Category: اوکاڑہ

اوکاڑہ (نامہ نگار ملک ظفر) جناح اسٹیڈیم اوکاڑہ میں پنجاب کبڈی چیمپئن شپ 2025 کے شاندار مقابلوں کا انعقاد کیا گیا، جس میں پنجاب بھر کی ڈویژنز سے نامور کبڈی ٹیموں نے حصہ لیا۔ مقابلوں میں شائقین کبڈی کی بڑی تعداد اسٹیڈیم میں موجود رہی اور کھلاڑیوں کے فن کو خوب سراہا۔

اختتامی مرحلے میں ساہیوال اور فیصل آباد کی ٹیموں کے درمیان کانٹے دار فائنل میچ ہوا جس میں ساہیوال نے 57 پوائنٹس کے مجموعی سکور سے فتح حاصل کر کے ٹورنامنٹ اپنے نام کر لیا۔

ٹورنامنٹ میں بطور مہمان خصوصی رکن قومی اسمبلی چوہدری ریاض الحق جج اور ایم پی اے و صدر پنجاب کبڈی ایسوسی ایشن چوہدری افتخار حسین چھچھر نے شرکت کی، جبکہ ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر، ڈی پی او راشد ہدایت اور اسسٹنٹ کمشنر چوہدری رب نواز بھی بطور مہمان اعزاز موجود تھے۔

اختتامی تقریب میں مہمانوں نے جیتنے والی اور رنر اپ ٹیموں میں ٹرافیاں اور انعامات تقسیم کیے۔ اس موقع پر رکن قومی اسمبلی چوہدری ریاض الحق جج نے کہا کہ وزیراعلیٰ پنجاب مریم نواز شریف کی قیادت میں کھیلوں کے فروغ کے لیے انقلابی اقدامات کیے جا رہے ہیں اور کبڈی جیسے روایتی کھیل ہماری ثقافت کا اہم حصہ ہیں۔

ایم پی اے و صدر کبڈی ایسوسی ایشن پنجاب چوہدری افتخار حسین چھچھر نے کہا کہ کبڈی ایسوسی ایشن کھیل کی ترقی و ترویج کے لیے پرعزم ہے اور بہترین کھلاڑیوں کو نیشنل اور انٹرنیشنل سطح پر مواقع فراہم کیے جائیں گے۔

اوکاڑہ (ڈسٹرکٹ رپورٹر ملک ظفر) سب ڈویژنل انفورسمنٹ آفیسر وسیم جاوید تجاوزات کے خاتمے اور عوامی سہولت کے لیے فیلڈ میں سرگرم عمل ہیں۔ انہوں نے گول چوک سے ملحقہ بازاروں کا دورہ کیا اور جمعہ بازار کے ذریعے عارضی تجاوزات کرنے والوں کے خلاف کارروائی کرتے ہوئے راستے کلیئر کروا دیے۔

اس موقع پر سب ڈویژنل انفورسمنٹ آفیسر وسیم جاوید نے کہا کہ حکومت پنجاب کی ہدایات کے مطابق انسداد تجاوزات مہم بھرپور انداز میں جاری ہے۔ ایک طرف مستقل تجاوزات کے خلاف سخت اقدامات اٹھائے جا رہے ہیں تو دوسری جانب عارضی تجاوزات کرنے والوں کی بھی حوصلہ شکنی کی جا رہی ہے تاکہ عوام کو صاف ستھرے اور کشادہ بازار میسر آ سکیں۔

انہوں نے کہا کہ بازاروں میں کاروبار کرنے والے افراد تجاوزات سے گریز کریں بصورت دیگر انہیں پیرا فورس کی کارروائی کا سامنا کرنا پڑے گا۔

اوکاڑہ (نامہ نگار ملک ظفر) ڈپٹی کمشنر احمد عثمان جاوید کی زیر صدارت ضلعی انتظامیہ کا اجلاس منعقد ہوا جس میں ایڈیشنل ڈپٹی کمشنر ریونیو محمد شعجین وسطرو، ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر، ایڈیشنل ڈپٹی کمشنر جنرل علیزہ ریحان، اسسٹنٹ کمشنر اوکاڑہ چوہدری رب نواز، ایچ ڈی ای او پیرا وسیم جاوید، ڈپٹی ڈائریکٹر ڈویلپمنٹ مرغوب حسین ڈوگر اور سسٹم نیٹ ورک ایڈمنسٹریٹر افضال حسین بلوچ نے شرکت کی۔

اجلاس میں ڈپٹی کمشنر کو مفاد عامہ کے اقدامات کے حوالے سے تفصیلی بریفنگ دی گئی۔ اس موقع پر انہوں نے ہدایت کی کہ سرکاری دکانوں کے کرایوں کی وصولی میں کسی قسم کی رعایت نہ برتی جائے اور واجبات کی وصولی یقینی بنائی جائے۔

ڈپٹی کمشنر نے مزید کہا کہ سیلاب متاثرین کے نقصانات کے تخمینے کے کام میں کسی قسم کی سستی برداشت نہیں کی جائے گی، ذمہ داران کے خلاف سخت کارروائی عمل میں لائی جائے گی۔ انہوں نے ترقیاتی منصوبوں کی رفتار مزید تیز کرنے کی ہدایت دیتے ہوئے کہا کہ عوامی خدمت ضلعی انتظامیہ کی اولین ترجیح ہے، اس مقصد کے تحت تمام افسران فیلڈ میں متحرک اور فعال کردار ادا کریں۔

اوکاڑہ (نامہ نگار ملک ظفر) فارن اسٹڈی کنسلٹنٹس ایسوسی ایشن (ایف ایس سی پاکستان) کے وفد نے چیئرمین راؤ شہزاد کی سربراہی میں گورنر پنجاب سردار سلیم حیدر خان سے گورنر ہاؤس لاہور میں ملاقات کی۔ ملاقات میں بیرونِ ممالک اعلیٰ تعلیم کے لیے جانے والے طلبہ کو درپیش مسائل اور ان کے حل پر تفصیلی تبادلۂ خیال کیا گیا۔

وفد نے تجویز دی کہ ایئرپورٹس پر ایسے طلبہ کی سہولت کے لیے خصوصی کاؤنٹر قائم کیے جائیں تاکہ کلیرنس اور دیگر مسائل کا بروقت سدباب کیا جا سکے۔ اس موقع پر میڈیا سے گفتگو کرتے ہوئے چیئرمین راؤ شہزاد نے کہا کہ ایسوسی ایشن اپنی صفوں میں احتساب کی مکمل صلاحیت رکھتی ہے اور کسی بھی غیر قانونی سرگرمی کی مذمت اور روک تھام کی جائے گی۔

انہوں نے مزید کہا کہ ایسے بدعنوان عناصر جو ملک و قوم کی بدنامی کا باعث بنتے ہیں، انہیں قانون کے کٹہرے میں لانا ناگزیر ہے۔ چیئرمین نے واضح کیا کہ فارن اسٹڈی کنسلٹنٹس ایسوسی ایشن (ایف ایس سی پاکستان) ہر قدم پر اداروں کے ساتھ کھڑی ہے۔

اوکاڑہ(نامہ نگارملک ظفر) ایڈیشنل ڈپٹی کمشنر (ریونیو) محمد شجین وسطرو کی زیر صدارت ڈسٹرکٹ اوورسیز کمیٹی کا ایک اہم اجلاس منعقد ہوا، جس میں سمندر پار پاکستانیوں کو درپیش مسائل کے حل کا جائزہ لیا گیا۔ اجلاس میں تمام متعلقہ محکموں کے افسران بھی شریک تھے۔

اجلاس کے دوران اوورسیز پاکستانیوں کی جانب سے پیش کیے گئے مختلف کیسز پر تفصیلی تبادلہ خیال کیا گیا۔ ایڈیشنل ڈپٹی کمشنر نے تمام کیسز کو فوری طور پر حل کرنے کے احکامات جاری کیے۔ انہوں نے اس موقع پر کہا کہ سمندر پار پاکستانی ہمارے لیے ایک قیمتی اثاثہ ہیں، اور ان کے جان و مال اور جائیدادوں کے تحفظ کو یقینی بنانا ہماری اولین ترجیح ہے۔

محمد شجین وسطرو نے وزیراعلیٰ پنجاب مریم نواز شریف کے خصوصی احکامات کا حوالہ دیتے ہوئے کہا کہ اوورسیز پاکستانیوں کو سہولیات فراہم کرنے کے لیے ہر ممکن کوشش کی جا رہی ہے۔ انہوں نے تمام متعلقہ افسران کو ہدایت کی کہ وہ ذاتی دلچسپی لیتے ہوئے اوورسیز کے مسائل کو ترجیحی بنیادوں پر حل کریں اور جائیدادوں کے تنازعات کو قانون کے مطابق میرٹ پر اور بروقت نمٹائیں۔

انہوں نے واضح کیا کہ سمندر پار پاکستانیوں کو کسی بھی قسم کی مشکلات کا سامنا نہیں ہونا چاہیے، اور انتظامیہ ان کے حقوق کے تحفظ کے لیے مکمل طور پر پرعزم ہے۔