Category: کوئٹہ

پشاور سے کوئٹہ جانے والی جعفر ایکسپریس کو سیکیورٹی خدشات کے پیشِ نظر سبی ریلوے اسٹیشن پر روک دیا گیا۔ ریلوے حکام کے مطابق ڈمبولی کے قریب ہونے والے دھماکے کے باعث ٹرین تقریباً چھ گھنٹے تاخیر سے سبی پہنچی، جہاں سیکیورٹی کلئیرنس نہ ملنے پر اسے مزید سفر سے روک دیا گیا۔

ذرائع کے مطابق، مسافروں کو صورتحال سے آگاہ کر دیا گیا ہے اور انہیں سبی سے کوئٹہ تک کے کرایہ کی واپسی کی سہولت بھی فراہم کی جا رہی ہے۔ ریلوے انتظامیہ کا کہنا ہے کہ متاثرہ مسافروں کو جمعہ کی صبح ایک متبادل ٹرین کے ذریعے کوئٹہ پہنچایا جائے گا۔

دوسری جانب، ریلوے حکام نے جمعہ کو چلنے والی کوئٹہ سے چمن جانے والی چمن ٹرین کو منسوخ کر دیا ہے۔ ریلوے ذرائع کے مطابق، اس فیصلے کا مقصد جعفر ایکسپریس کے متاثرہ مسافروں کو چمن ٹرین کے ڈبوں کے ذریعے سبی سے کوئٹہ منتقل کرنا ہے۔سیکیورٹی ادارے علاقے میں صورتحال کا جائزہ لے رہے ہیں اور ریلوے ٹریکس کی مکمل تفتیش کے بعد ہی ٹرین سروس بحال کی جائے گی۔ ڈمبولی میں ہونے والے دھماکے کی نوعیت اور اس کے محرکات کا پتہ لگانے کے لیے تحقیقات جاری ہیں۔

مسافروں نے ریلوے حکام سے مطالبہ کیا ہے کہ سیکیورٹی کے ساتھ ساتھ متبادل سفری سہولیات کی فراہمی کو فوری یقینی بنایا جائے تاکہ عوام کو مزید مشکلات کا سامنا نہ کرنا پڑے۔

کوئٹہ: وزیراعلیٰ بلوچستان میر سرفراز بگٹی نے کہا ہے کہ بلوچستان میں دہشتگرد ایک انچ زمین پر بھی دیرپا قبضہ کرنے کی کسی صورت کامیاب نہیں ہوں گے۔

انہوں نے یہ بات 16 ویں نیشنل ورکشاپ کے شرکاء سے ملاقات کے بعد گفتگو کرتے ہوئے کہی۔وزیراعلیٰ نے کہا کہ بلوچستان کے مسائل کو سمجھنے کے لیے ماضی کی حقائق جاننا بہت ضروری ہے، کیونکہ بلوچستان کے حوالے سے دیگر علاقوں میں جو تصورات عام ہیں وہ حقیقت کے منافی ہیں۔ انہوں نے واضح کیا کہ بلوچستان میں غیر متوازن ترقی یا بیروزگاری شورش کی اصل وجوہات نہیں ہیں بلکہ یہ مسائل زیادہ پیچیدہ اور تاریخی نوعیت کے ہیں۔سرفراز بگٹی نے کہا کہ حکومت سے نالاں نوجوانوں کے شکوے دور کر کے انہیں گلے لگایا جائے گا، مگر ریاست مخالف کارروائیاں کرنے والوں کے ساتھ آئین سے ہٹ کر کوئی بات ممکن نہیں۔ انہوں نے کہا کہ صوبے میں امن کے قیام کے لیے ایک جامع ایکشن پلان تشکیل دے دیا گیا ہے اور سکیورٹی فورسز گرے زونز میں موثر آپریشنز کر رہی ہیں۔ انہوں نے مزید کہا کہ دوست اور دشمن کی پہچان مشکل ہے لیکن بلوچستان میں دہشتگردوں کو زمین پر کوئی دیرپا قابض بننے نہیں دیا جائے گا۔

وزیراعلیٰ بلوچستان نے مزید کہا کہ لاپتہ افراد سے متعلق جامع قانون سازی کی جا چکی ہے تاکہ ایسے مسائل کا مؤثر حل ممکن ہو۔ انہوں نے خبردار کیا کہ بلوچ قوم کو لاحاصل جنگ کی طرف دھکیلنے کی کوشش کی جا رہی ہے جسے ہر صورت روکنا ہوگا۔انہوں نے کہا کہ حکومت گورننس اور سروس ڈلیوری کے نظام میں اصلاحات لا رہی ہے تاکہ عوام کو بہتر سہولیات فراہم کی جا سکیں۔ صحت اور تعلیم کے شعبوں میں 99 فیصد بھرتیاں میرٹ پر کی گئی ہیں اور طلبہ کو قومی و عالمی سطح پر اسکالرشپس دی جا رہی ہیں تاکہ نوجوانوں کا مستقبل روشن ہو۔

بلوچستان کے نواحی علاقے سنجدی ڈیگاری میں غیرت کے نام پر فائرنگ کے واقعے میں جاں بحق ہونے والے مرد اور عورت کی ابتدائی پوسٹ مارٹم رپورٹ سامنے آ گئی ہے، جس نے واقعے کی سنگینی کو مزید واضح کر دیا ہے۔

پولیس سرجن ڈاکٹر عائشہ فیض کے مطابق، دونوں مقتولین کا پوسٹ مارٹم ڈیگاری کول مائن کے قبرستان میں کیا گیا۔ ابتدائی میڈیکل رپورٹ کے مطابق خاتون کو 7 گولیاں اور مرد کو 9 گولیاں ماری گئیں، جو ان کی موت کا سبب بنیں۔ رپورٹ میں یہ بھی بتایا گیا کہ دونوں کو 4 جون 2025 کو قتل کیا گیا۔یہ اندوہناک واقعہ چند روز قبل سامنے آیا تھا جب غیرت کے نام پر قتل کی ایک ویڈیو سوشل میڈیا پر وائرل ہوئی، جس میں سنجدی ڈیگاری کے مقام پر ایک مرد اور عورت کو فائرنگ کر کے قتل کرتے ہوئے دکھایا گیا۔ ویڈیو کے وائرل ہونے کے بعد صوبے بھر میں عوامی غم و غصہ دیکھنے میں آیا۔

واقعے کا فوری نوٹس لیتے ہوئے وزیراعلیٰ بلوچستان میر سرفراز بگٹی نے کہا ہے کہ ریاست مظلوم کے ساتھ ہے اور تمام ملوث افراد کو قانون کے کٹہرے میں لایا جائے گا۔ ان کا کہنا تھا کہ واقعے میں ملوث عناصر کے خلاف آپریشن جاری ہے اور انہیں جلد گرفتار کر کے انصاف کے تقاضے پورے کیے جائیں گے۔پولیس حکام کے مطابق واقعے میں ملوث ملزمان کی شناخت کرلی گئی ہے اور گرفتاری کے لیے چھاپے مارے جا رہے ہیں۔ اعلیٰ پولیس افسران کی نگرانی میں جاری اس کارروائی میں حساس ادارے بھی معاونت فراہم کر رہے ہیں۔

دوسری جانب سول سوسائٹی، انسانی حقوق کی تنظیموں اور مقامی رہنماؤں نے واقعے کی شدید الفاظ میں مذمت کرتے ہوئے مطالبہ کیا ہے کہ غیرت کے نام پر قتل کے واقعات کے خلاف سخت قانون سازی کی جائے اور ایسے عناصر کو نشانِ عبرت بنایا جائے۔