بنوں کے مقامی اسپتال کی نرس کی مبینہ خودکشی کے معاملے میں اہم پیش رفت سامنے آئی ہے۔ مقامی عدالت نے نرس الفت کی موت کی وجوہات جاننے کے لیے قبر کشائی اور ازسرِنو پوسٹ مارٹم کا حکم جاری کر دیا ہے، جس سے کیس کی سمت میں نمایاں تبدیلی متوقع ہے۔
عدالت نے اپنے حکم میں واضح کیا ہے کہ قبر کشائی 26 جون 2025 کو دوپہر 12 بجے کی جائے گی۔ اس عمل کے دوران سیکیورٹی کے سخت انتظامات کو یقینی بنانے کے لیے ریجنل پولیس آفیسر بنوں ڈویژن کو خصوصی ہدایات جاری کر دی گئی ہیں۔عدالت نے یہ بھی حکم دیا ہے کہ دوبارہ پوسٹ مارٹم ویمن اینڈ چلڈرن اسپتال کی تجربہ کار لیڈی ہیلتھ آفیسر کی زیر نگرانی کیا جائے گا تاکہ طبی تجزیے میں شفافیت اور مہارت برقرار رکھی جا سکے۔ مدعی وکیل سیف اللہ ایڈووکیٹ نے کہا ہے کہ انصاف کے تقاضے پورے کرنے کے لیے ازسرِنو طبی جانچ ناگزیر ہو چکی ہے، کیونکہ ابتدائی پوسٹ مارٹم کے دوران کئی اہم نکات نظر انداز کیے گئے تھے اور متعلقہ ڈاکٹر سے مکمل تفتیش نہیں کی گئی تھی۔عدالتی حکم میں اس بات پر زور دیا گیا ہے کہ دوبارہ طبی معائنے کا مقصد حقیقت کو سامنے لانا اور متاثرہ خاندان کو انصاف فراہم کرنا ہے۔
یاد رہے کہ نرس الفت کی مبینہ خودکشی کا واقعہ کچھ روز قبل اس وقت پیش آیا جب اس نے مبینہ طور پر زہریلی گولیاں کھا کر اپنی جان لے لی تھی۔ ابتدائی رپورٹس کے مطابق ہسپتال کے ایک ملازم پر الزام ہے کہ وہ نرس کو مسلسل ہراساں کر رہا تھا، جس سے دلبرداشتہ ہو کر نرس نے یہ انتہائی قدم اٹھایا۔
