Category: اوکاڑہ

اوکاڑہ (نامہ نگار، ملک ظفر)رینالہ خورد میں اسسٹنٹ کمشنر انعم علی خان کی زیر صدارت تحصیل ایمرجنسی رسپانس کمیٹی کا اجلاس منعقد ہوا، جس میں محکمہ ہیلتھ اور ریونیو فیلڈ اسٹاف کے نمائندگان نے شرکت کی۔ اجلاس کا مقصد مون سون بارشوں کے دوران درپیش ممکنہ چیلنجز اور ڈینگی کے خطرات سے نمٹنے کے لیے پیشگی حکمت عملی ترتیب دینا تھا۔

اس موقع پر محکمہ ہیلتھ کے افسران نے ڈینگی مچھر کے خاتمے اور سرویلنس سرگرمیوں کے حوالے سے تفصیلی بریفنگ دی۔ اسسٹنٹ کمشنر انعم علی خان نے ہدایت کی کہ مون سون سیزن کے دوران ڈینگی مچھر کی افزائش کے مقامات پر کڑی نگرانی کی جائے اور ہاٹ سپاٹس کی مسلسل مانیٹرنگ کا عمل یقینی بنایا جائے۔

انہوں نے زور دیا کہ شہری علاقوں کے ساتھ ساتھ دیہی علاقوں اور گاؤں کی سطح پر بھی برساتی نالوں میں پانی کے بہاؤ کو مانیٹر کیا جائے، تاکہ کسی بھی ممکنہ صورتحال میں عوام کو بروقت ریلیف فراہم کیا جا سکے۔ انہوں نے یہ بھی ہدایت کی کہ تمام انسدادِ ڈینگی سرگرمیاں ڈیش بورڈ پر باقاعدگی سے اپ لوڈ کی جائیں۔

اے سی انعم علی خان نے کہا کہ گلیوں، بازاروں، گھروں کی چھتوں اور خالی پلاٹوں میں پانی جمع نہ ہونے دیا جائے اور متعلقہ محکمے تمام دستیاب وسائل کو بروئے کار لاتے ہوئے عوام کو محفوظ اور صحت مند ماحول فراہم کرنے کے لیے متحرک رہیں۔

اوکاڑہ (نامہ نگار: ملک ظفر)اسسٹنٹ کمشنر اوکاڑہ رب نواز نے شہر کے مختلف علاقوں کا دورہ کرتے ہوئے صفائی و ستھرائی کے انتظامات کا تفصیلی جائزہ لیا۔ انہوں نے سٹیڈیم روڈ، فیصل آباد روڈ، چرچ روڈ، ریل بازار اور بینظیر روڈ سمیت اہم شاہراہوں پر صفائی کے عمل کا معائنہ کیا اور متعلقہ عملے کو تمام علاقوں کی مکمل کلیرنس یقینی بنانے کی ہدایت کی۔

اس موقع پر اسسٹنٹ کمشنر نے ایم اے جناح روڈ پر موجود گرین بیلٹس کی صفائی اور خوبصورتی کے لیے خصوصی اقدامات کرنے کے بھی احکامات جاری کیے۔

رب نواز کا کہنا تھا کہ شہر کی خوبصورتی، صفائی اور عوامی سہولیات کی فراہمی حکومت کی اولین ترجیح ہے، اور اس ضمن میں عملی اقدامات کے ساتھ ساتھ مانیٹرنگ کا عمل بھی مسلسل جاری ہے تاکہ شہریوں کو صاف ستھرا اور خوشگوار ماحول فراہم کیا جا سکے۔

اوکاڑہ (نامہ نگار ملک ظفر)پاکستان مسلم لیگ (ن) کے سینئر رہنما اور خادمِ اوکاڑہ چوہدری فیاض ظفر نے کہا ہے کہ حالیہ بارشوں کے دوران ضلعی انتظامیہ کے تعاون سے عوام کو ہر ممکن ریلیف فراہم کیا گیا، اور یہ خدمت کا سلسلہ آئندہ بھی جاری رہے گا۔ وہ ایک وفد سے گفتگو کر رہے تھے جو بارشوں کے بعد کی صورت حال پر تبادلہ خیال کے لیے ان سے ملا۔

چوہدری فیاض ظفر نے کہا کہ مسلم لیگ (ن) نے ہمیشہ عوامی مسائل کو اپنی اولین ترجیح بنایا ہے اور مشکل کی ہر گھڑی میں عوام کے ساتھ کھڑے ہیں۔ "بارش ہو یا آفت، دن ہو یا رات — ہمارے دروازے اپنی عوام کے لیے ہمیشہ کھلے ہیں، کیونکہ ہم سیاست کو عبادت اور خدمت کا ذریعہ سمجھتے ہیں۔”

انہوں نے ضلعی انتظامیہ، ریسکیو 1122، ٹی ایم اے، اور دیگر متعلقہ اداروں کا شکریہ ادا کیا جنہوں نے دن رات محنت کر کے متاثرہ علاقوں میں ریلیف پہنچایا اور پانی کے نکاس کے عمل کو تیز تر بنایا۔ چوہدری فیاض ظفر نے کہا کہ شہری اور دیہی علاقوں میں جہاں جہاں نکاسی آب کا مسئلہ سامنے آیا، وہاں فوری طور پر اقدامات اٹھائے گئے تاکہ لوگ کسی بڑی پریشانی سے دوچار نہ ہوں۔

انہوں نے عوام سے اپیل کی کہ وہ قدرتی آفات کے دوران صبر و تحمل سے کام لیں اور حکومتی اداروں سے بھرپور تعاون کریں۔ چوہدری فیاض ظفر نے یہ بھی اعلان کیا کہ وہ ایک جامع حکمتِ عملی کے تحت بارش کے پانی کے دیرپا نکاس اور زرعی زمینوں کے تحفظ کے لیے جلد اعلیٰ حکام کو سفارشات پیش کریں گے۔

انہوں نے کہا کہ "ہمیں جو عوامی اعتماد اور محبت ملی ہے، وہ ہمارا اصل سرمایہ ہے، اور اس خدمت کا سفر تب تک جاری رہے گا جب تک ہر شہری کو سہولت، تحفظ اور عزت کا مکمل حق نہیں مل جاتا۔ عوام کی خدمت ہی ہمارا منشور، مقصد اور سیاست کا اصل چہرہ ہے۔”

اوکاڑہ (نامہ نگار ملک ظفر)ڈپٹی کمشنر احمد عثمان جاوید کی زیر صدارت ضلعی انتظامیہ کا اہم اجلاس منعقد ہوا جس میں ضلع کے مختلف شعبہ جات کے اعلیٰ افسران نے شرکت کی۔ اجلاس میں ایڈیشنل ڈپٹی کمشنر ریونیو محمد ابراہیم ارباب، ایڈیشنل ڈپٹی کمشنر جنرل حافظ محمد عمر طیب، ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر، اسسٹنٹ کمشنر اوکاڑہ رب نواز، اسسٹنٹ کمشنر ایچ آر نور محمد، ڈپٹی ڈائریکٹر لوکل گورنمنٹ شہباز سکھیرا، سب ڈویژنل انفورسمنٹ آفیسر وسیم جاوید اور ایس این اے افضال حسین شریک ہوئے۔

ڈپٹی کمشنر نے اجلاس سے خطاب کرتے ہوئے تمام افسران کو ہدایت کی کہ وہ وزیراعلیٰ پنجاب کے وژن کے مطابق گڈ گورننس کو یقینی بناتے ہوئے عوامی بہتری کے لیے میدان عمل میں متحرک رہیں۔ انہوں نے کہا کہ صحت، تعلیم اور دیگر شعبوں میں انقلابی اقدامات کے ذریعے شہریوں کے معیارِ زندگی کو بلند کیا جائے اور ہر ممکن سہولیات ان تک پہنچائی جائیں۔

احمد عثمان جاوید نے افسران پر زور دیا کہ وہ عوامی خدمت کو اولین ترجیح دیں اور خلوص نیت سے محنت کرتے ہوئے مسائل کے حل اور سہولتوں کی فراہمی میں فعال کردار ادا کریں۔ ان کا کہنا تھا کہ عوامی خدمت عبادت ہے، اور اس مشن میں کوتاہی ہرگز برداشت نہیں کی جائے گی۔

اجلاس میں مختلف ترقیاتی منصوبوں اور انتظامی حکمتِ عملی پر بھی تبادلہ خیال کیا گیا، اور افسران نے اپنی کارکردگی رپورٹ پیش کرتے ہوئے آئندہ لائحہ عمل سے بھی آگاہ کیا۔

اوکاڑہ (نامہ نگار ملک ظفر) سماجی کارکن ملک خالد یعقوب نے حالیہ شدید بارشوں کے دوران اوکاڑہ کی ضلعی انتظامیہ کی کارکردگی کو سراہتے ہوئے اسے مثالی قرار دیا ہے۔ انہوں نے اپنے بیان میں کہا کہ ڈپٹی کمشنر احمد عثمان جاوید، اسسٹنٹ کمشنر رب نواز، ڈی پی او راشد ہدایت، اور ریسکیو 1122 کی ٹیموں نے جس ذمہ داری اور تندہی سے فرائض انجام دیے، وہ لائقِ تحسین ہیں۔

ملک خالد یعقوب کے مطابق بارش کے دوران شہر کے مختلف علاقوں، خصوصاً نشیبی محلوں میں پانی جمع ہونے کے باوجود ضلعی افسران خود فیلڈ میں موجود رہے۔ انہوں نے متاثرہ علاقوں کے دورے کیے، صورتحال کا جائزہ لیا اور موقع پر فوری اقدامات کے ذریعے شہریوں کو ریلیف فراہم کیا۔ انہوں نے کہا کہ "یہ پہلا موقع ہے جب افسران دفاتر میں بیٹھنے کے بجائے عملی طور پر عوام کے درمیان موجود نظر آئے اور عوامی مسائل کو اپنی نگرانی میں حل کروایا۔”

انہوں نے ریسکیو 1122 کی خدمات کو خاص طور پر سراہتے ہوئے کہا کہ ان کی ٹیموں نے نہ صرف پانی کی نکاسی اور ٹریفک کنٹرول میں اہم کردار ادا کیا بلکہ متاثرہ شہریوں کو محفوظ مقامات پر منتقل کرنے اور زخمیوں کو بروقت طبی امداد فراہم کرنے میں بھی غیر معمولی خدمات سرانجام دیں۔

ملک خالد یعقوب نے حکومتِ پنجاب سے مطالبہ کیا کہ ایسے فرض شناس اور عوام دوست افسران کی نہ صرف حوصلہ افزائی کی جائے بلکہ اوکاڑہ انتظامیہ کو دیگر اضلاع کے لیے ماڈل کے طور پر پیش کیا جائے تاکہ پورے صوبے میں عوامی خدمت کو فوقیت دی جا سکے۔

ان کا مزید کہنا تھا: "جب عوام اور انتظامیہ مل کر کام کریں تو کسی بھی آزمائش کا مقابلہ آسان ہو جاتا ہے۔ ہمیں چاہیے کہ ہم ایسے افسران کا ساتھ دیں جو ہماری سلامتی اور سہولت کے لیے دن رات محنت کر رہے ہیں۔

اوکاڑہ (نامہ نگار ملک ظفر) ایڈیشنل ڈپٹی کمشنر ریونیو محمد ابراہیم ارباب نے ڈسٹرکٹ ہیڈ کوارٹر ہسپتال سٹی کا دورہ کرتے ہوئے ہسپتال میں موجود طبی سہولیات، صفائی ستھرائی اور فارمیسی میں ادویات کے سٹاک کا تفصیلی جائزہ لیا۔ دورے کے دوران انہوں نے مختلف وارڈز کا معائنہ کیا اور مریضوں کی عیادت کرتے ہوئے ان سے فراہم کردہ سہولیات کے بارے میں دریافت کیا۔

ایڈیشنل ڈپٹی کمشنر نے ہسپتال کے صفائی عملے کو ہدایت کی کہ مون سون کے دوران صفائی کے انتظامات میں کسی قسم کی غفلت نہ برتی جائے اور روزانہ کی بنیاد پر صفائی کو یقینی بنایا جائے تاکہ بیماریاں پھیلنے کا خدشہ کم ہو۔ انہوں نے فارمیسی کا معائنہ کرتے ہوئے ادویات کی دستیابی اور سٹاک کی موجودگی کا بھی جائزہ لیا۔

اس موقع پر محمد ابراہیم ارباب نے کہا کہ ہسپتال کا عملہ بالخصوص ڈاکٹرز اور پیرا میڈیکل سٹاف عوامی خدمت کے جذبے سے سرشار ہو کر مریضوں کے علاج معالجے میں بھرپور محنت کریں۔ انہوں نے زور دیا کہ حکومت پنجاب کی ہدایات کے مطابق مریضوں کو بہترین طبی سہولیات کی فراہمی کو ہر صورت ممکن بنایا جائے۔

انہوں نے مزید کہا کہ ہسپتالوں میں جاری سہولیات کی فراہمی کے سلسلے میں چیکنگ کا عمل تسلسل سے جاری رکھا جائے گا تاکہ عوام کو صحت کی بنیادی سہولیات بروقت اور موثر انداز میں فراہم کی جا سکیں۔

اوکاڑہ (باغی ٹی وی، نامہ نگار ملک ظفر)ڈپٹی کمشنر اوکاڑہ احمد عثمان جاوید نے شدید بارش کے دوران رات گئے شہر کے مختلف علاقوں کا ہنگامی دورہ کیا۔ ان کے ہمراہ ایڈیشنل ڈپٹی کمشنر جنرل حافظ محمد عمر طیب اور مسلم لیگ (ن) کے رہنما چوہدری فیاض ظفر بھی موجود تھے۔

ڈپٹی کمشنر نے کالج روڈ، تحصیل روڈ، کچہری روڈ، دیپالپور روڈ، ایم اے جناح روڈ، اور بینظیر روڈ سمیت دیگر متاثرہ علاقوں میں بارش کے پانی کی صورتحال کا جائزہ لیا۔ انہوں نے موقع پر موجود میونسپل کمیٹی کے حکام کو نکاسی آب کے لیے فوری اقدامات کرنے کی سخت ہدایات دیں۔

احمد عثمان جاوید نے کہا کہ مون سون سیزن کے پیش نظر تمام متعلقہ اداروں کو ہنگامی بنیادوں پر متحرک رہنا ہوگا۔ انہوں نے انتظامی افسران کو ہدایت کی کہ بارش کے دوران خود فیلڈ میں موجود رہ کر نکاسی آب کے عمل کی نگرانی کریں تاکہ شہریوں کو کسی قسم کی دشواری کا سامنا نہ ہو۔

ڈپٹی کمشنر نے مزید کہا کہ مختلف علاقوں میں نصب کیے گئے نئے ڈی واٹرنگ سیٹس کو مکمل فعال رکھا جائے، اور شہر بھر سے پانی کے فوری انخلاء کے لیے موثر اور منظم انداز میں کارروائی جاری رکھی جائے۔

شہری حلقوں نے ضلعی انتظامیہ کے اس بروقت اور متحرک اقدام کو سراہا ہے اور توقع ظاہر کی ہے کہ نکاسی آب کے مسائل جلد حل ہو جائیں گے۔