Category: اوکاڑہ

اوکاڑہ (نامہ نگار ملک ظفر)ڈپٹی کمشنر اوکاڑہ احمد عثمان جاوید کی زیر صدارت ضلعی افسران کا ایک اہم اجلاس منعقد ہوا۔ اجلاس میں ایڈیشنل ڈپٹی کمشنر ریونیو محمد شعجین وسترو، ایڈیشنل ڈپٹی کمشنر جنرل حافظ محمد عمر طیب، ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر، اسسٹنٹ کمشنر چوہدری رب نواز، ایس ڈی ای او پیرا وسیم جاوید، ڈپٹی ڈائریکٹر ڈویلپمنٹ مرغوب حسین ڈوگر اور پرائس کنٹرول مجسٹریٹس سمیت دیگر متعلقہ افسران نے شرکت کی۔

اجلاس کے دوران ڈپٹی کمشنر احمد عثمان جاوید نے عوامی مفاد عامہ کے مختلف اقدامات پر تفصیلی بریفنگ دی اور ان کی مؤثر انجام دہی کے لیے احکامات جاری کیے۔ ان اقدامات میں "ستھرا پنجاب مہم”، آوارہ کتوں کی تلفی، تجاوزات کے خلاف آپریشن، بازاروں کی خوبصورتی اور پرائس کنٹرول کارروائیاں شامل تھیں۔

ڈپٹی کمشنر نے زور دیا کہ عوام الناس کو صاف ستھرا ماحول فراہم کرنے کے لیے مؤثر انداز میں مانیٹرنگ کی جائے اور آوارہ کتوں کی تلفی کو یقینی بنایا جائے۔ انہوں نے مزید ہدایت کی کہ انسداد تجاوزات مہم کے تحت جنرل بس اسٹینڈ میں آپریشن کیا جائے۔

اوکاڑہ (نامہ نگار ملک ظفر)چیئرپرسن وزیراعلیٰ پنجاب ڈائریکٹوریٹ آف انسپکشن و مانیٹرنگ بریگیڈیئر (ر) بابر علاؤالدین نے ادارہ تحقیقات افزائش حیوانات بہادر نگر کا دورہ کیا اور مویشیوں کی افزائش نسل کے حوالے سے جاری منصوبہ جات و سہولیات کا جائزہ لیا۔ اس موقع پر اسسٹنٹ کمشنر چوہدری رب نواز، ڈائریکٹر لائیو اسٹاک ڈاکٹر مقصود اختر، میجر نوید اسلم اور اسٹاف آفیسر عبدالجبار بھٹی سمیت دیگر افسران بھی ان کے ہمراہ تھے۔

دورے کے دوران ڈائریکٹر لائیو اسٹاک نے ادارے میں جاری تحقیقی سرگرمیوں، جانوروں کی افزائش نسل کے جدید سائنسی طریقہ کار، ادویات، بہتر چارہ (فوڈر)، اور گوشت و دودھ کی پیداوار بڑھانے سے متعلق فراہم کی جانے والی سہولیات پر تفصیلی بریفنگ دی۔

بریگیڈیئر (ر) بابر علاؤالدین نے گفتگو کرتے ہوئے کہا کہ وزیراعلیٰ پنجاب مریم نواز شریف صوبے میں لائیو اسٹاک سیکٹر کی ترقی کے لیے انقلابی اور مثالی اقدامات کر رہی ہیں، جن کے ثمرات نچلی سطح تک پہنچائے جا رہے ہیں۔ انہوں نے کہا کہ ادارہ افزائش حیوانات بہادر نگر جدید تحقیق، اختراعات اور فیلڈ لیول پر اطلاق کے حوالے سے اہم کردار ادا کر رہا ہے۔

چیئرپرسن نے ہدایت کی کہ تحقیقاتی عمل، آپریشنل کارکردگی، اور وسائل کے شفاف استعمال کو جاری رکھتے ہوئے ادارے کو جدید خطوط پر استوار کیا جائے تاکہ مویشی پال کسان براہِ راست مستفید ہو سکیں۔

اوکاڑہ (نامہ نگار ملک ظفر) حکومت پنجاب کی ہدایات پر عمل درآمد کرتے ہوئے ڈپٹی کمشنر احمد عثمان جاوید نے شہر کے مختلف علاقوں کا دورہ کیا۔ ان کے ہمراہ اسسٹنٹ کمشنر چوہدری رب نواز، سیکرٹری ڈی آر ٹی اے آصف یاسین اور سب ڈویژنل انفورسمنٹ آفیسر وسیم جاوید بھی موجود تھے۔

ڈپٹی کمشنر نے جنرل بس سٹینڈ پر مسافروں کو درپیش سہولیات کا جائزہ لیا اور فوری بہتری کے احکامات جاری کیے۔ انہوں نے نئے شیڈز، ویٹنگ رومز اور پینے کے صاف پانی کے انتظامات کی ہدایت دی تاکہ عوام کو بہتر سفری سہولیات فراہم کی جا سکیں۔

فیصل آباد روڈ پر صفائی ستھرائی کے ناقص انتظامات اور سڑک کے اطراف کھڑے پانی کی شکایت پر ڈپٹی کمشنر نے نکاسی آب کے موثر انتظامات کرنے کی ہدایات دیں۔ انہوں نے میونسپل کمیٹی حکام کو ان امور کی براہِ راست نگرانی کا حکم بھی دیا۔

دورے کے دوران صدر بازار اور گول چوک میں انسداد تجاوزات آپریشن کی بھی نگرانی کی گئی، جہاں عارضی تجاوزات کرنے والے دکانداروں کا سامان قبضہ میں لے لیا گیا۔

ڈپٹی کمشنر احمد عثمان جاوید نے واضح کیا کہ عوامی سہولت کے پیش نظر انسداد تجاوزات مہم کو منطقی انجام تک پہنچایا جائے گا اور حکومتی ہدایات کی خلاف ورزی کرنے والوں سے کوئی رعایت نہیں برتی جائے گی۔ انہوں نے کہا کہ شہر کو صاف، منظم اور شہریوں کے لیے آسان بنانے کے لیے تمام متعلقہ ادارے فعال کردار ادا کریں۔

اوکاڑہ (نامہ نگار ملک ظفر) ڈپٹی کمشنر احمد عثمان جاوید کی زیر صدارت ضلع اوکاڑہ میں چینی کی کنٹرول ریٹ پر فراہمی یقینی بنانے کے لیے اہم اجلاس منعقد ہوا، جس میں ایڈیشنل ڈپٹی کمشنر جنرل حافظ محمد عمر طیب، اسسٹنٹ کمشنر ایچ آر نور محمد، شوگر ملز مالکان، کریانہ ایسوسی ایشن اور انجمن تاجران کے نمائندوں نے شرکت کی۔

ڈپٹی کمشنر نے اجلاس کے دوران واضح طور پر ہدایت جاری کی کہ ضلع بھر میں چینی کی فروخت 173 روپے فی کلو کے مقررہ نرخ پر ہی کی جائے گی۔ انہوں نے چینی کے ذخیرہ اندوزوں کے خلاف سخت کارروائی اور کریک ڈاؤن کا عندیہ بھی دیا۔

اجلاس میں فیصلہ کیا گیا کہ تمام کریانہ شاپس اور مارٹس پر چینی کے نرخ نامے نمایاں جگہوں پر آویزاں کیے جائیں گے تاکہ عوام کو معلومات با آسانی میسر ہوں۔ اس موقع پر شوگر ملز مالکان، کریانہ ایسوسی ایشن اور انجمن تاجران نے ڈپٹی کمشنر کو یقین دہانی کروائی کہ وہ چینی کی کنٹرول ریٹس پر فراہمی میں مکمل تعاون کریں گے۔

ڈپٹی کمشنر احمد عثمان جاوید نے دوٹوک الفاظ میں کہا کہ حکومت پنجاب کے احکامات پر ہر صورت عمل درآمد کروایا جائے گا، اور چینی مہنگے داموں فروخت کرنے والوں کے خلاف کوئی رعایت نہیں برتی جائے گی۔ تمام اسٹیک ہولڈرز سے اپیل کی گئی کہ وہ نرخ ناموں پر عمل درآمد میں انتظامیہ سے مکمل تعاون کریں۔

اوکاڑہ (نامہ نگار ملک ظفر)حلقہ این اے 136 کے عوام کی سہولت کے لیے رکن قومی اسمبلی چوہدری ریاض الحق جج کی خصوصی ہدایت پر طبروق روڈ کی مرمت کا عمل فوری طور پر شروع کر دیا گیا۔ حالیہ بارشوں کے باعث روڈ کے دونوں اطراف میں بننے والے گڑھوں اور خستہ حال راستوں کو مٹی ڈال کر عارضی طور پر قابلِ استعمال بنا دیا گیا، تاکہ عوام کو روزمرہ سفر میں درپیش مشکلات سے نجات دلائی جا سکے۔

اس کام کی نگرانی معروف سماجی کارکن ملک خالد یعقوب نے خود موقع پر موجود رہ کر کی۔ انہوں نے میڈیا سے گفتگو کرتے ہوئے بتایا کہ یہ اقدام چوہدری ریاض الحق جج کی قیادت میں عوامی خدمت کے جذبے سے سرشار ہو کر کیا گیا ہے۔ ان کا کہنا تھا کہ چوہدری ریاض الحق جج ایک ہمہ وقت متحرک اور عوام دوست رہنما ہیں، جو دن رات اپنے حلقے کے مسائل کے حل کے لیے کوشاں رہتے ہیں۔

ملک خالد یعقوب نے کہا کہ یہ صرف ایک ابتدائی قدم ہے، اور ان شاء اللہ حلقے کے تمام بنیادی مسائل ترجیحی بنیادوں پر حل کیے جائیں گے۔ انہوں نے چوہدری ریاض الحق جج کا خصوصی شکریہ ادا کرتے ہوئے کہا کہ ان کی قیادت ہی دراصل خدمت، اخلاص اور ترقی کی اصل پہچان ہے، جو حلقے کے ہر فرد کے دل میں گھر کیے ہوئے ہے۔

یہ اقدام نہ صرف چوہدری ریاض الحق جج کی عوامی خدمت کے جذبے کا مظہر ہے بلکہ حلقے میں ترقیاتی کاموں کے تسلسل کی بھی علامت ہے، جس کا مقصد شہریوں کو بہتر سہولیات فراہم کرنا اور ان کے مسائل کا فوری حل یقینی بنانا ہے۔

اوکاڑہ (نامہ نگار: ملک ظفر)اسسٹنٹ کمشنر چوہدری رب نواز نے شہر بھر میں صفائی ستھرائی، نکاسی آب اور دیگر بلدیاتی امور کا تفصیلی جائزہ لیا۔ انہوں نے عیدگاہ روڈ، تحصیل روڈ اور جناح روڈ کا دورہ کرتے ہوئے نالیوں کی صفائی اور بارش کے پانی کے بروقت انخلاء کے لیے احکامات جاری کیے۔

اسسٹنٹ کمشنر نے صدر بازار، گول چوک اور کچہری بازار میں صفائی کے انتظامات اور نکاسی کے عمل کا بھی مشاہدہ کیا اور عملے کو ہدایت کی کہ شہری علاقوں میں کسی بھی قسم کی غفلت برداشت نہیں کی جائے گی۔ ستھرا پنجاب مہم کے تحت انہوں نے پوسٹ آفس سے ملحقہ سڑکوں کی صفائی کے لیے ٹیموں کو متحرک کرنے کا حکم دیا، جبکہ پوسٹ آفس انتظامیہ کو ویسٹ مینجمنٹ بہتر بنانے اور کچرا دان نصب کرنے کی ہدایات بھی دیں۔

دیپالپور روڈ پر نکاسی آب کے نظام کو بہتر بنانے، جی ٹی روڈ، پبلک پارکس اور روڈز پر واقع گرین بیلٹس کی باقاعدہ صفائی اور خوبصورتی یقینی بنانے کے بھی احکامات جاری کیے گئے۔

اس موقع پر اسسٹنٹ کمشنر چوہدری رب نواز نے کہا کہ عوام کو صاف ستھرا اور صحت مند ماحول فراہم کرنا انتظامیہ کی اولین ترجیح ہے، اور اس مقصد کے لیے تشکیل دی گئی ٹیمیں عوامی خدمت کے جذبے سے اپنی ذمہ داریاں ادا کریں۔

اوکاڑہ (نامہ نگار ملک ظفر)وزیراعلیٰ پنجاب مریم نواز شریف کے ویژن کے تحت نوجوانوں میں کھیلوں کے فروغ کے لیے اقدامات جاری ہیں۔ اسی سلسلے میں ڈپٹی کمشنر اوکاڑہ احمد عثمان جاوید نے تھائی لینڈ میں ہونے والی ایشین انڈر 16 والی بال چیمپئن شپ میں فتح حاصل کرنے والے کھلاڑی علی احمد کے اعزاز میں زبردست استقبالیہ تقریب منعقد کی۔

علی احمد، جو نواحی علاقہ 37 فور ایل سے تعلق رکھتے ہیں، جب اوکاڑہ بائی پاس پہنچے تو سیکیورٹی اسکواڈ کے ہمراہ انہیں ڈپٹی کمشنر آفس لایا گیا۔ ڈی سی آفس میں ڈپٹی کمشنر احمد عثمان جاوید نے علی احمد کا پھولوں کا گلدستہ پیش کر کے شاندار کامیابی پر مبارکباد دی۔ اس موقع پر ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر، ڈسٹرکٹ سپورٹس آفیسر محمد اشفاق احمد، علی احمد کے استاد اور اہل علاقہ بھی موجود تھے۔

علی احمد نے میڈیا سے گفتگو میں کہا کہ ایشین چیمپئن شپ میں کامیابی اللہ کے فضل اور قوم کی دعاؤں کا نتیجہ ہے۔ انہوں نے کہا کہ دفاعی چیمپئن ایران کو شکست دینا ایک تاریخی لمحہ تھا۔

ڈپٹی کمشنر احمد عثمان جاوید نے اعلان کیا کہ علی احمد کو ڈی پی ایس اینڈ کالجز میں مکمل اسکالرشپ دی جائے گی۔ انہوں نے مزید کہا کہ قومی اور ضلعی سطح پر کھیلوں کو فروغ دینے کے لیے حکومت پرعزم ہے، اور تمام کھلاڑیوں کو بھرپور تعاون فراہم کیا جائے گا تاکہ نوجوان نسل صحت مند سرگرمیوں کی طرف راغب ہو۔