Category: ننکانہ

ننکانہ صاحب(باغی ٹی وی،نامہ نگاراحسان اللہ ایاز) خوراک میں ملاوٹ کی روک تھام، پنجاب فوڈ اتھارٹی کی کارروائیاں تیز

تفصیلات کے مطابق ننکانہ صاحب میں خوراک کے معیار کو یقینی بنانے کے لیے پنجاب فوڈ اتھارٹی کی کارروائیاں جاری ہیں۔ ڈائریکٹر جنرل فوڈ اتھارٹی عاصم جاوید کی ہدایت پر ضلع بھر میں فوڈ پوائنٹس اور یونٹس کی چیکنگ میں نمایاں اضافہ کیا گیا ہے۔

گزشتہ ماہ کی کارکردگی رپورٹ کے مطابق، فوڈ اتھارٹی کی ٹیموں نے 1 ہزار 870 سے زائد فوڈ پوائنٹس کا معائنہ کیا۔ اس دوران، خوراک کے معیار اور صفائی کے اصولوں کی خلاف ورزی پر سخت کارروائیاں کی گئیں۔

اہم کارروائیاں:
8 یونٹس سیل: ناقص اور غیر معیاری اشیاء کی فروخت پر 8 فوڈ یونٹس کو سیل کر دیا گیا۔

10 لاکھ 49 ہزار کے جرمانے: 155 فوڈ پوائنٹس اور یونٹس کو مجموعی طور پر 10 لاکھ 49 ہزار روپے کے بھاری جرمانے عائد کیے گئے۔
4 مقدمات درج: قوانین کی سنگین خلاف ورزیوں پر 4 مقدمات درج کیے گئے۔

بڑی مقدار میں اشیاء تلف: 170 لیٹر غیر معیاری دودھ، 180 کلو ناقص گوشت، 150 کلو ناقص مربہ، اور 2 من سے زائد بیکری آئٹمز، گھی اور دیگر ممنوعہ اشیاء کو تلف کیا گیا۔

24 سیمپل لیے گئے: مختلف اشیاء کے 24 سیمپلز تجزیے کے لیے لیبارٹری بھیجے گئے۔

فوڈ اتھارٹی کے افسران کا کہنا ہے کہ جو یونٹس پہلے دی گئی ہدایات پر عمل نہیں کر رہے تھے، ان کے خلاف سخت ایکشن لیا گیا ہے۔ اس مہم کا مقصد شہریوں کو صاف ستھری اور معیاری خوراک فراہم کرنا ہے۔ حکام نے عوام سے اپیل کی ہے کہ خوراک میں ملاوٹ یا جعلسازی کی کسی بھی اطلاع پر فوری طور پر 1223 پر رابطہ کریں۔

ننکانہ صاحب (باغی ٹی وی، نامہ نگار احسان اللہ ایاز)ڈسٹرکٹ ہیڈ کوارٹر ہسپتال ننکانہ صاحب میں ویسٹ مینجمنٹ کے سنگین مسائل نے مریضوں، ہیلتھ ملازمین اور قریبی آبادی کی زندگیوں کو شدید خطرات میں ڈال دیا ہے۔ ہسپتال انفیکشس ویسٹ کا ڈمپنگ پوائنٹ بن چکا ہے جہاں ایس او پیز کو یکسر نظر انداز کیا جا رہا ہے۔ صورتحال اس قدر تشویشناک ہے کہ لاہور کے بڑے ہسپتالوں کا انفیکشن ویسٹ بھی ننکانہ صاحب ڈی ایچ کیو لا کر جلایا جا رہا ہے، جس کے دھوئیں اور بدبو نے ماحول کو شدید آلودہ کر دیا ہے۔

ہسپتال ذرائع کے مطابق ارار انوویشن ویسٹ مینجمنٹ کمپنی گزشتہ ایک ماہ سے ییلو بیگ فراہم کرنے میں ناکام ہے، جس کے باعث انفیکشن ویسٹ ہسپتال کے اندر دو سے تین دن تک جمع رہتا ہے۔ اگست کے آغاز میں ویسٹ تلف تو کیا گیا تھا، لیکن ویسٹ روم اب بھی مکمل طور پر بھر چکا ہے۔ اس تعفن اور بدبو کے باعث ہسپتال کی رہائشی کالونی میں مقیم ملازمین اور ان کے اہل خانہ ذہنی و جسمانی اذیت میں مبتلا ہیں۔

قانونی ایس او پیز کے مطابق ویسٹ کی بروقت لفٹنگ اور تلفی لازمی ہے لیکن نہ تو بیگز بروقت فراہم کیے جا رہے ہیں، نہ ہی ویسٹ کو عالمی معیار کے مطابق جلایا جا رہا ہے۔ ملازمین کا کہنا ہے کہ کمپنی اپنے ورکرز کو ہراساں کرتی ہے اور جو بھی خلاف ورزی کی نشاندہی کرے اسے برخاست کر دیا جاتا ہے۔

سب سے تشویشناک پہلو یہ ہے کہ ویسٹ اسٹوریج روم سے چند فرلانگ کے فاصلے پر سی ای او ہیلتھ، ڈسٹرکٹ ہیلتھ آفیسر، ڈپٹی ڈسٹرکٹ ہیلتھ آفیسر کے دفاتر و رہائش گاہیں، ایم ایس ہسپتال کی رہائش اور انچارج آئی آر ایم این سی ایچ کا دفتر بھی موجود ہے۔ باوجود اس کے، حکام کی خاموشی ان کی کارکردگی پر بڑا سوالیہ نشان ہے۔

شہریوں اور ہیلتھ ملازمین نے وزیراعلیٰ پنجاب مریم نواز شریف، سیکرٹری صحت نادیہ ثاقب، صوبائی وزیر صحت خواجہ عمران نذیر اور ڈپٹی کمشنر محمد تسلیم اختر راؤ سے فوری نوٹس لینے اور ذمہ داروں کے خلاف سخت کارروائی کا مطالبہ کیا ہے۔

ننکانہ صاحب(باغی ٹی وی،نامہ نگاراحسان اللہ ایاز)مون سون اور سیلاب کا دہرہ وار، گلیاں ڈوب گئیں، ہیڈ بلوکی پر خطرے کی گھنٹی

تفصیلات کے مطابق ننکانہ صاحب اور گردونواح میں مون سون بارشوں اور دریاؤں کی طغیانی نے عوام کی مشکلات میں اضافہ کر دیا ہے۔ شہر کی گلیاں اور بازار کئی کئی فٹ پانی میں ڈوب گئے ہیں۔ ڈاکٹر والا بازار، حرا چوک، ڈھولر چوک، ڈی ایچ کیو اسپتال اور ڈی سی آفس کے سامنے پانی جمع ہونے سے شہریوں کو شدید مشکلات کا سامنا ہے۔ سیوریج کے ناقص انتظامات اور میونسپل کمیٹی کے افسران کی غفلت نے شہریوں کو بے یار و مددگار چھوڑ دیا ہے۔ شہریوں کا کہنا ہے کہ ان کی فریادیں حکام تک نہیں پہنچ رہیں، جبکہ گندے پانی سے بیماریاں پھیلنے کا خدشہ بڑھ گیا ہے۔ عوام نے مطالبہ کیا ہے کہ فوری طور پر سیوریج سسٹم کو بحال کیا جائے۔

دوسری جانب ہیڈ بلوکی میں دریائے راوی کی سیلابی صورتحال سنگین ہو گئی ہے۔ پانی کی آمد 2 لاکھ 20 ہزار کیوسک سے تجاوز کر چکی ہے جس کے نتیجے میں 15 سے زائد دیہات متاثر ہوئے ہیں۔ ضلعی انتظامیہ نے 26 فلڈ ریلیف کیمپس قائم کر دیے ہیں جہاں کھانے پینے کی اشیاء، صاف پانی اور طبی سہولیات فراہم کی جا رہی ہیں۔ ریسکیو اور ریلیف ٹیموں میں 600 سے زائد افسران اور اہلکار حصہ لے رہے ہیں۔

میجر جنرل محمد فیصل رانا نے ضلعی انتظامیہ کے ہمراہ ہیڈ بلوکی کا دورہ کیا۔ اس موقع پر ڈپٹی کمشنر محمد تسلیم اختر راؤ نے پاک فوج کے افسران کو سیلابی صورتحال پر بریفنگ دی۔ پاک فوج کے افسران نے ریلیف کیمپس کا معائنہ کیا، متاثرین سے ملاقات کی اور ان میں راشن بھی تقسیم کیا۔ افسران کا کہنا تھا کہ افواج پاکستان اور سول ادارے ہر مشکل گھڑی میں قوم کے ساتھ ہیں۔

ننکانہ صاحب (باغی ٹی وی،نامہ نگاراحسان اللہ ایاز) دریائے راوی میں سیلابی صورتحال سنگین ہو گئی ہے۔ ہیڈ بلوکی کے مقام پر پانی کی آمد ایک لاکھ چون ہزار کیوسک سے تجاوز کر گئی ہے جبکہ پانی کا اخراج ایک لاکھ چوالیس ہزار کیوسک ریکارڈ کیا گیا ہے۔ لاہور شاہدرہ سے آنے والا بڑا ریلا تیزی سے ہیڈ بلوکی کی طرف بڑھ رہا ہے اور امکان ظاہر کیا جا رہا ہے کہ رات تک پانی کی آمد دو لاکھ کیوسک تک جا سکتی ہے۔

سیلابی پانی ضلع ننکانہ صاحب کے متعدد دیہات میں داخل ہو گیا ہے جس سے نظام زندگی مفلوج ہو کر رہ گیا ہے۔ ضلعی انتظامیہ اور ریسکیو ٹیمیں بھرپور آپریشن میں مصروف ہیں۔ اب تک 32 سو سے زائد افراد کو محفوظ مقامات پر منتقل کیا جا چکا ہے جبکہ 43 سو سے زائد مال مویشیوں کو بھی سیلابی پانی سے نکالا گیا ہے۔

انتظامیہ کے مطابق متاثرہ کئی دیہات خالی کرائے جا چکے ہیں جبکہ 139 دیہاتوں کے رہائشیوں سے اپیل کی گئی ہے کہ وہ شام سے پہلے ممکنہ سیلابی علاقے خالی کر دیں تاکہ کسی جانی نقصان سے بچا جا سکے۔ ڈپٹی کمشنر ننکانہ کا کہنا ہے کہ عوام کی جان و مال کی حفاظت انتظامیہ کی اولین ترجیح ہے۔

واربرٹن (نامہ نگار) سٹی پریس کلب رجسٹرڈ واربرٹن کے فنانس سیکرٹری رانا اسد تیمور کے چھوٹے بھائی رانا صہیب کو شیخوپورہ میں بےدردی سے قتل کردیا گیا۔ مقتول کی نعش گھر پہنچنے پر کہرام مچ گیا اور علاقہ سوگوار ہو گیا۔ پولیس نے مقدمہ درج کر کے ملزمان کی تلاش شروع کر دی ہے۔

تفصیلات کے مطابق واربرٹن مکہ کالونی کے رہائشی رانا زاہد محمود شاد کا 30 سالہ بیٹا رانا صہیب کا شیخوپورہ شرقپور روڈ کے رہائشی یاور الطاف ورک کے ساتھ لین دین کا تنازع چل رہا تھا۔ گزشتہ شب رانا صہیب موٹر سائیکل پر شیخوپورہ گیا لیکن واپس نہ آیا۔ اہل خانہ کی تلاش پر رانا طارق خاقان، رانا اسد تیمور اور وقار احمد یاور ورک کے ڈیرے پر پہنچے تو وہاں رانا صہیب کی خون میں لت پت نعش پڑی ہوئی تھی جبکہ یاور ورک اور دو نامعلوم افراد موقع سے فرار ہوگئے۔

پولیس نے رانا اسد تیمور کی مدعیت میں مقدمہ درج کرکے نعش پوسٹمارٹم کے بعد ورثاء کے حوالے کر دی۔ مقتول رانا صہیب کی نماز جنازہ واربرٹن میں ادا کی گئی جس میں معززین علاقہ، عزیز و اقارب اور سینکڑوں افراد نے شرکت کی۔

عوام نے اس اندوہناک قتل پر شدید افسوس کا اظہار کرتے ہوئے مطالبہ کیا ہے کہ ملزمان کو جلد از جلد گرفتار کر کے کیفر کردار تک پہنچایا جائے۔

ننکانہ صاحب(باغی ٹی وی ،نامہ نگار احسان اللہ ایاز) ضلع ننکانہ صاحب میں حالیہ سیلابی صورتحال کے پیش نظر انسانی جان و مال کے تحفظ کے لیے دریائی علاقوں میں دفعہ 144 نافذ کر دی گئی ہے۔ اس اقدام کا مقصد شہریوں کو کسی بھی ممکنہ نقصان سے بچانا ہے۔ ترجمان ضلعی انتظامیہ کے مطابق، ڈپٹی کمشنر محمد تسلیم اختر راؤ نے دفعہ 144 کا باقاعدہ نوٹیفکیشن جاری کر دیا ہے۔

حفاظتی انتظامات کے بغیر کشتیوں، فیریوں اور بیڑوں کے ذریعے دریائے راوی کو پار کرنے پر مکمل پابندی عائد ہے۔ پرائیویٹ آپریٹرز کو دریا عبور کرنے کے لیے ضلعی انتظامیہ سے (NOC) حاصل کرنا لازمی ہوگا۔

دریائے راوی اور ضلع کی تمام نہروں و ندی نالوں میں نہانے پر بھی دفعہ 144 نافذ ہوگی۔

دریا اور نہروں کے پلوں پر غیر ضروری طور پر کھڑے ہونے پر بھی پابندی عائد کی گئی ہے۔

انتظامیہ نے واضح کیا ہے کہ جو افراد سیلاب زدہ علاقوں میں اپنی رہائش نہیں چھوڑیں گے، ان کے خلاف بھی کارروائی کی جائے گی۔

ضلعی انتظامیہ نے عوام سے اپیل کی ہے کہ وہ ان ہدایات پر سختی سے عمل کریں تاکہ کسی بھی ناخوشگوار واقعے سے بچا جا سکے۔

ننکانہ صاحب (باغی ٹی وی نامہ نگار احسان اللہ ایاز)تھانہ بڑا گھر پولیس کی بڑی کارروائی میں تین ماہ قبل ہونے والی 18 لاکھ روپے کی روڈ رابری کا سراغ لگا لیا گیا۔ پولیس نے مرکزی ملزم حماد کو گرفتار کر کے اس کے قبضے سے واردات کے دوران چھینی گئی رقم اور اسلحہ برآمد کر لیا۔

ڈی پی او فراز احمد نے ملزم سے برآمد شدہ 18 لاکھ روپے کی رقم مدعی مقدمہ خلیل احمد کے حوالے کر دی۔ چھینی گئی رقم واپس ملنے پر مدعی مقدمہ نے ننکانہ پولیس سے اظہار تشکر کیا۔

ڈی پی او فراز احمد کا کہنا ہے کہ واردات کا سراغ پولیس ٹیم کی پیشہ وارانہ مہارت کا نتیجہ ہے اور شہریوں کے جان و مال اور عزت کا تحفظ پولیس کی اولین ترجیح ہے۔