Category: اوکاڑہ

اوکاڑہ (نامہ نگار ملک ظفر) قومی شاہراہ پر اڈہ کسان کے قریب افسوسناک ٹریفک حادثے میں ایک نوجوان جاں بحق جبکہ دوسرا شدید زخمی ہو گیا۔ حادثہ اس وقت پیش آیا جب ایک نامعلوم تیز رفتار کار نے موٹر سائیکل کو ٹکر مار دی اور موٹرسائیکل سواروں کو کچلتے ہوئے موقع سے فرار ہو گئی۔

تفصیلات کے مطابق موٹر سائیکل نمبری AYA-8328 پر سوار 32 سالہ محمد شہزاد اور 33 سالہ محمد وسیم قومی شاہراہ پر سفر کر رہے تھے کہ اچانک ایک بے قابو کار نے اڈہ کسان کے قریب ان کی موٹر سائیکل کو ٹکر مار دی۔ تصادم کے نتیجے میں محمد شہزاد موقع پر ہی جاں بحق ہو گیا جبکہ محمد وسیم شدید زخمی ہو گیا۔

دونوں افراد کا تعلق دبئی ٹاؤن لاہور سے بتایا گیا ہے۔ واقعے کی اطلاع ملتے ہی ریسکیو 1122 اور پولیس کی ٹیمیں جائے وقوعہ پر پہنچ گئیں۔ ریسکیو اہلکاروں نے جاں بحق نوجوان کی لاش اور زخمی کو فوری طور پر قریبی ہسپتال منتقل کیا، جبکہ پولیس نے نامعلوم کار اور ڈرائیور کی تلاش شروع کر دی ہے۔

پولیس نے شواہد اکٹھے کر کے حادثے کی جامع تحقیقات کا آغاز کر دیا ہے، جبکہ علاقے میں واقعہ پر شدید افسوس کا اظہار کیا جا رہا ہے۔

اوکاڑہ (نامہ نگار ملک ظفر) اوکاڑہ میں جی ٹی روڈ پر افسوسناک اور دل دہلا دینے والا حادثہ پیش آیا جہاں ایک باپ اپنے تین معصوم بچوں کو اسکول چھوڑنے جا رہا تھا کہ تیز رفتار ٹرالر کی ٹکر نے سب کچھ ختم کر دیا۔ حادثے میں باپ سمیت دو بیٹے اور ایک بیٹی موقع پر ہی جاں بحق ہو گئے، واقعے نے علاقے کو سوگ میں مبتلا کر دیا۔

تفصیلات کے مطابق چک نمبر 24 ٹو آر کا رہائشی 43 سالہ محمد ندیم اپنے تین بچوں 10 سالہ آریان، 8 سالہ ایان اور 6 سالہ عائزہ فاطمہ کو موٹر سائیکل پر اسکول چھوڑنے جا رہا تھا۔ جب وہ جی ٹی روڈ پر پنجاب کالج اوکاڑہ کے قریب پہنچا تو تیز رفتار اور بے قابو ٹرالر (نمبری EA-7170) نے ان کی موٹر سائیکل کو زور دار ٹکر مار دی۔ تصادم اتنا شدید تھا کہ موٹر سائیکل سوار زمین پر گر گئے اور ٹرالر ان پر چڑھ دوڑا، جس کے نتیجے میں چاروں افراد موقع پر ہی دم توڑ گئے۔

حادثے کی اطلاع ملتے ہی ریسکیو 1122 اور پولیس موقع پر پہنچ گئی۔ ریسکیو ٹیموں نے لاشوں کو ضلعی ہسپتال منتقل کیا جبکہ پولیس نے جائے وقوعہ سے شواہد اکٹھے کرتے ہوئے ٹرالر کو اپنی تحویل میں لے لیا۔ ابتدائی اطلاعات کے مطابق، ٹرالر ڈرائیور موقع سے فرار ہو گیا جس کی تلاش جاری ہے۔

جاں بحق ہونے والے افراد کی اطلاع ملتے ہی پورے گاؤں میں کہرام مچ گیا۔ مقتول بچوں کے اسکول میں بھی سوگ کی فضا چھا گئی۔ اہل علاقہ اور عزیز و اقارب کی آنکھیں اشکبار ہیں اور ہر طرف غم و اندوہ کا سماں ہے۔ شہریوں نے حکومت سے مطالبہ کیا ہے کہ ایسے حادثات کی روک تھام کے لیے سخت قوانین نافذ کیے جائیں اور غفلت کے مرتکب ڈرائیور کو جلد گرفتار کر کے قرار واقعی سزا دی جائے۔

اوکاڑہ (نامہ نگار ملک ظفر) بلوچستان کے علاقے خضدار میں دہشت گردی کا نشانہ بننے والی مسافر بس میں اوکاڑہ کے نواحی گاؤں 52/2-ایل کے رہائشی دو بہن بھائی بھی سوار تھے۔ افسوسناک واقعے میں ساتویں جماعت کی طالبہ، سات سالہ حفضہ کوثر افتخار موقع پر شہید ہوگئی، جبکہ اس کا چھوٹا بھائی، چھٹی جماعت کا طالبعلم محمد حذیفہ افتخار شدید زخمی ہوگیا جسے فوری طور پر سی ایم ایچ کوئٹہ منتقل کر دیا گیا۔

دونوں بچے حصولِ تعلیم کے سلسلے میں اپنے والد، پاک آرمی کے حوالدار افتخار کے ساتھ خضدار میں مقیم تھے۔ حملے کے بعد شہید بچی کا جسد خاکی اس کے والد آبائی گاؤں اوکاڑہ لے کر پہنچے، جہاں نمازِ جنازہ میں اہلِ علاقہ کی بڑی تعداد نے شرکت کی اور شہداء کو خراجِ عقیدت پیش کیا۔

ورثاء نے واقعے پر شدید غم و غصے کا اظہار کرتے ہوئے کہا کہ معصوم بچوں کے خون کا بدلہ ضرور لیا جائے گا، وہ دہشتگردی کے خلاف اپنی افواجِ پاکستان کے شانہ بشانہ کھڑے ہیں۔ انہوں نے واضح پیغام دیا کہ اس قسم کی بزدلانہ کارروائیاں قوم کے حوصلے پست نہیں کر سکتیں۔

یہ افسوسناک واقعہ نہ صرف متاثرہ خاندان بلکہ پوری قوم کے لیے دکھ اور صدمے کا باعث بنا ہے۔ عوامی حلقوں اور سوشل میڈیا پر بھی معصوم شہید بچی کے لیے دعاؤں اور اظہارِ افسوس کا سلسلہ جاری ہے، جبکہ دہشتگردوں کے خلاف سخت ترین کارروائی کا مطالبہ زور پکڑ رہا ہے۔

اوکاڑہ (نامہ نگار ملک ظفر) تھانہ گوگیرہ کی حدود میں پولیس اور ڈاکوؤں کے درمیان ہونے والے مقابلے میں ایک ڈاکو اپنے ہی ساتھیوں کی فائرنگ کا نشانہ بن کر ہلاک ہوگیا جبکہ دو ملزمان فرار ہونے میں کامیاب ہوگئے۔ پولیس نے نعش کو تحویل میں لے کر ہسپتال منتقل کر دیا ہے۔

پولیس ترجمان کے مطابق تھانہ گوگیرہ کی پولیس معمول کے گشت پر تھی کہ جھٹیانہ پل کے قریب تین مسلح ڈاکوؤں نے پولیس کو دیکھتے ہی اندھا دھند فائرنگ شروع کر دی۔ پولیس نے بھی حفاظت خود اختیاری کے تحت جوابی فائرنگ کی۔ فائرنگ کے تبادلے میں ایک ڈاکو اپنے ہی ساتھیوں کی گولیوں کا نشانہ بن کر موقع پر ہلاک ہوگیا۔

پولیس ذرائع کے مطابق ہلاک ہونے والے ڈاکو کی شناخت عدنان عرف دانی کے نام سے ہوئی ہے، جو 19 سنگین جرائم میں مطلوب تھا اور دو مقدمات میں عدالت سے سزا یافتہ بھی قرار پایا تھا۔ واقعے کے بعد پولیس نے علاقے میں سرچ آپریشن شروع کر دیا ہے تاکہ فرار ہونے والے ملزمان کو گرفتار کیا جا سکے۔ پولیس کا کہنا ہے کہ جلد ہی دونوں ڈاکوؤں کو قانون کی گرفت میں لے لیا جائے گا۔

ڈی پی او محمد راشد نے تھانہ گوگیرہ کی پولیس ٹیم کو بروقت کارروائی اور جرأت مندانہ اقدام پر شاباش دی ہے، اور ہدایت کی ہے کہ فرار ہونے والے ملزمان کی گرفتاری کے لیے تمام ممکنہ وسائل بروئے کار لائے جائیں۔

اوکاڑہ (نامہ نگار ملک ظفر) پنجاب فوڈ اتھارٹی خوراک کے معیار کو بہتر بنانے کیلئے متحرک، ایڈیشنل ڈائریکٹر جنرل آپریشنز آصف علی ڈوگر نے ٹیم کے ہمراہ راؤف مارکیٹ میں قائم بیکری پر چھاپہ مارا جہاں خوراک کی تیاری میں ممنوعہ چائنیز نمک استعمال کیا جا رہا تھا۔ کارروائی کے دوران ناقص صفائی، پروڈکشن ایریا میں واش روم کی موجودگی اور فریزر میں کاکروچ پائے گئے، جس پر ممنوعہ اجزاء کو موقع پر تلف کرتے ہوئے بیکری مالک کو دو لاکھ روپے کا جرمانہ عائد کر دیا گیا۔

ایڈیشنل ڈائریکٹر جنرل نے موقع پر موجود ٹیم کو ہدایت دی کہ شہریوں کو معیاری اور محفوظ خوراک کی فراہمی میں کوئی غفلت برداشت نہیں کی جائے گی۔ انہوں نے کہا کہ ناقص خوراک فروخت کرنے والے عناصر کے خلاف بلاامتیاز کارروائیاں جاری رہیں گی۔

ڈی جی پنجاب فوڈ اتھارٹی محمد عاصم جاوید نے اس موقع پر اپنے بیان میں کہا کہ فوڈ اتھارٹی خوراک سے وابستہ ہر چھوٹے بڑے کاروبار کی کڑی نگرانی کر رہی ہے۔ ان کا کہنا تھا کہ صحت دشمن عناصر کے گرد گھیرا مزید تنگ کیا جا رہا ہے تاکہ عوام کو بیماریوں سے بچایا جا سکے اور خالص و محفوظ خوراک کی فراہمی یقینی بنائی جا سکے۔

عوامی حلقوں کی جانب سے فوڈ اتھارٹی کی بروقت کارروائی کو سراہا گیا ہے اور مطالبہ کیا گیا ہے کہ اس قسم کی چیکنگ کا دائرہ کار مزید وسیع کیا جائے تاکہ ناقص خوراک فروخت کرنے والوں کے خلاف سخت کارروائی عمل میں لائی جا سکے۔