Category: اوکاڑہ

اوکاڑہ(باغی ٹی وی نامہ نگارملک ظفر) ڈپٹی کمشنر کا ریونیو افسران کو سرکاری واجبات کی وصولی میں تیزی لانے کا حکم

تفصیل کے مطابق ڈپٹی کمشنراوکاڑہ کیپٹن (ر) فرخ عتیق خان نے ریونیو افسران کو ہدایت کی ہے کہ وہ سرکاری واجبات کی وصولی کے لیے اپنی کاوشوں میں تیزی لائیں۔ انہوں نے کہا کہ بورڈ آف ریونیو کے احکامات کی روشنی میں ریونیو افسران کو آبیانہ، مالیانہ، زرعی انتقالات سمیت دیگر معاملات میں بھرپور اقدامات کر کے سو فیصد ریکوری کو یقینی بنانا ہے۔

ڈپٹی کمشنر نے یہ باتیں ریونیو افسران کے ایک اجلاس کی صدارت کرتے ہوئے کہیں۔ اس اجلاس میں تینوں تحصیلوں کے اسسٹنٹ کمشنرز اور دیگر ریونیو افسران نے شرکت کی۔ ایڈیشنل ڈپٹی کمشنر (ریونیو) کامران بشیر ڈوگر نے اجلاس میں سرکاری واجبات کی وصولی اور دیگر ریونیو سے متعلق معاملات پر تفصیلی بریفنگ دی۔

ڈپٹی کمشنر نے واضح کیا کہ ریونیو افسران کو سرکاری واجبات کی وصولی کے لیے تمام دستیاب وسائل بروئے کار لانا چاہیے۔ انہوں نے کہا کہ جو افسران اپنی ذمہ داریوں کو پورا کرنے میں ناکام رہیں گے، ان کے خلاف قانون کے مطابق کارروائی کی جائے گی۔

اوکاڑہ (باغی ٹی نامہ نگار ملک ظفر)ضلع کوآرڈینیشن کمیٹی کے اجلاس میں ضلع اوکاڑہ میں جاری ترقیاتی منصوبوں کا جائزہ لیا گیا۔ اجلاس کی صدارت کرتے ہوئے چیئرمین ڈسٹرکٹ کو آرڈنیشن کمیٹی و ممبر قومی اسمبلی ریاض الحق جج نے کہا کہ حکومت پنجاب کا نصب العین عوامی خدمت ہے۔ اس سلسلہ میں ضلع اوکاڑہ میں مختلف ترقیاتی منصوبے شروع کیے گئے ہیں۔

اجلاس میں بتایا گیا کہ ضلع میں ایک نئی غلہ منڈی کی تعمیر کا کام تیزی سے جاری ہے جس سے کسانوں کو بہت سہولت ہوگی۔ اس کے علاوہ ضلع میں کوڑا کرکٹ کے مسئلے کے حل کے لیے ڈمپنگ سائٹس بھی بنائی جا رہی ہیں۔

ڈپٹی کمشنر کیپٹن ر فرخ عتیق خان نے کہا کہ ضلع کونسل کی جانب سے تینوں تحصیلوں میں صحت، تعلیم اور انفرااسٹرکچر کے شعبے میں مختلف ترقیاتی کام کیے جا رہے ہیں۔ انہوں نے کہا کہ سرکاری ہسپتالوں میں ڈاکٹروں اور دواؤں کی کمی کو دور کرنے کے لیے بھی اقدامات کیے جا رہے ہیں۔

ممبر قومی اسمبلی ریاض الحق جج نے کہا کہ عوام کو بہتر سہولیات فراہم کرنا حکومت کی اولین ترجیح ہے۔ انہوں نے تمام متعلقہ افسران کو ہدایت کی کہ وہ ترقیاتی کاموں کو تیزی سے مکمل کریں۔

مقامی لوگوں نے ان ترقیاتی منصوبوں کا خیر مقدم کیا ہے اور امید ظاہر کی ہے کہ ان سے ضلع کی مجموعی ترقی میں مدد ملے گی۔ ایک مقامی رہائشی محمد علی نے کہا، "نئی غلہ منڈی بننے سے کسانوں کو اپنی فصل بیچنے میں بہت آسانی ہوگی۔”

ضلع انتظامیہ کا کہنا ہے کہ وہ ان منصوبوں کو وقت پر مکمل کرنے کے لیے تمام ممکنہ اقدامات کر رہی ہے۔ اس کے علاوہ ضلع میں دیگر ترقیاتی کاموں کے لیے بھی نئے منصوبے شروع کرنے کا ارادہ ہے۔

اوکاڑہ (باغی ٹی وی نامہ نگار ملک ظفر) سوشل میڈیا پر سردار شیر علی گورچانی کے خلاف مہم کی مذمت کرتے ہیں،ملک غلام شبیر بھوہڑ

تفصیل کے مطابق آل پاکستان بھوہڑ ایسوسی ایشن کے صدر ملک غلام شبیر بھوہڑ نے صوبائی وزیر معدنیات سردار شیر علی گورچانی کے خلاف سوشل میڈیا پر پھیلائے جانے والے بے بنیاد پروپیگنڈے کی شدید مذمت کی ہے۔

انہوں نے کہا کہ سردار شیر علی گورچانی ایک شریف النفس اور عوام دوست لیڈر ہیں،سوشل میڈیا پر راجن پور کے عوام کے محبوب لیڈر سردار شیر علی گورچانی کے خلاف بے بنیاد الزامات لگائے جا رہے ہیں

ملک غلام شبیر بھوہڑ نے کہا کہ صوبائی وزیر معدنیات سردار شیر علی گورچانی سیاسی حریفوں کے نشانہ بن گئے ہیں،وہ راجن پور کے عوام کے مسیحا ہیں ،عوام دوست لیڈر ہیں جنہوں نے راجن پور میں بہت سے ترقیاتی کام کروائے ہیں،ان کے خلاف سوشل میڈیا پر بے بنیاد مہم چلائی جا رہی ہے۔ آل پاکستان بھوہڑ ایسوسی ایشن نے اس کی مذمت کرتے ہوئے کہا ہے کہ یہ ایک سازش ہے۔

واضح رہے کہ وزیرمعدنیات شیرعلی گورچانی کی ٹیلی فون پر بات کرنے کی مبینہ ویڈیو سامنے آئی تھی وزیر معدنیات نے فون پر کان عباد کو دینے کی یقین دہانی کروائی اور کہا آپ کو معدنیات کا بلاک نیلامی کے ذریعے دیا جائے گا، آپ کے لئے نیلامی کا راستہ نکالا ہے ، عباد نے سوال کیا آپ نیلامی کس طرح کریں گے ؟ شیر علی گورچانی بولے ہم چپ کر کے آپ کو پلاٹ دے دیں گے ، جو پلاٹ آپ نے کہے ہیں وہی آپ کو دیں گے ، اتوار کو لاہور آرہا ہوں پیر کو آپ سے ملاقات ہوگی آپ سے مل کر ہمیں خوشی ہوتی ہے ۔

اس مبینہ ویڈیو کے سامنے آنے پروزیراعلیٰ پنجاب مریم نواز شریف نے صوبائی وزیر معدنیات شیر علی گورچانی سے متعلق وائرل ویڈیو کا سختی سے نوٹس لیتے ہوئے شیر علی گورچانی سے جواب طلب کر لیا۔

اوکاڑہ (باغی ٹی وی نامہ نگار ملک ظفر) اوکاڑہ میں :پنجاب سیٹیز پروگرام کے تحت کئی اہم منصوبوں پر کام جاری ہے

ڈپٹی کمشنر کیپٹن (ر) فرخ عتیق خان کی زیر صدارت پنجاب سیٹیز پروگرام کے منصوبوں پر پیش رفت کا جائزہ لینے کے لیے ایک اجلاس منعقد ہوا۔ اس اجلاس میں ایڈیشنل ڈپٹی کمشنر جنرل و ایڈمنسٹریٹر میونسپل کارپوریشن سید جمیل حیدر شاہ، میونسپل کمیٹی، واپڈا، ہائی وے، ایریگیشن سمیت دیگر محکموں کے افسران نے شرکت کی۔

اجلاس میں ایڈمنسٹریٹر میونسپل کمیٹی سید جمیل حیدر شاہ اور میونسپل آفیسر انفرا سٹرکچر طلعت حسین نے ضلع میں جاری پی پی پراجیکٹس کے بارے میں تفصیلی بریفنگ دی۔ انہوں نے بتایا کہ اوکاڑہ سٹی کی مکمل سیوریج سکیم، واٹر ٹریٹمنٹ پلانٹ سمیت دیگر پی سی پی منصوبے زیر عمل ہیں۔

ڈپٹی کمشنر کیپٹن (ر) فرخ عتیق خان نے متعلقہ افسران کو ہدایت کی کہ یہ عوامی سہولت کے منصوبے اپنی مثال آپ ہونے چاہئیں۔ انہوں نے کہا کہ ان منصوبوں پر کام کی رفتار کو تیز کیا جائے اور ساتھ ہی ساتھ میٹریل کی کوالٹی بہترین ہونی چاہیے۔ انہوں نے مزید ہدایت کی کہ متعلقہ افسران منصوبوں میں استعمال ہونے والے مٹیریل کی جانچ کریں تاکہ یہ منصوبے دیر پا ہو سکیں اور عوام ان منصوبوں سے بھرپور فائدہ اٹھا سکیں۔

اوکاڑہ ،باغی ٹی وی( نامہ نگار ملک ظفر)یوم استحصال کشمیر کے موقع پر ڈی سی آفس اوکاڑہ میں ریلی کا انعقاد کیا گیا،کشمیریوں پر بھارت کے 5 اگست 2019ء کے ظالمانہ اقدامات کے خلاف یومِ سیاہ منایا گیا

تفصیل کے مطابق بھارت کے 5 اگست 2019 کے غیر قانونی اقدام اور مقبوضہ کشمیر میں انسانی حقوق کی پامالی کے خلاف اوکاڑہ میں یوم سیاہ منایا گیا۔ دفتر ڈپٹی کمشنر میں منعقدہ ایک بڑی ریلی میں شہریوں نے کشمیریوں کے ساتھ یکجہتی کا اظہار کیا۔

ریلی میں ممبر قومی اسمبلی چوہدری ندیم عباس ربیرہ، ڈپٹی کمشنر کیپٹن (ر) فرخ عتیق خان، اور دیگر اہم شخصیات نے شرکت کی۔ مقررین نے کہا کہ بھارت مقبوضہ کشمیر میں کشمیریوں پر ظلم و ستم ڈھاتا جا رہا ہے اور ان کے بنیادی حقوق سلب کر رکھے ہیں۔ انہوں نے کہا کہ پوری دنیا کو کشمیر کے مسئلے پر آواز اٹھانی چاہیے اور بھارت کو اس کے غیر قانونی اقدامات کے لیے جوابدہ ٹھہرایا جانا چاہیے۔

شرکاء نے کشمیریوں کے حق خود ارادیت کے حق میں نعرے لگائے اور کہا کہ کشمیر پاکستان کا لازمی حصہ ہے۔ ریلی کے شرکاء نے شہداء کو خراج عقیدت پیش کیا اور کشمیری عوام کے ساتھ یکجہتی کا عزم دوبارہ کیا۔

اوکاڑہ ،باغی ٹی وی( نامہ نگار ملک ظفر)اوکاڑہ یونیورسٹی اور سنٹر فار ایکسیلنس آف بووائن جنیٹکس میں باہمی تعاون پر تبادلہ خیال

تفصیلات کے مطابق سنٹر فار ایکسیلنس آف بووائن جنیٹکس رینالہ خورد کے ایک وفد نے اوکاڑہ یونیورسٹی کا دورہ کیا اور وائس چانسلر پروفیسر ڈاکٹر محمد واجد کے ساتھ باہمی تعاون کے امور پہ تبادلہ خیال کیا۔

اس وفد میں برگیڈئیر ڈاکٹر محمد علی، میجر ڈاکٹر حمیرا حیدر اور کیپٹن ڈاکٹر ارسلان طارق شامل تھے۔ دونوں فریقین نے جنیٹکس ریسرچ کے میدان میں ایک دوسرے کے وسائل اور صلاحیتوں سے مستفید ہونے میں دلچسپی ظاہر کی۔

اس موقع پر فیکلٹی آف لائف سائنسز کے اساتذہ ڈاکٹر سلیم خان، ڈاکٹر سائرہ ستار اور قاری ریاض بھی موجود تھے۔میٹنگ کے بعد وفد نے وائس چانسلر کی سربراہی میں اوکاڑہ یونیورسٹی کی بائیو ٹیکنالوجی لیب ، زوآلوجی جنیٹکس لیب اور پیلانٹالوجی لیب کا دورہ کیا ۔

آرمی آفیسرز نے ان لیبارٹریوں میں موجود سہولیات اور خاص طور پہ پروفیسر واجد کی فوسلز کولیکشن کو بے حد سراہا اور اس عزم کا اعادہ کیا کہ وہ مستقبل کے تحقیقی پراجیکٹس کےلیے ان سہولیات سے فائدہ اٹھائیں گے۔

وفد نے پروفیسر واجد کو دعوت دی کہ وہ ان کے ایمبریو ٹرانسفر ڈویژن میں آ کر ایف ون جنیٹکس پہ ایک سیر حاصل لیکچر دیں۔ پروفیسر واجد نے سنٹر فار ایکسیلنس آف بووائن جنیٹکس اور ایمبریو ٹرانسفر ڈویژن میں اوکاڑہ یونیورسٹی کی جانب سے شجر کاری کرنے کا بھی اعلان کیا۔

دونوں فریقین نے باہمی تعاون کو مزید فروغ دینے اور ایک دوسرے کے وسائل سے مستفید ہونے کےلیے میٹنگز کو باقاعدگی سے جاری رکھنے پر اتفاق کیا۔