Category: اوکاڑہ

اوکاڑہ (نامہ نگار ملک ظفر)ڈسٹرکٹ پاپولیشن ویلفیئر آفس اوکاڑہ کے زیر اہتمام "چیف منسٹر پاپولیشن مینجمنٹ اینڈ فیملی پلاننگ پروگرام” کے تحت ضلع کونسل ہال میں صحافیوں اور کالم نگاروں کے ساتھ ایک انٹرایکٹو سیشن کا انعقاد کیا گیا۔ سیشن کی صدارت ایڈیشنل ڈپٹی کمشنر جنرل حافظ عمر طیب نے کی، جبکہ ڈپٹی ڈائریکٹر انفارمیشن سید سلمان حسین مہمانِ خصوصی تھے۔

سیشن میں صحافت کے مختلف شعبوں سے تعلق رکھنے والے نمائندوں کے علاوہ محکمہ بہبود آبادی کے افسران نے شرکت کی۔ اس موقع پر خاندانی منصوبہ بندی اور تولیدی صحت کے بارے میں شعور اجاگر کرنے کے لیے میڈیا کے کردار پر زور دیا گیا۔

ڈسٹرکٹ ڈیموگرافر محمد بخش نے ضلع کے آبادیاتی اعداد و شمار اور محکمہ کی کارکردگی پر تفصیلی بریفنگ دی۔ڈاکٹر مہک سلیم نے محکمہ کی فراہم کردہ خدمات کی تفصیلات بیان کیں۔

سیشن کے میزبان چوہدری عاصم ہدایت نے بڑھتی ہوئی آبادی کے مسائل اور میڈیا کے اہم کردار پر روشنی ڈالی۔

ایڈیشنل ڈپٹی کمشنر جنرل نے اپنے خطاب میں کہا کہ آبادی میں تیزی سے اضافہ ملکی وسائل پر دباؤ ڈال رہا ہے، جس کا براہِ راست اثر صحت، تعلیم اور بنیادی سہولیات پر ہو رہا ہے۔ انہوں نے وسائل کی منصفانہ تقسیم اور عوامی آگاہی کو ناگزیر قرار دیا۔

سیشن کے شرکاء نے محکمہ بہبود آبادی کے ساتھ تعاون کا عزم کرتے ہوئے آگاہی مہم کو مؤثر بنانے کے لیے اپنے پلیٹ فارمز کے استعمال کی یقین دہانی کروائی۔

اوکاڑہ(باغی ٹی وی،نامہ نگار ملک ظفر) گورنمنٹ گریجوایٹ کالج میں سالانہ سیرت النبی ﷺ کانفرنس کا انعقاد کیا گیا، جس میں معاشرے کی اہم شخصیات، اساتذہ، طلبہ، اور عوام نے بڑی تعداد میں شرکت کی۔ تقریب کے مہمانِ خصوصی چوہدری ریاض الحق ایم این اے اور میاں محمد منیر ایم پی اے تھے، جبکہ چوہدری فیاض ظفر اور دیگر معززین بھی موجود تھے۔

کانفرنس میں مختلف علماء اور ماہرین نے "اخلاقِ نبوی اور عصرِ حاضر”، "حقوقِ رسالت” اور "ہماری ذمہ داریاں” جیسے اہم موضوعات پر تفصیل سے گفتگو کی۔ مقررین میں ڈاکٹر عبدالماجد کشمیری اور پروفیسر ڈاکٹر مفتی عبدالباسط خان شامل تھے۔

پرنسپل پروفیسر عبدالروف نے کہا کہ سیرت النبی ﷺ کا پیغام نہ صرف مسلمانوں بلکہ تمام انسانیت کے لیے ایک رہنما اصول ہے۔ انہوں نے اس بات پر زور دیا کہ اس کانفرنس کا مقصد نوجوان نسل میں تعلیمات نبوی ﷺ کا شعور اجاگر کرنا اور ان تعلیمات کو اپنی زندگیوں میں اپنانا ہے۔

میاں محمد منیر ایم پی اے نے کہا کہ امت مسلمہ کے مسائل کا حل سیرت النبی ﷺ کی تعلیمات میں موجود ہے، اور نوجوانوں کو اس پر عمل پیرا ہونے کی ضرورت ہے تاکہ وہ معاشرتی ترقی میں اپنا کردار ادا کر سکیں۔

مقررین نے اتحاد بین المسلمین کی اہمیت پر زور دیتے ہوئے کہا کہ نبی اکرم ﷺ کی حیات طیبہ کے عملی پہلو ہمارے لیے بہترین نمونہ ہیں، جنہیں اپنانے سے ہم اپنی زندگیوں کو بہتر بنا سکتے ہیں۔

اختتام پر دعا کی گئی اور اس عزم کا اظہار کیا گیا کہ سیرت النبی ﷺ کے پیغام کو عام کرنے کے لیے مزید ایسے پروگرامز کا انعقاد کیا جائے گا۔

اوکاڑہ (باغی ٹی وی، نامہ نگار ملک ظفر) پروبیشن آفیسر ضلع اوکاڑہ خاور وحید کی زیر نگرانی ای لائبریری اوکاڑہ میں آگاہی سیمینار کا انعقاد کیا گیا۔ سیمینار کا مقصد معاشرتی اصلاح اور پروبیشنرز کی فلاح و بہبود کے لیے شعور اجاگر کرنا تھا۔

محمد شفیق، ڈسٹرکٹ الیکشن کمشنر اوکاڑہ، نے ووٹر ایجوکیشن پر بات کرتے ہوئے کہا کہ شہری الیکشن کے دن ووٹ ڈال کر اپنے قومی فریضے کی انجام دہی یقینی بنائیں۔ انہوں نے خواتین کے شناختی کارڈ بنوانے پر زور دیتے ہوئے انہیں قومی دھارے میں شامل کرنے کی اہمیت کو اجاگر کیا۔

میڈم انساءاکرم، کلینیکل سائیکالوجسٹ پاپولیشن ویلفیئر ڈیپارٹمنٹ، نے پروبیشنرز کے ذہنی صحت کے مسائل اور غصہ کنٹرول کرنے کی تکنیکوں پر جامع گفتگو کی۔

پروبیشن آفیسر خاور وحید نے سیمینار کے اختتام پر کہا کہ پروبیشنرز کی اصلاح اور معاشرے کی بہتری کے لیے ایسے پروگرامز کا تسلسل جاری رکھا جائے گا تاکہ ایک پرامن اور بہتر سماج تشکیل دیا جا سکے۔

اوکاڑہ (باغی ٹی وی،نامہ نگارملک ظفر) ڈپٹی کمشنر احمد عثمان جاوید نے وزیر اعلیٰ پنجاب مریم نواز شریف کے ویژن کے تحت اوپن ڈور پالیسی کے مطابق اپنے دفتر میں آنے والے شہریوں کے مسائل سنے اور موقع پر ہی ان کے حل کے احکامات جاری کیے۔

انہوں نے ہدایت کی کہ تمام انتظامی اور ضلعی افسران صبح 9 سے 11 بجے تک اپنے دفاتر میں موجود رہیں اور شہریوں کے مسائل کو ترجیحی بنیادوں پر حل کریں۔

ڈپٹی کمشنر نے کہا کہ وزیر اعلیٰ پنجاب مریم نواز شریف کی ہدایت کے مطابق عوام کو ریلیف فراہم کرنے کے لیے ہر ممکن اقدامات کیے جا رہے ہیں۔ عوام کو ہدایت کی گئی ہے کہ وہ اپنے مسائل کے حل کے لیے متعلقہ افسران سے رابطہ کریں تاکہ فوری اور مؤثر حل ممکن ہو سکے۔

اوکاڑہ (باغی ٹی وی، نامہ نگار ملک ظفر) کمشنر ساہیوال شعیب اقبال سید نے کہا ہے کہ نوجوان حصول علم کے لیے محنت کریں اور ملک و قوم کا نام زندگی کے مختلف شعبوں میں تعلیم کے زیور سے آراستہ ہو کر روشن کریں۔ کامیاب قوموں نے تعلیم کی روشنی سے ترقی کی منازل طے کی ہیں۔ یہ بات انہوں نے کیڈٹ کالج میں "اینول پیرنٹس ڈے” کے موقع پر نمایاں کارکردگی کے حامل کیڈٹس میں انعامات تقسیم کرتے ہوئے کہی۔

تقریب میں ڈپٹی کمشنر احمد عثمان جاوید، کیڈٹ کالج کے پرنسپل عامر رؤف، اساتذہ، والدین اور طالب علموں کی بڑی تعداد موجود تھی۔ کیڈٹس نے کمشنر کو گارڈ آف آنر پیش کیا اور اپنی مہارت کا عملی مظاہرہ کیا۔ کمشنر شعیب اقبال نے اپنے خطاب میں کہا کہ کیڈٹ کالج کے اساتذہ خلوص دل سے نوجوانوں میں تعلیم اور قائدانہ صلاحیتوں کو فروغ دیں تاکہ وہ مستقبل کے چیلنجز سے نمٹنے کے لیے تیار ہوں۔ آخر میں پرنسپل عامر رؤف نے کمشنر کو یادگاری سوونئیر پیش کیا۔

اوکاڑہ (باغی ٹی وی ،نامہ نگار ملک ظفر) ڈپٹی کمشنر احمد عثمان جاوید نے ایڈیشنل ڈپٹی کمشنر جنرل حافظ عمر طیب کے ہمراہ سرور چوک میں واقع ضلع کونسل کی دکانوں کا دورہ کیا۔ اس موقع پر تمام متعلقہ محکموں کے افسران بھی موجود تھے۔ ضلع کونسل کے افسران نے دکانوں کی نیلامی کے عمل اور نا دہندگان کی تفصیلات سے آگاہ کیا۔

ڈپٹی کمشنر احمد عثمان جاوید نے کہا کہ ضلع کونسل کی جو سرکاری دکانیں نیلام ہونے سے رہ گئی ہیں، ان کی نیلامی کو جلد از جلد مکمل کیا جائے اور یہ بات یقینی بنائی جائے کہ دکانوں کی نیلامی مارکیٹ ریٹ کے مطابق ہو۔ انہوں نے مزید کہا کہ ضلع کونسل کی سرکاری دکانوں کے نا دہندگان اپنے بقایا جات فوری طور پر ادا کریں، بصورت دیگر قانونی کارروائی کی جائے گی۔