Category: اوکاڑہ

اوکاڑہ (نامہ نگار ملک ظفر) ڈپٹی کمشنر احمد عثمان جاوید کی خصوصی ہدایت پر شہر کی بیوٹیفکیشن مہم کے تحت محبوب عالم چوک میں جدید ’’پکسل ٹاور‘‘ نصب کر دیا گیا۔ ایڈمنسٹریٹر میونسپل کمیٹی علیزہ ریحان کی نگرانی میں اس منصوبے کی تکمیل سے شہر کی خوبصورتی میں نمایاں اضافہ ہوا ہے۔

انتظامیہ کے مطابق پکسل ٹاور کی تنصیب کا مقصد شہری ماحول کو جدید طرز پر ہم آہنگ کرنا اور شہریوں کو ایک پُرکشش اور دلکش منظر فراہم کرنا ہے۔ ایڈمنسٹریٹر علیزہ ریحان نے کہا کہ پکسل ٹاور جدید شہری ترقی کی علامت ہے جو شہر کی شناخت اور حسن میں اضافہ کرے گا۔

انہوں نے بتایا کہ بیوٹیفکیشن مہم کے سلسلے میں شہر کے مختلف مقامات پر بھی اس نوعیت کے جدید ڈیزائنز اور ماڈلز نصب کیے جائیں گے۔ پکسل ٹاور میں نصب روشنیاں اور رنگین ڈیزائن رات کے وقت علاقے کو منفرد دلکشی بخشتے ہیں۔

شہری حلقوں نے ضلعی انتظامیہ کے اس اقدام کو خوب سراہا ہے اور شہر کی خوبصورتی کے لیے اسے ایک مثبت پیش رفت قرار دیا ہے۔

اوکاڑہ (نامہ نگار ملک ظفر) ڈپٹی کمشنر احمد عثمان جاوید کی ہدایت پر محکمہ جنگلات کی جانب سے ایل بی ڈی سی کینال کے اطراف شجرکاری مہم جاری ہے۔ ڈویژنل فارسٹ آفیسر مشتاق حسین چغتائی کی نگرانی میں اربن فارسٹری کے تحت شہری علاقوں میں ماحول دوست سرگرمیوں کے فروغ اور فضائی آلودگی میں کمی کیلئے سینکڑوں پودے لگائے گئے۔

ڈی ایف او مشتاق حسین چغتائی نے کہا کہ اربن فارسٹری وقت کی اہم ضرورت ہے، جو نہ صرف ماحول کو بہتر بناتی ہے بلکہ شہری درجہ حرارت کم کرنے، آلودگی میں کمی اور خوبصورتی بڑھانے میں بھی مددگار ہے۔ ان کے مطابق مہم کے دوران سایہ دار اور آکسیجن پیدا کرنے والے مقامی موسم کے مطابق صحت مند پودے لگائے جا رہے ہیں۔

محکمہ جنگلات نے شجرکاری کے بعد پودوں کی نگہداشت کا خصوصی پلان بھی تشکیل دیا ہے، جس میں پانی، باڑ اور دیکھ بھال کی ذمہ داریاں متعلقہ ٹیموں کو سونپی گئی ہیں تاکہ ہر پودا بہتر نشوونما پا سکے۔
ڈی ایف او نے عوام اور اداروں سے اپیل کی ہے کہ شجرکاری مہم میں بھرپور حصہ لیں اور لگائے گئے پودوں کی حفاظت کو اپنی سماجی ذمہ داری سمجھیں۔

اوکاڑہ (نامہ نگار ملک ظفر) وزیراعلیٰ پنجاب کے عوامی ریلیف اقدامات پر عمل درآمد کے سلسلے میں ڈسپیوٹ ریزولوشن کمیٹی کا اہم اجلاس ہوا جس کی صدارت ایڈیشنل ڈپٹی کمشنر ریونیو محمد شعجین وسطرو اور ڈی پی او محمد راشد ہدایت نے مشترکہ طور پر کی۔ اجلاس میں ضلع کی تینوں تحصیلوں کے اسسٹنٹ کمشنرز اور ایس ڈی پی اوز نے شرکت کی۔

اجلاس کے دوران تحفظِ ملکیتی جائیداد ایکٹ کے تحت فریقین کی سنوائی کی گئی اور مختلف جائیدادی تنازعات کے کیسز کی مفصل سماعت کی گئی۔ ضلعی سربراہان نے ریونیو ریکارڈ کی روشنی میں سائلین کی شکایات کے فوری ازالے کے احکامات جاری کیے اور تمام اسسٹنٹ کمشنرز و ایس ڈی پی اوز کو شفافیت، میرٹ اور درست حقائق پر مبنی رپورٹس پیش کرنے کی خصوصی ہدایات دیں۔

ایڈیشنل ڈپٹی کمشنر ریونیو محمد شعجین وسطرو نے کہا کہ ڈسپیوٹ ریزولوشن کمیٹی متاثرین کے حقوق کے تحفظ کے لیے ایک مؤثر فورم ہے، جہاں ریونیو معاملات سے متعلق تنازعات کے شفاف حل کو یقینی بنایا جا رہا ہے۔ انہوں نے کہا کہ حکومت پنجاب کی ہدایات کے مطابق عوام کی فوری سنوائی اور شکایات کے حل کو اولین ترجیح بنایا گیا ہے۔

ڈی پی او محمد راشد ہدایت نے کہا کہ پولیس اور ضلعی انتظامیہ باہمی تعاون کے ساتھ غیر قانونی طور پر جائیدادوں پر قابض عناصر کے خلاف سخت کارروائیاں جاری رکھے ہوئے ہیں۔ انہوں نے واضح کیا کہ قانون کی بالادستی کو ہر صورت برقرار رکھا جائے گا اور جائیدادی حقوق تلف کرنے والے افراد سے آہنی ہاتھوں سے نمٹا جائے گا۔

اوکاڑہ (نامہ نگار ملک ظفر) ڈپٹی کمشنر احمد عثمان جاوید کی ہدایت پر محکمہ سول ڈیفنس کے زیر اہتمام گورنمنٹ ستلج ہائی سکول میں ریزیلینس کور کے حوالے سے آگاہی سیمینار کا انعقاد کیا گیا، جس میں طلبہ کی آن لائن رجسٹریشن بھی کی گئی۔

سیمینار سے خطاب کرتے ہوئے سول ڈیفنس آفیسر جاوید اختر کھچی نے ریزیلینس کور میں بطور رضا کار شامل ہونے کے اغراض و مقاصد اور اہمیت سے متعلق تفصیلی بریفنگ دی۔ انہوں نے بتایا کہ ریزیلینس کور کیلئے آن لائن رجسٹریشن کا طریقہ کار انتہائی آسان ہے اور اب تک ضلع بھر سے 7 ہزار افراد بلا معاوضہ رجسٹرڈ ہو چکے ہیں۔

جاوید اختر کھچی نے کہا کہ ریزیلینس کور کا بنیادی مقصد ہنگامی حالات، قدرتی آفات، حادثات اور ریسکیو آپریشنز کے دوران عوام کو فوری معاونت فراہم کرنا ہے۔ انہوں نے نوجوانوں کو مخاطب کرتے ہوئے کہا کہ ملک کو ایسے باہمت، ذمہ دار اور باشعور نوجوانوں کی ضرورت ہے جو مشکل وقت میں قوم کے ساتھ کھڑے ہو سکیں۔

انہوں نے مزید بتایا کہ کور میں شامل ہونے والے رضا کاروں کو فرسٹ ایڈ، فائر فائٹنگ، سرچ اینڈ ریسکیو، ایمرجنسی مینجمنٹ اور ڈیزاسٹر رسک ریڈکشن کی خصوصی تربیت فراہم کی جائے گی۔
سیمینار کے اختتام پر محکمہ سول ڈیفنس کے اہلکاروں نے اسکول کے طلبہ کی آن لائن رجسٹریشن بھی کی۔

اوکاڑہ (نامہ نگار ملک ظفر) ڈپٹی کمشنر احمد عثمان جاوید کی ہدایت پر فیصل آباد روڈ پر قائم ورکشاپس اور کاروباری مراکز میں کنورژن فیس کی ادائیگی کی صورتحال چیک کی گئی۔ اس سلسلے میں ایڈمنسٹریٹر میونسپل کمیٹی علیزہ ریحان کی زیر نگرانی خصوصی ٹیموں نے مختلف ورکشاپس کا معائنہ کیا۔

چیکنگ کے دوران متعدد مالکان کی جانب سے کنورژن فیس ادا نہ کیے جانے پر نوٹسز جاری کر دیے گئے۔ ٹیم نے تمام مالکان کو متنبہ کیا کہ حکومتی قواعد و ضوابط پر عمل درآمد ہر صورت یقینی بنایا جائے۔

ایڈمنسٹریٹر میونسپل کمیٹی علیزہ ریحان نے واضح کیا کہ تمام ورکشاپ مالکان بروقت کنورژن فیس ادا کریں، بصورت دیگر غفلت برتنے والوں کے خلاف سخت کارروائی عمل میں لائی جائے گی اور ورکشاپس کو سیل بھی کیا جا سکتا ہے۔

اوکاڑہ (نامہ نگار ملک ظفر) ایڈیشنل ڈپٹی کمشنر جنرل علیزہ ریحان کی زیرِ صدارت انسدادِ سموگ مہم سے متعلق اہم اجلاس منعقد ہوا۔ اجلاس میں ڈپٹی ڈائریکٹر ماحولیات محمد عبدالقیوم، سیکرٹری ڈی آر ڈی اے اقصیٰ ریاض، انڈسٹریز، ٹریفک پولیس اور دیگر محکموں کے افسران شریک ہوئے۔

اجلاس میں فیلڈ ٹیموں کی کارکردگی، انڈسٹری اور ٹرانسپورٹ سیکٹر میں کارروائیوں اور آگاہی مہم کا تفصیلی جائزہ لیا گیا۔ ایڈیشنل ڈپٹی کمشنر نے کہا کہ شہریوں کی صحت کے تحفظ کے لیے فوری اور مؤثر اقدامات ناگزیر ہیں۔ انہوں نے ہدایت کی کہ سموگ پالیسی پر سختی سے عملدرآمد یقینی بنایا جائے اور خلاف ورزی کرنے والوں کے خلاف بلاامتیاز کارروائیاں جاری رکھی جائیں۔

اجلاس میں بھٹہ مالکان کی نگرانی، کھلی جگہوں پر کچرا اور فصلوں کی باقیات جلانے کی روک تھام، دھوئیں خارج کرنے والی گاڑیوں کے خلاف ایکشن اور صنعتی یونٹس کی انسپکشن مزید تیز کرنے پر زور دیا گیا۔ ایڈیشنل ڈپٹی کمشنر نے کہا کہ سموگ کے تمام عوامل کا سدباب کیا جائے، روزانہ کی بنیاد پر رپورٹس پیش کی جائیں اور عوام کو مؤثر آگاہی فراہم کی جائے۔

اوکاڑہ (نامہ نگار ملک ظفر)ڈپٹی کمشنر احمد عثمان جاوید نے مفادِ عامہ کے پیش نظر ضلعی انتظامیہ کے افسران کو وزیراعلیٰ پنجاب کے گڈ گورننس پروگرام پر مکمل عملدرآمد کے واضح احکامات جاری کیے۔ اس سلسلے میں ہونے والے اجلاس میں ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر، ایڈیشنل ڈپٹی کمشنر جنرل علیزہ ریحان، اسسٹنٹ کمشنر اوکاڑہ چوہدری رب نواز، اسسٹنٹ کمشنر ایچ آر نور محمد، ڈپٹی ڈائریکٹر ڈویلپمنٹ مرغوب حسین ڈوگر، ایس ڈی ای او پیرا وسیم جاوید، ایس این اے افضال حسین بلوچ سمیت دیگر افسران نے شرکت کی۔

ڈپٹی کمشنر نے اجلاس میں ستھرا پنجاب مہم، تجاوزات کے خلاف کارروائی، شہر کی خوبصورتی، پارکس کی تزئین و آرائش، ڈویلپمنٹ اسکیموں پر پیش رفت اور دیگر گڈ گورننس اقدامات کا تفصیلی جائزہ لیا۔ انہوں نے تمام محکموں کو ہدایت کی کہ وزیراعلیٰ پنجاب کی ہدایات پر عملدرآمد میں کسی قسم کی کوتاہی برداشت نہیں کی جائے گی۔

احمد عثمان جاوید نے موثر مانیٹرنگ کے جامع پلان پر عمل کرنے کی تاکید کرتے ہوئے کہا کہ عوامی خدمت سب سے مقدم ہے۔ انہوں نے اس عزم کا اظہار کیا کہ ضلعی انتظامیہ پوری نیک نیتی کے ساتھ عوام کو سہولیات فراہم کرنے اور ان کے مسائل کے بہترین حل کے لیے بھرپور جدوجہد جاری رکھے گی۔

اوکاڑہ (نامہ نگار ملک ظفر)ڈسٹرکٹ ہیڈ کوارٹر سٹی ہسپتال اوکاڑہ میں انسدادِ خسرہ و روبیلا مہم کی افتتاحی تقریب منعقد کی گئی، جہاں بچوں کو موذی بیماریوں سے محفوظ رکھنے کے لیے خسرہ اور روبیلا ویکسینیشن مہم کا باقاعدہ آغاز کر دیا گیا۔ ایڈیشنل ڈپٹی کمشنر ریونیو محمد شعجین وسطرو نے 17 نومبر سے شروع ہونے والی مہم کا افتتاح کیا۔

تقریب سے خطاب کرتے ہوئے محمد شعجین وسطرو نے کہا کہ مہم کے دوران 9 ماہ سے 15 سال تک کے تمام بچوں کو مفت ویکسین لگائی جائے گی۔ یہ خصوصی مہم 17 تا 29 نومبر جاری رہے گی۔ انہوں نے کہا کہ بچوں کی بہترین صحت اور محفوظ مستقبل کے لیے خسرہ و روبیلا کے خلاف ویکسینیشن انتہائی ضروری ہے۔

ان کا کہنا تھا کہ یہ ویکسین بچوں میں قوتِ مدافعت بڑھاتی ہے اور انہیں متعدد خطرناک بیماریوں سے تحفظ فراہم کرتی ہے۔ حکومتِ پنجاب کی جانب سے خسرہ و روبیلا ویکسینیشن مہم کا آغاز والدین کے لیے ایک بہترین موقع ہے کہ وہ اپنے بچوں کو فوری ویکسینیشن کروا کر ان کی صحت و سلامتی میں اپنا کردار ادا کریں۔