اوکاڑہ،باغی ٹی وی( نامہ نگار ملک ظفر) کرسمس کے موقع پر فول پروف سیکیورٹی انتظامات مکمل
اوکاڑہ میں ڈسٹرکٹ پولیس آفیسر محمد راشد ہدایت کے احکامات پر کرسمس 2024 کے لیے جامع سیکیورٹی پلان جاری کر دیا گیا ہے۔ مسیحی برادری کی عبادات اور دعائیہ تقریبات کے دوران مکمل تحفظ کو یقینی بنانے کے لیے ضلع بھر میں سخت اقدامات کیے گئے ہیں۔
ضلع اوکاڑہ میں کل 58 مسیحی عبادت گاہیں ہیں، جن میں سے 5 کو کیٹیگری A، 4 کو کیٹیگری B، اور 49 کو کیٹیگری C میں شامل کیا گیا ہے۔ ان تمام مقامات کی حفاظت کے لیے 1100 سے زائد پولیس افسران اور اہلکاروں کو تعینات کیا گیا ہے، جب کہ ان کے ساتھ 110 رضاکار بھی اپنی خدمات سر انجام دیں گے۔
تمام عبادت گاہوں کے اطراف میں ناکہ بندی پوائنٹس مقرر کیے گئے ہیں، جہاں ہر آنے والے شخص، گاڑی، اور سواری کو مکمل چیکنگ کے بعد اجازت دی جائے گی۔ چیکنگ کے لیے میٹل ڈیٹیکٹرز اور اہم مقامات پر واک تھرو گیٹس نصب کیے گئے ہیں، جب کہ اہم چرچز پر سی سی ٹی وی کیمرے بھی فعال ہیں۔
علاوہ ازیں، مسلح سیکیورٹی گارڈز چرچز اور مسیحی عبادت گاہوں پر تعینات کیے گئے ہیں۔ تفریحی مقامات اور پارکس میں بھی خواتین کی حفاظت کے لیے ردا فورس اور لیڈیز پولیس کی ڈیوٹی لگائی گئی ہے۔ ایلیٹ کمانڈوز، ڈولفن فورس اور پولیس موبائلز مسلسل گشت پر رہیں گی۔
پولیس حکام نے ایس ایچ اوز اور مانیٹرنگ افسران کو ہدایت کی ہے کہ حساس مقامات پر سخت نگرانی رکھی جائے، اور ون ویلنگ، ہلڑ بازی، اور ہوائی فائرنگ کی روک تھام کے لیے بھی خصوصی ٹیمیں تشکیل دی گئی ہیں۔ شہریوں نے پولیس کے ان اقدامات کو سراہا ہے اور کرسمس تقریبات کے دوران امن و امان برقرار رکھنے کے لیے تعاون کی یقین دہانی کرائی ہے۔
