Category: اوکاڑہ

اوکاڑہ (نامہ نگار ملک ظفر)محکمہ صحت و آبادی کے زیرِ اہتمام فاطمہ جناح پارک میں ایک روزہ ایجوکیشنل فیملی میلہ منعقد کیا گیا، جس کا مقصد تیزی سے بڑھتی ہوئی آبادی کے سنگین سماجی و معاشی اثرات سے نمٹنے، عوامی شعور بیدار کرنے اور شہریوں کو صحت مند تفریح فراہم کرنا تھا۔ میلہ پنجاب فیملی پلاننگ پروگرام کے تحت منعقد کیا گیا، جس میں چھوٹے خاندان کی اہمیت اور صحت مند طرزِ زندگی کو فروغ دینے پر زور دیا گیا۔

میلے کا باقاعدہ افتتاح اسسٹنٹ کمشنر فیصل شہزاد چیمہ نے کیا، جبکہ ضلعی آفیسر پاپولیشن ویلفیئر چوہدری عاصم ہدایت اور تحصیل پاپولیشن ویلفیئر آفیسر ارسلان اسحاق نے معزز مہمانوں کا استقبال کیا۔ تقریب میں ڈسٹرکٹ ہیلتھ آفیسر ڈاکٹر یاسر سلیم، ایم ایس ٹی ایچ کیو ہسپتال ڈاکٹر عادل رشید، ڈرماٹالوجسٹ ڈاکٹر ولید اسلم اور ڈسٹرکٹ ڈیموگرافر محمد بخش نے خصوصی شرکت کی۔ اس کے علاوہ سول سوسائٹی کے نمائندوں اور فیملیز کی بڑی تعداد بچوں سمیت شریک ہوئی۔

میلے میں صحت مند ماؤں اور بچوں کے مقابلے، میوزیکل چیئر، رسہ کشی، جھومر، ملی نغمے اور قوالی نائٹ کا اہتمام کیا گیا، جس سے شرکاء خوب محظوظ ہوئے۔ پوسٹر ڈیزائننگ، کوئز پروگرامز، ہینڈی کرافٹس اور فوڈ سٹالز نے بھی میلے کی رونق کو دوبالا کیا۔

اس موقع پر اسسٹنٹ کمشنر فیصل شہزاد چیمہ نے کہا کہ وسائل اور آبادی میں توازن برقرار رکھنا آنے والی نسلوں کے بنیادی حقوق کے تحفظ کے لیے ناگزیر ہے۔ ضلعی آفیسر پاپولیشن ویلفیئر چوہدری عاصم ہدایت نے کہا کہ بے ہنگم آبادی پر قابو پانے کے لیے ہر شہری کو اپنی ذمہ داری کا احساس کرنا ہوگا۔

میلے کے اختتام پر نمایاں کارکردگی دکھانے والے شرکاء میں انعامات تقسیم کیے گئے جبکہ مہمانوں کو یادگاری شیلڈز بھی پیش کی گئیں۔

اوکاڑہ (نامہ نگار ملک ظفر)نیو ایئر نائٹ کے موقع پر اوکاڑہ پولیس نے فول پروف سیکیورٹی پلان جاری کر دیا ہے۔ ڈسٹرکٹ پولیس آفیسر اوکاڑہ محمد راشد ہدایت کی ہدایات پر مرتب کیے گئے اس جامع سیکیورٹی پلان کا مقصد شہریوں کے جان و مال کا تحفظ اور شہر میں امن و امان کی صورتحال کو یقینی بنانا ہے۔

ڈی پی او محمد راشد ہدایت کا کہنا ہے کہ نیو ایئر نائٹ کے دوران ون ویلنگ، ہوائی فائرنگ، ہلڑ بازی اور کسی بھی قسم کی قانون شکنی پر مکمل پابندی عائد ہو گی۔ خلاف ورزی کی صورت میں زیرو ٹالرنس پالیسی کے تحت فوری اور سخت قانونی کارروائی عمل میں لائی جائے گی۔

انہوں نے واضح کیا کہ خواتین اور شہریوں کو ہراساں کرنے والے عناصر کے خلاف بھی بلاامتیاز کارروائی کی جائے گی اور ایسے افراد کو فوری طور پر گرفتار کر کے حوالات میں بند کیا جائے گا۔

سیکیورٹی پلان کے تحت 900 سے زائد پولیس افسران اور اہلکار شہر بھر میں سیکیورٹی ڈیوٹی سرانجام دیں گے۔ حساس مقامات، تفریحی علاقوں اور اہم شاہراہوں پر خصوصی ناکہ بندی، گشت اور نگرانی کو یقینی بنایا جائے گا تاکہ کسی بھی ناخوشگوار واقعے سے بروقت نمٹا جا سکے۔

ڈی پی او اوکاڑہ نے شہریوں سے اپیل کی ہے کہ وہ قانون نافذ کرنے والے اداروں سے تعاون کریں اور کسی بھی مشکوک سرگرمی کی فوری اطلاع پولیس ہیلپ لائن 15 پر دیں تاکہ نیو ایئر نائٹ کو پرامن اور خوشگوار بنایا جا سکے۔

اوکاڑہ (نامہ نگار ملک ظفر)نجی اسکول سرسید کیمپسز نے ایک بار پھر شاندار تعلیمی ریکارڈ قائم کرتے ہوئے نمایاں کامیابیاں حاصل کر لی ہیں۔ سرسید کیمپس پتوکی کی ہونہار طالبہ آمنہ محبوب نے 555 میں سے 553 نمبر حاصل کر کے بورڈ آف انٹرمیڈیٹ اینڈ سیکنڈری ایجوکیشن لاہور میں اول پوزیشن حاصل کی۔

اسی طرح سرسید کیمپس حجرہ شاہ مقیم، ضلع اوکاڑہ کی طالبہ آمنہ عامر نے 555 میں سے 551 نمبر حاصل کر کے بورڈ آف انٹرمیڈیٹ اینڈ سیکنڈری ایجوکیشن ساہیوال میں دوم پوزیشن اپنے نام کی۔

ان شاندار نتائج کے باعث سرسید کیمپس پتوکی نے ملک بھر میں اسکولز چین میں پہلا مقام حاصل کیا، جبکہ سرسید کیمپس حجرہ شاہ مقیم دوسرے نمبر پر رہا۔ تعلیمی و سماجی حلقوں نے ان کامیابیوں پر طلبہ، اساتذہ اور بالخصوص ڈائریکٹرز میاں محمد نوید اور میاں محمد مظہر کو دلی مبارکباد پیش کی۔

مبارکباد دینے والوں کا کہنا تھا کہ سرسید کیمپسز میں معیاری تعلیم، نظم و ضبط اور اساتذہ کی انتھک محنت ہی ان شاندار نتائج کی بنیادی وجہ ہے، جبکہ طالبات کی کامیابی دیگر طلبہ کے لیے مشعلِ راہ ہے۔

اوکاڑہ (نامہ نگار: ملک ظفر)خصوصی افراد کی فلاح و بہبود کے لیے وزیراعلیٰ پنجاب مریم نواز شریف کے فلیگ شپ پروگرام کے پانچویں مرحلے کے تحت سوشل ویلفیئر ڈیپارٹمنٹ کے زیر اہتمام معاون آلات کی تقسیم کی ایک پروقار تقریب منعقد ہوئی۔

تقریب میں ڈپٹی کمشنر اوکاڑہ احمد عثمان جاوید اور رکن پنجاب اسمبلی میاں محمد منیر نے 80 خصوصی افراد میں مختلف معاون آلات تقسیم کیے۔ اس موقع پر ڈپٹی ڈائریکٹر سوشل ویلفیئر محمد اشتیاق خان نے حکومتِ پنجاب کے خصوصی افراد کے لیے جاری عوامی فلاحی اقدامات پر تفصیلی بریفنگ دی۔

فلاحی پروگرام کے تحت خصوصی افراد میں الیکٹرک اور مینول وہیل چیئرز، آلہ سماعت، بیساکھیاں اور دیگر ضروری معاون آلات فراہم کیے گئے، جس پر خصوصی افراد اور ان کے اہلِ خانہ نے وزیراعلیٰ پنجاب مریم نواز شریف سے دلی تشکر کا اظہار کیا۔

تقریب سے خطاب کرتے ہوئے ڈپٹی کمشنر احمد عثمان جاوید نے کہا کہ وزیراعلیٰ پنجاب کے شاندار ویژن کے تحت ضلع بھر کے دور دراز علاقوں تک خصوصی افراد کو سہولیات فراہم کی جا رہی ہیں۔ انہوں نے سول سوسائٹی پر زور دیا کہ وہ خصوصی افراد کی فلاح و بہبود کے لیے سرکاری محکموں کے شانہ بشانہ کردار ادا کرے۔

ڈپٹی کمشنر کا کہنا تھا کہ خصوصی افراد کی دیکھ بھال ہم سب کی مشترکہ ذمہ داری ہے اور وزیراعلیٰ پنجاب کے ویژن کے مطابق ان کی سپورٹ کے لیے مزید عملی اقدامات بھی کیے جائیں گے۔

اس موقع پر ایم پی اے میاں محمد منیر نے کہا کہ معاون آلات کی فراہمی سے خصوصی افراد کی روزمرہ زندگی میں نمایاں آسانی پیدا ہوگی۔ انہوں نے یقین دلایا کہ فلاح و بہبود کے منصوبوں کے ذریعے خصوصی افراد کی بہتری کے لیے تمام ممکنہ اقدامات جاری رکھے جائیں گے۔

اوکاڑہ (نامہ نگار ملک ظفر) کمشنر ساہیوال ڈویژن ڈاکٹر آصف طفیل نے آر پی او رانا ایاز سلیم اور ڈپٹی کمشنر احمد عثمان جاوید کے ہمراہ کرسمس کے انتظامات کے سلسلے میں اوکاڑہ کے کیتھولک چرچ کا دورہ کیا۔

دورے کے دوران چرچ میں صفائی، بجلی، پانی اور سیکیورٹی انتظامات کا تفصیلی جائزہ لیا گیا۔ کمشنر ساہیوال نے کرسمس کے موقع پر مسیحی برادری کو بہترین سہولیات کی فراہمی یقینی بنانے کی ہدایات دیں اور چرچ انتظامیہ سے ملاقات کے بعد انتظامات پر اطمینان کا اظہار کیا۔

کمشنر ساہیوال ڈاکٹر آصف طفیل اور آر پی او رانا ایاز سلیم نے کرسچن کمیونٹی کے ساتھ مل کر کرسمس کا کیک بھی کاٹا۔ اس موقع پر فول پروف سیکیورٹی انتظامات یقینی بنانے کے احکامات جاری کیے گئے۔

کمشنر نے کہا کہ کرسمس کی تقریبات کے دوران مسیحی برادری کو ہر ممکن سہولیات فراہم کی جائیں گی اور اس ضمن میں کسی قسم کا سمجھوتہ نہیں کیا جائے گا۔ پبلک پارکس، قبرستانوں اور کرسچن کالونیوں میں بہترین میونسپل سروسز کی فراہمی کے لیے تمام ممکن اقدامات کیے جائیں گے۔

انہوں نے واضح کیا کہ اقلیتی برادری کے مذہبی تہواروں پر مکمل احترام اور سہولیات کی فراہمی ضلعی انتظامیہ کی اولین ترجیح ہے، جبکہ سیکیورٹی ادارے کرسمس کے موقع پر فول پروف سیکیورٹی انتظامات کو یقینی بنائیں گے۔ کمشنر ساہیوال نے ضلعی انتظامیہ کے موثر اقدامات کو سراہا۔

اوکاڑہ ( نامہ نگار ملک ظفر )سب انسپکٹر محمد یونس کے صاحبزادے فخر فرید نے قانون کے شعبے میں قومی سطح پر مسلسل دو فتوحات حاصل کر کے ضلع اوکاڑہ اور اپنے والدین کا سر فخر سے بلند کر دیا ہے۔ گورنمنٹ کالج یونیورسٹی لاہور کے ہونہار طالب علم فخر فرید نے محض ایک ماہ کے دوران دو بڑے نیشنل موٹ کورٹ مقابلے جیت کر اپنی خداداد صلاحیتوں کا لوہا منوایا ہے۔ تفصیلات کے مطابق، 14 نومبر 2025 کو آئی وی کالج آف لا کے زیر اہتمام منعقدہ "آل پاکستان نیشنل موٹ کورٹ مقابلے” میں ملک بھر سے آئی ہوئی 16 ٹیموں کو پچھاڑ کر انہوں نے پہلی پوزیشن حاصل کی۔ اس کے فوری بعد 30 نومبر 2025 کو "ایچ آر پی سی” کے سالانہ موٹ کورٹ مقابلے میں بھی انہوں نے اپنی جامعہ کی نمائندگی کرتے ہوئے سیمی فائنل میں پنجاب یونیورسٹی اور فائنل میں گلوبل لا کالج جیسی مضبوط ٹیموں کو شکست دے کر مسلسل دوسری قومی چیمپئن شپ اپنے نام کی۔

فخر فرید کی اس غیر معمولی تعلیمی و پیشہ ورانہ کامیابی پر ڈی پی او اوکاڑہ محمد راشد ہدایت نے ان کی قابلیت کا اعتراف کرتے ہوئے انہیں نقد انعام اور تعریفی اسناد (Appreciation Letter) سے نوازا ہے۔ پولیس افسر کے صاحبزادے کی یہ شاندار کارکردگی نوجوان نسل کے لیے ایک مشعلِ راہ قرار دی جا رہی ہے جو اس بات کا ثبوت ہے کہ محنت اور لگن سے کسی بھی میدان میں کامیابی حاصل کی جا سکتی ہے۔ اس تاریخی کامیابی پر عوامی اور سماجی حلقوں کی جانب سے سب انسپکٹر محمد یونس کو مبارکباد دینے کا سلسلہ جاری ہے اور ہونہار طالب علم کے روشن مستقبل کے لیے نیک تمناؤں کا اظہار کیا جا رہا ہے۔

اوکاڑہ( نامہ نگار ملک ظفر )سول ڈیفنس آفیسر جاوید اختر کھچی کی خصوصی زیر نگرانی یونیورسٹی آف ایگریکلچر فیصل آباد اوکاڑہ کیمپس میں فائر سیفٹی اور حفاظتی اقدامات کے حوالے سے ایک اہم آگاہی سیمینار اور موک ایکسرسائز کا انعقاد کیا گیا ہے۔ اس سرگرمی کا بنیادی مقصد یونیورسٹی کے طلبہ، اساتذہ اور دیگر عملے میں کسی بھی ناگہانی یا ہنگامی صورتحال سے مؤثر طریقے سے نمٹنے کی صلاحیت پیدا کرنا تھا۔ سیمینار کے دوران سول ڈیفنس آفیسر جاوید اختر کھچی نے شرکاء کو آگ لگنے کی مختلف وجوہات، ابتدائی حفاظتی تدابیر، آگ بجھانے والے آلات (فائر ایکسٹی نشرز) کے درست استعمال اور عمارت سے ہنگامی انخلا کے طریقہ کار پر تفصیلی بریفنگ دی۔ انہوں نے اس بات پر زور دیا کہ ہنگامی حالات میں حواس باختہ ہونے کے بجائے پرسکون رہ کر فوری ردعمل دینا ہی قیمتی جانوں اور املاک کو بچانے کا بہترین طریقہ ہے۔

تربیتی سیشن کے دوسرے مرحلے میں باقاعدہ موک ایکسرسائز کا اہتمام کیا گیا، جس میں طلبہ اور یونیورسٹی اسٹاف نے فائر الارم بجنے پر محفوظ راستوں سے انخلا اور امدادی اداروں کے ساتھ تعاون کرنے کے عملی مظاہرے پیش کیے۔ اس موقع پر محکمہ سول ڈیفنس، پولیس اور دیگر سیکیورٹی اداروں کی جانب سے مشترکہ فرضی مشقیں بھی کی گئیں تاکہ یونیورسٹی کے حفاظتی انتظامات کو مزید فول پروف بنایا جا سکے۔ تقریب کے شرکاء نے سول ڈیفنس کے اس اقدام کو انتہائی مفید قرار دیتے ہوئے کہا کہ تعلیمی اداروں میں اس طرح کی تربیتی سرگرمیاں وقت کی اہم ضرورت ہیں تاکہ نوجوان نسل کسی بھی حادثے کی صورت میں فرسٹ ایڈ اور حفاظتی اقدامات سے مکمل طور پر باخبر ہو۔

اوکاڑہ(نامہ نگار ملک ظفر)ڈی پی او اوکاڑہ محمد راشد ہدایت نے کرسمس کی آمد کے پیش نظر ضلع بھر میں سیکیورٹی انتظامات کو حتمی شکل دیتے ہوئے مختلف گرجا گھروں کا تفصیلی دورہ کیا اور حفاظتی اقدامات کا جائزہ لیا۔ دورے کے دوران ڈی پی او نے کیتھولک چرچ، ناصری چرچ اور کرائسٹ چرچ میں سیکیورٹی کے انتظامات کا معائنہ کیا اور وہاں ڈیوٹی پر مامور افسران و اہلکاروں کو الرٹ رہنے کی سخت ہدایات جاری کیں۔ محمد راشد ہدایت نے اس موقع پر میڈیا سے گفتگو کرتے ہوئے بتایا کہ مسیحی برادری کے تہوار کے موقع پر ضلع بھر میں فول پروف سیکیورٹی یقینی بنانے کے لیے ایک ہزار سے زائد پولیس افسران اور جوانوں کو خصوصی طور پر تعینات کیا گیا ہے تاکہ کسی بھی ناخوشگوار واقعے سے بچا جا سکے اور امن و امان کی صورتحال برقرار رہے۔

ڈی پی او اوکاڑہ کا مزید کہنا تھا کہ چرچز کے ساتھ ساتھ فیملی پارکس، عوامی مقامات اور اہم شاہراہوں پر بھی اضافی نفری تعینات کی گئی ہے اور مسیحی برادری کے تحفظ کے لیے تمام ضروری وسائل بروئے کار لائے جا رہے ہیں۔ انہوں نے واضح کیا کہ اوکاڑہ پولیس پرامن کرسمس کے انعقاد کے لیے پوری طرح متحرک ہے اور سیکیورٹی ڈیوٹی میں کسی بھی قسم کی غفلت یا کوتاہی کو ہرگز برداشت نہیں کیا جائے گا۔ ان کا کہنا تھا کہ تمام ناکہ جات اور حساس مقامات کی کڑی نگرانی کی جا رہی ہے تاکہ شہری بلا خوف و خطر اپنی خوشیوں میں شریک ہو سکیں اور ضلع بھر میں بھائی چارے کی فضا قائم رہے۔

اوکاڑہ (نامہ نگار ملک ظفر) اوکاڑہ میں گورنمنٹ گرلز کالج کی طالبات نے بھارت کی ریاست بہار کے وزیر اعلیٰ نتیش کمار کی جانب سے حجاب کی مبینہ بے حرمتی کے خلاف شدید احتجاجی مظاہرہ کیا۔ مظاہرین نے واقعے کو خواتین کے احترام اور مذہبی آزادی پر حملہ قرار دیا۔

تفصیلات کے مطابق سوشل میڈیا پر وائرل ہونے والی ایک ویڈیو میں ایک خاتون کے ساتھ نامناسب رویہ دکھایا گیا، جس میں وہ واضح طور پر بے چینی محسوس کرتی نظر آتی ہیں جبکہ مبینہ طور پر بہار کے وزیر اعلیٰ نے خاتون کے حجاب کو چہرے سے نیچے کی جانب کھینچا۔ اس واقعے پر دنیا بھر میں مسلمانوں کے جذبات مجروح ہونے کی اطلاعات سامنے آئی ہیں۔

گورنمنٹ گرلز کالج اوکاڑہ کی پرنسپل انیلا افضال نے کہا کہ ویڈیو میں نظر آنے والا عمل انتہائی قابلِ مذمت ہے۔ ان کا کہنا تھا کہ حجاب عورت کی عزت اور شناخت کی علامت ہے اور اس کی توہین کسی صورت برداشت نہیں کی جا سکتی۔

احتجاج کے دوران طالبات نے پلے کارڈز اور بینرز اٹھا رکھے تھے جن پر حجاب کے تقدس کے حق میں نعرے درج تھے۔ مظاہرین نے مطالبہ کیا کہ واقعے کی شفاف تحقیقات کی جائیں اور مذہبی اقدار و خواتین کے احترام کو یقینی بنایا جائے۔

طالبات اور کالج انتظامیہ نے عالمی برادری اور انسانی حقوق کی تنظیموں سے بھی مطالبہ کیا کہ وہ اس معاملے کا نوٹس لیں۔ آخر میں مظاہرین نے پرامن احتجاج کرتے ہوئے اس عزم کا اظہار کیا کہ وہ مذہبی آزادی اور خواتین کے وقار کے تحفظ کے لیے اپنی آواز بلند کرتی رہیں گی۔