Category: پشاور

لکی مروت اور بنوں میں فائرنگ کے واقعات میں 4 پولیس اہلکار شہید ہوگئے۔

لکی مروت پولیس کے ترجمان کے مطابق سرائے نورنگ شہر میں نامعلوم موٹر سائیکل سوار دہشتگردوں نے فائرنگ کی جس سے ڈیوٹی پر مامور 3 ٹریفک پولیس اہلکار شہید ہوگئے، فائرنگ کے واقعے میں انچارج ٹریفک پولیس نورنگ جلال خان، کانسٹیبل عزیز اللہ اور کانسٹیبل عبداللہ شہید ہوئے،ترجمان کے مطابق نامعلوم موٹرسائیکل سوار دہشتگرد فائرنگ کے بعد فرار ہوگئے، شہید پولیس اہلکاروں کی لاشیں تحصیل ہیڈ کوارٹر اسپتال سرائے نورنگ منتقل کردی گئی ہے۔

دوسری جانب بنوں پولیس کا کہنا ہے کہ منڈان میں نامعلوم افراد کی فائرنگ سے پولیس اہلکار شہید ہوگیا، کانسٹیبل رشید خان گھر سے ڈیوٹی پر تھانا منڈان جا رہا تھا کہ مسلح افراد کی فائرنگ سے شہید ہوگیا۔

وزیراعلی خیبرپختونخوا سہیل آفریدی نے لکی مروت میں فائرنگ کے واقعہ کی مذمت کی ہے، انہوں نے دہشتگردوں کی فائرنگ سے شہید ٹریفک پولیس اہلکاروں کے لواحقین سے اظہار تعزیت کیا،سہیل آفریدی نے کہا واقعہ افسوسناک ہے، شہید پولیس اہلکاروں کی قربانیاں رائیگاں نہیں جائیں گی، بزدلانہ حملوں سے ملک دشمن عناصر اپنے مذموم عزائم میں کامیاب نہیں ہوں گے، دہشت گردی کے خلاف جنگ میں پولیس اہلکار فرنٹ لائن پر قربانیاں دے رہے ہیں، ملوث عناصر کو قانون کے کٹہرے میں لا کر کیفرِ کردار تک پہنچایا جائے گا،صوبائی حکومت پولیس فورس کے شانہ بشانہ کھڑی ہے، شہداء کے لواحقین کو ہرممکن معاونت فراہم کی جائے گی۔

خیبر پختونخوا میں سال 2025 کے دوران دہشت گردی کے واقعات میں تشویشناک حد تک اضافہ دیکھنے میں آیا ہے۔ کاؤنٹر ٹیررازم ڈیپارٹمنٹ (CTD) کی جاری کردہ سالانہ رپورٹ کے مطابق صوبے کو مسلسل اور بدلتے ہوئے سکیورٹی خطرات کا سامنا رہا، خصوصاً قبائلی اضلاع اور جنوبی علاقوں میں حالات زیادہ سنگین رہے۔

سی ٹی ڈی رپورٹ کے مطابق سال 2025 میں صوبے بھر میں 1,762 دہشت گردی کے واقعات پیش آئے۔ ان واقعات میں مجموعی طور پر 707 افراد جان بحق ہوئے، جن میں 159 پولیس اہلکار شامل ہیں، جبکہ 272 افراد زخمی ہوئے۔
دہشت گردوں کے خلاف کارروائیوں کے دوران سکیورٹی فورسز نے 395 شدت پسندوں کو ہلاک کیا۔ اسی عرصے میں 9 خودکش حملے بھی ریکارڈ کیے گئے، جو ایک خطرناک رجحان کی نشاندہی کرتے ہیں۔

رپورٹ کے مطابق بنوں میں دہشتگردی کے 430 واقعات،شمالی وزیرستان میں 213 واقعات،ڈی آئی خان میں 137 واقعات،جنوبی وزیرستان میں111 واقعات پیش آئے،یہ اعداد و شمار واضح کرتے ہیں کہ جنوبی اور قبائلی اضلاع بدستور دہشت گردوں کا مرکزی ہدف رہے۔سال 2025 میں دہشت گردوں نے مختلف طریقوں سے حملے کیے،فائرنگ کے واقعات 628 (14 اضلاع میں)پیش آئے،آئی ای ڈی دھماکے 179 ہوئے،ہینڈ گرنیڈ حملے 71 کئے گئے، راکٹ ،میزائل حملے کئے گئے، 80 ڈرون حملے کئے گئے،یہ تنوع اس بات کی عکاسی کرتا ہے کہ دہشت گرد گروہ نت نئے طریقے اپنا رہے ہیں۔

رپورٹ میں دیگر سنگین جرائم کا بھی انکشاف کیا گیا، جن میں 88 اغوا کے واقعات ،149 بھتہ خوری کے کیسز، 117ٹارگٹ کلنگ،151سہولت کاری (Facilitation) کے کیسز،26 دہشت گردی کی مالی معاونت کے کیسز شامل ہیں،سی ٹی ڈی کی رپورٹ کے مطابق 2025 میں خیبر پختونخوا کو ایک مسلسل، منظم اور بدلتے ہوئے دہشت گردی کے خطرے کا سامنا رہا۔ حملوں کی نوعیت، جغرافیائی پھیلاؤ اور جرائم کی اقسام اس بات کی نشاندہی کرتی ہیں کہ سکیورٹی اداروں کو نہ صرف آپریشنل سطح پر بلکہ انٹیلی جنس اور مالیاتی نگرانی کے شعبوں میں بھی مزید مؤثر حکمت عملی اپنانا ہوگی۔رپورٹ اس امر پر زور دیتی ہے کہ صوبے میں امن کے قیام کے لیے سکیورٹی اداروں، سول انتظامیہ اور عوام کے درمیان مضبوط تعاون ناگزیر ہے۔

شمالی وزیرستان کے علاقے میرعلی میں دہشتگردی کا سنگین واقعہ پیش آیا، جہاں گاؤں حسوخیل میں قائم الفاتح پبلک ہائی اسکول کو ڈرون حملے کا نشانہ بنایا گیا۔ پولیس کے مطابق حملے کے نتیجے میں اسکول کے تین عملے کے افراد زخمی ہو گئے، جن میں اسکول کے پرنسپل بھی شامل ہیں۔

پولیس کا کہنا ہے کہ دہشتگردوں نے اسکول کی عمارت کو نشانہ بناتے ہوئے ڈرون کے ذریعے دھماکہ خیز مواد گرایا، جس سے اسکول کی عمارت کو جزوی نقصان پہنچا اور خوف و ہراس پھیل گیا۔واقعے کے فوراً بعد زخمی افراد کو طبی امداد فراہم کرنے کے لیے ریسکیو 1122 کی ٹیم جائے وقوعہ پر پہنچی، مگر اسی دوران حملہ آوروں نے ایک بار پھر ڈرون کا استعمال کرتے ہوئے ریسکیو اہلکاروں کو نشانہ بنایا۔ دوسرے حملے کے نتیجے میں متعدد ریسکیو اہلکار بھی زخمی ہو گئے، جنہیں فوری طور پر قریبی ہسپتال منتقل کیا گیا۔پولیس حکام کا کہنا ہے کہ تعلیمی اداروں اور ریسکیو عملے کو نشانہ بنانا دہشتگردوں کی بزدلانہ کارروائی ہے، جس کا مقصد علاقے میں خوف پھیلانا ہے۔ حکام کے مطابق واقعے میں ملوث عناصر کو جلد قانون کے کٹہرے میں لایا جائے گا اور علاقے میں سکیورٹی مزید سخت کر دی گئی ہے۔

وادی تیراہ میں عسکریت پسندوں نے جرگہ ممبر کو اغواء کر لیا
جرگہ کے دیگر ممبران کا عسکریت پسندوں کے خلاف مقامی مزاحمت شروع کرنے کا فیصلہ
ذرائع کے مطابق وادی تیراہ میں 24 رکنی جرگہ کے ایک ممبر ملک اسلام غنی کو اغواء کرنے کے بعد جرگہ کے دیگر ممبران نےعسکریت پسندوں کے خلاف مقامی مزاحمت شروع کرنے پر مشاورت شروع کردی اور اس حوالے سےجرگہ طلب کرنے کا فیصلہ کیا ہے ،جرگہ کے ایک ممبر نے بات کرتے ہوئے کہا کہ انہوں نے دہشت گردوں کو واضح پیغام بھیجا ہے کہ اگر جرگہ ممبر کو کسی بھی قسم کا نقصان پہنچایا گیا تو پھر اہل علاقہ ان کے خلاف اسلحہ اٹھاکر نہ صرف بدلہ لیں گے بلکہ علاقہ سے دہشت گردوں کا صفایا کرنے اور نکالنے کیلئے سکیورٹی فورسز اور پولیس کا بھی ساتھ دینگے۔

سنٹرل کرم :سکیورٹی فورسز کی کارروائی ، کالعدم تنظیم کے انتہائی مطلوب سمیت 11 دہشتگرد ہلاک؛
ذرائع کے مطابق سکیورٹی فورسز نے سنٹرل کرم کے علاقہ مارغن میں انٹیلی جنس بیسڈ آپریشن کرکے کالعدم ٹی ٹی پی کاظم گروپ کے 11 دہشت گردوں کو ہلاک کردیا،مصدقہ اطلاعات کے مطابق، مقابلے کے دوران ایک ہائی ویلیو ٹارگٹ مارے جانے کی بھی اطلاعات ہیں۔

وزیراعلیٰ خیبر پختونخوا سہیل آفریدی نے کہا ہے کہ کراچی کے دورہ کےدوران وزیراعلیٰ سندھ سید مرادعلی شاہ سےملاقات کروں گا،

سہیل آفریدی کا کہنا تھا کہ وزیراعلیٰ سندھ نےملاقات کی دعوت دی ہے، ملاقات کےدوران کراچی میں پختون کمیونٹی کو درپیش مسائل پربات چیت ہوگی، کراچی کےکچھ اسپتالوں میں ہیلتھ کارڈ پرعلاج میں خیبرپختونخوا کے لوگوں کو مسائل کا سامنا ہے، وزیراعلیٰ سندھ سےکہوں گا کہ ہیلتھ کارڈ پر علاج میں درپیش مسائل کو دور کریں، کراچی میں آئی ایس ایف، آئی ایل ایف، پی ٹی آئی کےرہنماوں اور ورکرزملاقاتیں کروں گا، کراچی میں پی ٹی آئی کےاراکین قومی و صوبائی اسمبلی سےبھی ملوں گا،

واضح رہے کہ وزیراعلیٰ خیبر پختونخوا جنوری سے 11 جنوری تک کراچی کا دورہ کریں گے،

لکی مروت پولیس نے 2025میں118 دہشتگردوں کو ہلاک جبکہ 16 بڑے حملے ناکام بنائے،

پولیس نے سال 2025 کی سالانہ کارکردگی رپورٹ جاری کر دی، دہشتگردی کے خلاف کارروائیوں میں مجموعی طور پر 118 دہشتگرد ہلاک جبکہ 53 کو گرفتار کیا گیا۔ اسی طرح 8 سہولت کار مارے گئے اور 28 سہولت کاروں کو حراست میں لیا گیا۔ پولیس نے سال 2025 کے دوران 16 دہشتگرد حملوں کو بروقت کارروائی کرتے ہوئے ناکام بنایا، جن میں 4 کوڈ کاپٹر حملے بھی شامل تھے۔

پولیس ترجمان کے مطابق بم ڈسپوزل یونٹ نے 17 آئی ای ڈیز ناکارہ بنائیں اور 372 کلوگرام بارودی مواد برآمد کیا۔ اس کے علاوہ قتل، ڈکیتی اور دیگر سنگین جرائم کے 35 اندھے مقدمات ٹریس کیے گئے۔ رپورٹ میں بتایا گیا کہ سال 2025 میں 1665 اشتہاری اور مفرور ملزمان کو گرفتار کیا گیا۔رپورٹ کے مطابق تختی خیل میں کیے گئے ایک بڑے آپریشن میں عسکریت پسندوں کا بدنام مہاجر کیمپ مکمل طور پر مسمار کیا گیا۔

ڈیرہ اسماعیل خان: کاؤنٹر ٹیررازم ڈیپارٹمنٹ (سی ٹی ڈی) نے پہاڑپور کے مختلف پہاڑی علاقوں میں ایک بڑی کارروائی کے دوران دہشتگردوں کے 21 مبینہ سہولت کاروں کو گرفتار کرلیا۔ گرفتار ملزمان کے قبضے سے اسلحہ، گولہ بارود اور دیگر خطرناک مواد بھی برآمد ہوا ہے۔

سی ٹی ڈی کے ترجمان کے مطابق، پولیس اور سی ٹی ڈی کی مشترکہ ٹیموں نے سیدو والی، برز والی، علی ونڈا، چندہ، کالی ونڈا، گڑھ پیر امام شاہ، گلوٹی اور پانیالہ کے پہاڑی علاقوں میں انٹیلی جنس بیسڈ آپریشن انجام دیا۔ آپریشن کے دوران دہشت گردوں کے ساتھ فائرنگ کا تبادلہ بھی ہوا تاہم خوش قسمتی سے کوئی جانی نقصان نہیں ہوا۔ترجمان نے بتایا کہ کارروائی کے دوران علاقے کو گھیرے میں لے کر تفصیلی سرچ آپریشن کیا گیا، جس کے نتیجے میں 21 افراد کو گرفتار کیا گیا جن میں دہشت گردوں کے مبینہ سہولت کار بھی شامل ہیں۔ گرفتار افراد کے قبضے سے برآمد ہونے والا اسلحہ اور بارود مزید تحقیقات کے لیے تحویل میں لے لیا گیا ہے۔

سی ٹی ڈی نے عوام سے اپیل کی ہے کہ وہ مشکوک سرگرمیوں کی اطلاع فوراً متعلقہ حکام کو دیں تاکہ دہشت گردوں کے نیٹ ورک کو مزید نقصان پہنچایا جا سکے۔ پولیس اور سی ٹی ڈی کا کہنا ہے کہ آپریشنز آئندہ بھی جاری رہیں گے اور علاقے میں امن و امان قائم رکھنے کے لیے تمام اقدامات کیے جائیں گے۔