Category: اوکاڑہ

اوکاڑہ (باغی ٹی وی، نامہ نگار ملک ظفر) معروف فائر فائٹر رانا نعمان نے کہا ہے کہ فائر فائٹنگ کی تربیت ہر نوجوان کے لیے نہایت ضروری ہے تاکہ ہنگامی حالات میں بروقت اور مؤثر اقدامات کیے جا سکیں۔ ان کا کہنا تھا کہ ہمارے معاشرے میں آگ لگنے کے واقعات میں قیمتی جانوں اور املاک کا ضیاع اکثر اس لیے ہوتا ہے کیونکہ عام افراد کو ابتدائی فائر سیفٹی کا علم نہیں ہوتا۔

رانا نعمان نے زور دیا کہ نوجوان نسل ملک کا مستقبل ہے، اگر انہیں فائر سیفٹی اور ایمرجنسی ریسپانس کی عملی تربیت دی جائے تو وہ نہ صرف اپنی حفاظت کر سکتے ہیں بلکہ دوسروں کی جانیں بچانے میں بھی کردار ادا کر سکتے ہیں۔ ان کا کہنا تھا کہ فائر فائٹنگ صرف ایک پیشہ نہیں بلکہ ایک قومی خدمت ہے، جسے جذبۂ انسانیت کے تحت اپنانا چاہیے۔

انہوں نے حکومت سے مطالبہ کیا کہ تمام تعلیمی اداروں میں فائر سیفٹی کی بنیادی تربیت کو نصاب کا حصہ بنایا جائے اور ہر ضلع میں جدید فائر ٹریننگ سنٹرز قائم کیے جائیں تاکہ نوجوانوں کو عملی مہارتیں سکھائی جا سکیں۔

ان کا مزید کہنا تھا کہ اگر ہر گھر میں کم از کم ایک فرد کو آگ بجھانے کے ابتدائی اصولوں کی تربیت حاصل ہو، تو کسی بھی ناگہانی حادثے کے نقصانات کو بڑی حد تک کم کیا جا سکتا ہے۔

رانا نعمان نے نوجوانوں سے اپیل کی کہ وہ فائر فائٹنگ کو بطور جذبہ، ذمہ داری اور قومی خدمت کے طور پر اپنائیں، تاکہ ہم ایک محفوظ اور باشعور معاشرہ تشکیل دے سکیں۔

دیپال پور (نامہ نگار امتیاز شاہین چوہدری)دیپال پور کے نواحی گاؤں لالو پور کے عوام کا دیرینہ مطالبہ بالآخر سردار ندیم حسین وٹو کی کوششوں سے پورا ہو گیا۔ مقامی ایم پی اے ملک علی عباس کھوکھر نے سردار ندیم وٹو کی درخواست پر گاؤں کے لیے باقاعدہ ترقیاتی فنڈز جاری کر دیے۔ گاؤں میں سولنگ اور نکاسی آب کی سہولیات نہ ہونے کی وجہ سے بارش کے موسم میں بزرگوں اور بچوں کو شدید دشواریوں کا سامنا تھا۔

سردار ندیم حسین وٹو نے اس مسئلے کو اپنی ترجیح بنایا اور مقامی ایم پی اے سے مسلسل رابطے میں رہے۔ میڈیا سے گفتگو کرتے ہوئے انہوں نے کہا کہ یہ کامیابی پورے گاؤں کی ہے، جس محبت اور عزت سے عوام نے مجھے نوازا وہ ہمیشہ یاد رکھوں گا۔ گاؤں کو جب بھی میری ضرورت ہوگی، میں 24 گھنٹے حاضر ہوں گا۔

انہوں نے ایم پی اے ملک علی عباس کھوکھر کا بھی شکریہ ادا کیا کہ انہوں نے عوامی مسئلے کو سنجیدگی سے لیا۔ گاؤں کے بزرگ سردار حنیف خاں نے اظہارِ مسرت کرتے ہوئے کہا کہ بارش کے دنوں میں گزرنا محال ہو جاتا تھا، مگر سردار ندیم وٹو نے میرے گھر سمیت پورے گاؤں کے لیے فنڈز جاری کروائے، جس پر ہم ان کے شکر گزار ہیں۔

اوکاڑہ (باغی ٹی وی، نامہ نگار ملک ظفر)اسسٹنٹ کمشنر رب نواز نے ستھرا پنجاب مہم کے تحت شہر کے مختلف مقامات کا دورہ کرتے ہوئے صفائی ستھرائی کے انتظامات کا جائزہ لیا۔ انہوں نے فیصل روڈ، اوورہیڈ برج اور صفدر شہید پارک میں صفائی ٹیموں کی کارکردگی کا معائنہ کیا اور انہیں سویپنگ اور سالڈ ویسٹ مینجمنٹ کے حوالے سے مؤثر اقدامات کی ہدایات دیں۔

اسسٹنٹ کمشنر رب نواز نے جنرل بس سٹینڈ پر صفائی انتظامات چیک کیے اور مسافروں کو بہتر سفری سہولیات و صاف ستھرا ماحول فراہم کرنے پر زور دیا۔ انہوں نے کہا کہ ستھرا پنجاب مہم کے تحت عوام کو معیاری میونسپل سروسز کی فراہمی ضلعی انتظامیہ کی اولین ترجیح ہے، اسی لیے صفائی انتظامات کی باقاعدہ نگرانی کا عمل مسلسل جاری ہے تاکہ شہر کو صاف، خوبصورت اور صحت مند بنایا جا سکے۔

اوکاڑہ (نامہ نگار ملک ظفر) ڈسٹرکٹ ایمرجنسی آفیسر انجینئر احتشام واہلہ نے عیدالاضحیٰ کی تعطیلات کے دوران ریسکیو 1122 اوکاڑہ کی کارکردگی رپورٹ جاری کرتے ہوئے بتایا کہ ریسکیو کو مجموعی طور پر 4197 کالز موصول ہوئیں، جن میں 899 ایمرجنسی کالز شامل تھیں۔

ایمرجنسیز میں 261 روڈ ٹریفک حادثات، 539 میڈیکل کیسز، 10 آگ لگنے کے واقعات، 24 کرائم اور 65 متفرق نوعیت کے حادثات شامل تھے۔ ان ایمرجنسیز میں مجموعی طور پر 954 افراد متاثر ہوئے، جن میں سے 408 کو موقع پر ہی ابتدائی طبی امداد فراہم کی گئی جبکہ 512 زخمیوں کو اسپتال منتقل کیا گیا۔ افسوسناک طور پر 34 افراد جان کی بازی ہار گئے۔

تحصیل وار تفصیلات کے مطابق تحصیل اوکاڑہ میں 628 ایمرجنسیز کے دوران 651 افراد کو سروس فراہم کی گئی، جن میں 140 روڈ حادثات، 417 میڈیکل، 4 آگ، 17 کرائم اور 50 دیگر واقعات شامل تھے۔

تحصیل دیپالپور میں 190 ایمرجنسیز میں 202 افراد متاثر ہوئے، جن میں 73 ٹریفک حادثات، 95 میڈیکل، 4 آگ، 7 کرائم اور 11 متفرق واقعات رپورٹ ہوئے۔

تحصیل رینالہ خورد میں 81 ایمرجنسیز کے دوران 101 افراد کو سروس فراہم کی گئی، جن میں 48 روڈ حادثات، 27 میڈیکل، 2 آگ اور 4 دیگر حادثات شامل تھے۔

پیشنٹ ریفرل سسٹم کے تحت ضلع بھر میں 34 مریضوں کو بہتر طبی سہولیات کے لیے منتقل کیا گیا، جن میں سے 19 کو ڈسٹرکٹ ہیڈکوارٹر ہسپتال اوکاڑہ جبکہ 15 کو دیگر اضلاع کے ہسپتالوں میں ریسکیو 1122 کے تربیت یافتہ عملے کی نگرانی میں منتقل کیا گیا۔

عیدالاضحیٰ کی تعطیلات کے دوران ضلع بھر کے تفریحی مقامات جیسے کہ پاک-انڈو بارڈر، ہیڈ سلیمانکی پارک، پیپلی پہاڑ فاریسٹ پارک اور دریاؤں و نہروں پر بھی ریسکیو 1122 اوکاڑہ کی جانب سے خصوصی انتظامات کیے گئے، جس کی بدولت کوئی بھی ڈوبنے کا واقعہ پیش نہ آیا۔

ڈسٹرکٹ ایمرجنسی آفیسر نے ریسکیو ٹیموں کی بروقت اور مؤثر کارکردگی کو سراہتے ہوئے کہا کہ عوام کی جان و مال کی حفاظت ریسکیو 1122 کی اولین ترجیح ہے۔

اوکاڑہ (نامہ نگار ملک ظفر) اسسٹنٹ کمشنر رب نواز نے عیدالاضحیٰ کے موقع پر صفائی کے انتظامات کا جائزہ لینے کے لیے قائم کردہ کیمپ کا دورہ کیا، جہاں شہریوں میں جانوروں کی آلائشیں اکٹھی کرنے کے لیے شاپرز تقسیم کیے گئے۔ اس موقع پر انہوں نے کلیکشن پوائنٹس کا معائنہ بھی کیا اور شہریوں سے اپیل کی کہ قربانی کے جانوروں کی آلائشیں گلیوں، محلوں اور سڑکوں پر پھینکنے کے بجائے دیے گئے شاپرز میں ڈال کر مقررہ پوائنٹس پر جمع کروائیں۔

اسسٹنٹ کمشنر نے 6/4 ایل میں قائم ڈمپنگ سائٹس کا بھی معائنہ کیا اور صفائی عملے کو ہدایت دی کہ تمام ایس او پیز کے مطابق فوری طور پر ڈمپنگ پوائنٹس کی تیاری مکمل کی جائے تاکہ عید کے ایام میں تعفن اور گندگی سے پاک ماحول یقینی بنایا جا سکے۔ انہوں نے واضح کیا کہ حکومت پنجاب کی ہدایت کے مطابق عوام کو صاف ستھرا ماحول فراہم کرنا اولین ترجیح ہے اور اس سلسلے میں کوئی کوتاہی برداشت نہیں کی جائے گی۔

اوکاڑہ (نامہ نگار ملک ظفر) صوبائی وزیر زراعت سید عاشق حسین کرمانی کی زیر صدارت ڈسٹرکٹ کمپلیکس میں اہم اجلاس منعقد ہوا جس میں ترقیاتی منصوبوں اور عیدالاضحیٰ صفائی پلان پر تفصیلی جائزہ لیا گیا۔ اجلاس میں ڈپٹی کمشنر احمد عثمان جاوید، ایڈیشنل ڈپٹی کمشنر فنانس پلاننگ چوہدری عبدالجبار گجر، ایکسین ہائی وے، ایکسین پی ایچ ای، ایکسین لوکل گورنمنٹ، سی ای او ہیلتھ ڈاکٹر سیف اللہ وڑائچ، سی ای او ایجوکیشن محمد یوسف، اسسٹنٹ ڈائریکٹر پلاننگ محمد رضوان وارث سمیت متعلقہ محکموں کے افسران نے شرکت کی۔

اجلاس میں اے ڈی پی اور ایس ڈی جیز 2024-25 کے تحت سڑکوں کی تعمیر و مرمت، سیوریج، ڈرینج، ٹف ٹائل، واٹر فلٹریشن پلانٹس، سپورٹس سٹیڈیمز اور مراکز صحت کے منصوبوں پر بریفنگ دی گئی۔ صوبائی وزیر نے حجرہ شاہ مقیم تا حویلی لکھا روڈ اور اختر آباد تا شیرگڑھ روڈ پر ترقیاتی کام کی سست روی پر سخت برہمی کا اظہار کیا اور کہا کہ دونوں منصوبے جلد از جلد مکمل کیے جائیں، جبکہ ڈپٹی کمشنر کو ان سڑکوں کی انسپکشن کروانے کی ہدایت بھی کی۔

انہوں نے واضح کیا کہ تعمیراتی کاموں میں معیار پر کسی قسم کا سمجھوتہ برداشت نہیں کیا جائے گا۔ وزیر موصوف نے کہا کہ وزیراعلیٰ پنجاب مریم نواز شریف جدید تقاضوں کے مطابق عوامی فلاح و بہبود کے منصوبوں پر بھرپور توجہ دے رہی ہیں اور ان منصوبوں پر بھاری فنڈز کے ساتھ ساتھ سخت مانیٹرنگ بھی کی جا رہی ہے۔ انہوں نے مزید کہا کہ ترقیاتی سکیمیں عوام کی سہولت کا ذریعہ ہیں، اس لیے ان میں تاخیر کسی صورت برداشت نہیں کی جائے گی۔ تمام محکمے کام کی رفتار تیز کریں اور جلد از جلد منصوبوں کو مکمل کرنے کے لیے تمام تر وسائل بروئے کار لائیں۔

دیپالپور (باغی ٹی وی ،نامہ نگار امتیاز شاہین چوہدری)ملک بھر کی طرح دیپالپور اور گردونواح میں بھی عید الاضحی کے موقع پر حسب سابق بڑے پیمانے پر اجتماعات کی تیاریاں مکمل کر لی گئی ہیں۔ رواں برس بھی مختلف مکاتبِ فکر کی 60 سے زائد مساجد و امام بارگاہوں میں نماز عید الاضحی کے اوقات کا تفصیلی شیڈول جاری کر دیا گیا ہے، جس کا مقصد اہل اسلام کی سہولت اور بروقت اطلاع فراہم کرنا ہے۔

پریس کلب دیپالپور اور انجمن صحافیاں (رجسٹرڈ) 1991ء کے صدر حاجی محمد اشفاق چوہدری کی ہدایات پر جنرل سیکرٹری مرزا فاروق احمد سلفی نے حسب سابق خصوصی محنت اور لگن سے تمام اہم مساجد و مقامات کے نماز عید الاضحی کے اوقات یکجا کر کے جاری کیے ہیں۔ موسم کی شدت کے پیش نظر بیشتر مقامات پر نماز عید الفجر کے فوراً بعد ادا کی جائے گی تاکہ نمازی شدید گرمی سے محفوظ رہ سکیں۔

ذیل میں دیپالپور شہر، گردونواح اور تحصیل بھر کی اہم مساجد و مقامات کے نماز عید الاضحی کے اوقات اور پیش نماز حضرات کے نام تفصیل کے ساتھ پیش کیے جا رہے ہیں:

جامع شاہی مسجد دیپالپور: مولانا سید انظر محمود بخاری – 7:00 بجے صبح

جامع مسجد فریدیہ: علامہ قاری مسرور احمد – 8:00 بجے صبح

جامع مسجد نوری، ٹینکی گراؤنڈ: مولانا پروفیسر قاری ساجد ستار نوری – 6:30 بجے صبح

جامع مسجد زیب النساء، نوبہار کالونی: پروفیسر قاری روح الامین – 5:30 بجے صبح

جامع مسجد صداقت یوسف رضوی چوک: مولانا محمد ادریس اثری – 6:30 بجے صبح

جامع مسجد امام الانبیاء ﷺ، حامد شاہ کالونی: حافظ محمد عمار حسین – 6:45 بجے صبح

جامع مسجد محمدی اہلحدیث، رتہ کھنہ روڈ: مولانا حمید احمد لکھوی – 6:00 بجے صبح

جامع مسجد ابو بکر، بستی نور محمد: 7:00 بجے صبح

جامع مسجد ختم نبوت، گلبرگ ٹاؤن کے نزدیک: مولانا فضل الرحمٰن – 6:30 بجے صبح

جامع مسجد چشتیہ خلیل آباد کالونی: حافظ محمد ظہور نقشبندی – 8:00 بجے صبح

مرکزی جامع مسجد امیر حمزہ، فاخر شاہ کالونی: قاری محمد حذیفہ – 7:30 بجے صبح

امام بارگاہ ایوان حسین، محلہ لالو جسرائے (فقہ جعفریہ): رائے عامر حسین کھرل – 7:00 بجے صبح

امام بارگاہ سجادیہ دیپالپور: علامہ حسن طاہری – 7:00 بجے صبح

اس کے علاوہ دیگر درجنوں مساجد، مدرسوں اور تبلیغی مراکز جیسے تبلیغی مرکز بستی نیاز آباد، جامع مسجد نورالسلام، جامع مسجد ربانی، جامع مسجد معاذ بن جبل، جامع مسجد انوار رحمت، جامع مسجد تاج کالونی، جامع مسجد سرور کونین ﷺ، جامع مسجد مزدلفہ، اور جامع مسجد گورنمنٹ کالونی وغیرہ میں بھی نماز عید مقررہ اوقات میں ادا کی جائے گی۔

عید الاضحی کے ان اجتماعات میں تمام مکاتب فکر کے علمائے کرام اپنے اپنے مسالک کے مطابق نماز عید الاضحی پڑھائیں گے۔ انتظامیہ اور مقامی شہریوں نے عوام سے گزارش کی ہے کہ وہ وقت کی پابندی کرتے ہوئے نماز میں شرکت کریں، صفائی کا خیال رکھیں، اور قربانی کے جانوروں کی آلائشیں مقررہ مقامات پر ٹھکانے لگائیں تاکہ ماحول صاف ستھرا رہے۔

عید کے اجتماعات کی فہرست کے مطابق شہر کے مختلف حصوں میں نماز کے اوقات صبح 5:30 سے لے کر 8:00 بجے تک ہیں، اور لوگوں کی سہولت کے لیے مختلف مکاتب فکر کی عبادت گاہوں میں متعدد وقت رکھے گئے ہیں تاکہ ہر فرد اپنی سہولت سے نماز ادا کر سکے۔

(ان شاء اللہ الرحمن) ان تمام مقامات پر عید الاضحی کی نماز باجماعت ادا کی جائے گی، اور شہر بھر میں عید کے ان روح پرور اجتماعات کے پرامن انعقاد کے لیے شہری انتظامیہ اور سیکیورٹی ادارے متحرک ہیں۔