Category: اوکاڑہ

اوکاڑہ (نامہ نگار ملک ظفر) ڈپٹی کمشنر احمد عثمان جاوید اور ڈی پی او راشد ہدایت کی زیر صدارت ضلعی امن کمیٹی کا اجلاس منعقد ہوا۔ اجلاس میں ایڈیشنل ڈپٹی کمشنر ریونیو محمد ابراہیم ارباب، ایڈیشنل ڈپٹی کمشنر جنرل حافظ محمد طیب، سول ڈیفنس آفیسر وقار اکبر، صدر بار ایسوسی ایشن اصغر خان، صدر انجمن تاجران شیخ ریاض سمیت مختلف مسالک کے علمائے کرام اور امن کمیٹی کے ممبران نے شرکت کی۔

اجلاس میں امن عامہ کی صورتحال، رمضان المبارک، جمعۃ الوداع اور عید الفطر کے حوالے سے سیکیورٹی انتظامات پر تبادلہ خیال کیا گیا۔ ڈپٹی کمشنر احمد عثمان جاوید نے کہا کہ اسلام محبت اور امن کا درس دیتا ہے، ناموس رسالت کا تحفظ ہمارے ایمان کا حصہ ہے۔ امن عامہ کو برقرار رکھنے کے لیے ہر مکتبہ فکر کو اپنا کردار ادا کرنا ہوگا۔ دہشت گردی اور فرقہ واریت کی روک تھام ضروری ہے۔ انہوں نے کہا کہ اوکاڑہ ایک پرامن شہر ہے اور کسی بھی انتشار کے خلاف سب کو متحد ہونا ہوگا۔

ڈی پی او راشد ہدایت نے کہا کہ امن و امان کے لیے تمام وسائل بروئے کار لائے جائیں گے۔ کسی کو شر انگیزی کی اجازت نہیں دی جائے گی۔ انتشار کی سرکوبی کے لیے اداروں کے ساتھ ساتھ علماء کرام اور امن کمیٹی کے ممبران بھی اپنا کردار ادا کریں۔

اجلاس کے اختتام پر دہشت گردی سے نبردآزما قومی سلامتی کے اداروں، پاک فوج اور ملکی ترقی و سلامتی کے لیے خصوصی دعا کی گئی۔

اوکاڑہ (نامہ نگار ملک ظفر) ڈپٹی کمشنر احمد عثمان جاوید کی ہدایت پر ضلعی انتظامیہ کے افسران عوام کو ریلیف فراہم کرنے کے لیے متحرک ہیں۔ ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر نے رمضان المبارک میں عوام کو کنٹرول ریٹس پر اشیائے خورونوش کی فراہمی کے سلسلے میں متعدد مقامات پر دکانوں کی چیکنگ کی۔

چیکنگ کے دوران مہنگے داموں اشیائے ضروریہ فروخت کرنے والے دکانداروں کو جرمانے بھی کیے گئے۔ ایڈیشنل ڈپٹی کمشنر نے کہا کہ ماہ صیام میں مہنگی اشیاء کی فروخت کے ذریعے عوام کے ساتھ زیادتی ہرگز برداشت نہیں کی جائے گی۔ انہوں نے خبردار کیا کہ اس گھناؤنے فعل میں ملوث افراد کو بھاری جرمانے کرنے کے ساتھ ساتھ ان کے خلاف مقدمات کا اندراج بھی کروایا جائے گا۔

انہوں نے دکانداروں کو تنبیہ کرتے ہوئے کہا کہ دکانوں میں نمایاں جگہوں پر ریٹ لسٹیں آویزاں کی جائیں اور ان لسٹوں پر سختی سے عمل درآمد کو بھی یقینی بنایا جائے۔ مزید برآں، تمام پرائس کنٹرول مجسٹریٹس ضلع بھر میں پرائس چیکنگ کے عمل میں مصروف ہیں اور مقررہ نرخوں پر اشیائے ضروریہ کی فراہمی کے سلسلے میں فیلڈ انسپیکشنز میں عوامی ریلیف کو مدنظر رکھتے ہوئے کاروائیاں بھی کر رہے ہیں۔

اوکاڑہ (نامہ نگار ملک ظفر) ڈی پی او اوکاڑہ محمد راشد ہدایت نے تھانہ گوگیرہ کا اچانک دورہ کیا، جہاں انہوں نے فرنٹ ڈیسک، ریکارڈ، حوالات اور تھانے کی عمارت سمیت تمام امور کا تفصیلی جائزہ لیا۔

انہوں نے تفتیشی افسران کو ہدایت دی کہ اشتہاری مجرمان اور سنگین مقدمات میں ملوث ملزمان کو فوری گرفتار کر کے مقدمات کو میرٹ پر یکسو کیا جائے۔ ڈی پی او نے واضح کیا کہ عوامی خدمت عبادت ہے اور شہریوں کے جان و مال کے تحفظ پر کوئی سمجھوتہ نہیں کیا جائے گا۔

انہوں نے مزید کہا کہ تھانوں کے دوروں کا مقصد پولیس کی کارکردگی کو جانچنا اور استعداد کار میں اضافہ کرنا ہے تاکہ قانون کی عملداری کو مزید مؤثر بنایا جا سکے۔

اوکاڑہ (نامہ نگار ملک ظفر) ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر نے شہر کے مختلف مقامات پر اشیائے ضروریہ کے نرخوں کی جانچ کی اور گرانفروشی میں ملوث دکانداروں کے خلاف سخت کارروائی کا عندیہ دیا۔

چوہدری عبدالجبار گجر نے واضح کیا کہ ماہِ رمضان کے دوران اشیائے خورونوش کی قیمتوں میں اضافے کو کسی صورت برداشت نہیں کیا جائے گا۔ جو افراد گرانفروشی میں ملوث پائے گئے، انہیں بھاری جرمانے اور قانونی کارروائی کا سامنا کرنا پڑے گا۔

ایڈیشنل ڈپٹی کمشنر نے اس عزم کا اظہار کیا کہ عوام کو ریلیف فراہم کرنے کے لیے شہر کی مارکیٹس اور دکانوں کی مسلسل مانیٹرنگ جاری رہے گی، تاکہ شہریوں کو سرکاری نرخوں پر اشیائے ضروریہ کی فراہمی یقینی بنائی جا سکے۔

اوکاڑہ (نامہ نگار ملک ظفر) ڈپٹی کمشنر احمد عثمان جاوید کی ہدایت پر ضلعی انتظامیہ رمضان المبارک میں عوامی ریلیف کے لیے سرگرم ہو گئی۔ ایڈیشنل ڈپٹی کمشنر جنرل نے شہر کے مختلف کریانہ مارٹس کا دورہ کرتے ہوئے چینی کے نرخ چیک کیے اور مہنگے داموں فروخت پر دکانداروں کو 50 ہزار روپے جرمانہ عائد کر دیا۔

اسی طرح ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر نے دودھ اور دہی کی قیمتوں کو کنٹرول ریٹس پر یقینی بنانے کے لیے مختلف دکانوں کی چیکنگ کی۔

ترجمان ضلعی انتظامیہ کا کہنا ہے کہ رمضان المبارک کے دوران مصنوعی مہنگائی پیدا کرنے والوں کے خلاف سخت ایکشن لیا جائے گا، بھاری جرمانے اور مقدمات درج کیے جائیں گے تاکہ عوام کو حقیقی ریلیف فراہم کیا جا سکے۔

اوکاڑہ (نامہ نگار ملک ظفر) ڈسٹرکٹ ایمرجنسی آفیسر انجینئر احتشام کی زیر صدارت سنٹرل اسٹیشن اوکاڑہ میں ماہانہ کارکردگی اجلاس منعقد ہوا۔ اجلاس میں ریسکیو 1122 اوکاڑہ کی گزشتہ ماہ کی کارکردگی رپورٹ پیش کی گئی۔

رپورٹ کے مطابق ریسکیو 1122 اوکاڑہ کو گزشتہ ماہ کل 14836 کالز موصول ہوئیں، جن میں 4567 ایمرجنسی کالز تھیں۔ ان میں 1021 روڈ ٹریفک حادثات، 3039 میڈیکل ایمرجنسیز، 49 آگ لگنے کے واقعات، 91 کرائم اور 367 دیگر حادثات شامل تھے۔

روڈ ٹریفک حادثات میں 1174 افراد متاثر ہوئے، جن میں سے 12 افراد جان کی بازی ہار گئے۔ 632 افراد کو موقع پر ہی ابتدائی طبی امداد دی گئی اور 530 متاثرین کو ہسپتال منتقل کیا گیا۔ آگ لگنے کے 49 واقعات میں 31 کمرشل ایریا، 14 رہائشی علاقے اور 4 دیگر مقامات پر پیش آئے۔ ریسکیو 1122 نے تقریباً 27 ملین روپے سے زائد کی املاک کو محفوظ بنایا۔

ڈسٹرکٹ ایمرجنسی آفیسر نے ریسکیو 1122 کے عملے کی کارکردگی کو سراہا اور شہریوں سے اپیل کی کہ ایمرجنسی کی صورت میں فوری طور پر ریسکیو 1122 سے رابطہ کریں۔

اوکاڑہ، باغی ٹی وی( نامہ نگار ملک ظفر)رمضان سہولت بازاروں میں اشیائے خوردونوش کے وزن اور نرخوں کی چیکنگ

ڈپٹی کمشنر احمد عثمان جاوید کی ہدایات پر انٹرپرائزز ویٹ اینڈ میئرز ڈیپارٹمنٹ کے افسران نے رمضان سہولت بازاروں میں اشیائے خوردونوش کے وزن اور نرخوں کی جانچ پڑتال کی۔

ڈسٹرکٹ آفیسر انٹرپرائزز ویٹ اینڈ میئرز خالد جاوید بھٹی نے تحصیل اوکاڑہ کے مختلف رمضان بازاروں کا دورہ کیا اور مختلف سٹالز پر اشیائے خوردونوش کے وزن اور ناپ تول کے پیمانوں کا جائزہ لیا۔

اس موقع پر انہوں نے کہا کہ رمضان سہولت بازار عوامی خدمت کے آئینہ دار ہیں، جہاں اشیائے ضروریہ کی کوالٹی اور وزن پر کوئی سمجھوتہ نہیں کیا جائے گا۔ انہوں نے واضح کیا کہ تمام سٹالز پر درست پیمانے استعمال کیے جائیں اور خریداروں کو ناپ تول کے مطابق اشیاء فراہم کی جائیں۔

اوکاڑہ (نامہ نگارملک ظفر) ریجنل یونین آف جرنلسٹس ضلع اوکاڑہ اور ڈی یو جے کے نو منتخب عہدیداران کی تقریب حلف برداری بلدیہ ہال اوکاڑہ میں منعقد ہوئی، جس میں آر یو جے پاکستان کے قائدین سمیت مختلف شعبوں کی نمایاں شخصیات نے شرکت کی۔

تقریب میں ریجنل یونین آف جرنلسٹس پاکستان کے مرکزی سینئر نائب صدر سید طاہر احمد شاہ، سیکرٹری اطلاعات سید شہزاد نقوی، صوبائی صدر ویسٹ پنجاب رانا خالد محمود، جنرل سیکرٹری جنوبی پنجاب رضوان الحسن قریشی اور پیپلز پارٹی کے رہنما سید علی حسنین نقوی نے حلف لیا۔

اس موقع پر ایڈیشنل ڈپٹی کمشنر فنانس چوہدری جبار گجر، مسلم لیگ (ن) کے رہنما چوہدری فیاض ظفر، پرنسپل کیڈٹ کالج عامر روف، ڈسٹرکٹ الیکشن کمشنر چوہدری شفیق، ڈپٹی ڈائریکٹر انفارمیشن سید سلمان شاہ، ڈی ایس پی لیگل تصدق کچھی، صدر غلہ منڈی چوہدری حبیب الحق، ضلعی صدر پی ایم ایل (ق) علی عمران چوہدری، ممبر ڈسٹرکٹ امن کمیٹی قاری سعید عثمانی، عوامی پریس کلب کے بانی آصف کھوکھر اور سینئر صحافی ملک ظفر اقبال و عمر فاروق سمیت ضلع اوکاڑہ کے 21 پریس کلبز کے عہدیداران نے بھی شرکت کی۔

تقریب میں صحافیوں کے کردار، میڈیا کی آزادی اور درپیش چیلنجز پر بھی گفتگو کی گئی۔