Category: اوکاڑہ

اوکاڑہ (نامہ نگار ملک ظفر) ماہرِ فلکیات ہمایوں افضل نے سال 2026 کے حوالے سے پاکستان، بھارت اور عالمی صورتحال پر مبنی اہم اور چونکا دینے والی پیش گوئیاں جاری کر دی ہیں۔ ہمایوں افضل کے مطابق سال 2026 میں پاکستان اور بھارت سمیت بعض ممالک میں حکومتوں کی تبدیلی اور مارشل لا کے نفاذ کے امکانات موجود ہیں، جبکہ عوام اور حکومتوں کے درمیان فاصلے میں مزید اضافہ ہوگا۔

انہوں نے کہا کہ غربت اور بے روزگاری کے باعث عوامی بے چینی بڑھے گی، جس کے نتیجے میں دنگا فساد، احتجاجی مظاہرے اور جلسے جلوس دیکھنے میں آ سکتے ہیں۔ ماہرِ فلکیات کے مطابق عالمی امن کی صورتحال بھی غیر مستحکم رہے گی، تاہم صدر ٹرمپ اور فیلڈ مارشل عاصم منیر مل کر عالمی امن کے قیام میں اہم کردار ادا کریں گے۔

ہمایوں افضل نے پیش گوئی کی کہ مارچ اور اپریل 2026 سے پاکستان کی قسمت کا ستارہ چمکنا شروع ہوگا اور ملک کے معاشی و اقتصادی حالات میں نمایاں بہتری آئے گی۔ دوسری جانب بھارت میں علیحدگی پسند تنظیمیں زور پکڑیں گی، جس کے باعث مودی سرکار کی مشکلات میں اضافہ ہوگا۔ ان کا کہنا تھا کہ دنیا کے نقشے پر ایک نیا ملک بھی ابھرنے کا امکان ہے، جبکہ قدرتی آفات اور مالی نقصانات کا خدشہ بھی موجود رہے گا۔ اسی دوران کسی اہم سیاسی شخصیت کی اچانک موت دنیا کو صدمے سے دوچار کر سکتی ہے۔

ماہرِ فلکیات کے مطابق سال 2026 میں پہلا سورج گرہن 17 فروری بروز منگل، پہلا چاند گرہن 3 مارچ بروز منگل، دوسرا سورج گرہن 12 اگست بروز بدھ اور دوسرا چاند گرہن 28 اگست بروز جمعہ کو ہوگا۔ انہوں نے بتایا کہ اس سال یکم رمضان 19 فروری بروز جمعرات کو جبکہ یکم شوال 21 مارچ بروز ہفتہ کو ہونے کا امکان ہے، اور سال 2026 میں 30 روزے ہوں گے۔

ہمایوں افضل کا کہنا تھا کہ آنے والا سال دنیا بھر کے لیے غیر معمولی تبدیلیوں اور بڑے واقعات کا حامل ہوگا، جس کے اثرات عالمی سیاست، معیشت اور امن و امان پر واضح طور پر مرتب ہوں گے۔

اوکاڑہ (نامہ نگار ملک ظفر)محکمہ صحت و آبادی کے زیرِ اہتمام فاطمہ جناح پارک میں ایک روزہ ایجوکیشنل فیملی میلہ منعقد کیا گیا، جس کا مقصد تیزی سے بڑھتی ہوئی آبادی کے سنگین سماجی و معاشی اثرات سے نمٹنے، عوامی شعور بیدار کرنے اور شہریوں کو صحت مند تفریح فراہم کرنا تھا۔ میلہ پنجاب فیملی پلاننگ پروگرام کے تحت منعقد کیا گیا، جس میں چھوٹے خاندان کی اہمیت اور صحت مند طرزِ زندگی کو فروغ دینے پر زور دیا گیا۔

میلے کا باقاعدہ افتتاح اسسٹنٹ کمشنر فیصل شہزاد چیمہ نے کیا، جبکہ ضلعی آفیسر پاپولیشن ویلفیئر چوہدری عاصم ہدایت اور تحصیل پاپولیشن ویلفیئر آفیسر ارسلان اسحاق نے معزز مہمانوں کا استقبال کیا۔ تقریب میں ڈسٹرکٹ ہیلتھ آفیسر ڈاکٹر یاسر سلیم، ایم ایس ٹی ایچ کیو ہسپتال ڈاکٹر عادل رشید، ڈرماٹالوجسٹ ڈاکٹر ولید اسلم اور ڈسٹرکٹ ڈیموگرافر محمد بخش نے خصوصی شرکت کی۔ اس کے علاوہ سول سوسائٹی کے نمائندوں اور فیملیز کی بڑی تعداد بچوں سمیت شریک ہوئی۔

میلے میں صحت مند ماؤں اور بچوں کے مقابلے، میوزیکل چیئر، رسہ کشی، جھومر، ملی نغمے اور قوالی نائٹ کا اہتمام کیا گیا، جس سے شرکاء خوب محظوظ ہوئے۔ پوسٹر ڈیزائننگ، کوئز پروگرامز، ہینڈی کرافٹس اور فوڈ سٹالز نے بھی میلے کی رونق کو دوبالا کیا۔

اس موقع پر اسسٹنٹ کمشنر فیصل شہزاد چیمہ نے کہا کہ وسائل اور آبادی میں توازن برقرار رکھنا آنے والی نسلوں کے بنیادی حقوق کے تحفظ کے لیے ناگزیر ہے۔ ضلعی آفیسر پاپولیشن ویلفیئر چوہدری عاصم ہدایت نے کہا کہ بے ہنگم آبادی پر قابو پانے کے لیے ہر شہری کو اپنی ذمہ داری کا احساس کرنا ہوگا۔

میلے کے اختتام پر نمایاں کارکردگی دکھانے والے شرکاء میں انعامات تقسیم کیے گئے جبکہ مہمانوں کو یادگاری شیلڈز بھی پیش کی گئیں۔

اوکاڑہ (نامہ نگار ملک ظفر)نیو ایئر نائٹ کے موقع پر اوکاڑہ پولیس نے فول پروف سیکیورٹی پلان جاری کر دیا ہے۔ ڈسٹرکٹ پولیس آفیسر اوکاڑہ محمد راشد ہدایت کی ہدایات پر مرتب کیے گئے اس جامع سیکیورٹی پلان کا مقصد شہریوں کے جان و مال کا تحفظ اور شہر میں امن و امان کی صورتحال کو یقینی بنانا ہے۔

ڈی پی او محمد راشد ہدایت کا کہنا ہے کہ نیو ایئر نائٹ کے دوران ون ویلنگ، ہوائی فائرنگ، ہلڑ بازی اور کسی بھی قسم کی قانون شکنی پر مکمل پابندی عائد ہو گی۔ خلاف ورزی کی صورت میں زیرو ٹالرنس پالیسی کے تحت فوری اور سخت قانونی کارروائی عمل میں لائی جائے گی۔

انہوں نے واضح کیا کہ خواتین اور شہریوں کو ہراساں کرنے والے عناصر کے خلاف بھی بلاامتیاز کارروائی کی جائے گی اور ایسے افراد کو فوری طور پر گرفتار کر کے حوالات میں بند کیا جائے گا۔

سیکیورٹی پلان کے تحت 900 سے زائد پولیس افسران اور اہلکار شہر بھر میں سیکیورٹی ڈیوٹی سرانجام دیں گے۔ حساس مقامات، تفریحی علاقوں اور اہم شاہراہوں پر خصوصی ناکہ بندی، گشت اور نگرانی کو یقینی بنایا جائے گا تاکہ کسی بھی ناخوشگوار واقعے سے بروقت نمٹا جا سکے۔

ڈی پی او اوکاڑہ نے شہریوں سے اپیل کی ہے کہ وہ قانون نافذ کرنے والے اداروں سے تعاون کریں اور کسی بھی مشکوک سرگرمی کی فوری اطلاع پولیس ہیلپ لائن 15 پر دیں تاکہ نیو ایئر نائٹ کو پرامن اور خوشگوار بنایا جا سکے۔

اوکاڑہ (نامہ نگار ملک ظفر)نجی اسکول سرسید کیمپسز نے ایک بار پھر شاندار تعلیمی ریکارڈ قائم کرتے ہوئے نمایاں کامیابیاں حاصل کر لی ہیں۔ سرسید کیمپس پتوکی کی ہونہار طالبہ آمنہ محبوب نے 555 میں سے 553 نمبر حاصل کر کے بورڈ آف انٹرمیڈیٹ اینڈ سیکنڈری ایجوکیشن لاہور میں اول پوزیشن حاصل کی۔

اسی طرح سرسید کیمپس حجرہ شاہ مقیم، ضلع اوکاڑہ کی طالبہ آمنہ عامر نے 555 میں سے 551 نمبر حاصل کر کے بورڈ آف انٹرمیڈیٹ اینڈ سیکنڈری ایجوکیشن ساہیوال میں دوم پوزیشن اپنے نام کی۔

ان شاندار نتائج کے باعث سرسید کیمپس پتوکی نے ملک بھر میں اسکولز چین میں پہلا مقام حاصل کیا، جبکہ سرسید کیمپس حجرہ شاہ مقیم دوسرے نمبر پر رہا۔ تعلیمی و سماجی حلقوں نے ان کامیابیوں پر طلبہ، اساتذہ اور بالخصوص ڈائریکٹرز میاں محمد نوید اور میاں محمد مظہر کو دلی مبارکباد پیش کی۔

مبارکباد دینے والوں کا کہنا تھا کہ سرسید کیمپسز میں معیاری تعلیم، نظم و ضبط اور اساتذہ کی انتھک محنت ہی ان شاندار نتائج کی بنیادی وجہ ہے، جبکہ طالبات کی کامیابی دیگر طلبہ کے لیے مشعلِ راہ ہے۔

اوکاڑہ (نامہ نگار: ملک ظفر)خصوصی افراد کی فلاح و بہبود کے لیے وزیراعلیٰ پنجاب مریم نواز شریف کے فلیگ شپ پروگرام کے پانچویں مرحلے کے تحت سوشل ویلفیئر ڈیپارٹمنٹ کے زیر اہتمام معاون آلات کی تقسیم کی ایک پروقار تقریب منعقد ہوئی۔

تقریب میں ڈپٹی کمشنر اوکاڑہ احمد عثمان جاوید اور رکن پنجاب اسمبلی میاں محمد منیر نے 80 خصوصی افراد میں مختلف معاون آلات تقسیم کیے۔ اس موقع پر ڈپٹی ڈائریکٹر سوشل ویلفیئر محمد اشتیاق خان نے حکومتِ پنجاب کے خصوصی افراد کے لیے جاری عوامی فلاحی اقدامات پر تفصیلی بریفنگ دی۔

فلاحی پروگرام کے تحت خصوصی افراد میں الیکٹرک اور مینول وہیل چیئرز، آلہ سماعت، بیساکھیاں اور دیگر ضروری معاون آلات فراہم کیے گئے، جس پر خصوصی افراد اور ان کے اہلِ خانہ نے وزیراعلیٰ پنجاب مریم نواز شریف سے دلی تشکر کا اظہار کیا۔

تقریب سے خطاب کرتے ہوئے ڈپٹی کمشنر احمد عثمان جاوید نے کہا کہ وزیراعلیٰ پنجاب کے شاندار ویژن کے تحت ضلع بھر کے دور دراز علاقوں تک خصوصی افراد کو سہولیات فراہم کی جا رہی ہیں۔ انہوں نے سول سوسائٹی پر زور دیا کہ وہ خصوصی افراد کی فلاح و بہبود کے لیے سرکاری محکموں کے شانہ بشانہ کردار ادا کرے۔

ڈپٹی کمشنر کا کہنا تھا کہ خصوصی افراد کی دیکھ بھال ہم سب کی مشترکہ ذمہ داری ہے اور وزیراعلیٰ پنجاب کے ویژن کے مطابق ان کی سپورٹ کے لیے مزید عملی اقدامات بھی کیے جائیں گے۔

اس موقع پر ایم پی اے میاں محمد منیر نے کہا کہ معاون آلات کی فراہمی سے خصوصی افراد کی روزمرہ زندگی میں نمایاں آسانی پیدا ہوگی۔ انہوں نے یقین دلایا کہ فلاح و بہبود کے منصوبوں کے ذریعے خصوصی افراد کی بہتری کے لیے تمام ممکنہ اقدامات جاری رکھے جائیں گے۔

اوکاڑہ (نامہ نگار ملک ظفر) کمشنر ساہیوال ڈویژن ڈاکٹر آصف طفیل نے آر پی او رانا ایاز سلیم اور ڈپٹی کمشنر احمد عثمان جاوید کے ہمراہ کرسمس کے انتظامات کے سلسلے میں اوکاڑہ کے کیتھولک چرچ کا دورہ کیا۔

دورے کے دوران چرچ میں صفائی، بجلی، پانی اور سیکیورٹی انتظامات کا تفصیلی جائزہ لیا گیا۔ کمشنر ساہیوال نے کرسمس کے موقع پر مسیحی برادری کو بہترین سہولیات کی فراہمی یقینی بنانے کی ہدایات دیں اور چرچ انتظامیہ سے ملاقات کے بعد انتظامات پر اطمینان کا اظہار کیا۔

کمشنر ساہیوال ڈاکٹر آصف طفیل اور آر پی او رانا ایاز سلیم نے کرسچن کمیونٹی کے ساتھ مل کر کرسمس کا کیک بھی کاٹا۔ اس موقع پر فول پروف سیکیورٹی انتظامات یقینی بنانے کے احکامات جاری کیے گئے۔

کمشنر نے کہا کہ کرسمس کی تقریبات کے دوران مسیحی برادری کو ہر ممکن سہولیات فراہم کی جائیں گی اور اس ضمن میں کسی قسم کا سمجھوتہ نہیں کیا جائے گا۔ پبلک پارکس، قبرستانوں اور کرسچن کالونیوں میں بہترین میونسپل سروسز کی فراہمی کے لیے تمام ممکن اقدامات کیے جائیں گے۔

انہوں نے واضح کیا کہ اقلیتی برادری کے مذہبی تہواروں پر مکمل احترام اور سہولیات کی فراہمی ضلعی انتظامیہ کی اولین ترجیح ہے، جبکہ سیکیورٹی ادارے کرسمس کے موقع پر فول پروف سیکیورٹی انتظامات کو یقینی بنائیں گے۔ کمشنر ساہیوال نے ضلعی انتظامیہ کے موثر اقدامات کو سراہا۔

اوکاڑہ ( نامہ نگار ملک ظفر )سب انسپکٹر محمد یونس کے صاحبزادے فخر فرید نے قانون کے شعبے میں قومی سطح پر مسلسل دو فتوحات حاصل کر کے ضلع اوکاڑہ اور اپنے والدین کا سر فخر سے بلند کر دیا ہے۔ گورنمنٹ کالج یونیورسٹی لاہور کے ہونہار طالب علم فخر فرید نے محض ایک ماہ کے دوران دو بڑے نیشنل موٹ کورٹ مقابلے جیت کر اپنی خداداد صلاحیتوں کا لوہا منوایا ہے۔ تفصیلات کے مطابق، 14 نومبر 2025 کو آئی وی کالج آف لا کے زیر اہتمام منعقدہ "آل پاکستان نیشنل موٹ کورٹ مقابلے” میں ملک بھر سے آئی ہوئی 16 ٹیموں کو پچھاڑ کر انہوں نے پہلی پوزیشن حاصل کی۔ اس کے فوری بعد 30 نومبر 2025 کو "ایچ آر پی سی” کے سالانہ موٹ کورٹ مقابلے میں بھی انہوں نے اپنی جامعہ کی نمائندگی کرتے ہوئے سیمی فائنل میں پنجاب یونیورسٹی اور فائنل میں گلوبل لا کالج جیسی مضبوط ٹیموں کو شکست دے کر مسلسل دوسری قومی چیمپئن شپ اپنے نام کی۔

فخر فرید کی اس غیر معمولی تعلیمی و پیشہ ورانہ کامیابی پر ڈی پی او اوکاڑہ محمد راشد ہدایت نے ان کی قابلیت کا اعتراف کرتے ہوئے انہیں نقد انعام اور تعریفی اسناد (Appreciation Letter) سے نوازا ہے۔ پولیس افسر کے صاحبزادے کی یہ شاندار کارکردگی نوجوان نسل کے لیے ایک مشعلِ راہ قرار دی جا رہی ہے جو اس بات کا ثبوت ہے کہ محنت اور لگن سے کسی بھی میدان میں کامیابی حاصل کی جا سکتی ہے۔ اس تاریخی کامیابی پر عوامی اور سماجی حلقوں کی جانب سے سب انسپکٹر محمد یونس کو مبارکباد دینے کا سلسلہ جاری ہے اور ہونہار طالب علم کے روشن مستقبل کے لیے نیک تمناؤں کا اظہار کیا جا رہا ہے۔