تقریبات اور 14 اگست کی تیاریوں کے بارے میں بریفنگ دی۔ بریفنگ میں بتایا گیا کہ جشن آزادی کی تقریبات روزانہ کی بنیاد پر جاری ہیں اور 14 اگست کی مرکزی تقریبات کے تمام انتظامات مکمل کر لیے گئے ہیں۔

ڈپٹی کمشنر محمد تسلیم اختر راؤ نے خطاب کرتے ہوئے کہا کہ اس سال یوم آزادی کی تقریبات "معرکہ حق” میں پاکستان کی فتح کے جذبے کے ساتھ منائی جا رہی ہیں۔ انہوں نے بتایا کہ وزیراعلیٰ پنجاب مریم نوازشریف کی خصوصی ہدایات پر یہ تقریبات "حصولِ آزادی سے تحفظِ آزادی تک” کے عنوان سے منعقد کی جا رہی ہیں۔ انہوں نے مزید کہا کہ ضلع بھر کے تمام پبلک اور پرائیویٹ سکولوں میں آج سے تقریبات کا آغاز ہو جائے گا اور تدریسی سرگرمیاں نہیں ہوں گی۔

ڈپٹی کمشنر نے بتایا کہ 12 اگست کی شام علامہ اقبال پارک میں بچوں کے لیے میجک اور پپٹ شو سمیت دیگر تقریبات کا اہتمام کیا جائے گا، جبکہ 13 اگست کی رات اسی پارک میں میوزیکل شو منعقد ہو گا۔ انہوں نے کہا کہ اس سال جشن آزادی میں نوجوانوں اور بچوں کی خصوصی شرکت کو یقینی بنایا جا رہا ہے۔

اہم اعلانات اور ہدایات:
پرچم کشائی: ضلع کی مرکزی پرچم کشائی کی تقریب جمنازیم ہال میں ہوگی، جبکہ تحصیل سطح پر اسسٹنٹ کمشنرز پرچم کشائی سمیت دیگر تقریبات میں شرکت کریں گے۔
مقابلہ جات: ضلعی اور تحصیل سطح پر قرات، نعت، تقاریر اور دیگر مقابلہ جات کا انعقاد کیا جائے گا۔
شجرکاری: ضلع بھر میں شجرکاری مہم کے تحت پودے لگائے جا رہے ہیں۔
آتشبازی: 13 اگست کی رات میونسپل حدود میں شاندار آتشبازی کا مظاہرہ کیا جائے گا۔
چھٹیاں منسوخ: 15 اگست تک ہسپتالوں کے ڈاکٹروں اور عملے سمیت تمام ضلعی اداروں کے افسران و اہلکاروں کی چھٹیاں منسوخ کر دی گئی ہیں۔

حفاظتی اقدامات: 14 اگست کو ضلع بھر میں صفائی ستھرائی کے مثالی انتظامات کیے جائیں گے۔ گوردوارہ جات اور چینی باشندوں کی سکیورٹی کو یقینی بنانے کی ہدایت کی گئی ہے، اور تمام ایونٹس پر خواتین پولیس اہلکاروں کو بھی تعینات کیا جائے گا۔

دفعہ 144: 15 اگست تک ون ویلنگ، ہلڑ بازی، سلنسر اتارنے، نہروں اور دریاؤں میں نہانے پر دفعہ 144 نافذ ہو گی۔ اس کے علاوہ ہوائی فائرنگ اور اسلحہ لہرانے پر بھی پابندی ہو گی۔ پولیس کو پٹرولنگ بڑھانے کی ہدایت کی گئی ہے۔

ڈپٹی کمشنر نے عوام سے اپیل کی کہ وہ یوم آزادی کی تقریبات میں بھرپور شرکت کریں اور یہ ثابت کر دیں کہ وہ ایک زندہ اور باوقار قوم ہیں۔

ننکانہ صاحب (باغی ٹی وی، نامہ نگار احسان اللہ ایاز) پاکستان مرکزی مسلم لیگ ضلع ننکانہ صاحب کے زیر اہتمام "متحد قوم فاتح پاکستان” کے عنوان سے ایک آل پارٹیز کانفرنس کا انعقاد کیا گیا۔

کانفرنس میں پاکستان مرکزی مسلم لیگ کے رہنماؤں کے علاوہ پاکستان پیپلز پارٹی، مسلم اسٹوڈنٹس لیگ، تاجر برادری، وکلاء اور میڈیا کے نمائندوں نے شرکت کی۔ مقررین میں پاکستان مرکزی مسلم لیگ وسطی پنجاب کے صدر حمید الحسن گجر، پاکستان پیپلزپارٹی لاہور ڈویژن کے صدر رائے شاہ جہان احمد بھٹی، مسلم سٹوڈنٹس لیگ پاکستان کے سیکرٹری جنرل عمر عباس اور پاکستان مرکزی مسلم لیگ ضلع ننکانہ صاحب کے صدر میاں عابد شامل تھے۔

مقررین نے اپنے خطاب میں کہا کہ "معرکہ حق” اور "آپریشن بنیان المرصوص” میں پاک فوج نے بھارت کے غرور کو خاک میں ملا کر 1971 میں پاکستان کے خلاف کی گئی سازشوں کا بدلہ لیا۔ انہوں نے کہا کہ اس تاریخی کامیابی کے بعد پوری قوم اس سال یوم آزادی بھرپور جوش و خروش سے منا رہی ہے۔

انہوں نے مزید بتایا کہ پاکستان مرکزی مسلم لیگ اس سال "ہفتہ یوم آزادی” منا رہی ہے اور 14 اگست کو گول چکر ننکانہ صاحب میں ایک بڑی "متحد قوم فاتح پاکستان کانفرنس” منعقد کی جائے گی، جس میں تمام مکاتب فکر سے تعلق رکھنے والے ہزاروں افراد شرکت کریں گے۔

مقررین نے اس بات پر زور دیا کہ 10 مئی کو پوری قوم نے افواج پاکستان کے ساتھ کھڑے ہو کر مثالی اتحاد کا مظاہرہ کیا اور ملک کو ترقی یافتہ اور خوشحال بنانے کے لیے اسی طرح کے اتحاد کی ضرورت ہے۔ انہوں نے بھارت کو خبردار کرتے ہوئے کہا کہ اگر اس نے دوبارہ کوئی غلطی کی تو پاکستان کا جواب پہلے سے بھی زیادہ سخت ہوگا۔ یہ وقت جھگڑوں اور اختلافات کا نہیں بلکہ متحد ہونے کا ہے، اور بلوچستان میں بھارت کی تمام سازشوں کا ڈٹ کر مقابلہ کیا جائے گا۔ انہوں نے دفاعِ وطن کے لیے اپنی جانوں کا نذرانہ دینے والے پاک فوج کے شہداء کو خراج تحسین بھی پیش کیا۔

ننکانہ صاحب (باغی ٹی وی، نامہ نگار احسان اللہ ایاز)پنجاب میں پھیپھڑوں کے سرطان سے بچاؤ کیلئے اقدامات تیز،ٹی بی کنٹرول پروگرام کی جانب سے عالمی دن پر آگاہی مہم کا آغاز، طلحہ خان شیروانی کا عزم

تفصیلات کے مطابق پنجاب میں پھیپھڑوں کے سرطان (لنگ کینسر) سے بچاؤ اور عوامی آگاہی کے لیے اقدامات تیز کر دیے گئے ہیں۔ ورلڈ لنگ کینسر ڈے 2025 کے موقع پر صوبائی ٹی بی کنٹرول پروگرام پنجاب نے عالمی برادری کے ساتھ یکجہتی کا مظاہرہ کرتے ہوئے "Stronger Together: United for Lung Cancer Awareness” کے تھیم کے تحت بھرپور آگاہی مہم کا آغاز کر دیا ہے۔

یہ دن ہر سال یکم اگست کو منایا جاتا ہے تاکہ پھیپھڑوں کے سرطان کے خلاف اجتماعی کوششوں کی اہمیت کو اجاگر کیا جا سکے۔ اس موقع پر ٹی بی کنٹرول پروگرام پنجاب کی جانب سے نہ صرف ٹی بی اور لنگ کینسر کے باہمی تعلق پر روشنی ڈالی گئی بلکہ عوامی سطح پر شعور بیداری، جلد تشخیص اور علاج تک بہتر رسائی کو بھی یقینی بنانے کے عزم کا اعادہ کیا گیا۔

ترجمان ٹی بی کنٹرول پروگرام کے مطابق، ٹی بی اور لنگ کینسر دونوں پھیپھڑوں کو متاثر کرنے والی مہلک بیماریاں ہیں۔ ان کی وجوہات میں تمباکو نوشی، فضائی آلودگی اور صنعتی کیمیکل سرِفہرست ہیں۔ پروگرام کے ماہرین کا کہنا ہے کہ ٹی بی سے متاثرہ افراد میں بعد ازاں لنگ کینسر ہونے کے امکانات زیادہ ہوتے ہیں، لہٰذا مشترکہ اسکریننگ اور تشخیصی حکمت عملیوں پر زور دیا جا رہا ہے۔

لنگ کینسر کی ابتدائی علامات میں آٹھ ہفتوں سے زائد جاری رہنے والی مسلسل کھانسی، سینے میں درد، خون والی کھانسی، وزن کا اچانک کم ہونا اور سانس لینے میں دشواری شامل ہیں۔ ماہرین نے خبردار کیا ہے کہ ان علامات کو عام نزلہ زکام سمجھ کر نظر انداز کرنا خطرناک ثابت ہو سکتا ہے۔ تشخیص کے لیے چھاتی کے ایکسرے، سی ٹی اسکین، پی ای ٹی اسکین اور برونکوسکوپی جیسے جدید طریقۂ کار تجویز کیے جا رہے ہیں، خاص طور پر ان افراد کے لیے جن کی عمر 50 سے 80 سال ہے اور جو تمباکو نوشی کی طویل تاریخ رکھتے ہیں۔

آگاہی مہم کے تحت پنجاب بھر میں ہیلتھ کیمپس، تعلیمی سیمینارز اور معلوماتی سیشنز کا انعقاد کیا جائے گا۔ ترجمان کے مطابق، پروگرام نہ صرف تمباکو نوشی ترک کرنے کی ترغیب دے رہا ہے بلکہ فضائی آلودگی سے بچاؤ اور باقاعدہ طبی معائنے کی اہمیت پر بھی زور دے رہا ہے۔

ڈائریکٹر ٹی بی کنٹرول پروگرام پنجاب، طلحہ خان شیروانی نے اپنے بیان میں کہا کہ پروگرام کا عزم ہے کہ ہر فرد کو مساوی طبی سہولیات میسر ہوں تاکہ پھیپھڑوں کے سرطان کا بروقت علاج ممکن بنایا جا سکے۔ اس مقصد کے لیے حکومتی اداروں، نجی شعبے، محققین اور سول سوسائٹی کے تعاون سے اسکریننگ اور علاج کے نظام کو مزید مضبوط کیا جائے گا۔

ننکانہ صاحب (باغی ٹی وی، نامہ نگار احسان اللہ ایاز)ننکانہ صاحب کی تاریخ میں ایک منفرد اور حوصلہ افزا قدم اٹھایا گیا، جہاں لاہور بورڈ میں میٹرک امتحانات میں تیسری پوزیشن حاصل کرنے والے ہونہار طالبعلم فیضان رضا کو ایک دن کے لیے اعزازی ڈپٹی کمشنر کا چارج سونپا گیا۔ اس موقع پر فیضان رضا کو پورے سرکاری پروٹوکول کے ساتھ ان کے گھر سے ڈپٹی کمشنر آفس پہنچایا گیا۔

اسسٹنٹ کمشنر شاہکوٹ ثناء شرافت اور دیگر ضلعی افسران نے انہیں سرکاری گاڑی میں بٹھا کر ڈی سی آفس روانہ کیا۔ فیضان رضا نے اپنے دن کا آغاز گورنمنٹ ہائی اسکول شاہکوٹ نمبر 1 کے دورے سے کیا، جہاں انہوں نے اپنے اساتذہ اور طلبا سے ملاقات کی اور اس کامیابی پر اساتذہ کا شکریہ ادا کیا۔

ڈپٹی کمشنر آفس پہنچنے پر اصل ڈپٹی کمشنر محمد تسلیم اختر راو اور دیگر افسران نے اعزازی ڈپٹی کمشنر کا پرتپاک استقبال کیا۔ فیضان رضا نے شہریوں کے مسائل سنے اور ضلعی افسران سے تفصیلی بریفنگ بھی لی۔ بعدازاں انہوں نے مریم نواز سکول فار اسپیشل چلڈرن (سنٹر آف ایکسیلنس) اور گورنمنٹ گرونانک گریجویٹ کالج برائے خواتین کا بھی دورہ کیا۔

مون سون شجرکاری مہم کے تحت انہوں نے ننکانہ سٹی کے پبلک پارکس میں پودے لگا کر ماحول دوست اقدام میں بھی حصہ لیا۔ میڈیا نمائندگان سے گفتگو کرتے ہوئے فیضان رضا نے کہا:
"ڈپٹی کمشنر بننا میرے لیے ایک بڑا اعزاز ہے، میں ایک سبزی فروش کا بیٹا ہوں، زندگی میں بہت مشکلات آئیں، لیکن والدین اور اساتذہ نے ہمیشہ ساتھ دیا۔ میں یہ اعزاز اپنے والدین اور اساتذہ کے نام کرتا ہوں اور وعدہ کرتا ہوں کہ ملک و قوم کا نام روشن کرنے کے لیے مزید محنت کروں گا۔”

اس موقع پر ڈپٹی کمشنر محمد تسلیم اختر راو نے کہا کہ اگر کوئی ضلع میں پہلی پوزیشن حاصل کرتا تو اسے مزید پروٹوکول ملتا۔ انہوں نے نوجوانوں کو پیغام دیا کہ تعلیم کو اپنا ہدف بنائیں اور والدین، اساتذہ اور ملک کا نام روشن کریں۔

عوامی، وکلاء، اور تاجر حلقوں نے اس اقدام کو بے حد سراہا اور ڈپٹی کمشنر کو خراجِ تحسین پیش کرتے ہوئے کہا کہ اس فیصلے سے نوجوانوں میں تعلیم کے لیے دلچسپی بڑھے گی اور ایک مثبت مقابلے کی فضا قائم ہو گی۔

یہ اقدام نہ صرف ایک طالبعلم کی حوصلہ افزائی کا ذریعہ بنا بلکہ یہ پیغام بھی دیا کہ محنت، خلوص اور لگن سے کامیابی کے دروازے کھلتے ہیں – چاہے پس منظر کچھ بھی ہو۔

ننکانہ صاحب (باغی ٹی وی،نامہ نگار احسان اللہ ایاز)ہونہار طالب علم فیضان رضا ایک دن کے لیے اعزازی ڈپٹی کمشنر مقرر

ننکانہ صاحب کی تاریخ میں پہلی مرتبہ ایک طالبعلم کو ایک دن کے لیے اعزازی ڈپٹی کمشنر مقرر کیا گیا ہے۔ لاہور بورڈ میں میٹرک امتحانات کے نتائج میں تیسری پوزیشن حاصل کرنے والے گورنمنٹ ہائی سکول شاہکوٹ نمبر 1 کے ہونہار طالبعلم فیضان رضا کو ڈپٹی کمشنر ننکانہ صاحب محمد تسلیم اختر راؤ کی جانب سے یہ اعزاز دیا گیا۔

ترجمان ضلعی انتظامیہ کے مطابق فیضان رضا نے آج اعزازی ڈپٹی کمشنر ننکانہ صاحب کا چارج سنبھالا اور پورے دن ضلعی انتظامیہ کے مختلف امور کا جائزہ لیا۔ ضلعی افسران نے انہیں ضلعی نظم و نسق، ترقیاتی منصوبوں اور عوامی سروسز سے متعلق تفصیلی بریفنگ دی۔

اس موقع پر ڈپٹی کمشنر آفس میں ایک خصوصی تقریب کا اہتمام کیا گیا جس میں فیضان رضا، ان کے والدین، اساتذہ اور ضلعی افسران نے شرکت کی۔ ڈپٹی کمشنر محمد تسلیم اختر راؤ نے فیضان رضا کو لاہور بورڈ میں شاندار کامیابی حاصل کرنے پر مبارکباد دی اور انہیں ایک لاکھ روپے نقد انعام بھی پیش کیا۔ مزید برآں، انہوں نے اعلان کیا کہ فیضان رضا کے اساتذہ کو بھی ان کی محنت کے اعتراف میں آدھی تنخواہ بطور انعام دی جائے گی۔

ڈپٹی کمشنر نے کہا کہ فیضان رضا نے نہ صرف ضلع ننکانہ بلکہ اپنے والدین اور اساتذہ کا سر فخر سے بلند کیا ہے۔ ان کا کہنا تھا کہ ضلعی حکومت تعلیمی میدان میں نمایاں کارکردگی دکھانے والے طلباء کی حوصلہ افزائی جاری رکھے گی تاکہ نوجوان نسل کو خدمتِ وطن کے لیے تیار کیا جا سکے۔

واربرٹن (باغی ٹی وی، عبدالغفار چوہدری)واربرٹن کی معروف سماجی و سیاسی شخصیت حاجی محمد اکرم آرائیں کی اہلیہ کی چوتھی برسی کے موقع پر ایک پروقار ایصالِ ثواب و دعا کی تقریب مقامی شادی ہال میں منعقد ہوئی، جس میں علاقہ بھر سے معززین، سیاسی و سماجی شخصیات، علما کرام اور نعت خواں حضرات نے بھرپور شرکت کی۔

تقریب کا آغاز تلاوتِ قرآنِ پاک سے ہوا، جس کے بعد بین الاقوامی شہرت یافتہ نعت خواں حضرات نے بارگاہِ رسالت میں عقیدت کے پھول نچھاور کیے۔ معروف نعت خواں ظہیر الحسن ظہور ، استاد جوجی علی خان، مدثر ہمدانی، فیصل قیوم اور ننھے نعت خواں موحد نے اپنے مخصوص انداز میں نعتیں پیش کر کے حاضرین کے دلوں کو منور کیا۔

پروگرام میں خصوصی خطاب کرتے ہوئے پروفیسر ڈاکٹر علامہ محب النبی طاہر نے کہا کہ "ہمیں برائیوں سے بچنے کے لیے اپنی موت کو یاد رکھنا چاہیے اور زندگی کو قرآن و سنت کے مطابق بسر کرنا چاہیے۔ نبی کریم ﷺ کی ذاتِ اطہر کو ہر مقام پر مقدم رکھنا چاہیے اور ان کی تعلیمات پر عمل پیرا ہو کر ہم دنیا و آخرت میں کامیابی حاصل کر سکتے ہیں۔” انہوں نے مزید کہا کہ فضول اور لاحاصل بحثوں سے اجتناب کریں اور جن باتوں کا مکمل علم نہ ہو، ان پر خاموشی اختیار کرنا ہی بہتر ہے۔

تقریب میں ڈاکٹر علی ثقلین حیدر نے اشعار کی صورت میں اپنی والدہ مرحومہ کو خراجِ عقیدت پیش کیا، جس سے فضا جذباتی اور روحانی کیفیت سے بھر گئی۔ آخر میں حاجی محمد اکرم آرائیں نے تمام معزز مہمانوں اور شرکاء کا شکریہ ادا کیا اور کہا کہ ان کی شرکت نے اس روحانی محفل کو حقیقی معنوں میں ایصالِ ثواب کا ذریعہ بنایا۔

تقریب کے اختتام پر مرحومہ کے ایصالِ ثواب اور مغفرت کے لیے خصوصی دعا کی گئی۔