Category: اوکاڑہ

اوکاڑہ (نامہ نگار ملک ظفر) اوکاڑہ میں 9 محرم الحرام کے موقع پر امن و امان کے قیام اور شہریوں میں احساسِ تحفظ پیدا کرنے کے لیے پولیس کی جانب سے فلیگ مارچ کا انعقاد کیا گیا۔ فلیگ مارچ کی قیادت ڈسٹرکٹ پولیس آفیسر (ڈی پی او) راشد ہدایت اور ڈپٹی کمشنر احمد عثمان جاوید نے کی، جب کہ رینجرز، ضلعی انتظامیہ، پی ای آر اے فورس، ایلیٹ فورس، ریسکیو 1122 اور ٹریفک پولیس کے دستے بھی شریک ہوئے۔

مارچ ضلع کونسل سے شروع ہو کر ایم اے جناح روڈ، تحصیل روڈ، بے نظیر روڈ، گول چوک اور مین بازار سمیت شہر کے مختلف علاقوں سے ہوتا ہوا ڈسٹرکٹ کمپلیکس پر اختتام پذیر ہوا۔ فلیگ مارچ کا مقصد 9 اور 10 محرم الحرام کے دوران شہریوں کو پرامن ماحول فراہم کرنا اور دہشت گردی یا شرپسندی کے کسی بھی خدشے کو ختم کرنا تھا۔

ڈی پی او راشد ہدایت نے کہا کہ محرم کے جلوسوں اور مجالس کے لیے سیکیورٹی کے فول پروف انتظامات کیے گئے ہیں۔ 9 محرم کو ضلع بھر میں 26 عزاداری کے جلوس اور 66 مجالس کا انعقاد متوقع ہے، جن کی سیکیورٹی کے لیے 1200 سے زائد پولیس افسران اور جوان تعینات کیے گئے ہیں۔ جلوس کے راستوں کو قناتیں اور خاردار تاریں لگا کر مکمل طور پر سیل کر دیا جائے گا، جب کہ ریزرو نفری اور کیو آر ایف (کِک رسپانس فورس) کو ہائی الرٹ پر رکھا گیا ہے۔

ڈی سی احمد عثمان جاوید کا کہنا تھا کہ ضابطہ اخلاق کی مکمل پابندی یقینی بنائی جائے گی، اور کسی بھی قسم کی خلاف ورزی کو برداشت نہیں کیا جائے گا۔ انہوں نے شہریوں سے تعاون کی اپیل کرتے ہوئے کہا کہ امن کے دشمنوں کو ناکام بنانے کے لیے انتظامیہ اور عوام کا اشتراک ضروری ہے۔

اوکاڑہ (باغی ٹی وی، نامہ نگار ملک ظفر)ایڈیشنل ڈپٹی کمشنر ریونیو محمد ابراہیم ارباب کی زیر صدارت ڈسٹرکٹ ایمرجنسی رسپانس کمیٹی کا اہم اجلاس منعقد ہوا، جس میں محکمہ صحت سمیت تمام متعلقہ اداروں کے افسران نے شرکت کی۔ اجلاس میں انسدادِ ڈینگی مہم کے تحت جاری اقدامات، ڈینگی سرویلنس، ہاٹ سپاٹس کی چیکنگ، اور انسپیکشن اہداف کے حوالے سے تفصیلی بریفنگ دی گئی۔

ایڈیشنل ڈپٹی کمشنر محمد ابراہیم ارباب نے ہدایت کی کہ مون سون کے دوران ڈینگی سرویلنس کو مزید مؤثر اور مربوط بنایا جائے۔ انہوں نے کہا کہ بارشی پانی کے جمع ہونے سے ڈینگی مچھر کی افزائش ہوتی ہے، اس لیے نکاسی آب کو یقینی بنایا جائے اور کسی بھی مقام پر پانی کھڑا نہ ہونے دیا جائے۔

انہوں نے متعلقہ اداروں کو تاکید کی کہ حکومت پنجاب کی جانب سے طے کردہ انسپیکشن ٹارگٹس کو ہر صورت مکمل کیا جائے اور کارروائیوں کا ریکارڈ باقاعدگی سے ڈیش بورڈ پر اپلوڈ کیا جائے۔ ڈینگی سکواڈ کو متحرک کرنے اور موذوں مقامات پر مسلسل چیکنگ کو یقینی بنانے کی ہدایت بھی دی گئی تاکہ ڈینگی لاروا کو پنپنے کا موقع نہ ملے۔

ایڈیشنل ڈپٹی کمشنر نے انسداد ڈینگی مہم میں تھرڈ پارٹی ویلیڈیشن کے عمل کو بھی تسلسل سے جاری رکھنے پر زور دیا تاکہ شفافیت اور کارکردگی کا درست اندازہ لگایا جا سکے۔ اجلاس میں انسداد ڈینگی کے لیے تمام محکموں کے مابین بھرپور تعاون کی ضرورت پر بھی اتفاق کیا گیا۔

اوکاڑہ (باغی ٹی وی، نامہ نگار ملک ظفر)ڈپٹی کمشنر احمد عثمان جاوید کی زیر صدارت ڈسٹرکٹ کوآرڈینیشن کمیٹی برائے نیشنل ایکشن پلان کا اہم اجلاس منعقد ہوا، جس میں ڈی پی او راشد ہدایت، پاک آرمی کے افسران اور وفاقی و صوبائی محکموں کے نمائندہ افسران نے شرکت کی۔ اجلاس کا مقصد ضلع میں نیشنل ایکشن پلان کے مختلف نکات پر عملدرآمد کا جائزہ لینا تھا۔

اجلاس میں غیر قانونی پیٹرول پمپس اور ایل پی جی شاپس کے خلاف کارروائیاں، ہیومن ٹریفکنگ کی روک تھام، بجلی چوری کے خلاف کریک ڈاؤن، نان کسٹم پیڈ گاڑیوں کے خلاف آپریشن، ٹریفک قوانین کی خلاف ورزیوں پر ٹرانسپورٹرز کے خلاف اقدامات، گداگری کے خاتمے، انسداد تجاوزات مہم، مدارس کی رجسٹریشن اور اوورسیز پاکستانیوں کے مسائل کے حل جیسے اہم امور پر تفصیلی بریفنگ دی گئی۔

ڈپٹی کمشنر احمد عثمان جاوید نے تمام محکموں کو ہدایت کی کہ عوامی مفاد کو مقدم رکھتے ہوئے ذمہ داریوں کی ادائیگی میں کوئی کوتاہی نہ برتی جائے۔ انہوں نے زور دیا کہ حکومت پنجاب کے احکامات پر مؤثر عملدرآمد یقینی بنایا جائے اور قانون شکنی کے مرتکب افراد سے آہنی ہاتھوں سے نمٹا جائے۔ اجلاس میں طے پایا کہ ضلعی سطح پر بین المحکماتی رابطے کو مزید مؤثر بنایا جائے گا تاکہ نیشنل ایکشن پلان کے تمام اہداف بروقت اور مکمل طور پر حاصل کیے جا سکیں۔

اوکاڑہ (نامہ نگار: ملک ظفر)اوکاڑہ میں محرم الحرام کے سلسلے میں ساتویں محرم الحرام کا مرکزی ماتمی جلوس آج رات 9 بجے امام بارگاہ ایوانِ حسین سے برآمد ہوگا جو اپنے روایتی راستوں سے ہوتا ہوا راوی روڈ پر اختتام پذیر ہوگا۔

ضلع بھر میں سات محرم کو مجموعی طور پر 24 جلوس اور 70 مجالس عزاداری کا انعقاد کیا جائے گا۔ سیکیورٹی کے سخت ترین انتظامات مکمل کر لیے گئے ہیں، جن کے تحت 1300 سے زائد افسران اور پولیس اہلکاروں کو ڈیوٹی پر تعینات کیا گیا ہے۔

جلوس کے تمام راستوں کو قناتیں لگا کر اور خاردار تاروں سے سیل کیا جائے گا جبکہ کسی بھی ہنگامی صورتحال سے نمٹنے کے لیے ریزرو نفری اور کوئیک ریسپانس فورس (QRF) کو سٹینڈ بائی رکھا گیا ہے۔

انتظامیہ کا کہنا ہے کہ شہریوں کے جان و مال کے تحفظ کو یقینی بنانے کے لیے سیکیورٹی کو ہر سطح پر چوکس رکھا گیا ہے۔

اوکاڑہ (نامہ نگار ملک ظفر)ریسکیو 1122 اوکاڑہ کا ماہانہ کارکردگی اجلاس ڈسٹرکٹ ایمرجنسی آفیسر انجینئر احتشام کی زیر صدارت سنٹرل اسٹیشن اوکاڑہ میں منعقد ہوا، جس میں ضلع بھر کی ایمرجنسیز، طبی امداد، آتشزدگی، روڈ حادثات اور دیگر معاملات کا تفصیلی جائزہ لیا گیا۔

اجلاس میں پیش کی گئی رپورٹ کے مطابق جون 2025 میں ریسکیو 1122 کو کل 28 ہزار 638 کالز موصول ہوئیں جن میں 5 ہزار 965 ایمرجنسی کالز تھیں۔ موصول شدہ کالز میں بڑی تعداد غیر متعلقہ، ڈسٹربنگ اور معلوماتی نوعیت کی رہی، جن میں 13 ہزار 541 ڈسٹربنگ، 5 ہزار 90 معلوماتی، 26 رونگ، اور 31 جعلی کالز شامل تھیں۔

رپورٹ کے مطابق 5 ہزار 965 ایمرجنسیز میں سے 1261 روڈ ٹریفک حادثات، 3908 میڈیکل کیسز، 72 آتشزدگی کے واقعات، 167 جرائم سے متعلق کیسز، ایک ڈوبنے کا واقعہ اور دیگر 556 متفرق حادثات شامل تھے۔ ٹریفک حادثات میں 1553 افراد متاثر ہوئے جن میں 20 افراد جان کی بازی ہار گئے۔ 832 افراد کو موقع پر ہی ابتدائی طبی امداد دی گئی جبکہ 701 کو اسپتال منتقل کیا گیا۔

آگ لگنے کے 72 واقعات میں سے 2 کمرشل، 6 رہائشی اور 64 دیگر علاقوں میں پیش آئے۔ ان میں شارٹ سرکٹ، گیس لیکج، کچن فائر، فائر ورکس اور لاپرواہی کو اہم وجوہات قرار دیا گیا۔ ان حادثات میں بروقت کارروائی کے ذریعے 54 ملین روپے سے زائد مالیت کی پراپرٹی کو نقصان سے محفوظ بنایا گیا۔

ریسکیو موٹر بائیک سروس نے 3528 ایمرجنسیز پر 5.14 منٹ کے اوسط ریسپانس ٹائم سے بروقت کارروائی کرتے ہوئے 3665 افراد کو فوری طبی امداد فراہم کی۔ پیشنٹ ریفرل سسٹم کے تحت 117 مریضوں کو ڈی ایچ کیو اوکاڑہ جبکہ 156 مریضوں کو دیگر اضلاع کے بڑے اسپتالوں میں منتقل کیا گیا۔

ڈسٹرکٹ ایمرجنسی آفیسر انجینئر احتشام نے کہا کہ ریسکیو 1122 کا عملہ شہریوں کی جان و مال کے تحفظ کے لیے چوبیس گھنٹے مستعد اور فرض شناس انداز میں خدمات انجام دے رہا ہے۔

اوکاڑہ (نامہ نگار ملک ظفر)محرم الحرام کے دوران ضلعی سطح پر عزاداروں کو سہولیات کی فراہمی اور سکیورٹی انتظامات کا جائزہ لینے کے لیے صوبائی وزیر زراعت و لائیو اسٹاک سید عاشق حسین کرمانی کی زیر صدارت ڈی سی آفس اوکاڑہ میں اعلیٰ سطحی اجلاس منعقد ہوا۔ اجلاس میں مشیر وزیر اعلیٰ پنجاب سلمہ بٹ، ایم این اے ریاض الحق جج، ممبران صوبائی اسمبلی میاں محمد منیر، چوہدری غلام رضا ربیرہ، چوہدری جاوید علاؤالدین، ملک علی عباس کھوکھر، کمشنر ساہیوال ڈاکٹر آصف طفیل، آر پی او محبوب رشید، ڈپٹی کمشنر احمد عثمان جاوید، ڈی پی او راشد ہدایت اور دیگر افسران نے شرکت کی۔

ڈپٹی کمشنر احمد عثمان جاوید نے اجلاس کو محرم الحرام کے موقع پر عزاداروں کو سہولیات کی فراہمی کے انتظامات پر تفصیلی بریفنگ دی، جبکہ ڈی پی او راشد ہدایت نے مجالس و جلوسوں کی سکیورٹی حکمت عملی سے آگاہ کیا۔

صوبائی وزیر نے اجلاس سے خطاب کرتے ہوئے کہا کہ وزیراعلیٰ پنجاب مریم نواز شریف کی ہدایت پر محرم الحرام کے دوران عزاداروں کو بہترین سہولیات فراہم کرنے کے لیے تمام سٹیک ہولڈرز کو آن بورڈ لیا جا رہا ہے۔ انہوں نے کہا کہ جلوسوں اور مجالس میں شریک عزاداروں کو طبی سہولیات کی فراہمی کے لیے میڈیکل کیمپس اور کلینک آن وہیلز خدمات فراہم کریں گے، جبکہ سکیورٹی کو فول پروف بنایا جائے گا۔

اس موقع پر صوبائی وزیر نے ڈی سی آفس میں قائم کنٹرول روم کا بھی دورہ کیا اور وہاں موجود اہلکاروں کی کارکردگی کا جائزہ لیا۔ انہوں نے ہدایت کی کہ کنٹرول روم 24 گھنٹے فعال رہے اور ضلعی سطح پر مانیٹرنگ اور تمام محکموں سے موثر رابطہ کاری یقینی بنائی جائے۔
انہوں نے کہا کہ محرم الحرام کے تمام انتظامات کی خود نگرانی کروں گا، جبکہ کمیٹیاں اپنے اپنے دائرہ کار میں کلیدی کردار ادا کریں تاکہ پرامن، منظم اور بااحترام انداز میں مجالس و جلوسوں کا انعقاد ممکن ہو سکے۔

اوکاڑہ (نامہ نگار، ملک ظفر) محرم الحرام کے پیش نظر ریسکیو 1122 کی جانب سے ایمرجنسی تیاریوں کا جامع جائزہ اجلاس ڈسٹرکٹ ایمرجنسی آفیسر انجینئر احتشام کی زیر صدارت سنٹرل اسٹیشن اوکاڑہ میں منعقد ہوا۔ اجلاس میں تمام تحصیل انچارجز نے شرکت کی اور اپنے اپنے علاقوں میں محرم الحرام کے دوران کیے جانے والے حفاظتی و انتظامی اقدامات پر تفصیلی بریفنگ دی۔

ڈسٹرکٹ ایمرجنسی آفیسر نے تمام انتظامات پر اطمینان کا اظہار کرتے ہوئے کہا کہ ضلع بھر میں 5 سے 10 محرم، خصوصاً یومِ عاشورہ کے موقع پر ریسکیو عملہ ہائی الرٹ پر ہوگا۔ اس سلسلے میں 200 سے زائد ریسکیو اہلکاروں کو ایمرجنسی ڈیوٹیوں پر تعینات کر دیا گیا ہے جبکہ عملے کی تمام چھٹیاں منسوخ کر دی گئی ہیں۔

محرم الحرام کے دوران ضلع بھر میں مجالس اور جلوسوں کی سیکیورٹی کو یقینی بنانے کے لیے 13 سے زائد ریسکیو پوسٹیں قائم کر دی گئی ہیں۔ یہ پوسٹیں مجالس اور جلوسوں کے داخلی و خارجی راستوں پر قائم کی گئی ہیں تاکہ کسی بھی ہنگامی صورتحال میں فوری رسپانس ممکن ہو۔ اس کے علاوہ موٹر بائیک ایمبولینس پوسٹیں بھی قائم کی گئی ہیں تاکہ گنجان راستوں اور ہجوم میں بروقت امدادی کارروائی کی جا سکے۔

ریسکیو پوسٹوں پر ایمبولینسز، فائر وہیکلز، اور تربیت یافتہ ریسکیو اسٹاف چوبیس گھنٹے موجود رہے گا۔ کنٹرول روم انچارج کی نگرانی میں انسپیکشن ٹیمیں بھی تشکیل دے دی گئی ہیں جو تمام ریسکیو پوسٹوں کا معائنہ کریں گی اور ہنگامی تیاریوں کو چیک کریں گی۔

ڈسٹرکٹ ایمرجنسی آفیسر نے شہریوں سے اپیل کی ہے کہ وہ محرم الحرام کے دوران تعاون کریں اور کسی بھی ہنگامی صورتحال میں فوری طور پر ریسکیو 1122 سے رابطہ کریں تاکہ بروقت مدد فراہم کی جا سکے۔