Category: ننکانہ

ننکانہ صاحب (باغی ٹی وی، نامہ نگار احسان اللہ ایاز) عیدالاضحیٰ کے موقع پر ممکنہ ہنگامی حالات سے نمٹنے کے لیے ریسکیو 1122 ننکانہ صاحب نے ایمرجنسی کور پلان کو حتمی شکل دے دی ہے۔ اس سلسلے میں ضلعی ہیڈکوارٹرز میں ڈسٹرکٹ ایمرجنسی آفیسر محمد اکرم پنوار کی زیر صدارت اجلاس منعقد ہوا، جس میں کنٹرول روم انچارج محمد نوید، ریسکیو سیفٹی آفیسر علی عمران، اسٹیشن کوآرڈینیٹر سعید احمد، میڈیا کوآرڈینیٹر علی اکبر اور دیگر افسران نے شرکت کی۔

اجلاس میں عیدالاضحیٰ کے دوران ریسکیو سروسز کی حکمت عملی کا جائزہ لیا گیا اور تمام انتظامات کو حتمی شکل دی گئی۔ ڈسٹرکٹ ایمرجنسی آفیسر محمد اکرم پنوار کے مطابق عید کے دنوں میں ریسکیو 1122 کا عملہ معمول کی ایمبولینس سروس اور پیشنٹ ٹرانسفر کے علاوہ جامع مساجد میں نماز عید کے دوران ریسکیو کور فراہم کرے گا۔ اس کے ساتھ ساتھ شہر کے اہم مقامات پر موٹر بائیک سروس، ایمبولینس، فائر وہیکلز اور موبائل ریسکیو پوسٹس بھی قائم کی جائیں گی۔

علاوہ ازیں، نہروں کے حساس مقامات پر واٹر ریسکیو ٹیمیں تعینات کی جائیں گی اور نہروں میں نہانے پر دفعہ 144 کی خلاف ورزی کرنے والوں کے خلاف قانونی کارروائی عمل میں لائی جائے گی۔ عوام سے اپیل کی گئی ہے کہ قربانی کے جانور ذبح کرتے وقت احتیاطی تدابیر اختیار کریں اور بچوں کو محفوظ فاصلے پر رکھیں تاکہ کسی بھی ناخوشگوار واقعے سے بچا جا سکے۔

ریسکیو 1122 کی جانب سے تمام اسٹاف کی چھٹیاں محدود کر دی گئی ہیں تاکہ عید کے دوران ہر قسم کی ایمرجنسی سے بروقت نمٹا جا سکے۔

ننکانہ صاحب (باغی ٹی وی نامہ نگار احسان اللہ ایاز) وزیراعلیٰ پنجاب مریم نواز شریف نے انسانی ہمدردی اور فلاح عامہ کی شاندار روایت کو آگے بڑھاتے ہوئے صحت عامہ کے شعبے میں ایک تاریخی قدم اٹھایا ہے۔ "وزیراعلیٰ انسولین کارڈ پروگرام” کے تحت اب ٹائپ ون ذیابیطس میں مبتلا بچوں کو نہ صرف مفت انسولین فراہم کی جا رہی ہے بلکہ یہ زندگی بچانے والی دوا اور اس سے منسلک ضروری طبی سامان براہ راست ان کے گھروں تک پہنچایا جا رہا ہے۔ اس عظیم الشان اقدام کا مقصد ان معصوم جانوں کو تکلیف دہ سفر، قطاروں، دھوپ اور انتظار کی اذیت سے بچا کر باعزت، باوقار اور بروقت علاج مہیا کرنا ہے۔

یہ صرف ایک منصوبہ نہیں، بلکہ ماں جیسے احساس سے جڑا وہ عمل ہے جو ریاستی سطح پر بچوں کی صحت کو اولین ترجیح دیتا ہے۔ اسی سلسلے میں ضلع ننکانہ صاحب میں بھی یہ مہم زور و شور سے جاری ہے، جہاں ڈپٹی کمشنر ننکانہ صاحب محمد تسلیم آختر راؤ کی ہدایات پر چیف ایگزیکٹو آفیسر ہیلتھ اینڈ پاپولیشن ڈیپارٹمنٹ ڈاکٹر طلحہ شیروانی نے ضلع بھر میں گھر گھر انسولین پہنچانے کے لیے خصوصی ٹیمیں تشکیل دے دی ہیں۔ ان ٹیموں کی نگرانی انچارج این سی ڈی اے ڈاکٹر راؤ سکندر اور فوکل پرسن نواز دیرتھ کر رہے ہیں، تاکہ کسی بھی بچے کا علاج کسی بھی لمحے متاثر نہ ہو اور وہ ایک محفوظ، خوشحال اور صحت مند زندگی کی طرف گامزن ہو سکے۔

اس انسان دوست پروگرام کا باقاعدہ افتتاح سٹی ننکانہ کے تین بچوں، ابو ہریرہ، عائشہ اور فاطمہ کے گھروں سے کیا گیا، جہاں سی ای او ہیلتھ ڈاکٹر طلحہ شیروانی نے خود ان کے دروازے پر انسولین پہنچا کر اس مشن کا عملی مظاہرہ کیا۔ یہ مناظر صرف دوا کی فراہمی نہیں تھے بلکہ ایک ریاستی عزم کا مظہر تھے جو ثابت کر رہے ہیں کہ پنجاب میں اب علاج عزت سے، بغیر سفارش اور گھر کی دہلیز پر دستیاب ہے۔ یہ وہ قدم ہے جسے تاریخ ہمیشہ یاد رکھے گی جب پنجاب کی بیٹی نے پنجاب کے بچوں کو اپنے بچوں کی طرح سمجھا اور ان کی صحت کا ذمہ اٹھایا۔

ننکانہ صاحب (باغی ٹی وی، نامہ نگار احسان اللہ ایاز) کمشنر لاہور ڈویژن زید بن مقصود کی زیر صدارت ریجنل اور ضلعی امن کمیٹیوں کا اہم اجلاس منعقد ہوا، جس میں آر پی او شیخوپورہ اطہر اسماعیل، ڈپٹی کمشنر محمد تسلیم اختر راؤ، ڈی پی او سید ندیم عباس، اسسٹنٹ کمشنرز، اے ڈی سیز، ضلعی امن کمیٹی ممبران، علماء کرام اور سکھ برادری کے نمائندوں نے شرکت کی۔

اجلاس میں عیدالاضحیٰ کے موقع پر امن و امان، صفائی، قربانی کے جانوروں کی آلائشوں کی مناسب تلفی، کھالوں کے جمع کرنے کے ضابطے اور بین المذاہب ہم آہنگی کے فروغ جیسے اہم نکات پر غور کیا گیا۔ کمشنر لاہور زید بن مقصود نے کہا کہ ننکانہ صاحب بھائی چارے اور رواداری کی سرزمین ہے، اور اسی روایت کو برقرار رکھتے ہوئے تمام مذاہب اور مکاتب فکر کو ساتھ لے کر امن کے ماحول کو مزید مضبوط بنایا جائے گا۔

علماء کرام سے اپیل کی گئی کہ وہ خطبات کے ذریعے عوام میں صفائی، قانون کی پاسداری اور مذہبی رواداری کا پیغام دیں۔ قربانی کے جانوروں کی آلائشیں شاپر میں ڈال کر مقررہ مقامات پر پہنچانے کی ترغیب دی جائے تاکہ صفائی کا معیار بہتر ہو۔

ضلعی انتظامیہ کی جانب سے اعلان کیا گیا کہ بغیر اجازت کھالیں جمع کرنے والوں کے خلاف کریک ڈاؤن کیا جائے گا اور ضلعی کنٹرول روم عید کے ایام میں فعال رہے گا تاکہ صفائی اور دیگر عوامی شکایات کا فوری ازالہ کیا جا سکے۔

عید کے موقع پر پولیس کی جانب سے ضلع بھر میں سخت سیکیورٹی اقدامات، مساجد و عید گاہوں پر نفری کی تعیناتی، لاوڈ اسپیکر، ون ویلنگ اور ہلڑ بازی کے خلاف کارروائی کا بھی اعلان کیا گیا۔

اجلاس کے اختتام پر ملک و قوم کی سلامتی اور خوشحالی کے لیے خصوصی دعا کی گئی۔ بعد ازاں کمشنر لاہور زید بن مقصود نے ننکانہ صاحب میں مویشی منڈیوں اور سیل پوائنٹس کا دورہ کیا، جہاں شہریوں اور بیوپاریوں کے لیے فراہم کی گئی سہولیات کا جائزہ لیا اور ضلعی انتظامیہ کو مزید بہتری کی ہدایات جاری کیں۔

ننکانہ صاحب (باغی ٹی وی، نامہ نگار احسان اللہ ایاز) وزیراعلیٰ پنجاب مریم نواز شریف کے محفوظ پنجاب ویژن کے تحت ننکانہ صاحب میں ٹریفک قوانین سے متعلق شعور اجاگر کرنے کے لیے بھرپور آگاہی مہم جاری ہے۔ اس سلسلے میں ضلع بھر میں ریلیاں نکالی گئیں، جن کی قیادت سٹی ننکانہ میں ڈسٹرکٹ پولیس آفیسر (ڈی پی او) سید ندیم عباس نے ڈی ایس پی ٹریفک کے ہمراہ کی۔

ریلیوں میں انجمن تاجران، ڈی ایس پیز، طلباء، سول سوسائٹی اور میڈیا نمائندگان نے بھرپور شرکت کی۔ اس مہم کا مقصد شہریوں میں ٹریفک قوانین کی اہمیت اجاگر کرنا اور سڑکوں کو محفوظ بنانا ہے۔

ڈی پی او سید ندیم عباس نے شہریوں سے اپیل کی کہ وہ کم عمر بچوں کو ڈرائیونگ نہ کرنے دیں۔ انہوں نے کہا کہ ٹریفک قوانین کی خلاف ورزی پر سخت کارروائیاں جاری ہیں اور عوامی تعاون ہی ٹریفک نظام کو بہتر بنا سکتا ہے۔

تاجر برادری نے بھی پولیس کے ساتھ تعاون کا اعلان کرتے ہوئے کہا کہ وہ اس مہم میں ضلعی پولیس کے شانہ بشانہ کھڑے ہیں تاکہ ننکانہ صاحب کو ایک محفوظ اور قانون پسند شہر بنایا جا سکے۔

ننکانہ صاحب (باغی ٹی وی، نامہ نگاراحسان اللہ ایاز) ضلعی انتظامیہ ننکانہ صاحب کے زیر اہتمام ضلع کونسل ہال میں یومِ تکبیر کی مناسبت سے ایک پروقار تقریب کا انعقاد کیا گیا جس میں طلبہ، افسران، سکھ برادری، اقلیتوں، تاجر تنظیموں اور میڈیا نمائندگان نے بھرپور شرکت کی۔

تقریب میں ایڈیشنل ڈپٹی کمشنر جنرل شاہد کھوکھر، اسسٹنٹ کمشنر عطیہ عنائیت، سی او ایجوکیشن شازیہ بانو سمیت متعدد اہم شخصیات شریک ہوئیں۔ اسکول کے بچوں نے وطن سے محبت پر مبنی تقاریر اور خوبصورت ٹیبلو پیش کیے جنہیں شرکاء نے سراہا۔

تقریب سے خطاب کرتے ہوئے ڈپٹی کمشنر محمد تسلیم اختر راؤ نے کہا کہ یومِ تکبیر پاکستان کی خودمختاری، مسلسل جدوجہد اور قربانی کے جذبے کا مظہر ہے۔ 28 مئی 1998 کا دن پاکستان کے دفاعی استحکام کی تاریخ میں سنگ میل کی حیثیت رکھتا ہے۔ اُنہوں نے کہا کہ ہماری افواج اور سائنسدانوں نے دنیا کو یہ پیغام دیا کہ پاکستان ایک پرامن مگر ناقابلِ تسخیر ایٹمی طاقت ہے۔

ڈپٹی کمشنر نے کہا کہ یومِ تکبیر قوم کے اتحاد اور قومی سلامتی کے عزم کا دن ہے۔ پاکستان کی ایٹمی صلاحیت کا مقصد کسی پر حملہ نہیں بلکہ اپنی خودمختاری اور سالمیت کا تحفظ ہے۔ انہوں نے کہا کہ اب ہمیں معاشی استحکام، سائنسی ترقی اور قومی اتحاد کے سفر کو بھی جاری رکھنا ہوگا۔

تقریب کے اختتام پر ڈی سی آفس سے گوردوارہ جنم استھان تک یومِ تکبیر ریلی نکالی گئی جس کی قیادت خود ڈپٹی کمشنر محمد تسلیم اختر راؤ نے کی۔ اس ریلی میں ضلعی افسران، سکھ کمیونٹی، علما کرام، تاجر برادری اور شہریوں کی بڑی تعداد نے شرکت کی۔ ریلی کے شرکاء نے “افواج پاکستان زندہ باد” اور “پاکستان زندہ باد” کے فلک شگاف نعرے لگا کر قومی جوش و جذبے کا اظہار کیا۔

یومِ تکبیر کی یہ تقریب قومی یکجہتی، بین المذاہب ہم آہنگی اور پاکستان کی دفاعی خودمختاری کے عزم کی علامت بن گئی۔

ننکانہ صاحب(باغی ٹی وی رپورٹ) باغی ٹی وی کے نامہ نگار احسان اللہ ایاز باغی کو بابا گورونانک یونیورسٹی نے صحافت کے میدان میں ان کی نمایاں خدمات کے اعتراف میں اعزاز سے نوازا ہے۔ یونیورسٹی کے وائس چانسلر ڈاکٹر شاہد مبین نے انہیں شیلڈ اور تعریفی سرٹیفکیٹ پیش کیا۔ یہ اعزاز احسان اللہ ایاز باغی کی بے لوث، جرات مندانہ اور ذمہ دارانہ رپورٹنگ کا اعتراف ہے۔

اس موقع پر جرنلسٹس ایسوسی ایشن آف پاکستان/یوکے کے مرکزی صدر میاں عامر علی، جرنلسٹس ایسوسی ایشن آف پاکستان کے صدر سمیع اللہ عثمانی، ننکانہ صاحب پریس کلب کے صدر شیخ آصف اقبال اور جنرل سیکرٹری عرفان رشید بھٹی، پنجاب یونین آف جرنلسٹس ڈسٹرکٹ ننکانہ صاحب کے جنرل سیکرٹری راؤ توقیر السلام، پاکستان مرکزی مسلم لیگ ڈسٹرکٹ ننکانہ صاحب کے صدر میاں عابد علی، اور پیر سید زاہد حسین ترمزی سجادہ نشین درگاہ پیر سید یعقوب شاہ رحمتہ اللہ سمیت دیگر سیاسی و سماجی شخصیات نے احسان اللہ ایاز باغی کو مبارکباد پیش کی۔

ان شخصیات نے کہا کہ ایسے باصلاحیت اور محنتی صحافی معاشرے میں سچ اور حق کی آواز بن کر سامنے آتے ہیں اور ایسے صحافیوں کو سراہنا وقت کی اہم ضرورت ہے۔ سیاسی و سماجی حلقوں نے امید ظاہر کی کہ احسان اللہ ایاز باغی آئندہ بھی اپنے صحافتی فرائض اسی جذبے اور دیانتداری سے نبھاتے رہیں گے اور نوجوان صحافیوں کے لیے ایک مثالی کردار ادا کریں گے۔

ننکانہ صاحب (باغی ٹی وی، نامہ نگار احسان اللہ ایاز) ڈپٹی کمشنر ننکانہ صاحب محمد تسلیم اختر راؤ کی زیرصدارت عید الاضحیٰ کے انتظامات کے حوالے سے ایک اہم اجلاس منعقد ہوا جس میں ایڈیشنل ڈپٹی کمشنرز، اسسٹنٹ کمشنرز، اور تمام ضلعی افسران نے شرکت کی۔ اجلاس میں عید کے ایام میں صفائی، سیکیورٹی، اور دیگر ضروری انتظامات کو فول پروف بنانے کے لیے جامع حکمت عملی وضع کی گئی۔

ڈپٹی کمشنر نے ہدایت کی کہ میونسپل کمیٹیز، ضلع کونسل، اور ایل ڈبلیو ایم سی صفائی ستھرائی کے بہترین انتظامات کو یقینی بنائیں۔ پولیس سمیت تمام متعلقہ اداروں کو عید کے دنوں میں ہائی الرٹ رہنے کی ہدایات جاری کی گئیں۔

عید کے موقع پر شہری حدود میں سری پائے جلانے، نہروں میں نہانے اور ون ویلنگ جیسے خطرناک عوامل پر دفعہ 144 نافذ کی جائے گی۔ سیل پوائنٹس کے علاوہ کسی بھی مقام پر جانوروں کی فروخت پر بھی دفعہ 144 لاگو رہے گی۔ ضلع میں چار عارضی مویشی منڈیاں قائم کی جا رہی ہیں، جہاں متعلقہ ادارے صفائی، سیکیورٹی، پانی اور سایہ دار جگہوں کی فراہمی یقینی بنائیں گے۔

محکمہ لائیو اسٹاک کی ٹیمیں مویشی منڈیوں کے داخلی راستوں پر جانوروں کی صحت کی جانچ کریں گی، اور صرف صحت مند جانوروں کو منڈی میں داخلے کی اجازت دی جائے گی۔ پولیس اور دیگر ادارے منڈیوں کے داخلی راستوں پر سیکیورٹی کیمپ قائم کریں گے۔ میونسپل کمیٹیز کو ہدایت کی گئی کہ وہ منڈیوں میں پارکنگ کے مناسب انتظامات بھی کریں۔

ڈپٹی کمشنر نے واضح کیا کہ نماز عید صرف مساجد کے اندر ادا کی جائے گی، سڑکوں پر نماز پڑھنے کی اجازت نہیں ہوگی۔ جانوروں کے فضلے کے لیے یکم جون سے گھر گھر شاپر بیگز کی تقسیم شروع کی جائے گی۔ عید کے دوران کنٹرول رومز کی نگرانی اسسٹنٹ کمشنرز خود کریں گے۔

ڈپٹی کمشنر نے تمام افسران کو ہدایت کی کہ عوامی شکایات کا فوری ازالہ یقینی بنایا جائے، اداروں کو شکایات کے حل کے لیے 10 سے 15 منٹ کا وقت دیا جائے گا، بصورت دیگر غفلت کے مرتکب افسران کے خلاف کارروائی کی جائے گی۔

مزید برآں، تمام پبلک پارکس میں سخت سیکیورٹی انتظامات کیے جائیں گے، جبکہ واپڈا حکام کو ہدایت دی گئی ہے کہ عید کے ایام میں بجلی کی بلا تعطل فراہمی کو یقینی بنایا جائے۔ میونسپل کمیٹیز اور لوکل گورنمنٹ کو قبرستانوں میں صفائی ستھرائی کے اقدامات تیز کرنے کی بھی ہدایت کی گئی ہے۔

ننکانہ صاحب (باغی ٹی وی،نامہ نگار احسان اللہ ایاز)بابا گورو نانک یونیورسٹی ننکانہ صاحب کے شعبہ بوٹنی اور آفس آف ریسرچ، انوویشن اینڈ کمرشلائزیشن (ORIC) کے اشتراک سے عالمی یومِ حیاتیاتی تنوع کے موقع پر "حیاتیاتی تنوع اور تحفظ میں حالیہ پیش رفت” کے عنوان سے ایک بین الاقوامی سمپوزیم کا انعقاد کیا گیا۔ یہ علمی و تحقیقی اجلاس نہ صرف ایک سائنسی مکالمے کا پلیٹ فارم فراہم کرتا ہے بلکہ حیاتیاتی تنوع جیسے حساس موضوع پر آگاہی پھیلانے اور عملی اقدامات کی راہ ہموار کرنے کی ایک بامعنی کوشش بھی ہے۔

یہ تقریب حیاتیاتی نظام کو لاحق خطرات، ماحولیاتی تبدیلیوں، اور ان کے حل کی جانب جدید سائنسی تحقیق و پائیدار حکمتِ عملیوں پر روشنی ڈالنے کے لیے منعقد کی گئی، جس میں قومی و بین الاقوامی ماہرین، محققین، اساتذہ کرام اور طلبہ کی بڑی تعداد نے شرکت کی۔ اس اہم سمپوزیم کا مقصد نہ صرف تحقیقی اشتراک کو فروغ دینا تھا بلکہ طلبہ کو عالمی سائنسی معیار اور ماحول دوست طرزِ فکر سے روشناس کروانا بھی اس کی ترجیحات میں شامل تھا۔

تقریب کا آغاز چیئرمین شعبہ بوٹنی اور ڈائریکٹر اکیڈمکس، پروفیسر ڈاکٹر کفیل احمد کے استقبالیہ خطاب سے ہوا، جنہوں نے معزز مہمانوں کو خوش آمدید کہا اور حیاتیاتی تنوع کے تحفظ کی ناگزیر اہمیت پر زور دیا۔ انہوں نے کہا کہ ماحولیاتی نظام میں توازن کے لیے حیاتیاتی تنوع کا تحفظ نہایت اہم ہے، اور بابا گورو نانک یونیورسٹی اس سلسلے میں اپنا تعلیمی اور تحقیقی کردار بھرپور طریقے سے ادا کر رہی ہے۔

رجسٹرار بابا گورو نانک یونیورسٹی، جناب مبشر طارق نے بھی اپنے خیالات کا اظہار کیا۔ انہوں نے مہمان مقررین اور شرکاء کا شکریہ ادا کرتے ہوئے کہا کہ اس نوعیت کی علمی سرگرمیاں طلبہ کے لیے سیکھنے اور تحقیق کے نئے افق کھولتی ہیں۔ انہوں نے ORIC اور شعبہ بوٹنی کی کاوشوں کو سراہا اور کہا کہ یونیورسٹی مستقبل میں بھی ماحولیاتی تحفظ کے حوالے سے ایسے اقدامات جاری رکھے گی۔

سمپوزیم میں مختلف موضوعات پر گراں قدر علمی و تحقیقی مقالات پیش کیے گئے۔ مقررین میں محترمہ فوزیہ اکرم (ڈپٹی ڈائریکٹر، ایجنسی برائے ماحولیاتی تحفظ)، محترمہ فریحہ اکرم (سینئر سائنٹسٹ، سائل اینڈ واٹر ٹیسٹنگ لیب، حکومت پنجاب)، ڈاکٹر محمد حمزہ (چائنیز اکیڈمی آف ایگریکلچرل سائنسز، چین)، ڈاکٹر عدنان ارشاد (لانژو یونیورسٹی، چین) اور ڈاکٹر محمد عدیل غفار (شعبہ بوٹنی، بی جی این یو) شامل تھے۔ انہوں نے حیاتیاتی تنوع کے عالمی رجحانات، ماحولیاتی عدم توازن کے مقامی چیلنجز، اور پائیدار ماحولیاتی نظام کے قیام کے لیے عالمی سطح پر کی جانے والی کوششوں پر سیر حاصل گفتگو کی۔

اس سمپوزیم میں سامعین کو ماحولیاتی توازن کے تحفظ میں جدید تحقیق، ٹیکنالوجی کے استعمال، اور زمینی حقائق پر مبنی پالیسی سازی کی اہمیت سے روشناس کرایا گیا۔ مقررین نے زور دیا کہ حیاتیاتی تنوع نہ صرف قدرتی وسائل کی بقا کا ضامن ہے بلکہ انسانی زندگی کے معیار کو بھی براہ راست متاثر کرتا ہے۔

اختتام پر مقررین اور شرکاء کو شیلڈز اور اسناد پیش کی گئیں اور طلبہ نے علمی نمائش کے ذریعے اپنے تحقیقی منصوبے پیش کیے، جنہیں ماہرین نے سراہا۔
یہ تقریب اس عزم کے ساتھ اختتام پذیر ہوئی کہ بابا گورو نانک یونیورسٹی ماحولیاتی تحفظ، حیاتیاتی تنوع، اور سائنسی تحقیق کے میدان میں اپنی خدمات جاری رکھے گی اور نوجوان نسل کو ذمہ دار ماحولیاتی شہری بنانے کے لیے اپنا کردار ادا کرتی رہے گی۔

ننکانہ صاحب (باغی ٹی وی، نامہ نگار احسان اللہ ایاز) آر پی او شیخوپورہ رینج اطہر اسماعیل نے ڈی پی او سید ندیم عباس کے ہمراہ تھانہ سید والا اور مانگٹانوالا میں کھلی کچہری منعقد کی۔ آر پی او نے شہریوں کی شکایات سن کر موقع پر حل کے احکامات جاری کیے۔

تھانہ سید والا میں صحافیوں نے ٹریفک مسائل اور پولیس نفری کی تعیناتی کے سوالات اٹھائے، جس پر آر پی او نے مسائل کے حل کی یقین دہانی کروائی۔ تھانہ مانگٹانوالا میں قصبہ موڑ کھنڈا کے دار ارقم سکول اور جاوید ہسپتال کے ساتھ پولیس ویلفیئر معاہدوں پر دستخط کیے گئے۔ معاہدوں کے تحت شہداء پولیس کے خاندانوں کو علاج اور تعلیمی اخراجات میں سہولیات، جبکہ حاضر سروس ملازمین کے بچوں کو 40 فیصد فیس رعایت اور دو بچوں کو مفت تعلیم دی جائے گی۔ جاوید ہسپتال موڑ کھنڈا میں ملازمین کے بچوں کو 50 فیصد فیس رعایت ملے گی۔

صحافیوں نے موڑ کھنڈا میں ٹریفک، تجاوزات اور منشیات فروشی کے مسائل اٹھائے، جس پر آر پی او نے فوری حل اور منشیات فروشوں کے خلاف کریک ڈاؤن کی ہدایات دیں۔ تھانہ مانگٹانوالا میں مسیحی برادری سے ملاقات کرتے ہوئے چرچوں کی سیکیورٹی اور تعاون کی یقین دہانی کروائی گئی۔ تھانہ فیض آباد میں انجمن تاجران و امن کمیٹی سے میٹنگ کی گئی۔

آر پی او نے تینوں تھانوں (سید والا، مانگٹانوالا، فیض آباد) کا دورہ کیا اور ریکارڈ رجسٹرز کا جائزہ لے کر اپنے تاثرات قلمبند کیے۔ انہوں نے کہا کہ پولیس شہداء کے خاندانوں اور ویلفیئر کے لیے تمام اقدامات اٹھائے جا رہے ہیں، اور کھلی کچہریوں کا مقصد شہریوں کو انصاف فراہم کرنا ہے۔ انہوں نے وزیر اعلیٰ اور آئی جی پنجاب کے ویژن کے مطابق کھلی کچہریوں کے سلسلے کو جاری رکھنے کا عزم ظاہر کیا۔

دورے کے دوران ایس پی انویسٹی گیشن حنا نیک بخت سمیت دیگر افسران بھی موجود تھے۔

ننکانہ صاحب (باغی ٹی وی نامہ نگار احسان اللہ ایاز)پاکستان مرکزی مسلم لیگ ڈسٹرکٹ ننکانہ صاحب کے زیرِ اہتمام تحصیل سانگلہ ہل اور تحصیل شاہ کوٹ میں سول ڈیفنس آگاہی اور تربیتی ورکشاپس کا انعقاد کیا گیا جن میں نوجوانوں اور عام شہریوں کو قدرتی آفات، آگ لگنے، ہنگامی صورتحال میں فوری ردعمل، ابتدائی طبی امداد اور شہری تحفظ جیسے اہم موضوعات پر عملی تربیت دی گئی۔

ورکشاپس میں صدر مسلم یوتھ لیگ وسطی پنجاب عدیل عامر، جنرل سیکرٹری پاکستان مرکزی مسلم لیگ ننکانہ ڈاکٹر ثاقب مجید، اور ضلع صدر مسلم یوتھ لیگ انجینئر علی احمد ملک نے خصوصی شرکت کی۔ مقررین نے اس بات پر زور دیا کہ موجودہ حالات میں ہر شہری کے لیے سول ڈیفنس کی تربیت ناگزیر ہو چکی ہے تاکہ وہ نہ صرف اپنی بلکہ دوسروں کی جانیں بچانے کے قابل ہو سکیں۔

ماہرین کی جانب سے شرکاء کو ابتدائی طبی امداد، فائر فائٹنگ، ہنگامی انخلاء اور ریلیف اقدامات کے اصولوں سے آگاہ کیا گیا۔ عملی مظاہروں نے ورکشاپ کو نہ صرف مفید بلکہ دلچسپ بھی بنا دیا۔ مقررین نے کہا کہ پاکستان مرکزی مسلم لیگ نوجوانوں کو صرف سیاسی نہیں بلکہ عملی طور پر قومی خدمت کے لیے بھی تیار کر رہی ہے۔

ورکشاپ کے اختتام پر شرکاء میں اسناد تقسیم کی گئیں اور اس عزم کا اظہار کیا گیا کہ ایسے آگاہی پروگرامز کو پورے ضلع ننکانہ اور پنجاب بھر میں وسعت دی جائے گی۔ والدین اور اساتذہ نے ان اقدامات کو سراہتے ہوئے انہیں وقت کی اہم ضرورت قرار دیا۔