Category: پشاور

محکمہ ایکسائز خیبرپختونخوا نے نشتر ہال پشاور میں پرسنلائزڈ مارکس چوائس نمبر پلیٹس کی نیلامی کا انعقاد کیا۔
‎نیلامی کے دوران سب سے زیادہ بولی وزیر 1 نمبر پلیٹ پر لگی، جو 1 کروڑ 50 لاکھ روپے میں فروخت ہوئی۔ دوسری سب سے زیادہ بولی آفریدی 1 نمبر پلیٹ پر لگی، جو 1 کروڑ 40 لاکھ 50 ہزار روپے میں فروخت ہوئی اور یہ پشاور زلمی کے مالک جاوید آفریدی نے حاصل کی۔
‎تیسری نمایاں بولی خان 1 نمبر پلیٹ پر رہی، جو 1 کروڑ 11 لاکھ روپے میں فروخت ہوئی اور یہ نمبر پلیٹ ایم پی اے نیک محمد خان کے حصے میں آئی۔

پشاور ہائی کورٹ نے وزیراعلیٰ خیبر پختونخوا سہیل آفریدی کے خلاف توہین عدالت کی درخواست خارج کردی۔

چیف جسٹس پشاور ہائی کورٹ ایس ایم عتیق شاہ نے سہیل آفریدی کے خلاف توہین عدالت کی درخواست پر سماعت کی،درخواست گزار کے وکیل نے مؤقف اختیار کیا کہ وزیراعلیٰ سہیل آفریدی عدالت سے ضمانت لیتے ہیں اور پھر اس کا غلط استعمال کرتے ہیں،وکیل درخواست گزار نے کہا کہ وزیراعلیٰ اسلام آباد، لاہور اور کراچی جاتے ہیں اور وہاں پر تقاریر کرتے ہیں، وزیراعلیٰ عدالتی آرڈر کا غلط استعمال کرکے توہین عدالت کر رہے ہیں۔

ایڈیشنل ایڈووکیٹ جنرل نے عدالت کو بتایا کہ سہیل آفریدی صوبے کے منتخب وزیراعلیٰ ہیں، درخواست گزاروں نے توہین عدالت درخواست دائر کی لیکن اس کی کوئی قانونی حیثیت نہیں ہے،ایڈیشنل ایڈووکیٹ جنرل نے کہا کہ درخواست گزار متاثرہ فریق نہیں، یہ درخواست قابل سماعت نہیں ہے۔

گورنر خیبر پختونخوا فیصل کریم کنڈی نے خیبر پختونخوا کی موجودہ صورتحال پر ایکس پر اہم پیغام جاری کرتے ہوئے کہا ہے کہ ایک پُرامن صوبہ 2013 میں صوبائی حکومت کے حوالے کیا گیا تھا جو آج وہ دوبارہ دہشتگردی کی لپیٹ میں ہے،اس تمام صورتحال کی ذمہ داری صوبائی قیادت کے سوا کس پر عائد ہوتی ہے

گورنر خیبر پختونخوا فیصل کریم کنڈی کا کہنا تھا کہ اگر صوبے کا چیف ایگزیکٹو بغیر حکومتی منظوری کے انٹیلیجنس بیسڈ آپریشنز اور اپنی لاعلمی کا دعویٰ کرے ، تو یہ صرف نااہلی نہیں گورننس کی تباہی کا اعتراف ہے۔میں وزیراعلیٰ خیبر پختونخواہ کو مشورہ دیتا ہوں کہ وہ شعبدہ بازی اور ڈرامہ بازی کو ختم کریں۔خیبرپختونخواخصوصاً تیراہ اور کرم کی عوام کو اس وقت تقاریر کی نہیں بلکہ واضح قیادت کی ضرورت ہے،وزیراعلیٰ کی ترجیح آئی ڈی پیز کی فوری بحالی اور سیکورٹی ہونی چاہیے، نہ کہ سیاسی ڈرامہ اور انتشار پھیلانا،

شمالی وزیرستان کے علاقے میرعلی میرانشاہ روڈ پر سیکیورٹی فورسز نے خفیہ اطلاعات کی بنیاد پر ٹارگٹڈ آپریشن کرتے ہوئے ایک مطلوب عسکریت پسند کو ہلاک کر دیا۔

سیکیورٹی ذرائع کے مطابق ہلاک ہونے والے عسکریت پسند کی شناخت محمد گل کے نام سے ہوئی ہے، جو علاقے میں دہشتگردانہ سرگرمیوں میں ملوث تھا،ذرائع کا کہنا ہے کہ سیکیورٹی فورسز کو محمد گل کی نقل و حرکت سے متعلق مستند خفیہ معلومات موصول ہوئی تھیں، جس پر بروقت کارروائی کرتے ہوئے آپریشن کیا گیا۔ کارروائی کے دوران فائرنگ کے تبادلے میں مطلوب دہشتگرد ہلاک ہو گیا، جبکہ سیکیورٹی فورسز کا کوئی جانی نقصان نہیں ہوا،سیکیورٹی ذرائع کے مطابق محمد گل متعدد تخریبی کارروائیوں میں ملوث رہا ہے اور قانون نافذ کرنے والے اداروں کو طویل عرصے سے مطلوب تھا۔ ہلاک دہشتگرد کے قبضے سے اسلحہ اور گولہ بارود بھی برآمد ہوا، جسے تحویل میں لے لیا گیا ہے۔

کارروائی کے بعد علاقے میں سرچ اینڈ کلیئرنس آپریشن شروع کر دیا گیا، تاکہ کسی ممکنہ سہولت کار یا دیگر مشتبہ عناصر کو گرفتار کیا جا سکے۔ سیکیورٹی فورسز نے علاقے کو گھیرے میں لے کر مکمل کلیئرنس تک آپریشن جاری رکھنے کا فیصلہ کیا ہے۔سیکیورٹی حکام کا کہنا ہے کہ شمالی وزیرستان میں امن و امان کی صورتحال کو بہتر بنانے اور دہشتگردی کے مکمل خاتمے تک ایسی کارروائیاں جاری رہیں گی۔ عوام سے بھی اپیل کی گئی ہے کہ وہ مشتبہ سرگرمیوں کی اطلاع فوری طور پر قانون نافذ کرنے والے اداروں کو دیں

شمالی وزیرستان کے علاقے بکاخیل میں سیکیورٹی فورسز نے خفیہ اطلاعات کی بنیاد پر بڑی کارروائی کرتے ہوئے کالعدم تحریک طالبان پاکستان (ٹی ٹی پی) کے ایک اہم کمانڈر کو ہلاک کر دیا۔

سیکیورٹی ذرائع کے مطابق کارروائی کے دوران ہلاک ہونے والے دہشت گرد کی شناخت غفور عرف اجاز کے نام سے ہوئی ہے، جو ٹی ٹی پی کا اہم کمانڈر تھا اور متعدد دہشت گرد کارروائیوں میں ملوث رہا۔ ذرائع کا کہنا ہے کہ غفور عرف اجاز کا تعلق شمالی وزیرستان کے علاقے سیدگئی سے تھا اور وہ سیکیورٹی فورسز کو طویل عرصے سے مطلوب تھا۔سیکیورٹی حکام کے مطابق دہشت گردوں کی موجودگی کی اطلاع ملنے پر فورسز نے علاقے کو گھیرے میں لے کر ٹارگٹڈ آپریشن کیا۔ کارروائی کے دوران شدید فائرنگ کا تبادلہ ہوا جس کے نتیجے میں ٹی ٹی پی کا کمانڈر مارا گیا، جبکہ دیگر دہشت گرد اندھیرے کا فائدہ اٹھاتے ہوئے فرار ہونے میں کامیاب ہو گئے۔

ذرائع کے مطابق ہلاک ہونے والا کمانڈر شمالی وزیرستان اور اس کے گردونواح میں سیکیورٹی فورسز اور عام شہریوں پر حملوں کی منصوبہ بندی اور سہولت کاری میں سرگرم تھا۔ کارروائی کے بعد علاقے میں سرچ اینڈ کلیئرنس آپریشن شروع کر دیا گیا تاکہ کسی بھی ممکنہ خطرے کا مکمل خاتمہ یقینی بنایا جا سکے۔سیکیورٹی ذرائع کا کہنا ہے کہ دہشت گردی کے خلاف آپریشنز بلا تفریق جاری رہیں گے اور ملک دشمن عناصر کے خاتمے تک کارروائیاں جاری رکھی جائیں گی۔ مقامی لوگوں نے سیکیورٹی فورسز کی بروقت کارروائی کو سراہتے ہوئے علاقے میں امن کے قیام کے لیے اسے ایک اہم پیش رفت قرار دیا ہے۔

وادی تیراہ میں شدید اور مسلسل برف باری کے باعث معمولاتِ زندگی بری طرح متاثر ہو گئے ہیں۔ شدید سردی اور برفانی طوفان کے نتیجے میں کئی علاقے زمینی رابطوں سے منقطع ہو گئے جبکہ روزمرہ سرگرمیاں معطل ہو کر رہ گئی ہیں۔ اس صورتحال میں پاک فوج نے مقامی انتظامیہ کے تعاون سے بڑے پیمانے پر ریلیف آپریشن شروع کر رکھا ہے جو بلا تعطل جاری ہے۔

انتظامیہ کے مطابق مقامی آبادی کو درپیش مشکلات کے ازالے اور زندگی کو معمول پر لانے کے لیے پاک فوج کے دستے متحرک ہیں۔ شدید برف باری کے دوران برف میں پھنسنے والی متعدد گاڑیوں کو نکال کر محفوظ مقامات تک منتقل کیا گیا، جس سے مسافروں اور مقامی افراد کو فوری ریلیف ملا۔ریلیف آپریشن کی نگرانی پاک فوج اور فرنٹیئر کور (ایف سی) کے افسران اور جوان خود کر رہے ہیں۔ متاثرہ علاقوں میں خاندانوں کو کھانے پینے کی اشیاء، کمبل اور دیگر ضروری سامان فراہم کیا جا رہا ہے، جبکہ ہنگامی طبی امداد کی سہولیات بھی مہیا کی گئی ہیں تاکہ کسی بھی ناخوشگوار صورتحال سے بروقت نمٹا جا سکے۔

پاک فوج کی جانب سے متاثرہ خاندانوں میں اشیائے ضروریہ کی تقسیم کا سلسلہ بھی جاری ہے۔ پیشہ ورانہ حکمتِ عملی اور منظم اقدامات کے باعث متعدد علاقوں میں زمینی رابطے بحال کر دیے گئے ہیں، جس سے امدادی سرگرمیوں میں مزید تیزی آئی ہے۔مقامی شہریوں نے مشکل حالات میں پاک فوج اور سکیورٹی فورسز کی بروقت امدادی کارروائیوں کو سراہتے ہوئے کہا ہے کہ برفانی موسم میں یہ اقدامات ان کے لیے کسی نعمت سے کم نہیں۔ انتظامیہ کا کہنا ہے کہ جب تک حالات مکمل طور پر بہتر نہیں ہو جاتے، ریلیف آپریشن اسی جذبے کے ساتھ جاری رہے گا۔

ڈیرہ اسماعیل خان: شہر کے علاقے قریشی موڑ پر امن کمیٹی کے سربراہ نور عالم محسود کے گھر میں ہونے والے ہولناک دھماکے کے بعد خودکش حملہ آور کی شناخت ہو گئی ہے۔

پولیس ذرائع کے مطابق ابتدائی تحقیقات میں حملہ آور کی شناخت 21 سالہ عبدالرحمن کے نام سے ہوئی ہے جو افغانی شہری بتایا جا رہا ہے۔پولیس کے مطابق دھماکہ اس وقت ہوا جب گھر میں شادی کی تقریب جاری تھی۔ دھماکے کے نتیجے میں 5 افراد موقع پر ہی جاں بحق جبکہ متعدد افراد شدید زخمی ہو گئے۔ دھماکے کی شدت اتنی زیادہ تھی کہ گھر کا بڑا حصہ منہدم ہو گیا اور علاقے میں خوف و ہراس پھیل گیا۔پولیس حکام کا کہنا ہے کہ دھماکے کی نوعیت اور طریقہ کار کا تعین کیا جا رہا ہے جبکہ شواہد اکٹھے کر کے تحقیقات کا دائرہ وسیع کر دیا گیا ہے۔

ڈیرہ اسماعیل خان میں شادی کی ایک تقریب کے دوران خودکش دھماکہ ہوا، جس کے نتیجے میں 5 افراد موقع پر ہی جاں بحق جبکہ 10 سے زائد افراد شدید زخمی ہوگئے۔ زخمیوں کو فوری طور پر قریبی ہسپتال منتقل کیا گیا، جہاں بعض کی حالت تشویشناک بتائی جا رہی ہے۔

ڈیرہ اسماعیل خان میں قریشی موڑ کے قریب امن کمیٹی کے سربراہ نور عالم محسود کے گھر خودکش دھماکہہوا،جاں بحق ہونے والوں میں امن کمیٹی کے رکن وحید اللّٰہ محسود بھی شامل ہیں جبکہ نور عالم محسود دھماکے میں زخمی ہوئے ہیں،ڈسٹرکٹ پولیس آفیسر (ڈی پی او) نے خودکش دھماکے کی تصدیق کی اور بتایا کہ دھماکے بعد فائرنگ بھی ہوئی،پولیس حکام کے مطابق دھماکا امن کمیٹی کے سربراہ نور عالم محسود کے گھر پر شادی کی تقریب کے دوران ہوا۔

پولیس کے مطابق ابتدائی تحقیقات میں یہ بات سامنے آئی ہے کہ واقعہ بھتہ خوری سے جڑی ذاتی دشمنی کا شاخسانہ ہو سکتا ہے۔ پولیس حکام کا کہنا ہے کہ دھماکے کی نوعیت اور محرکات جانچنے کے لیے شواہد اکٹھے کیے جا رہے ہیں جبکہ فرانزک ٹیموں نے جائے وقوعہ سے شواہد قبضے میں لے لیے ہیں۔عینی شاہدین کے مطابق دھماکہ اتنا شدید تھا کہ شادی کی تقریب میں بھگدڑ مچ گئی ، مقامی افراد نے بتایا کہ دھماکے کے فوراً بعد امدادی کارروائیاں شروع کی گئیں اور علاقے کو سیکیورٹی فورسز نے گھیرے میں لے لیا۔ریسکیو ذرائع کے مطابق زخمیوں میں خواتین اور بچے بھی شامل ہیں، جنہیں طبی امداد فراہم کی جا رہی ہے۔ ہسپتال انتظامیہ نے ایمرجنسی نافذ کرتے ہوئے اضافی طبی عملہ طلب کر لیا ہے۔