Category: اوکاڑہ

اوکاڑہ (نامہ نگار ملک ظفر) صوبائی سیکرٹری سپیشل ایجوکیشن پنجاب محمد خان رانجھا نے ڈپٹی کمشنر احمد عثمان جاوید کے ہمراہ ادارہ گنج شکر اسپیشل ایجوکیشن اوکاڑہ کا دورہ کیا۔ انہوں نے ادارے کے مختلف کلاس رومز کا معائنہ کیا اور تدریسی عمل کا تفصیلی جائزہ لیا۔ اس موقع پر صوبائی سیکرٹری نے اساتذہ سے خصوصی بچوں کی تعلیمی کارکردگی، نصابی و غیر نصابی سرگرمیوں اور سہولیات سے متعلق دریافت کیا۔

محمد خان رانجھا نے خصوصی بچوں سے براہِ راست نصابی سوالات کیے اور کمپیوٹر لیب کا دورہ کر کے بچوں کی مہارت کا مشاہدہ کیا۔ وہ بچوں میں گھل مل گئے اور ان کے کھیل میں بھی شریک ہوئے۔ اس موقع پر گفتگو کرتے ہوئے انہوں نے کہا کہ وزیراعلیٰ پنجاب مریم نواز شریف خصوصی افراد کو بہترین سہولیات فراہم کرنے کی پالیسی پر عمل پیرا ہیں۔ خصوصی بچے صلاحیتوں میں کسی طور عام بچوں سے کم نہیں، انہیں خصوصی توجہ اور نگہداشت کے ذریعے معاشرے کا فعال اور کارآمد شہری بنایا جا سکتا ہے۔

انہوں نے اساتذہ پر زور دیا کہ وہ خصوصی بچوں کی تعلیم و تربیت کے ساتھ ساتھ انہیں غیر نصابی سرگرمیوں میں بھی بھرپور حصہ لینے کی ترغیب دیں تاکہ وہ اعتماد کے ساتھ آگے بڑھ سکیں۔ صوبائی سیکرٹری نے ادارہ گنج شکر اسپیشل ایجوکیشن میں فراہم کی جانے والی سہولیات اور بچوں کی کارکردگی پر اطمینان کا اظہار کیا۔

اوکاڑہ (باغی ٹی وی نامہ نگار ملک ظفر)محکمہ سکول ایجوکیشن کے زیر اہتمام ٹیچرز ڈے کے موقع پر گورنمنٹ ایم سی بوائز سکول اوکاڑہ میں ٹیچرز ایکسیلنس ایوارڈز کی پروقار تقریب کا انعقاد کیا گیا۔ تقریب میں ایڈیشنل ڈپٹی کمشنر جنرل علیزہ ریحان نے بطورِ مہمانِ خصوصی شرکت کی۔

اس موقع پر سی ای او ایجوکیشن محمد یوسف کاہلوں، مسلم لیگ (ن) کے رہنما چوہدری فیاض ظفر، محکمہ ایجوکیشن کے افسران، سکول انتظامیہ اور طلبہ کی بڑی تعداد موجود تھی۔ تقریب میں مقررین نے اساتذہ کے معاشرتی کردار، علم کی ترویج اور نوجوان نسل کی تربیت میں ان کی خدمات پر روشنی ڈالی۔

ایڈیشنل ڈپٹی کمشنر علیزہ ریحان نے خطاب کرتے ہوئے کہا کہ استاد انسان کی زندگی کا وہ چراغ ہے جو جہالت کی تاریکی کو علم کی روشنی سے منور کرتا ہے۔ استاد ہی وہ ہستی ہے جو ایک نادان بچے کو شعور، عقل، تمیز اور اخلاق کے زیور سے آراستہ کرتی ہے۔ انہوں نے کہا کہ وہ قومیں کبھی ترقی نہیں کر سکتیں جو اپنے اس محسن کا احترام نہیں کرتیں۔

انہوں نے مزید کہا کہ حکومتِ پنجاب تعلیم کے فروغ کے لیے انقلابی اقدامات کر رہی ہے تاکہ طلبہ کو جدید علوم سے روشناس کروایا جا سکے۔ اس موقع پر بہترین کارکردگی دکھانے والے اساتذہ میں سرٹیفکیٹس اور ایوارڈز تقسیم کیے گئے۔

اوکاڑہ (نامہ نگار ملک ظفر)اسسٹنٹ کمشنر اوکاڑہ چوہدری رب نواز نے سیلاب سے متاثرہ علاقوں میں جوائنٹ سروے ٹیموں کی کارکردگی کا جائزہ لیتے ہوئے ٹیموں کو تسلسل سے کام جاری رکھنے اور درست، حقائق پر مبنی ڈیٹا مرتب کرنے کی ہدایت کی۔ انہوں نے موضع جھیڈو، جندراکہ، پیر علی اور ناوتہ کھچی کا دورہ کیا، جہاں انہوں نے سروے ٹیموں کی ورکنگ اور مرتب کیے جانے والے ڈیٹا کی تفصیلی چیکنگ کی۔

اس موقع پر انہوں نے کہا کہ سیلاب متاثرین کی امداد اور بحالی کے لیے شفاف ڈیٹا کی تیاری نہایت اہم ہے، اس لیے سروے ٹیمیں باہمی کوآرڈینیشن کو برقرار رکھتے ہوئے ذمہ داری سے کام کریں اور جلد از جلد سروے مکمل کریں۔

اسسٹنٹ کمشنر نے واضح کیا کہ سروے ٹیموں کی کارکردگی کا روزانہ کی بنیاد پر جائزہ لیا جائے گا، جبکہ عدم دلچسپی یا سستی دکھانے والے اہلکاروں کے خلاف کارروائی عمل میں لائی جائے گی۔

انہوں نے کہا کہ سیلاب متاثرین کی بحالی و امداد کے عمل کو تیز اور مؤثر بنانے کے لیے تمام ٹیمیں اپنی بھرپور توانائیاں بروئے کار لائیں تاکہ متاثرہ خاندانوں کو بروقت ریلیف فراہم کیا جا سکے۔

اوکاڑہ (نامہ نگار ملک ظفر) کمشنر ساہیوال ڈاکٹر آصف طفیل کی زیر صدارت ضلع کونسل ہال میں اہم اجلاس منعقد ہوا جس میں ڈپٹی کمشنر احمد عثمان جاوید، ایڈیشنل ڈپٹی کمشنر فنانس چوہدری عبدالجبار گجر، ایڈیشنل ڈپٹی کمشنر جنرل علیزہ ریحان، سی او ایم سی عمر نسیم، سی او ضلع کونسل رانا نوید سمیت دیگر افسران نے شرکت کی۔ اجلاس میں پنجاب سٹیز پروگرام کے تحت مکمل ہونے والے 11 منصوبوں اور جاری 7 منصوبوں پر تفصیلی بریفنگ دی گئی جن میں انفراسٹرکچر، مشینری، سالڈ ویسٹ مینجمنٹ، سیوریج سسٹم، واٹر ٹریٹمنٹ پلانٹ، سولرائزیشن اور سڑکوں کی تعمیر و مرمت شامل ہیں۔

کمشنر ڈاکٹر آصف طفیل نے ترقیاتی منصوبوں کی رفتار تیز کرنے کی ہدایت دیتے ہوئے ایڈیشنل ڈپٹی کمشنر جنرل علیزہ ریحان کو مکمل منصوبوں کی چیکنگ کا ٹاسک سونپا۔ بعد ازاں کمشنر اور ڈپٹی کمشنر نے ویسٹ واٹر ٹریٹمنٹ پلانٹ کی سائٹ کا دورہ کیا اور شجرکاری مہم کے تحت پودے لگائے۔ ایم او آئی طلعت حسین اور ایم ڈی واسا نے منصوبے پر کام کی تفصیلات سے آگاہ کیا۔ کمشنر نے منصوبوں کی بروقت اور شفاف تکمیل کو یقینی بنانے کے لیے تمام وسائل بروئے کار لانے کی ہدایت کی اور کہا کہ یہ منصوبے عوامی سہولت کے آئینہ دار ہونے چاہییں۔

اوکاڑہ (نامہ نگار ملک ظفر) نیو نول پلاٹ پریس کلب اوکاڑہ کے عہدیداران و ممبران کا ماہانہ اجلاس صدر رائے گلزار حسین کی زیر صدارت منعقد ہوا۔ اجلاس میں چیئرمین الیکشن کمیٹی رائے محمد علی کھرل، سرپرست اعلیٰ بلال شعیب خان لاشاری، سرپرست حافظ عمیر شوکت سیال، چیئرمین چوہدری شہباز حسین اٹھوال، وائس چیئرمین رانا قادر عباس، جنرل سیکرٹری رائے ذوالفقار علی، جوائنٹ سیکرٹری رانا عباس علی، فنانس سیکرٹری رائے فخر حیات، انفارمیشن سیکرٹری عنصر محمود، ممبران رائے مزمل خان، رائے حسن کھرل اور محمد امتیاز بھٹی نے شرکت کی۔

اجلاس میں صحافی برادری کو درپیش مسائل، علاقائی خبروں کے معیار کو بہتر بنانے اور صحافت کے فروغ کے لیے باہمی تعاون کو مضبوط کرنے پر تفصیلی گفتگو کی گئی۔ اجلاس کے اختتام پر سرپرست اعلیٰ بلال شعیب خان لاشاری کی جانب سے عہدیداران و ممبران کے اعزاز میں پرتکلف عشائیے کا اہتمام بھی کیا گیا۔

اوکاڑہ (نامہ نگار ملک ظفر) محتسب اعلیٰ پنجاب اوکاڑہ کے دفتر کی آئی ایس او سرٹیفیکیشن کے سلسلے میں تقریب کا انعقاد کیا گیا جس میں اسسٹنٹ کمشنر چوہدری رب نواز اور ڈی ایس پی سید تقی شاہ سمیت سی ای او ایجوکیشن محمد یوسف کاہلوں، ایڈوائزر محتسب اعلیٰ شفیق احمد، ڈسٹرکٹ ایمرجنسی آفیسر چوہدری ظفر اقبال، لائزان آفیسر محمد سرفراز، میڈیا نمائندگان اور دیگر معززین شریک ہوئے۔ تقریب میں ایڈوائزر شفیق احمد نے سرٹیفیکیشن پر مبارکباد دیتے ہوئے محتسب اعلیٰ پنجاب کا پیغام پڑھ کر سنایا اور ادارے کے اغراض و مقاصد اور ورکنگ سے آگاہ کیا۔

شرکا نے اس تاریخی کامیابی پر کیک بھی کاٹا۔ اسسٹنٹ کمشنر چوہدری رب نواز نے کہا کہ آئی ایس او سرٹیفکیٹ کا حصول ادارے کی اہم کامیابی ہے، عوام کو فیملی کیسز، بناولنٹ فنڈ، پنشن اور ریونیو کیسز میں ریلیف فراہم کیا جا رہا ہے۔ ایڈوائزر شفیق احمد نے بتایا کہ شکایات کے اندراج کے لیے آن لائن کمپلینٹ مینجمنٹ سسٹم موجود ہے اور تمام متعلقہ محکموں کے روابط مثالی ہیں تاکہ عوام کے مسائل فوری طور پر حل کیے جا سکیں۔ انہوں نے کہا کہ میڈیا اور تمام اسٹیک ہولڈرز کو چاہیے کہ وہ محتسب اعلیٰ پنجاب کی ان کاوشوں کو اجاگر کریں۔

اوکاڑہ (نامہ نگار ملک ظفر) چیئرپرسن وزیراعلیٰ پنجاب انسپیکشن، سرویلنس اینڈ مانیٹرنگ ڈائریکٹوریٹ برگیڈیئر (ر) بابر علاؤالدین نے ہیڈ سلیمانکی کا دورہ کیا جہاں ایکسین ایریگیشن نے دریائے ستلج میں حالیہ سیلابی صورتحال اور محکمے کے اقدامات بارے تفصیلی بریفنگ دی۔

چیئرپرسن نے سیلاب متاثرہ علاقوں کے سروے کا جائزہ لیا اور متاثرین کو حکومت پنجاب کی جانب سے ہر ممکن ریلیف فراہم کرنے کی یقین دہانی کرائی۔ انہوں نے ایریگیشن افسران کو ہدایت دی کہ سیلابی علاقوں کی انسپکشن کریں اور حفاظتی پشتوں و سڑکوں کے نقصانات کا تفصیلی معائنہ کیا جائے۔

برگیڈیئر (ر) بابر علاؤالدین نے جوائنٹ سروے ٹیموں کو ہدایت کی کہ نقصانات کے حقائق پر مبنی شفاف رپورٹس تیار کی جائیں تاکہ متاثرہ خاندانوں کو بروقت ریلیف پیکج فراہم کیا جا سکے۔ انہوں نے کہا کہ وزیراعلیٰ پنجاب مریم نواز شریف کی ہدایات کے مطابق سیلاب متاثرین کی بحالی کے لیے ہنگامی بنیادوں پر اقدامات جاری ہیں۔

محکمہ مال، اربن یونٹ، زراعت، نمبردار اور پاک فوج کے جوان مشترکہ کوآرڈینیشن کے ساتھ نقصانات کے سروے میں حصہ لیں تاکہ گھروں، زرعی رقبے اور دیگر متاثرہ اثاثوں کا درست ڈیٹا مرتب ہو سکے۔

اوکاڑہ (نامہ نگار ملک ظفر) اسسٹنٹ کمشنر چوہدری رب نواز کی زیر نگرانی سیلاب متاثرہ علاقوں میں نقصانات کا تخمینہ لگانے کے لیے سروے کا عمل تیزی سے جاری ہے۔ محکمہ ریونیو، اربن یونٹ اور محکمہ زراعت کے اہلکاروں پر مشتمل ٹیمیں متاثرہ موضع جات میں جا کر فیلڈ ورک کر رہی ہیں تاکہ سیلاب سے ہونے والے جانی و مالی نقصانات کا درست ریکارڈ مرتب کیا جا سکے۔

اسسٹنٹ کمشنر چوہدری رب نواز نے موضع جندراکہ کے مختلف دیہات کا دورہ کیا اور موقع پر ٹیموں کی ورکنگ کا جائزہ لیا۔ انہوں نے سروے کے عمل کی نگرانی کرتے ہوئے اہلکاروں کو ہدایت کی کہ ریونیو ریکارڈ کے مطابق درست اور مستند ڈیٹا تیار کیا جائے اور یہ امر یقینی بنایا جائے کہ تیار ہونے والا ڈیٹا ہر قسم کی غلطیوں سے پاک ہو۔

چوہدری رب نواز نے مزید کہا کہ سیلاب متاثرین کے حوالے سے سروے میں میرٹ اور شفافیت کو ہر حال میں ملحوظ خاطر رکھا جائے تاکہ متاثرہ خاندانوں کو ریلیف کی فراہمی میں کسی قسم کی کوتاہی یا ناانصافی نہ ہو۔