Category: اوکاڑہ

اوکاڑہ (باغی ٹی وی نامہ نگار ملک ظفر) ڈپٹی کمشنر کیپٹن (ر) فرخ عتیق خان نے کہا ہے کہ وزیر اعلیٰ پنجاب مریم نواز شریف کی ہدایت پر زراعت کے شعبے سے منسلک کسانوں کو سہولیات فراہم کرنے کے لیے بڑے اقدامات کیے جا رہے ہیں۔ اس سلسلے میں زراعت کے شعبے میں اربوں روپے کے پیکج بھی متعارف کرائے جا رہے ہیں۔

یہ بات انہوں نے کسان تنظیموں اور کولڈ اسٹوریج کے نمائندگان کے جائزہ اجلاس کی صدارت کرتے ہوئے کہی۔ اجلاس میں ڈپٹی ڈائریکٹر زراعت توسیع محمد اعجاز، سیکریٹری مارکیٹ کمیٹی، کولڈ اسٹوریج مالکان کے نمائندے چوہدری طاہر صدیق، کسان تنظیموں کے نمائندے غلام مصطفيٰ وٹو، ملک یاسین جھجھ، اور میاں علی حسن صدر پاکستان مسلم لیگ ن کسان ونگ سمیت دیگر متعلقہ افسران بھی موجود تھے۔

اجلاس میں کولڈ اسٹوریج مالکان اور کسان تنظیموں کے نمائندوں نے کولڈ اسٹوریج میں رکھی جانے والی اجناس کے نرخوں کے تعین کے لیے اپنی گذارشات پیش کیں۔ ڈپٹی کمشنر نے کہا کہ کولڈ اسٹوریج میں اجناس کے رکھنے کے سلسلے میں نرخوں کے تعین کے لیے ایک طریقہ کار وضع کیا جائے گا۔ انہوں نے کولڈ اسٹوریج مالکان کو ہدایت کی کہ وہ جائز منافع کے لیے دیانتداری سے کام کریں اور کسانوں سے مقررہ نرخوں سے زائد رقم ہر گز وصول نہ کریں۔

ڈپٹی کمشنر کے اس اقدام سے کسانوں کو بہتر سہولیات فراہم کرنے اور اجناس کے نرخوں میں شفافیت یقینی بنانے کی توقع کی جا رہی ہے، جس سے زراعت کے شعبے میں بہتری آئے گی۔

اوکاڑہ (باغی ٹی وی، نامہ نگار ملک ظفر) پاکستان کی معروف فرٹیلائزر کمپنی اینگرو فرٹیلائزرز نے دیپالپور میں کسانوں اور ڈیلرز کے لیے ایک خصوصی سیشن کا انعقاد کیا جس کا مقصد زرعی شعبے میں درپیش چیلنجوں سے نمٹنے اور جدید حل تلاش کرنا تھا۔ اس سیشن میں اینگرو کی موبائل لیب کا لائیو مظاہرہ کیا گیا، جو موقع پر ہی مٹی اور پانی کی جانچ کی خدمات فراہم کرتی ہے۔

موبائل لیب کی یہ جدید سہولت کسانوں کو کھاد کے بہتر استعمال کے لیے ڈیٹا پر مبنی سفارشات فراہم کرتی ہے، جس سے مٹی کی متوازن غذائیت اور فصل کی پیداوار میں اضافہ ممکن ہوتا ہے۔ یہ اقدام کسانوں کو بااختیار بناتا ہے تاکہ وہ اپنی زمین کی ضروریات کے مطابق کھاد کا استعمال کریں اور زیادہ پیداوار حاصل کر سکیں۔

اینگرو فرٹیلائزرز کے چیف ایگزیکٹو آفیسر علی راٹھور نے اس موقع پر خطاب کرتے ہوئے زرعی ویلیو چین میں کسانوں اور ڈیلرز کے اہم کردار کو تسلیم کیا۔ انہوں نے کہا کہ کمپنی کا مقصد اپنے ڈیلر نیٹ ورک اور کسانوں کو جدید آلات اور وسائل کی فراہمی ہے تاکہ وہ بہتر منصوبہ بندی کر سکیں، کم لاگت میں زیادہ پیداواری صلاحیت حاصل کریں اور باخبر فیصلے کر سکیں۔ انہوں نے زرعی ترقی کے لیے اینگرو کے اقدامات پر بھی روشنی ڈالی۔

اس سیشن میں متعدد ممتاز کاشت کاروں نے شرکت کی، جن میں راؤ عبد الکریم ٹیپو، چوہدری طاہر ارشاد، احمد رضا خان، راؤ فیاض اسلم خاں، راؤ عمران، رانا سعید خان، سید ساجد شاہ، سید نور حسن شاہ اور حاجی شعبان شامل تھے۔

اینگرو کا یہ اقدام زرعی شعبے میں ترقی اور کسانوں کی فلاح کے لیے ایک اہم سنگ میل ثابت ہو گا۔

اوکاڑہ (باغی ٹی وی نامہ نگار ملک ظفر) چیف ایگزیکٹو افسر محکمہ صحت ڈاکٹر سیف اللہ وڑائچ نے ڈسٹرکٹ ہیڈ کوارٹر ہسپتال ساؤتھ سٹی اوکاڑہ اور تحصیل ہیڈ کوارٹر ہسپتال رینالہ خورد کا دورہ کیا۔ اس دورے کا مقصد ہسپتالوں میں فراہم کی جانے والی طبی سہولیات اور انتظامات کا جائزہ لینا تھا۔

ڈپٹی کمشنر کیپٹن (ر) فرخ عتیق خان کی ہدایات پر ہونے والے اس دورے میں ڈاکٹر سیف اللہ وڑائچ نے ہسپتالوں کی مختلف شعبہ جات کا معائنہ کیا، جن میں ایمرجنسی، میڈیسن سٹورز، چلڈرن وارڈ، سرجیکل وارڈ، لیبارٹریز اور ایکسرے روم شامل تھے۔ انہوں نے مریضوں اور ان کے لواحقین سے ملاقات کی اور ہسپتال انتظامیہ کی جانب سے مفت ادویات اور دیگر سہولیات کے حوالے سے دریافت کیا۔

اس موقع پر ڈاکٹر سیف اللہ وڑائچ نے کہا کہ پنجاب حکومت عوام کو معیاری صحت کی سہولیات فراہم کرنے کے لیے بھرپور کوششیں کر رہی ہے۔ انہوں نے ہسپتال کے ڈاکٹرز اور پیرا میڈیکل سٹاف کو ہدایت کی کہ وہ اپنے فرائض کو عبادت سمجھ کر انجام دیں اور مریضوں اور ان کے لواحقین کے ساتھ خوش اخلاقی سے پیش آئیں۔

ڈاکٹر سیف اللہ وڑائچ نے مزید کہا کہ عوام کو بہترین طبی سہولیات فراہم کرنا حکومت کی اولین ترجیح ہے اور اس سلسلے میں تمام وسائل بروئے کار لائے جا رہے ہیں۔

اوکاڑہ (باغی ٹی وی نامہ نگار ملک ظفر) سیکرٹری ایمرجنسی سروسز ڈاکٹر رضوان نصیر (ستارہِ امیتاز) نے کمیونٹی ریسکیو اسٹیشن اوکاڑہ کا دورہ کیا، جہاں ان کا استقبال ڈویژنل ایمرجنسی آفیسر ڈاکٹر ارشاد الحق، ڈسٹرکٹ ایمرجنسی آفیسر انجینئر احتشام اور ساہیوال کے ڈسٹرکٹ ایمرجنسی آفیسر ڈاکٹر خالد عبداللہ نے کیا۔

ریسکیو کے چاک و چوبند دستے نے انہیں سلامی دی۔ دورے کے دوران، سیکرٹری ایمرجنسی سروسز نے ایمرجنسی میڈیکل ٹیکنیشنز کی پرسنل کٹ بیگ کا معائنہ کیا اور مختلف ایمرجنسیز کے حوالے سے ریسکیورز سے سوالات کیے۔

ڈاکٹر رضوان نصیر نے ریسکیو اہلکاران سے خطاب کرتے ہوئے کہا، "آپ لوگ خوش نصیب ہیں جنہیں اللہ تعالیٰ نے لوگوں کی جانوں کو بچانے کے لیے چنا ہے۔ ہمیں اپنی ڈیوٹی کو خدمت کے جذبے اور خوش اسلوبی سے سرانجام دینا چاہیے۔”

انہوں نے مزید کہا کہ "ریسکیو اہلکاران کو فزیکل فٹنس اور پیشہ ورانہ مہارت کو برقرار رکھنا چاہئے تاکہ ایمرجنسی کے متاثرہ افراد کو بہترین مدد فراہم کی جا سکے۔” انہوں نے اس بات پر زور دیا کہ ایمرجنسی گاڑیوں اور آلات کو ہمیشہ فعال رکھنا سب کی ذمہ داری ہے۔

اس موقع پر سیکرٹری ایمرجنسی سروسز نے سنٹرل اسٹیشن پر ساہیوال ڈویژن کی پرفارمنس کے حوالے سے میٹنگ کی صدارت کی، جس میں ڈویژنل ایمرجنسی آفیسر ڈاکٹر ارشاد الحق نے ڈویژن کی کارکردگی پر بریفنگ دی۔

اوکاڑہ (باغی ٹی وی نامہ نگارملک ظفر) ایڈیشنل ڈپٹی کمشنر ریوینیو محمد ابراہیم ارباب نے کہا ہے کہ سرکاری واجبات کی وصولی ریوینیو افسران کی بنیادی ذمہ داری ہے اور اس میں کسی قسم کی کوتاہی یا غفلت ناقابل قبول ہوگی۔ انہوں نے ریوینیو افسران کو ہدایت کی کہ وہ اپنے اپنے دائرہ کار میں حکومتی ہدایات کے مطابق واجبات کی وصولی کو یقینی بنائیں۔

یہ بات انہوں نے سرکاری واجبات کی وصولی کے حوالے سے منعقدہ ایک اجلاس کی صدارت کرتے ہوئے کہی، جس میں اسسٹنٹ کمشنرز اوکاڑہ سورٹھ مبشر، رینالہ خورد ضیاءاللّٰہ چودھری، اور دیگر تحصیلداران سمیت تمام ریوینیو افسران نے شرکت کی۔ اجلاس میں مالیہ، آبیانہ، سٹمپ ڈیوٹی، زرعی انتقالات اور دیگر محصولات کی وصولی کا جائزہ لیا گیا۔

محمد ابراہیم ارباب نے ریوینیو افسران پر زور دیا کہ وہ طے شدہ اہداف کے حصول کے لیے محنت اور لگن سے کام کریں اور بورڈ آف ریونیو کی ہدایات پر سو فیصد عملدرآمد کو یقینی بنائیں۔

اوکاڑہ (باغی ٹی وی نامہ نگار ملک ظفر): اوکاڑہ میں یوم دفاع پاکستان کے موقع پر گورنمنٹ ماڈل گرلز ہائی سکول میں منعقدہ ایک پروقار تقریب میں ڈپٹی کمشنر کیپٹن ر فرخ عتیق خان نے خطاب کرتے ہوئے کہا کہ پاک افواج کے شہداء نے ملک کی خاطر اپنی جانوں کا نذرانہ پیش کیا ہے۔ انہوں نے کہا کہ ملک کا ہر فرد ان شہداء کی قربانیوں کا قرضدار ہے۔

ڈپٹی کمشنر نے مزید کہا کہ مختلف اداروں میں فرائض کی انجام دہی کے دوران شہید ہونے والے تمام اہلکار بھی شہید ہیں۔ انہوں نے کہا کہ ان شہداء اور ان کے اہل و عیال کی عزت و تکریم ہر ایک پر واجب ہے۔

اس موقع پر سکول کی طالبات نے یوم دفاع پاکستان کے سلسلے میں مختلف ثقافتی پروگرام پیش کیے جن میں تقریریں، مضامین، ملی نغمے، پینٹنگز اور ٹیبلوز شامل تھے۔

ڈپٹی کمشنر نے طلباء کو خطاب کرتے ہوئے کہا کہ بچیوں کو غیر نصابی سرگرمیوں میں بڑھ چڑھ کر حصہ لینا چاہیے تاکہ وہ زندگی کے مختلف شعبوں میں خود اعتمادی سے آگے بڑھ سکیں اور ملکی ترقی میں اپنا کردار ادا کر سکیں۔

تقریب کے اختتام پر ڈپٹی کمشنر نے مقابلہ جات میں نمایاں کارکردگی دکھانے والی طالبات میں سرٹیفکیٹ بھی تقسیم کیے۔

اوکاڑہ (باغی ٹی وی،نامہ نگار) ڈپٹی کمشنر اوکاڑہ، کیپٹن (ر) فرخ عتیق خان نے کہا ہے کہ خواندگی انسان کی زندگی میں بہت اہم کردار ادا کرتی ہے اور یہ ہر فرد کا بنیادی حق ہے۔ انہوں نے یہ بات خواندگی کے عالمی دن کے موقع پر منعقدہ ایک سیمینار سے خطاب کرتے ہوئے کہی۔

ڈپٹی کمشنر نے کہا کہ ناخواندہ افراد اپنے بنیادی حقوق سے بھی محروم رہ جاتے ہیں۔ انہوں نے مزید کہا کہ محدود وسائل کے باوجود، محکمہ خواندگی و غیر رسمی بنیادی تعلیم محروم طبقات کے لیے تعلیمی سہولیات فراہم کرنے میں مصروف ہے۔

ڈپٹی کمشنر نے بتایا کہ پاکستان میں اب بھی لاکھوں بچے تعلیم سے محروم ہیں۔ تاہم، اوکاڑہ میں محکمہ خواندگی 515 نان فارمل بیسک ایجوکیشن سکولز کے ذریعے 17097 بچوں کو تعلیم دے رہا ہے۔ گزشتہ 4 ماہ میں انرولمنٹ مہم کے ذریعے 4883 نئے بچوں کو ان سکولوں میں داخل کیا گیا ہے۔

ڈپٹی کمشنر نے بتایا کہ حکومت پنجاب فنی تعلیم کے فروغ کے لیے ٹی وی ٹی اے کے تعاون سے مڈل ٹیک پروگرام شروع کرنے جا رہی ہے۔ اس کے علاوہ لٹریسی ان ویل اور ایکسریٹڈ لرننگ پروگرامز بھی جلد شروع کیے جائیں گے۔

سیمینار میں نان فارمل بیسک ایجوکیشن سکول کے بچوں نے مختلف ٹیبلوز پیش کیے۔ آخر میں، ڈپٹی کمشنر نے ایک طالبہ کو شیلڈ اور دیگر بچوں اور اساتذہ کو انعامات دیے۔