Category: اوکاڑہ

اوکاڑہ (باغی ٹی وی،نامہ نگارملک ظفر) ڈسٹرکٹ الیکشن کمشنر چوہدری محمد شفیق کی زیر صدارت ڈسٹرکٹ انکلوسیو کووارڈینیشن کمیٹی کا ایک اہم اجلاس منعقد ہوا، جس میں مختلف سرکاری محکموں کے افسران، سول سوسائٹی کے نمائندگان اور دیگر متعلقہ اسٹیک ہولڈرز نے شرکت کی۔ اجلاس کے دوران انتخابی عمل کو ہر طبقے کے لیے یکساں، شفاف اور قابل رسائی بنانے کے حوالے سے تفصیلی تبادلۂ خیال کیا گیا۔ ڈسٹرکٹ الیکشن کمشنر نے شرکاء سے خطاب کرتے ہوئے کہا کہ ایک جامع اور منصفانہ انتخابی عمل ہی جمہوریت کی اصل مضبوطی کی ضمانت ہے اور اس عظیم مقصد کے حصول کے لیے تمام اداروں کے درمیان مضبوط باہمی تعاون وقت کی اشد ضرورت ہے۔

اس موقع پر ڈسٹرکٹ الیکشن کمشنر نے ڈسٹرکٹ ووٹر ایجوکیشن کمیٹی کے اراکین کو خصوصی ہدایات جاری کیں کہ وہ اپنے متعلقہ علاقوں میں ووٹر رجسٹریشن اور انتخابی عمل سے متعلق آگاہی سیشنز کا بھرپور انعقاد کریں تاکہ عوام میں ووٹ کے اندراج کی اہمیت کو اجاگر کیا جا سکے۔ مزید برآں، ڈسٹرکٹ انکلوسیو کووارڈینیشن کمیٹی کے اراکین کو پابند کیا گیا کہ وہ اپنے علاقوں میں اہل افراد کی فہرستیں مرتب کر کے فراہم کریں تاکہ نادرا کی معاونت سے موبائل رجسٹریشن وین (MRV) کو فوری طور پر تعینات کیا جا سکے۔ اس اقدام کا بنیادی مقصد دور دراز علاقوں کے شہریوں، بالخصوص خواتین کے ووٹ کے اندراج اور قومی شناختی کارڈز کی تیاری کو یقینی بنانا ہے۔ اجلاس کے اختتام پر تمام شرکاء نے اس عزم کا اعادہ کیا کہ تمام شہریوں کو بلا تفریق حقِ رائے دہی کے استعمال میں سہولت فراہم کرنے کے لیے مشترکہ کوششیں جاری رکھی جائیں گی۔

اوکاڑہ (نامہ نگار ملک ظفر) ڈپٹی کمشنر احمد عثمان جاوید نے پنجاب انفورسمنٹ اینڈ ریگولیٹری اتھارٹی (پیرا) میں بھرتی کے سلسلے میں انویسٹیگیشن افسران کے فزیکل ٹیسٹس کے موقع پر انتظامات کا تفصیلی جائزہ لیا۔ انہوں نے فزیکل ٹیسٹ اور دوڑ کے عمل، سیکیورٹی انتظامات، امیدواروں کو فراہم کی جانے والی سہولیات اور طبی انتظامات کا معائنہ کیا۔

اس موقع پر ایڈیشنل ڈپٹی کمشنر جنرل احمد سلیم چشتی، اسسٹنٹ کمشنر احمد شیر گوندل، سسٹم نیٹ ورک ایڈمنسٹریٹر افضال حسین بلوچ سمیت دیگر افسران بھی موجود تھے۔ مختلف محکموں کے افسران اور اہلکاروں نے اپنی تفویض کردہ ذمہ داریاں احسن طریقے سے انجام دیں۔

ڈپٹی کمشنر احمد عثمان جاوید نے ہدایت کی کہ بھرتی کے تمام مراحل شفافیت، میرٹ اور مقررہ معیار کے مطابق مکمل کیے جائیں، جبکہ امیدواروں کے لیے صاف پانی، طبی سہولیات اور نظم و ضبط کو یقینی بنایا جائے۔ انہوں نے کہا کہ پیرا میں بھرتیاں اہل، فٹ اور باصلاحیت افراد کے انتخاب کے لیے کی جا رہی ہیں تاکہ ادارہ اپنی ذمہ داریاں مؤثر انداز میں سرانجام دے سکے۔

اعداد و شمار کے مطابق انویسٹیگیشن افسران کی بھرتی کے لیے 142 مرد اور 62 خواتین نے شرکت کی، جن میں سے 78 مرد اور 33 خواتین فزیکل ٹیسٹ میں کامیاب قرار پائے۔ انفورسمنٹ افسران کی بھرتی کے لیے فزیکل ٹیسٹ 7 جنوری کو لیا جائے گا۔

اوکاڑہ (نامہ نگار ملک ظفر)ڈسٹرکٹ پولیس آفیسر اوکاڑہ محمد راشد ہدایت نے ضلع بھر میں سیکیورٹی، سروس ڈلیوری اور پولیس ویلفیئر کو مزید مؤثر بنانے کے لیے مختلف مقامات کے دورے کیے۔ اس سلسلے میں انہوں نے کیڈٹ کالج اوکاڑہ کا دورہ کیا جہاں تعلیمی اداروں کی سیکیورٹی کو یقینی بنانے کے لیے موجود انتظامات کا تفصیلی جائزہ لیا اور متعلقہ افسران کو سیکیورٹی مزید بہتر بنانے کے لیے ضروری ہدایات جاری کیں۔

ڈی پی او اوکاڑہ نے پولیس خدمت مرکز کا اچانک دورہ بھی کیا، جہاں شہریوں کو فراہم کی جانے والی سہولیات کا معائنہ کیا گیا۔ اس موقع پر انہوں نے سروس ڈلیوری کے معیار پر اطمینان کا اظہار کرتے ہوئے شہریوں سے براہِ راست گفتگو کی اور پولیس عملے کو ہدایت کی کہ بلا تاخیر، شفاف اور مؤثر سہولیات کی فراہمی ہر صورت یقینی بنائی جائے۔

بعد ازاں ڈی پی او محمد راشد ہدایت نے طیب سعید شہید پولیس لائنز کا دورہ کیا جہاں پولیس اہلکاروں کی ویلفیئر سے متعلق امور کا جائزہ لیا گیا۔ انہوں نے پولیس اہلکاروں کے جم کو اپ گریڈ کرنے کے احکامات جاری کرتے ہوئے جسمانی فٹنس اور صحت مند طرزِ زندگی کی اہمیت پر زور دیا۔ اس موقع پر ڈی ایس پی ہیڈ کوارٹر کو بھی پولیس اہلکاروں کے لیے بہترین سہولیات کی فراہمی یقینی بنانے کی ہدایات دی گئیں۔

ڈی پی او اوکاڑہ محمد راشد ہدایت نے اس عزم کا اظہار کیا کہ عوام کے جان و مال کا تحفظ، معیاری سروس ڈلیوری اور پولیس اہلکاروں کی ویلفیئر اوکاڑہ پولیس کی اولین ترجیحات میں شامل ہیں، اور ان اہداف کے حصول کے لیے تمام دستیاب وسائل بروئے کار لائے جائیں گے۔

اوکاڑہ (نامہ نگار ملک ظفر) اوکاڑہ پولیس کے ہونہار اہلکار محمد عابد نے کراچی میں منعقدہ 35ویں نیشنل گیمز میں جوڈو کے مقابلوں میں شاندار کارکردگی کا مظاہرہ کرتے ہوئے برونز میڈل حاصل کر کے پنجاب پولیس اور اوکاڑہ پولیس کا نام روشن کر دیا۔

محمد عابد کی یہ کامیابی ان کی محنت، لگن اور پیشہ ورانہ صلاحیتوں کا واضح ثبوت ہے۔ اس شاندار کامیابی پر ڈی پی او اوکاڑہ محمد راشد ہدایت نے محمد عابد سے خصوصی ملاقات کی اور انہیں تعریفی سرٹیفکیٹ اور نقد انعام سے نوازا۔ اس موقع پر اسپورٹس سیکرٹری لیاقت کو بھی کھیلوں کے فروغ اور اس کامیابی میں اہم کردار ادا کرنے پر شاباش دی گئی۔

واضح رہے کہ محمد عابد اس سے قبل بھی بین الاقوامی سطح پر پاکستان کی نمائندگی کر چکے ہیں۔ وہ ایشین بیچ گیمز میں تیسری پوزیشن اور ورلڈ پولیس گیمز میں چوتھی پوزیشن حاصل کر کے ملک کا نام روشن کر چکے ہیں۔

اوکاڑہ پولیس کی قیادت نے اس عزم کا اظہار کیا کہ فورس میں کھیلوں کے فروغ کے لیے ہر ممکن تعاون جاری رکھا جائے گا، کیونکہ ایسی کامیابیاں نہ صرف صحت مند سرگرمیوں کو فروغ دیتی ہیں بلکہ پولیس کے مثبت اور پیشہ ورانہ تشخص کو بھی اجاگر کرتی ہیں۔

اوکاڑہ پولیس کی جانب سے محمد عابد کو اس کامیابی پر دلی مبارکباد پیش کی گئی اور مستقبل میں مزید قومی و بین الاقوامی اعزازات کے لیے نیک تمناؤں کا اظہار کیا گیا۔

اوکاڑہ (نامہ نگار ملک ظفر) ماہرِ فلکیات ہمایوں افضل نے سال 2026 کے حوالے سے پاکستان، بھارت اور عالمی صورتحال پر مبنی اہم اور چونکا دینے والی پیش گوئیاں جاری کر دی ہیں۔ ہمایوں افضل کے مطابق سال 2026 میں پاکستان اور بھارت سمیت بعض ممالک میں حکومتوں کی تبدیلی اور مارشل لا کے نفاذ کے امکانات موجود ہیں، جبکہ عوام اور حکومتوں کے درمیان فاصلے میں مزید اضافہ ہوگا۔

انہوں نے کہا کہ غربت اور بے روزگاری کے باعث عوامی بے چینی بڑھے گی، جس کے نتیجے میں دنگا فساد، احتجاجی مظاہرے اور جلسے جلوس دیکھنے میں آ سکتے ہیں۔ ماہرِ فلکیات کے مطابق عالمی امن کی صورتحال بھی غیر مستحکم رہے گی، تاہم صدر ٹرمپ اور فیلڈ مارشل عاصم منیر مل کر عالمی امن کے قیام میں اہم کردار ادا کریں گے۔

ہمایوں افضل نے پیش گوئی کی کہ مارچ اور اپریل 2026 سے پاکستان کی قسمت کا ستارہ چمکنا شروع ہوگا اور ملک کے معاشی و اقتصادی حالات میں نمایاں بہتری آئے گی۔ دوسری جانب بھارت میں علیحدگی پسند تنظیمیں زور پکڑیں گی، جس کے باعث مودی سرکار کی مشکلات میں اضافہ ہوگا۔ ان کا کہنا تھا کہ دنیا کے نقشے پر ایک نیا ملک بھی ابھرنے کا امکان ہے، جبکہ قدرتی آفات اور مالی نقصانات کا خدشہ بھی موجود رہے گا۔ اسی دوران کسی اہم سیاسی شخصیت کی اچانک موت دنیا کو صدمے سے دوچار کر سکتی ہے۔

ماہرِ فلکیات کے مطابق سال 2026 میں پہلا سورج گرہن 17 فروری بروز منگل، پہلا چاند گرہن 3 مارچ بروز منگل، دوسرا سورج گرہن 12 اگست بروز بدھ اور دوسرا چاند گرہن 28 اگست بروز جمعہ کو ہوگا۔ انہوں نے بتایا کہ اس سال یکم رمضان 19 فروری بروز جمعرات کو جبکہ یکم شوال 21 مارچ بروز ہفتہ کو ہونے کا امکان ہے، اور سال 2026 میں 30 روزے ہوں گے۔

ہمایوں افضل کا کہنا تھا کہ آنے والا سال دنیا بھر کے لیے غیر معمولی تبدیلیوں اور بڑے واقعات کا حامل ہوگا، جس کے اثرات عالمی سیاست، معیشت اور امن و امان پر واضح طور پر مرتب ہوں گے۔