Category: اوکاڑہ

اوکاڑہ (باغی ٹی وی، نامہ نگار ملک ظفر)ڈسٹرکٹ پولیس آفیسر اوکاڑہ راشد ہدایت نے محکمانہ احتساب کے عمل کو مضبوط بنانے کی ایک عملی مثال قائم کر دی۔ تھانہ صدر اوکاڑہ میں تعینات اسسٹنٹ سب انسپکٹر (اے ایس آئی) عامر شہزاد کے خلاف اختیارات کے ناجائز استعمال اور جھوٹا مقدمہ قائم کرنے کے الزامات ثابت ہونے پر باقاعدہ فوجداری مقدمہ درج کر لیا گیا ہے۔

تفصیلات کے مطابق مومن آباد کے ایک شہری نے بیرون ملک جانے کے لیے پولیس کریکٹر سرٹیفکیٹ حاصل کرنے کی درخواست دی، تاہم متعلقہ ریکارڈ میں اسے ایک چھ سال پرانے چوری کے مقدمے میں نامزد پایا گیا۔ شہری کی جانب سے اس معاملے کی نشاندہی اعلیٰ پولیس حکام کو کی گئی، جس پر ڈی ایس پی لیگل نے فوری طور پر فیکٹ فائنڈنگ انکوائری شروع کی۔

تحقیقات کے دوران انکشاف ہوا کہ اے ایس آئی عامر شہزاد نے مبینہ طور پر اختیارات سے تجاوز کرتے ہوئے نہ صرف جھوٹا مقدمہ درج کیا بلکہ شہری کے بنیادی حقوق کی خلاف ورزی بھی کی۔ رپورٹ کے مطابق الزام ثابت ہونے پر ایس ایچ او تھانہ صدر انسپکٹر ریاض احمد کی مدعیت میں اے ایس آئی کے خلاف باقاعدہ مقدمہ درج کر لیا گیا ہے۔

ڈی پی او راشد ہدایت نے واقعے پر ردعمل دیتے ہوئے کہا کہ محکمہ پولیس میں کرپشن یا اختیارات کے غلط استعمال کی کوئی گنجائش نہیں ہے۔ انہوں نے واضح کیا کہ محکمانہ احتساب کا عمل بلا امتیاز جاری رکھا جائے گا تاکہ عوام کے جان و مال، عزت اور وقار کو یقینی تحفظ فراہم کیا جا سکے۔

ڈی پی او کا مزید کہنا تھا کہ شہریوں کے اعتماد کو بحال رکھنے اور پولیس کی ساکھ کو برقرار رکھنے کے لیے ہر ممکن اقدامات کیے جا رہے ہیں، اور کسی بھی اہلکار کی غفلت، زیادتی یا بدعنوانی کو برداشت نہیں کیا جائے گا۔

اوکاڑہ (نامہ نگار: ملک ظفر) تھانہ گوگیرہ کے نواحی گاؤں چک خان محمد میں رشتے کے تنازع پر خانہ بدوش قبیلے کے دو افراد قتل ہو گئے۔ مقتولین شاہد اور فرمائش آپس میں سالا اور بہنوئی تھے۔

پولیس ذرائع کے مطابق شاہد نے اپنے دو ساتھیوں کے ہمراہ بہنوئی فرمائش کی جھگی میں جا کر دستی اسلحہ سے فائرنگ کی اور اسے قتل کر دیا۔ فائرنگ کے بعد شاہد کے ساتھی موقع سے فرار ہو گئے، جبکہ مقتول کے عزیز و اقارب نے قاتل شاہد کو موقع پر ہی پکڑ لیا اور وحشیانہ تشدد کا نشانہ بنایا، جس سے وہ شدید زخمی ہو گیا۔

واقعے کی اطلاع پر ایس ایچ او تھانہ گوگیرہ پولیس نفری کے ہمراہ موقع پر پہنچے اور شواہد اکٹھے کیے۔ مقتول فرمائش کی لاش کو پوسٹمارٹم کے لیے منتقل کر دیا گیا جبکہ قاتل شاہد کو زخمی حالت میں پولیس حراست میں ہسپتال لے جایا گیا، جہاں وہ زخموں کی تاب نہ لاتے ہوئے دم توڑ گیا۔

ڈی پی او کے نوٹس پر پولیس نے مقتول فرمائش کی والدہ کی درخواست پر شاہد اور اس کے ساتھیوں کے خلاف مقدمہ نمبر 723/25 درج کر لیا۔ دوسری جانب شاہد کی موت کے بعد اس کے ورثاء کی درخواست پر کراس ورژن بھی درج کر لیا گیا ہے۔

پولیس تھانہ گوگیرہ نے دوہرے قتل کے اس پیچیدہ کیس کی میرٹ اور سائنسی بنیادوں پر تفتیش کے لیے اعلیٰ افسران پر مشتمل ٹیمیں تشکیل دے دی ہیں۔ پولیس ترجمان کے مطابق دونوں فریقین کے بیانات، شواہد اور فرانزک رپورٹ کی روشنی میں قانونی کارروائی مکمل کی جائے گی۔

اوکاڑہ (باغی ٹی وی، نامہ نگار ملک ظفر)تھانہ منڈی احمد آباد کی حدود میں افسوسناک واقعہ، دیور نے وراثتی مکان کے تنازع پر 4 بچوں کی ماں بیوہ بھابھی کو ٹولے کے وار کر کے قتل کر دیا۔ واقعہ گاؤں چاہ موہری والا داخلی جھگیاں غلام فرید میں پیش آیا جہاں مقتولہ زاہرا بی بی، جو کہ بیوہ اور چار بچوں کی ماں تھی، اپنے دیور محمد یونس کی طرف سے مکان پر ناجائز قبضے کی دھمکیوں کے باعث جان بچا کر بچوں سمیت لاہور چلی گئی تھی۔

پولیس ایف آئی آر کے مطابق، وقوعہ کے روز زاہرا بی بی اپنے جیٹھ خالد کے گھر گاؤں واپس آئی تو ملزم محمد یونس نے اپنے ساتھی محمد عاشق کے ہمراہ موقع پر گھات لگا رکھی تھی۔ دونوں نے زاہرا بی بی پر ٹولے سے پے در پے وار کیے جس سے وہ موقع پر ہی جاں بحق ہو گئی۔ واردات کے بعد دونوں ملزمان فرار ہو گئے۔

پولیس نے مقتولہ کے بھائی کی مدعیت میں مقدمہ نمبر 529/25 درج کر کے تفتیش کا آغاز کر دیا ہے، جبکہ مقتولہ کی لاش کو پوسٹ مارٹم کے لیے اسپتال منتقل کر دیا گیا ہے۔ واقعے پر علاقے میں افسوس اور غم کی فضا ہے، جبکہ ورثاء نے انصاف کی اپیل کی ہے۔

اوکاڑہ (نامہ نگار ملک ظفر) تھانہ حجرہ شاہ مقیم کی حدود موضع کھرل کلاں میں غیرت کے نام پر دوہرے قتل کی لرزہ خیز واردات پیش آئی، جس میں خالہ اور بھانجی کو گولیاں مار کر قتل کر دیا گیا۔ مقتولین کی شناخت 27 سالہ سدرہ بی بی دختر اظہر اور 28 سالہ شمائلہ بی بی دختر مولا بخش کے نام سے ہوئی ہے۔ پولیس کے مطابق دونوں خواتین آپس میں خالہ بھانجی تھیں اور گھر میں موجود تھیں کہ شمائلہ کا بھائی محمد احمد بوٹا ایک نامعلوم شخص کے ہمراہ پہنچا اور مبینہ طور پر غیرت کے نام پر دونوں کو فائرنگ کر کے موت کے گھاٹ اتار دیا۔

واقعہ کی اطلاع ملتے ہی تھانہ حجرہ شاہ مقیم پولیس موقع پر پہنچی، شواہد اکٹھے کیے اور لاشوں کو پوسٹ مارٹم کے لیے ہسپتال منتقل کر دیا گیا۔ پولیس نے فوری کارروائی کرتے ہوئے مرکزی ملزم محمد احمد بوٹا کو گرفتار کر لیا ہے، جب کہ اس کے ساتھی کی گرفتاری کے لیے چھاپے مارے جا رہے ہیں۔ پولیس حکام کے مطابق دوہرے قتل کے اصل محرکات تفتیش اور پوسٹمارٹم رپورٹ کے بعد سامنے آئیں گے۔ واقعے نے علاقے میں خوف و ہراس پھیلا دیا ہے۔

اوکاڑہ (نامہ نگار ملک ظفر)پیٹرولنگ پولیس کی انسانیت نواز کارروائی، گھریلو ناچاکی کے باعث گھر سے بھاگنے والی 15 سالہ لڑکی بازیاب، والدین کے حوالے

دکھی، بے سہارا اور لاپتہ انسانیت کی مدد کا جذبہ لیے پیٹرولنگ پولیس ضلع اوکاڑہ نے ایک اور قابلِ فخر کارنامہ سرانجام دے دیا۔ گھریلو ناچاکی کے باعث گھر سے بھاگ کر ساہیوال جانے والی 15 سالہ جواں سال لڑکی کو بازیاب کر کے عزت و احترام کے ساتھ والدین کے سپرد کر دیا گیا۔

تفصیلات کے مطابق پیٹرولنگ چوکی چک نمبر 48 تھری-آر کے اے ایس آئی محمد نوید نے اپنی ٹیم کے ہمراہ LBDC پل کے مقام پر دورانِ سنیپ چیکنگ ایک مشکوک رکشہ کو روکا۔ رکشے میں موجود 15 سالہ لڑکی (ص) کو حفاظتی تحویل میں لے کر تحقیقات کی گئیں۔ انکوائری کے دوران معلوم ہوا کہ لڑکی میٹرک کی طالبہ اور لاہور کی رہائشی ہے، جس کا والد کچھ عرصہ قبل قتل ہو چکا ہے۔ لڑکی اپنی والدہ کے مبینہ ناروا سلوک سے دلبرداشتہ ہو کر ساہیوال میں مقیم رشتہ داروں کے ہاں جا رہی تھی۔

پیٹرولنگ پولیس نے فوری طور پر لڑکی کے اہلِ خانہ سے رابطہ کیا، جنہوں نے تصدیق کی کہ ان کی بیٹی گزشتہ صبح سے لاپتہ ہے۔ بعدازاں لڑکی کی والدہ، بھائی اور علاقہ معززین کی موجودگی میں صلح کروائی گئی اور لڑکی کو عزت و احترام کے ساتھ حقیقی ورثاء کے سپرد کر دیا گیا۔

اس کامیاب، انسانیت دوست اور عزت بچانے والی کارروائی پر ریجنل آفیسر پیٹرولنگ پولیس فتح احمد اور ڈسٹرکٹ آفیسر اصغر علی نے پیٹرولنگ ٹیم کو بھرپور شاباش اور حوصلہ افزائی سے نوازا۔ عوامی حلقوں نے بھی پولیس کی بروقت کارروائی کو سراہتے ہوئے خراجِ تحسین پیش کیا۔