Category: اوکاڑہ

اوکاڑہ (باغی ٹی وی/نامہ نگار ملک ظفر)چیف ایگزیکٹو آفیسر ایجوکیشن اوکاڑہ محمد یوسف کاہلوں نے ضلع کے مختلف سرکاری سکولوں کا دورہ کیا اور تدریسی عمل سمیت تعلیمی و انتظامی امور کا تفصیلی جائزہ لیا۔ سی ای او ایجوکیشن نے گورنمنٹ ہائی سکول رضا آباد، گورنمنٹ ہائی سکول 12 جی ڈی اور گورنمنٹ گرلز پرائمری سکول کندووال سرائے مرکز فرید کوٹ کا معائنہ کیا۔

دورے کے دوران محمد یوسف کاہلوں نے اساتذہ کی حاضری، تدریسی معیار، سکول بیوٹیفکیشن، صفائی ستھرائی اور مجموعی نظم و ضبط کا جائزہ لیا۔ انہوں نے کلاس رومز میں جا کر طلبہ سے نصابی سوال و جواب کیے اور اساتذہ کی کارکردگی، نصابی سرگرمیوں اور ڈسپلن پر خصوصی توجہ دینے کی ہدایت کی۔

سی ای او ایجوکیشن نے سکولوں میں صفائی کے انتظامات، پینے کے صاف پانی، فرنیچر، بجلی، پنکھوں اور واش رومز کی دستیاب سہولیات کا بھی معائنہ کیا اور جہاں بہتری کی ضرورت تھی وہاں فوری اقدامات کی ہدایات جاری کیں۔

اس موقع پر محمد یوسف کاہلوں نے کہا کہ طلبہ ہمارا روشن مستقبل ہیں، انہیں چاہیے کہ محنت اور لگن سے تعلیم حاصل کر کے اپنا مستقبل سنواریں اور ملکی ترقی میں مثبت کردار ادا کریں۔ انہوں نے اساتذہ پر زور دیا کہ وہ طلبہ کی تعلیم و تربیت کیلئے بھرپور محنت کریں اور انہیں زیورِ تعلیم سے آراستہ کرنے میں اپنی تمام تر صلاحیتیں بروئے کار لائیں۔

انہوں نے مزید کہا کہ ایک پڑھے لکھے معاشرے سے ہی باوقار قوم کی تشکیل ممکن ہے، اسی مقصد کے حصول کیلئے حکومتی ہدایات کے مطابق سرکاری تعلیمی اداروں میں معیاری تعلیمی سہولیات کے فروغ کیلئے بھرپور محنت کی جا رہی ہے۔

اوکاڑہ (نامہ نگار ملک ظفر) چیف منسٹر ڈائیلسز پروگرام کے تحت ٹی ایچ کیو ہسپتال رینالہ خورد میں جدید ڈائیلسز سنٹر کا افتتاح کر دیا گیا۔ اس موقع پر صوبائی وزیر صحت و بہبود آبادی خواجہ عمران نذیر نے نئے وارڈ کا افتتاح کیا اور مریضوں سے سہولیات کے بارے میں دریافت کیا۔

افتتاحی تقریب میں ممبر قومی اسمبلی ندیم عباس ربیرہ، ایم پی اے چوہدری جاوید علاؤالدین، ڈپٹی کمشنر احمد عثمان جاوید، اسسٹنٹ کمشنر انعم علی خان، سی ای او ہیلتھ ڈاکٹر فواد افتخار، ہسپتال انتظامیہ اور میڈیا نمائندگان بھی موجود تھے۔

صوبائی وزیر نے ڈائیلسز وارڈ کی بروقت تکمیل پر ڈپٹی کمشنر اور ایم ایس کی کاوشوں کو سراہا اور ہسپتال انتظامیہ کو مریضوں کو بہترین سہولیات فراہم کرنے کی ہدایات دیں۔ انہوں نے کہا کہ اگلے مرحلے میں دس مزید ڈائیلسز مشینیں ہسپتال کو فراہم کی جائیں گی، جس سے مریضوں کو اپنے ہی شہر میں معیاری علاج کی سہولت میسر ہوگی۔

خواجہ عمران نذیر نے مزید کہا کہ پنجاب بھر میں جلد ہزاروں نئے ڈاکٹرز، کنسلٹنٹ اور سپیشلسٹ بھرتی کیے جائیں گے، اور ڈاکٹروں کی کارکردگی کے لیے کے پی آئیز بنائے جائیں گے۔ ہسپتالوں میں ایل پی کے ذریعے مریضوں کو تمام ضروری ادویات مفت فراہم کی جائیں گی۔ انہوں نے یقین دلایا کہ چھوٹے شہروں میں جدید طبی سہولیات کے ذریعے بھی مریضوں کا مکمل علاج ممکن ہوگا، اور وزیراعلیٰ پنجاب کے روڈ میپ پر عملدرآمد سے ہسپتالوں میں نمایاں بہتری آئے گی۔

اوکاڑہ (نامہ نگارملک ظفر) وزیراعلیٰ پنجاب کے "ستھرا پنجاب” ویژن کے ثمرات تحصیل اوکاڑہ میں نمایاں طور پر نظر آنے لگے ہیں جہاں ڈپٹی کمشنر احمد عثمان جاوید کی خصوصی ہدایات پر صفائی ستھرائی کے نظام کو مثالی بنانے کے لیے انتظامیہ ہائی الرٹ ہے۔ شہر کا نقشہ بدلنے کے لیے جاری اس زیرو ویسٹ آپریشن کی قیادت ڈائریکٹر ملک زین اشفاق، مینجنگ ڈائریکٹر محمد حسن اور ڈسٹرکٹ مینیجر راؤ فیصل جبار کر رہے ہیں، جن کی زیرِ نگرانی تمام دستیاب وسائل کو بروئے کار لایا جا رہا ہے۔ فیلڈ میں اسسٹنٹ کمشنر احمد شیر گوندل، پروجیکٹ مینیجر وسیم اشرف اور تحصیل مینیجر نعمان راشد خود صفائی کے کاموں کی نگرانی کر رہے ہیں تاکہ شہر کے چوک چوراہوں اور گلی محلوں کو کوڑا کرکٹ سے پاک کیا جا سکے۔

اس خصوصی مہم کے دوران سینٹری ورکرز کی بھاری نفری نہ صرف کوڑے کے پرانے ڈھیروں کا خاتمہ کر رہی ہے بلکہ نکاسی آب کے نظام کو بہتر بنانے کے لیے نالیوں کی بھل صفائی بھی ہنگامی بنیادوں پر یقینی بنائی جا رہی ہے۔ انتظامی حکام نے دوٹوک موقف اختیار کیا ہے کہ فرائض میں غفلت برتنے والے اہلکاروں کے لیے محکمے میں کوئی جگہ نہیں، جبکہ محنتی ورکرز کی بھرپور حوصلہ افزائی کی جائے گی۔ شہریوں نے انتظامیہ کے ان اقدامات کو سراہتے ہوئے امید ظاہر کی ہے کہ اس مہم کے تسلسل کو برقرار رکھا جائے گا تاکہ اوکاڑہ پنجاب کا صاف ستھرا ترین شہر بن کر ابھر سکے۔ انتظامیہ کا کہنا ہے کہ عوامی تعاون اور ٹیم ورک کے ذریعے ہی شہر کو مستقل بنیادوں پر صاف رکھا جا سکتا ہے۔

اوکاڑہ (نامہ نگار ملک ظفر) ڈی پی او راشد ہدایت کی خصوصی ہدایت پر منشیات ایکٹ 1997 اور ترمیمی ایکٹ 2022 کے تحت درج مقدمات کی تفتیش کا معیار بہتر بنانے کے لیے کمیونٹی لائزون ہال میں ایک روزہ تربیتی ورکشاپ منعقد کی گئی۔ اس ورکشاپ میں ضلع بھر کے تمام انچارج انویسٹی گیشن اور محرران نے شرکت کی، جس کا بنیادی مقصد منشیات فروشوں کے خلاف قانونی گھیرا تنگ کرنا اور مضبوط تفتیش کے ذریعے انہیں عدالتوں سے کڑی سزائیں دلوانا ہے۔ تربیتی سیشن کے دوران ڈپٹی ڈسٹرکٹ پبلک پراسیکیوٹر زاہد الحسن ناصر، ڈی ایس پی لیگل کلیم اللہ اور سب انسپکٹر محمد اکرم نے شرکاء کو منشیات قوانین، تفتیشی طریقہ کار میں جدت اور مقدمات کی مؤثر مسل رائیٹنگ کے حوالے سے تفصیلی لیکچرز دیے۔

ڈی ایس پی لیگل کلیم اللہ نے شرکاء سے خطاب کرتے ہوئے کہا کہ اس ورکشاپ کا مقصد پولیس افسران کی استعداد کار میں بہتری لانا ہے تاکہ منشیات کے خلاف کی جانے والی کارروائیوں کو قانونی تقاضوں کے مطابق منطقی انجام تک پہنچایا جا سکے۔ انہوں نے اس بات پر زور دیا کہ تفتیش کے دوران معمولی سی کوتاہی بھی ملزم کو فائدہ پہنچا سکتی ہے، اس لیے تمام تفتیشی افسران جدید خطوط پر تفتیش مکمل کریں تاکہ معاشرے کو ناسور کی طرح چاٹنے والے منشیات فروش کسی بھی رعایت کے مستحق نہ رہ سکیں۔ پولیس حکام کا کہنا تھا کہ ایسی ورکشاپس کے انعقاد سے نہ صرف تفتیش کا معیار بلند ہوگا بلکہ ضلع بھر میں منشیات کے خاتمے کے لیے جاری مہم کو بھی مزید تقویت ملے گی۔

اوکاڑہ (نامہ نگارملک ظفر) اسسٹنٹ کمشنر کوآرڈینیشن نور محمد کی زیر صدارت ڈسٹرکٹ اوورسیز کمیٹی کا اہم جائزہ اجلاس منعقد ہوا، جس میں دیارِ غیر میں مقیم پاکستانیوں کو درپیش مسائل، خصوصاً جائیدادوں کے تنازعات کے حل کے لیے کیسز کا تفصیلی جائزہ لیا گیا۔ اجلاس میں تمام متعلقہ محکموں کے افسران نے شرکت کی، جہاں اسسٹنٹ کمشنر نے مختلف شکایات پر سماعت کرتے ہوئے متعلقہ حکام کو احکامات جاری کیے کہ ان کیسز کو جلد از جلد منطقی انجام تک پہنچایا جائے۔ اس موقع پر ان کا کہنا تھا کہ وزیراعلیٰ پنجاب مریم نواز شریف کی واضح ہدایات ہیں کہ اوورسیز پاکستانیوں کے مسائل ترجیحی بنیادوں پر حل کیے جائیں، کیونکہ وہ ملک کا قیمتی اثاثہ ہیں۔

اسسٹنٹ کمشنر نور محمد نے افسران کو تاکید کی کہ اوورسیز پاکستانیوں کے جان و مال اور جائیدادوں کے تحفظ کے لیے تمام ممکنہ وسائل بروئے کار لائے جائیں۔ انہوں نے ہدایت کی کہ تمام محکمے جائیداد کے تنازعات کے حوالے سے تواتر کے ساتھ پیروی کریں اور اپنی پیش رفت رپورٹس باقاعدگی سے کمیٹی کو پیش کریں تاکہ متاثرہ افراد کو فوری ریلیف فراہم کیا جا سکے۔ انہوں نے مزید کہا کہ بیرونِ ملک مقیم شہریوں کی شکایات کے ازالے میں کسی قسم کی سستی برداشت نہیں کی جائے گی اور انتظامیہ ان کے حقوق کے تحفظ کے لیے ہر وقت کوشاں ہے۔

درینالہ خورد (نامہ نگار) یونیورسٹی آف اوکاڑہ کے زیرِ اہتمام تیسرے سالانہ کانووکیشن کی پروقار تقریب منعقد ہوئی، جس میں مجموعی طور پر 4 ہزار 924 فارغ التحصیل طلبہ میں اسناد تقسیم کی گئیں۔ تقریب کی صدارت صوبائی وزیر برائے اعلیٰ تعلیم رانا سکندر حیات نے کی، جبکہ وائس چانسلر پروفیسر ڈاکٹر سجاد مبین، پرو وائس چانسلر ڈاکٹر محمد واجد، رجسٹرار جمیل عاصم اور کنٹرولر امتحانات ڈاکٹر فہیم ارشد بھی اسٹیج پر موجود تھے۔ کانووکیشن کے دوران مختلف شعبہ جات میں نمایاں کارکردگی دکھانے والے 72 پوزیشن ہولڈرز کو گولڈ میڈلز سے نوازا گیا، جبکہ گزشتہ ایک برس کے دوران اپنی تحقیق مکمل کرنے والے 18 پی ایچ ڈی اسکالرز نے بھی اپنی ڈگریاں وصول کیں۔

تقریب کے مہمانِ خصوصی صوبائی وزیر رانا سکندر حیات نے اپنے خطاب میں وائس چانسلر پروفیسر ڈاکٹر سجاد مبین کی متحرک قیادت کو سراہتے ہوئے کہا کہ یونیورسٹی آف اوکاڑہ نے تعلیمی معیار اور بنیادی ڈھانچے کی ترقی میں مختصر عرصے میں نمایاں کامیابیاں حاصل کی ہیں۔ انہوں نے یونیورسٹی کی قومی اور بین الاقوامی درجہ بندی میں بہتری پر اطمینان کا اظہار کرتے ہوئے امید ظاہر کی کہ یہ ادارہ جلد ہی ملک کی صفِ اول کی جامعات میں شامل ہو جائے گا۔ اس موقع پر انہوں نے فارغ التحصیل طلبہ کو مبارکباد دیتے ہوئے کہا کہ نوجوان محنت اور لگن کو اپنا شعار بنائیں اور ملک کی ترقی میں اپنا مثبت کردار ادا کریں۔ صوبائی وزیر نے یونیورسٹی میں مصنوعی ذہانت (Artificial Intelligence) کے مرکزِ امتیاز (Center of Excellence) کے قیام کا بھی اعلان کیا۔

وائس چانسلر پروفیسر ڈاکٹر سجاد مبین نے تقریب میں شرکت پر صوبائی وزیر کا شکریہ ادا کیا اور یونیورسٹی کے جاری ترقیاتی منصوبوں اور تعلیمی اصلاحات پر تفصیلی روشنی ڈالی۔ انہوں نے فارغ التحصیل طلبہ کو نصیحت کی کہ عملی زندگی کے چیلنجز کا مقابلہ کرنے کے لیے خود اعتمادی اور جدت پسندی ضروری ہے۔ انہوں نے زور دیا کہ طلبہ دیانت داری سے محنت کریں اور بڑے خواب دیکھیں تاکہ وہ معاشرے کے لیے ایک کارآمد شہری ثابت ہو سکیں۔ تقریب کے اختتام پر معزز مہمانوں نے کامیاب طلبہ میں شیلڈز اور اسناد تقسیم کیں، جبکہ اساتذہ اور والدین نے طلبہ کی اس اہم کامیابی پر خوشی کا اظہار کیا۔

اوکاڑہ (نامہ نگار ملک ظفر)ڈپٹی کمشنر احمد عثمان جاوید کی زیر صدارت انسداد پولیو مہم کے اجلاس میں 2 فروری سے شروع ہونے والی مہم کے لیے 100 فیصد اہداف مکمل کرنے کی ہدایات جاری کی گئیں۔ اجلاس میں محکمہ صحت، ایجوکیشن، ڈبلیو ایچ او کے نمائندوں اور دیگر متعلقہ اداروں کے افسران نے شرکت کی، جبکہ چیف ایگزیکٹو آفیسر ڈسٹرکٹ ہیلتھ اتھارٹی ڈاکٹر فواد افتخار نے مہم کے مائیکرو پلان، ٹیموں کی تشکیل، لاجسٹک سپورٹ اور سیکیورٹی پر تفصیلی بریفنگ دی۔

ڈپٹی کمشنر نے کہا کہ صحت مند معاشرے کے لیے پولیو کا خاتمہ ناگزیر ہے اور ضلع کو پولیو فری بنانے کے لیے تشکیل دی گئی ٹیمیں اپنی ذمہ داریاں پوری کرنے کے لیے مکمل تیاریاں کریں۔ انہوں نے ہدایت کی کہ مہم کے دوران کوئی بھی بچہ قطرے پینے سے محروم نہ رہے اور دور دراز علاقوں و خانہ بدوش بستیوں پر خصوصی توجہ دی جائے۔ پولیس حکام کو ہدایت کی گئی کہ پولیو ٹیموں کی حفاظت کے لیے فول پروف سیکیورٹی پلان ترتیب دیا جائے اور حساس علاقوں میں اضافی نفری تعینات کی جائے۔

ڈپٹی کمشنر نے مزید کہا کہ مہم کی شفافیت کو یقینی بنانے کے لیے تھرڈ پارٹی مانیٹرنگ کی جائے گی اور روزانہ شام کو جائزہ اجلاس منعقد کر کے ٹیموں کی کارکردگی کا موازنہ کیا جائے گا تاکہ ہر علاقے میں مکمل ریلیف اور مؤثر حکمت عملی کو یقینی بنایا جا سکے۔

اوکاڑہ (نامہ نگار ملک ظفر) گورنمنٹ ایم سی بوائز ہائی سکول میں سیکیورٹی اور سول ڈیفنس کے حوالے سے ایک جامع فرضی مشق کا انعقاد کیا گیا جس کا مقصد طلبہ اور اساتذہ کو کسی بھی ناگہانی صورتحال سے نمٹنے کے لیے تیار کرنا تھا۔ اس اہم تربیتی پروگرام میں محکمہ سول ڈیفنس، مقامی پولیس، ٹریفک پولیس اور دیگر متعلقہ اداروں کے اہلکاروں نے بھرپور شرکت کی۔ مشقوں کے دوران ماہرین نے طلبہ کو عملی طور پر یہ سکھایا کہ کسی بھی ہنگامی صورتحال کے دوران بروقت رسپانس کیسے دیا جاتا ہے تاکہ جانی و مالی نقصان کو کم سے کم رکھا جا سکے۔ ان فرضی مشقوں کا بنیادی مقصد تعلیمی اداروں میں تحفظ کے احساس کو اجاگر کرنا اور طلبہ میں درست ردعمل کی صلاحیت پیدا کرنا تھا۔

مشق کے دوران مختلف ممکنہ خطرات بشمول سیکیورٹی تھریٹ، دہشت گردی کی کوشش اور اچانک آگ لگنے جیسے واقعات کا فرضی منظر نامہ تیار کیا گیا تھا۔ سیکیورٹی اداروں کے اہلکاروں نے طلبہ کو عمارت سے محفوظ طریقے سے نکلنے (ایویکویشن)، کسی زخمی کو ابتدائی طبی امداد فراہم کرنے اور آگ بجھانے والے آلات کے درست استعمال کے بارے میں تفصیلی آگہی فراہم کی۔ ماہرین نے زور دیا کہ ایسی صورتحال میں سب سے اہم چیز گھبراہٹ پر قابو پانا ہے، کیونکہ خوفزدہ ہونے کے بجائے نظم و ضبط اور طے شدہ احتیاطی تدابیر پر عمل کر کے ہی قیمتی جانیں بچائی جا سکتی ہیں۔

اس موقع پر سول ڈیفنس آفیسر جاوید اختر کھچی نے شرکاء سے خطاب کرتے ہوئے کہا کہ آج کے دور میں ہر شہری بالخصوص طلبہ کے لیے سول ڈیفنس کی بنیادی تربیت حاصل کرنا ناگزیر ہو چکا ہے۔ انہوں نے کہا کہ ایسی مشقوں سے نہ صرف طلبہ کے اعتماد میں اضافہ ہوتا ہے بلکہ وہ نامساعد حالات میں بھی اپنے اعصاب پر قابو رکھتے ہوئے صورتحال کا مقابلہ کرنے کے قابل بنتے ہیں۔ انہوں نے اس عزم کا اظہار کیا کہ اس طرح کے تربیتی سیشنز دیگر تعلیمی اداروں میں بھی منعقد کیے جائیں گے تاکہ معاشرے کے ہر طبقے کو حفاظتی اقدامات سے روشناس کرایا جا سکے۔