Category: اوکاڑہ

اوکاڑہ (نامہ نگار ملک ظفر) جامعہ عثمانیہ مسجد گول چوک اوکاڑہ میں تقسیم اسناد کی ایک عظیم الشان اور روح پرور تقریب منعقد ہوئی، جس میں علما، طلبہ، معززین شہر اور عوام کی بڑی تعداد نے شرکت کی۔

تقریب کی صدارت مفتی اعظم بہاولنگر، مفتی عبد خلیق احمد اخوان نے کی، جنہوں نے اپنے خصوصی خطاب میں کہا کہ قرآنِ مجید امتِ مسلمہ کے لیے مکمل دستورِ حیات ہے۔ انہوں نے کہا کہ دینی مدارس قرآن و سنت کی اشاعت کے مراکز اور اسلام کے مضبوط قلعے ہیں، جہاں دین کی اصل روح محفوظ ہو کر نسل در نسل منتقل ہوتی ہے۔

تقریب کا باقاعدہ آغاز قاری محمد عاصم عبدالودود اور قاری عبدالرحمن کی پُرسوز تلاوتِ کلامِ پاک سے ہوا، جس سے محفل میں روحانی کیفیت طاری ہو گئی۔ بعد ازاں نعت خواں حافظ محمد عثمان قصوری اور حافظ اسحاق بدر نے بارگاہِ رسالت ﷺ میں ہدیۂ عقیدت پیش کیا، جسے حاضرین نے عقیدت اور احترام کے ساتھ سنا۔

اس موقع پر مفتی عبدالحیم، مہتمم جامعہ اشرفیہ، مولانا عبدالقدیر، قاری عمر تھانوی سمیت دیگر نامور علما و مشائخ بھی موجود تھے، جنہوں نے دینی تعلیم کی اہمیت، مدارس کے کردار اور طلبہ کی علمی و اخلاقی تربیت پر روشنی ڈالی۔

تقریب کے اختتام پر کامیاب طلبہ میں اسناد تقسیم کی گئیں، جبکہ ملک و ملت کی سلامتی، اتحادِ امت اور دین کی سربلندی کے لیے خصوصی دعا بھی کی گئی۔

اوکاڑہ (باغی ٹی وی/نامہ نگار ملک ظفر)یومِ یکجہتی کشمیر کے موقع پر اوکاڑہ میں ضلعی انتظامیہ کے زیرِ اہتمام ایک پُرامن اور باوقار یکجہتی ریلی کا انعقاد کیا گیا، جس میں کشمیری عوام کے ساتھ بھرپور اظہارِ یکجہتی کیا گیا۔

تفصیلات کے مطابق ریلی کی قیادت ایڈیشنل ڈپٹی کمشنر ریونیو محمد شعجین وسطرو نے کی۔ اس موقع پر ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر، ایڈیشنل ڈپٹی کمشنر جنرل احمد سلیم چشتی، دیگر سرکاری افسران، سول سوسائٹی کے نمائندے، اساتذہ، طلبہ اور شہریوں کی بڑی تعداد نے شرکت کی۔

ریلی کے شرکاء نے کشمیر کی آزادی اور مقبوضہ وادی میں جاری انسانی حقوق کی سنگین خلاف ورزیوں کے خلاف بینرز اور پلے کارڈز اٹھا رکھے تھے، جبکہ فضا ’’کشمیر بنے گا پاکستان‘‘ اور ’’ہم کشمیریوں کے ساتھ ہیں‘‘ جیسے فلک شگاف نعروں سے گونجتی رہی۔

اس موقع پر خطاب کرتے ہوئے ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر نے کہا کہ کشمیری عوام سے اظہارِ یکجہتی کا مقصد دنیا کو یہ باور کروانا ہے کہ پاکستانی قوم مظلوم کشمیریوں کے ساتھ کھڑی ہے۔ انہوں نے کہا کہ مقبوضہ کشمیر کے غاصبانہ قبضے کے خاتمے تک پاکستان ہر فورم پر اپنی آواز بلند کرتا رہے گا، کیونکہ پاکستان کی آزادی کشمیر کی آزادی کے بغیر نامکمل ہے۔

ایڈیشنل ڈپٹی کمشنر جنرل احمد سلیم چشتی نے اپنے خطاب میں کہا کہ کشمیری عوام اپنی جدوجہدِ آزادی میں تنہا نہیں ہیں، پاکستان کی پوری قوم ان کے شانہ بشانہ کھڑی ہے۔ انہوں نے عالمی برادری اور عالمِ اسلام پر زور دیا کہ وہ اقوامِ متحدہ کی قراردادوں کے مطابق کشمیری عوام کو ان کا حقِ خودارادیت دلوانے کے لیے مؤثر کردار ادا کریں۔

ریلی کے اختتام پر مقبوضہ کشمیر کے شہداء کے درجات کی بلندی اور وادیٔ کشمیر کی جلد آزادی کے لیے خصوصی دعا بھی کی گئی۔

دوسری طرف گورنمنٹ گریجویٹ کالج اوکاڑہ میں یومِ یکجہتی کشمیر کے حوالے سے ایک پروقار سیمینار اور ریلی کا انعقاد کیا گیا جس میں کشمیری عوام کی جدوجہدِ آزادی اور ان پر ہونے والے مظالم کو بھرپور طریقے سے اجاگر کیا گیا۔ سیمینار کی نظامت ڈاکٹر حسن رضا اقبالی نے نہایت خوش اسلوبی سے انجام دی جبکہ پروفیسر عثمان غنی اور پروفیسر حسیب افتخار نے اپنے خطاب میں کشمیریوں کی لازوال قربانیوں پر روشنی ڈالی۔ پرنسپل کالج پروفیسر علی حیدر ڈوگر نے اپنے صدارتی خطاب میں کشمیری مسلمانوں کے ساتھ مکمل یکجہتی کا اظہار کرتے ہوئے اس عزم کا اعادہ کیا کہ پاکستان ان کی جائز جدوجہد کی حمایت جاری رکھے گا

اوکاڑہ (نامہ نگار ملک ظفر):کمشنر ساہیوال ڈاکٹر آصف طفیل اور رکن قومی اسمبلی چوہدری ریاض الحق جج نے ڈی ایچ کیو ہسپتال ساؤتھ سٹی اوکاڑہ کا تفصیلی دورہ کیا اور مریضوں کو فراہم کی جانے والی طبی سہولیات کا جائزہ لیا۔ دورے کے دوران ڈاکٹرز اور طبی عملے کی حاضری، ادویات کی دستیابی، صفائی کے انتظامات اور مجموعی سروس ڈیلیوری کا باریک بینی سے معائنہ کیا گیا۔

کمشنر ساہیوال اور ایم این اے نے مختلف وارڈز، ایمرجنسی، او پی ڈی اور دیگر شعبہ جات کا دورہ کیا، جبکہ زیرِ علاج مریضوں اور ان کے لواحقین سے سہولیات کے بارے میں دریافت کیا۔ مریضوں اور لواحقین نے مجموعی طور پر ہسپتال میں فراہم کی جانے والی طبی سہولیات پر اطمینان کا اظہار کیا۔

اس موقع پر کمشنر ساہیوال ڈاکٹر آصف طفیل نے ہسپتال انتظامیہ کو ہدایت کی کہ مریضوں کو بروقت اور معیاری طبی سہولیات کی فراہمی ہر صورت یقینی بنائی جائے اور علاج معالجے میں کسی بھی قسم کی کوتاہی ہرگز برداشت نہیں کی جائے گی۔
ایم این اے چوہدری ریاض الحق جج نے کہا کہ حکومت عوام کو بہتر صحت کی سہولیات فراہم کرنے کے لیے تمام وسائل بروئے کار لا رہی ہے۔ انہوں نے مزید کہا کہ سرکاری ہسپتالوں میں سہولیات کی بہتری حکومت کی اولین ترجیحات میں شامل ہے اور طبی سہولیات کی باقاعدہ چیکنگ کا مقصد صحتِ عامہ کے نظام کی مؤثر نگرانی اور بہتری کو یقینی بنانا ہے۔

مزید برآں کمشنر ساہیوال اور ایم این اے نے میڈیکل کالج کی سائٹ کا بھی دورہ کیا اور متعلقہ حکام کو ہدایت کی کہ ترقیاتی کام جلد از جلد شروع کیے جائیں تاکہ علاقے میں طبی تعلیم اور صحت کی سہولیات کو مزید فروغ دیا جا سکے۔

اوکاڑہ (نامہ نگارملک ظفر) ضلع بھر میں امن و امان کی صورتحال کو برقرار رکھنے، سرکاری املاک اور اہم تنصیبات کے تحفظ کو یقینی بنانے کے لیے انتظامیہ کی جانب سے سخت اقدامات اٹھائے گئے ہیں۔ ڈپٹی کمشنر اوکاڑہ احمد عثمان جاوید نے کسی بھی ممکنہ ناخوشگوار واقعے کی روک تھام کے پیشِ نظر ضلع بھر میں فوری طور پر دفعہ 144 نافذ کرنے کا حکم دے دیا ہے۔ اس فیصلے کا مقصد شہریوں کے جان و مال کی حفاظت اور ضلعی حدود میں قانون کی بالادستی کو برقرار رکھنا ہے۔

جاری کردہ نوٹیفکیشن کے مطابق ضلع بھر میں ہر قسم کے جلسے، جلوسوں، ریلیوں اور دھرنوں پر مکمل پابندی عائد ہوگی اور عوامی اجتماعات کی اجازت نہیں دی جائے گی۔ اس کے علاوہ اسلحہ کی نمائش، اسلحہ لے کر چلنے، لاٹھی، پٹرول بم اور ہر قسم کے آتشیں مواد کے استعمال پر بھی سخت پابندی ہوگی۔ انتظامیہ نے واضح کیا ہے کہ عوامی مقامات پر کسی بھی ایسی سرگرمی کی اجازت نہیں دی جائے گی جس سے امن عامہ میں خلل پڑنے کا اندیشہ ہو۔

ڈپٹی کمشنر کے احکامات کے تحت ضلع میں لاؤڈ اسپیکر کے غیر قانونی استعمال، موٹر سائیکل کی ڈبل سواری اور اشتعال انگیز تقاریر یا منافرت پر مبنی مواد کی تشہیر پر بھی مکمل پابندی لگا دی گئی ہے۔ انتظامیہ کی جانب سے یہ واضح کیا گیا ہے کہ ان پابندیوں کا اطلاق فوری طور پر ہو چکا ہے جو 10 فروری تک برقرار رہے گا۔ اس دوران ضلعی پولیس اور قانون نافذ کرنے والے ادارے گشت اور نگرانی کے عمل کو مزید سخت کریں گے تاکہ حکومتی رٹ کو برقرار رکھا جا سکے۔

نوٹیفکیشن میں مزید تنبیہ کی گئی ہے کہ دفعہ 144 کی خلاف ورزی کرنے والے عناصر کے خلاف قانونی کارروائی عمل میں لائی جائے گی اور کسی بھی استثنیٰ کے بغیر سخت تادیبی اقدامات کیے جائیں گے۔ ڈپٹی کمشنر احمد عثمان جاوید نے شہریوں سے اپیل کی ہے کہ وہ امن و امان کے قیام کے لیے ضلعی انتظامیہ کے ساتھ تعاون کریں اور کسی بھی غیر قانونی سرگرمی کا حصہ بننے سے گریز کریں تاکہ ضلع کی پرامن فضا برقرار رہ سکے۔

اوکاڑہ (نامہ نگارملک ظفر) کمشنر ساہیوال ڈویژن ڈاکٹر آصف طفیل کی زیر صدارت ڈی سی آفس میں ضلع بھر کے ترقیاتی منصوبوں کی پیشرفت کا اجلاس منعقد ہوا، جس میں ڈپٹی کمشنر احمد عثمان جاوید، ڈائریکٹر ڈویلپمنٹ اینڈ فنانس ساہیوال شفیق احمد ڈوگر اور محکمہ ہائی وے، روڈز، بلڈنگز، پبلک ہیلتھ انجینئرنگ سمیت دیگر متعلقہ محکموں کے حکام نے شرکت کی۔

اجلاس کے دوران متعلقہ محکموں کے افسران نے اے ڈی پی کے تحت ضلع بھر میں نئے اور جاری ترقیاتی منصوبوں کی تفصیلی بریفنگ دی۔ کمشنر ساہیوال ڈاکٹر آصف طفیل نے کہا کہ عوامی فلاح کے تمام منصوبے مقررہ مدت میں مکمل کیے جائیں اور ترقیاتی سکیموں کے معیار و بروقت تکمیل پر ہرگز سمجھوتہ نہیں کیا جائے گا۔

انہوں نے مزید کہا کہ تمام متعلقہ افسران کو فیلڈ وزٹس اور کام کی رفتار کو برقرار رکھنے کے لیے مانیٹرنگ کرنا ہوگی، اور سرکاری فنڈز کا درست استعمال انتہائی اہمیت کا حامل ہے۔ کمشنر نے واضح کیا کہ منصوبوں کی بروقت تکمیل میں غفلت برداشت نہیں کی جائے گی اور عوامی سہولت کے پیش نظر ترقیاتی منصوبوں کی بروقت تکمیل ناگزیر ہے۔