Category: اوکاڑہ

اوکاڑہ (نامہ نگار ملک ظفر) ڈپٹی کمشنر احمد عثمان جاوید اور ڈسٹرکٹ پولیس آفیسر راشد ہدایت کی زیر صدارت ڈسپیوٹ ریزولوشن کمیٹی کا اہم اجلاس منعقد ہوا، جس میں شہری و دیہی نوعیت کے مختلف تنازعات، عوامی شکایات اور فوری ریلیف سے متعلق کیسز کی سماعت کی گئی۔

اجلاس میں پنجاب پروٹیکشن آف اونر شپ آف امووایبل پراپرٹی ایکٹ کے تحت موصول ہونے والی درخواستوں کا تفصیلی جائزہ لیا گیا۔ درخواست گزاروں نے جائیداد کے تنازعات، ناجائز قبضوں، جعلسازی اور دستاویزی مسائل سے متعلق شکایات پیش کیں، جن پر متعلقہ افسران کو فوری اقدامات کی ہدایات جاری کی گئیں۔

افسران نے موقع پر عوامی مسائل سنتے ہوئے متعدد کیسز میں متعلقہ محکموں کو ہدایات دیں کہ سائلین کو فوری ریلیف فراہم کیا جائے اور زمین و ملکیت سے متعلق شکایات کے حل میں تاخیر نہ ہونے دی جائے۔

ڈپٹی کمشنر احمد عثمان جاوید نے کہا کہ شہریوں کی ملکیتی جائیداد کے تحفظ کے لیے حکومت نے مؤثر قانون سازی کر دی ہے، اور اس قانون کے تحت ناجائز قبضہ کسی صورت برداشت نہیں کیا جائے گا۔ انہوں نے مزید کہا کہ ضلعی انتظامیہ شہریوں کے قانونی حقوق کے تحفظ کے لیے ہر ممکن اقدامات کر رہی ہے۔

ان کا کہنا تھا کہ شکایات کے جلد از جلد ازالے اور کیسز کی شفاف پراسیسنگ کو یقینی بنانے کے لیے ضلعی سطح پر مسلسل مانیٹرنگ جاری رکھی جائے گی، تاکہ عوام کو فوری اور موثر ریلیف فراہم کیا جا سکے۔

اوکاڑہ (نامہ نگار ملک ظفر)ہیلمٹ کی اوور چارجنگ کی شکایات پر اسسٹنٹ کمشنر چوہدری رب نواز نے فوری ایکشن لیتے ہوئے مختلف دکانوں کا معائنہ کیا، زائد قیمت پر فروخت کیے جانے والے ہیلمٹ تحویل میں لے لیے اور دکانداروں کو سخت وارننگ جاری کی۔

بعد ازاں ضبط شدہ ہیلمٹس شہریوں میں سرکاری طور پر مقرر کردہ مارکیٹ ریٹ پر تقسیم کیے گئے، تاکہ عوام کو ریلیف فراہم کیا جا سکے اور منافع خوری کے رجحان کی حوصلہ شکنی ہو سکے۔

اس موقع پر اسسٹنٹ کمشنر نے کہا کہ حکومت عوام کو ریلیف دینے کے لیے ہر ممکن اقدامات کر رہی ہے اور ضروری اشیاء پر ناجائز منافع خوری کسی صورت برداشت نہیں کی جائے گی۔ انہوں نے بتایا کہ قیمتوں کی مانیٹرنگ جاری رہے گی اور خلاف ورزی کرنے والوں کے خلاف سخت کارروائی ہوگی۔

شہریوں نے ضلعی انتظامیہ کے اقدام کو سراہتے ہوئے کہا کہ مقررہ نرخوں پر ہیلمٹس کی فراہمی نہ صرف ریلیف ہے بلکہ ٹریفک قوانین پر عملدرآمد اور عوامی تحفظ کو بھی فروغ دے گی۔

اوکاڑہ (نامہ نگار ملک ظفر)ڈپٹی کمشنر احمد عثمان جاوید کی زیرِ صدارت ڈسٹرکٹ کوآرڈی نیشن کمیٹی برائے نیشنل ایکشن پلان کا اہم اجلاس منعقد ہوا۔ اجلاس میں ڈی پی او محمد راشد ہدایت، آرمی افسران سمیت وفاقی و صوبائی محکموں کے نمائندگان نے شرکت کی۔

اجلاس کے دوران متعلقہ محکموں کے افسران نے مختلف امور پر تفصیلی بریفنگ دی جن میں شامل تھے:

×ٹریفکنگ اور قانون نافذ کرنے کے اقدامات
×انسدادِ سمگلنگ اور ذخیرہ اندوزی
×غیر قانونی پٹرول پمپس اور ایل پی جی شاپس کے خلاف کارروائیاں
×بجلی چوری کے خلاف آپریشن
×بھکاریوں کے خلاف کریک ڈاؤن
×ٹریفک قوانین پر عمل درآمد
×مدارس کی رجسٹریشن سے متعلق پیش رفت

ڈپٹی کمشنر احمد عثمان جاوید نے ہدایت کی کہ حکومت پنجاب کی پالیسی کے مطابق قانون کے نفاذ، عوامی سہولیات، اور گڈ گورننس کو یقینی بنانے کے لیے تمام محکمے عملی اقدامات کریں۔

انہوں نے کہا کہ ٹریفک قوانین سے متعلق عوام میں مؤثر آگاہی پیدا کی جائے، جبکہ شہر کی خوبصورتی کے لیے تجاوزات کا خاتمہ ناگزیر ہے۔ اس مقصد کے لیے شہر میں موجود تمام رکاوٹیں ہٹائی جائیں اور پیرا فورس کے جوان اپنے فرائض ایمانداری سے سر انجام دیں۔

ڈپٹی کمشنر نے واضح کیا کہ قانون کی پاسداری ہر شہری کی ذمہ داری ہے، اس لیے ذاتی مفادات کو بالائے طاق رکھ کر عوامی خدمت اور گڈ گورننس کو یقینی بنایا جائے۔

اوکاڑہ (نامہ نگار ملک ظفر) واسا اوکاڑہ نے شہر میں شہری سہولیات کو مؤثر اور جدید خطوط پر بہتر بنانے کے لیے گھر گھر سروے مہم کا آغاز کر دیا ہے۔ یہ مہم ایم ڈی واسا عبدالوحید کی خصوصی ہدایات پر شروع کی گئی، جس کی عملی نگرانی ڈپٹی ڈائریکٹر ریونیو رانا عدنان کر رہے ہیں۔

تفصیلات کے مطابق سروے ٹیمیں گھر گھر جا کر رہائشی اور تجارتی مقامات کا درست ریکارڈ مرتب کر رہی ہیں۔ پانی اور سیوریج کنکشنز، مالکانہ معلومات، کمرشل استعمال سمیت شہریوں کا مکمل ڈیٹا باقاعدہ فارم اور ڈیجیٹل سسٹم کے ذریعے محفوظ کیا جا رہا ہے۔

ترجمان واسا کے مطابق شہری سہولیات کی بہتری درست اور اپڈیٹ ڈیٹا سے ممکن ہے، جبکہ ایم ڈی عبدالوحید نے کہا کہ سروے سے حاصل ریکارڈ آئندہ ترقیاتی منصوبوں، سروس ڈیلیوری اور شکایات کے بروقت حل میں اہم کردار ادا کرے گا۔

ڈپٹی ڈائریکٹر ریونیو رانا عدنان نے شہریوں سے اپیل کی کہ سروے ٹیموں کے ساتھ تعاون کریں اور درست معلومات فراہم کریں۔ واسا انتظامیہ نے وضاحت کی کہ سروے مکمل طور پر مفت ہے اور کسی قسم کی فیس وصول نہیں کی جا رہی۔

شہری مزید معلومات اور شکایات کے لیے ہیلپ لائن 1334 پر رابطہ کر سکتے ہیں۔

اوکاڑہ (نامہ نگار ملک ظفر) سنٹرل اسٹیشن ریسکیو 1122 اوکاڑہ میں سیلاب کے دوران فرض شناسی اور بہادری کا مظاہرہ کرنے والے ریسکیورز کے اعزاز میں پر تکلف عشائیے کا اہتمام کیا گیا۔ تقریب میں ایڈیشنل ڈپٹی کمشنر (ریونیو) محمد شعجین وسطرو، ایڈیشنل ڈپٹی کمشنر (فنانس اینڈ پلاننگ) عبد الجبار گجر، ایڈیشنل ڈپٹی کمشنر (جنرل) میڈم علیزہ ریحان، اسسٹنٹ کمشنر اوکاڑہ راب نواز چڈھر، اسسٹنٹ ڈائریکٹر فنانس اینڈ پلاننگ رضوان وارث، چیف ایگزیکٹو آفیسر محکمہ تعلیم محمد یوسف کاہلوں، چیف آفیسر ضلع کونسل فدا افتخار میر، ڈویژنل فارسٹ آفیسر اور صدر انجمن تاجران شیخ ریاض انور نے شرکت کی۔

ڈسٹرکٹ ایمرجنسی آفیسر ظفر اقبال نے مہمانوں اور ریسکیورز کو خوش آمدید کہا اور حالیہ سیلاب کے دوران ریسکیو کی جانب سے کیے گئے آپریشنز کی تفصیلی بریفنگ دی۔ مہمانوں نے اپنے خطابات میں ریسکیو اہلکاروں کی دن رات محنت، خلوص اور بہادری کو سراہا اور ڈسٹرکٹ ایمرجنسی آفیسر ظفر اقبال کی قیادت میں کی جانے والی کامیاب ریسکیو و ریلیف کارروائیوں پر خراجِ تحسین پیش کیا۔

اوکاڑہ (نامہ نگار ملک ظفر) وزیراعلیٰ پنجاب کے فلیگ شپ پروگرام کے تحت کامیاب کاشتکاروں میں ہائی پاور گرین ٹریکٹرز کی تقسیم کے سلسلے میں ایک پروقار تقریب کا انعقاد کیا گیا۔ تقریب میں کمشنر ساہیوال ڈاکٹر آصف طفیل، ڈپٹی کمشنر احمد عثمان جاوید، ممبران صوبائی اسمبلی میاں محمد منیر، چوہدری جاوید علاؤالدین اور لیگی رہنما راؤ محمد اجمل نے بھی شرکت کی۔

وزیر زراعت و لائیو اسٹاک پنجاب سید عاشق حسین کرمانی نے تقریب میں کامیاب کاشتکاروں کو ٹریکٹرز کی چابیاں تقسیم کیں اور کہا کہ صوبہ پنجاب کے کاشتکاروں کو کل 10 ہزار ہائی پاور ٹریکٹرز سبسڈی پر فراہم کیے جا رہے ہیں۔ ہر ٹریکٹر پر 10 لاکھ روپے کی سبسڈی دی جا رہی ہے، جس پر مجموعی لاگت 10 ارب روپے بنتی ہے۔ ساہیوال ڈویژن میں 679 اور ضلع اوکاڑہ میں 280 ہائی پاور گرین ٹریکٹر فراہم کیے جا رہے ہیں۔

انہوں نے مزید کہا کہ وزیراعلیٰ پنجاب فارم میکانائزیشن کے لیے فیاضانہ وسائل فراہم کر رہی ہیں اور 10 ہزار مزید گرین ٹریکٹرز کی سبسڈی پر فراہمی کے لیے درخواستیں جلد وصول کی جائیں گی۔ وزیر زراعت نے بتایا کہ کسان کارڈ حکومت کا فلیگ شپ پروگرام ہے، جس کے تحت اب تک 7 لاکھ سے زائد کاشتکاروں کو 250 ارب روپے سے زائد بلا سود قرض فراہم کیے جا چکے ہیں۔

ہائی پاور گرین ٹریکٹرز کی تقسیم پر کسانوں و کاشتکاروں نے وزیراعلیٰ پنجاب مریم نواز شریف کا شکریہ ادا کیا اور پروگرام کو پنجاب کے زرعی شعبے کے لیے ایک اہم قدم قرار دیا۔

اوکاڑہ (نامہ نگار ملک ظفر) وزیر زراعت پنجاب سید عاشق حسین کرمانی کی زیر صدارت ڈپٹی کمشنر آفس اوکاڑہ میں گندم کی کاشت کے حوالے سے جائزہ اجلاس منعقد ہوا۔ اجلاس میں کمشنر ساہیوال ڈویژن ڈاکٹر آصف طفیل، ڈپٹی کمشنر احمد عثمان جاوید، ممبر صوبائی اسمبلی میاں محمد منیر، الیگی رہنما راؤ محمد اجمل، محکمہ زراعت کے افسران اور کسانوں کے نمائندے شریک ہوئے۔

ڈائریکٹر زراعت ساہیوال محمد شہباز نے گندم کی موجودہ صورتحال اور محکمہ کی جانب سے کیے جانے والے اقدامات پر تفصیلی بریفنگ دی۔ صوبائی وزیر زراعت نے کہا کہ پنجاب میں رواں سیزن میں گندم کی کاشت کا ہدف 1 کروڑ 65 لاکھ ایکڑ مقرر کیا گیا ہے اور ساہیوال ڈویژن میں اس ہدف کو 5 دسمبر تک یقینی بنایا جائے۔ انہوں نے کہا کہ گندم ملکی فوڈ سکیورٹی کے لیے ناگزیر ہے اور بوائی کے نتائج حوصلہ افزا ہیں۔

صوبائی وزیر نے بتایا کہ محکمہ زراعت کی جانب سے 9 لاکھ روپے فی سپر سیڈر سبسڈی فراہم کی جا رہی ہے اور پہلی دفعہ ربیع سیزن میں کھادیں مقررہ نرخوں سے کم قیمت پر وافر مقدار میں دستیاب ہیں۔ انہوں نے کہا کہ وزیراعلیٰ پنجاب کی ہدایت پر سرکاری رقبوں پر 100 فیصد گندم کی کاشت کی جائے اور محکمہ زراعت کو کسانوں کے ساتھ روابط مزید مضبوط کرنے کے لیے اقدامات کیے جا چکے ہیں۔

اجلاس میں گندم کے پیداواری مقابلوں کا بھی اعلان کیا گیا۔ صوبائی سطح پر اول، دوم اور سوم انعام کے طور پر بالترتیب 85، 75 اور 60 ہارس پاور کے ٹریکٹرز دیے جائیں گے۔ ضلعی سطح پر پہلے، دوسرے اور تیسرے انعام کے طور پر بالترتیب 10 لاکھ، 8 لاکھ اور 5 لاکھ روپے نقد انعامات مقرر کیے گئے ہیں۔